Nōmipa

28 Naʻe hoko atu ʻa Sihova ʻo ne folofola kia Mōsese: 2 “Fai ha tuʻutuʻuni ki he kau ʻIsilelí pea tala kiate kinautolu, ‘ʻOku totonu ke mou tokanga ke ʻomai ʻa e feilaulau kiate aú, ʻa e maá. Ko e ngaahi feilaulau ʻoku fai ʻaki ʻa e afi kiate au ko ha ngangatu fakahōifuá* kuo pau ke fai ia ʻi honau ngaahi taimi kuo kotofá.’+

3 “Pea tala kiate kinautolu, ‘Ko e feilaulau eni ʻoku fai ʻaki ʻa e afi ʻa ia te mou ʻoatu kia Sihová: Ko e ongo lami tangata taʻemele taʻu taha ʻi he ʻaho ko ha feilaulau tutu tuʻumaʻu.+ 4 Ko e lami tangata ʻe taha te ke feilaulauʻi ia ʻi he pongipongí, pea ko e lami tangata ʻe tahá te ke feilaulauʻi ia ʻi he mamalu ʻa e poʻulí,*+ 5 fakataha mo ha vahe hongofulu ʻe taha ʻo ha efa* ʻo e mahoaʻa lelei kuo fio mo ha vahe fā ʻe taha ʻo ha hini* ʻo e lolo kuo tuki, ko ha feilaulau meʻakai.+ 6 Ko ha feilaulau tutu+ tuʻumaʻu ia, ʻa ia naʻe fokotuʻu ʻi Moʻunga Sainai ko ha ngangatu fakahōifua,* ko ha feilaulau ʻoku fai ʻaki ʻa e afi kia Sihova, 7 fakataha mo hono feilaulau inú, ko ha vahe fā ʻe taha ʻo ha hini ki he lami tangata+ taki taha. Te ke lilingi ʻa e inu ʻolokaholó ʻi he potu toputapú ko ha feilaulau inu kia Sihova. 8 Pea te ke feilaulauʻi ʻa e lami tangata ʻe tahá ʻi he mamalu ʻa e poʻulí.* Te ke ʻoatu ia fakataha mo e feilaulau meʻakai tatau ʻo hangē ko ia naʻe fai ʻi he pongipongí pea mo hono feilaulau inu tatau ko ha feilaulau ʻoku fai ʻaki ʻa e afi ko ha ngangatu fakahōifua* kia Sihova.+

9 “‘Kae kehe, ʻi he ʻaho Sāpaté,+ ko e feilaulaú ʻoku totonu ko e ongo lami tangata taʻemele taʻu taha mo e vahe hongofulu ʻe ua ʻo ha fua efa ʻo e mahoaʻa lelei kuo fio mo e lolo, ko ha feilaulau meʻakai, fakataha mo hono feilaulau inú. 10 Ko e feilaulau tutu eni ki he Sāpaté, fakataha mo e feilaulau tutu tuʻumaʻú mo hono feilaulau inú.+

11 “‘ʻI he kamata ʻa e māhina* taki taha te mou ʻoatu ai ko ha feilaulau tutu kia Sihova ʻa e kiʻi pulu tangata ʻe ua, sipi tangata ʻe taha, mo e lami tangata taʻemele ʻe fitu taki taʻu taha,+ 12 pea mo e fua ko e vahe hongofulu ʻe tolu ʻo e mahoaʻa lelei kuo fio mo e lolo ko ha feilaulau meʻakai+ ki he pulu tangata taki taha mo e fua ko e vahe hongofulu ʻe ua ʻo e mahoaʻa lelei kuo fio mo e lolo ko ha feilaulau meʻakai ki he sipi tangata ʻe tahá,+ 13 mo ha fua ko e vahe hongofulu ʻe taha ʻo e mahoaʻa lelei kuo fio mo e lolo ko ha feilaulau meʻakai ki he lami tangata taki taha, ko ha feilaulau tutu, ko ha ngangatu fakahōifua,*+ ko ha feilaulau ʻoku fai ʻaki ʻa e afi kia Sihova. 14 Pea ko honau ngaahi feilaulau inú ʻoku totonu ko ha vaeuaʻi hini ʻo e uaine ki he pulu tangata+ ʻe taha mo ha vahe tolu ʻe taha ʻo ha hini ki he sipi tangatá+ pea mo ha vahe fā ʻe taha ʻo ha hini ki he lami tangata+ ʻe taha. Ko e feilaulau tutu fakamāhina eni ʻi he māhina taki taha ʻo e taʻú kotoa. 15 Pehē foki, ʻoku totonu ke ʻoatu ʻa e kosi mui ʻe taha ko ha feilaulau angahala kia Sihova ʻo tānaki atu ki he feilaulau tutu tuʻumaʻú fakataha mo hono feilaulau inú.

16 “‘ʻI he ʻuluaki māhiná, ʻi he ʻaho hono 14 ʻo e māhiná, ko e Pāsova+ ia ʻa Sihová. 17 Pea ʻi he ʻaho hono 15 ʻo e māhina ko ení ʻe fai ai ha kātoanga. ʻE kai ai ʻi he ʻaho ʻe fitu+ ʻa e mā taʻelēvaní. 18 ʻI he ʻuluaki ʻahó ʻe ʻi ai ha fakataha-lahi toputapu. Kuo pau ke ʻoua naʻa mou fai ai ha ngāue mamafa ʻe taha. 19 Pea te mou ʻoatu ko ha feilaulau tutu ʻoku fai ʻaki ʻa e afi kia Sihova ha kiʻi pulu tangata ʻe ua, ko e sipi tangata ʻe taha, pea mo e lami tangata ʻe fitu taki taʻu taha. ʻOku totonu ke mou ʻoatu ʻa e fanga manu taʻemele.+ 20 ʻOku totonu ke mou ʻoatu kinautolu fakataha mo honau ngaahi feilaulau meʻakaí ko e mahoaʻa lelei kuo fio mo e lolo,+ ʻa ia ko e fuá ko e vahe hongofulu ʻe tolu ki he pulu tangata ʻe taha mo e fua ko e vahe hongofulu ʻe ua ki he sipi tangatá. 21 Te ke ʻoatu ha fua ko e vahe hongofulu ʻe taha ki he lami tangata taki taha ʻi he lami tangata ʻe fitú, 22 pea pehē ki he kosi ʻe taha ko ha feilaulau angahala ke faiʻaki ha feilaulau ʻufiʻufi angahala maʻamoutolu. 23 Te mou ʻoatu ʻa e ngaahi meʻá ni tuku kehe ʻa e feilaulau tutu ʻi he pongipongí, ʻa ia ʻoku maʻá e feilaulau tutu tuʻumaʻú. 24 Te mou ʻoatu ʻa e ngaahi meʻá ni ʻi he founga tatau ʻi he ʻaho taki taha ʻi he ʻaho ʻe fitu ko ha meʻakai,* ko ha feilaulau ʻoku fai ʻaki ʻa e afi ko ha ngangatu fakahōifua* kia Sihova. ʻOku totonu ke ʻoatu ia fakataha mo e feilaulau tutu tuʻumaʻú mo hono feilaulau inú. 25 ʻI he ʻaho hono fitú ʻoku totonu ke mou fai ai ha fakataha-lahi toputapu.+ Kuo pau ke ʻoua naʻa mou fai ai ha ngāue mamafa+ ʻe taha.

26 “‘ʻI he ʻaho ʻo e ʻuluaki fua kuo motuʻá,+ ʻi hoʻomou ʻoatu ha feilaulau meʻakai foʻou kia Sihová,+ ʻoku totonu ke mou fai ai ha fakataha-lahi toputapu ʻi hoʻomou kātoanga ʻo e ngaahi uiké.+ Kuo pau ke ʻoua naʻa mou fai ai ha ngāue mamafa+ ʻe taha. 27 Te mou ʻoatu ko ha feilaulau tutu ki ha ngangatu fakahōifua* kia Sihova ha kiʻi pulu tangata ʻe ua, sipi tangata ʻe taha, mo e lami tangata ʻe fitu taki taʻu taha,+ 28 pea ko honau feilaulau meʻakaí ko e mahoaʻa lelei kuo fio mo e lolo, ʻa ia ko e fuá ko e vahe hongofulu ʻe tolu ki he pulu tangata taki taha, mo e fua ko e vahe hongofulu ʻe ua ki he sipi tangata ʻe tahá, 29 pea mo ha fua ko e vahe hongofulu ʻe taha ki he lami tangata taki taha ʻi he lami tangata ʻe fitú, 30 pea pehē ki he kosi mui ʻe taha ke faiʻaki ha feilaulau ʻufiʻufi angahala maʻamoutolu.+ 31 Te mou ʻoatu kinautolu ʻo tānaki atu ki he feilaulau tutu tuʻumaʻú mo hono feilaulau meʻakaí. ʻOku totonu ko e fanga manu taʻemele+ ia, fakataha mo honau ngaahi feilaulau inú.