Nōmipa

31 Naʻe folofola leva ʻa Sihova kia Mōsese: 2 “Ke ke fai ha sāuni+ ki he kau Mitianí+ maʻá e kau ʻIsilelí. ʻI he hili iá, ʻe fakatahaʻi koe ki ho kakaí.”*+

3 Ko ia naʻe lea ʻa Mōsese ki he kakaí, ʻo pehē: “Teuʻi ha kau tangata mei homou lotolotongá ke faitau mo Mitiani pea ke nau fakahoko ʻa e sāuni ʻa Sihova ki Mitianí. 4 ʻOku totonu ke mou tuku atu ʻa e toko 1,000 mei he matakali taki taha ʻo e ngaahi matakali kotoa ʻo ʻIsilelí ki he taú.” 5 Ko ia mei he laui afe ʻo ʻIsilelí,+ naʻe vaheʻi ʻa e toko 1,000 mei he matakali taki taha, ko e toko 12,000 kuo teuʻi ki he taú.

6 Ko ia naʻe tuku atu kinautolu ʻe Mōsese, ko e toko 1,000 mei he matakali taki taha ki he taú, fakataha mo Fineasi+ ko e foha ʻo ʻEliesá ko e taulaʻeiki ia ki he kau taú, ʻa ia naʻá ne toʻo ʻa e ngaahi naunau toputapú mo e ongo talupite+ fakatokangá. 7 Naʻa nau faitau mo Mitiani, ʻo hangē tofu pē ko e tuʻutuʻuni ʻa Sihova kia Mōsesé, pea naʻa nau tāmateʻi ʻa e kakai tangata kotoa pē. 8 Fakataha mo e niʻihi kehe naʻe tāmateʻí, naʻa nau tāmateʻi ʻa e ngaahi tuʻi ʻo Mitianí, ʻa ia ko ʻEvi, Lēkemi, Siuli, Hua, pea mo Lepa, ʻa e ngaahi tuʻi ʻe toko nima ʻo Mitianí. Naʻa nau tāmateʻi foki mo Pēlami+ ko e foha ʻo Pioá ʻaki ʻa e heletaá. 9 Ka naʻe ʻave pōpula ʻe he kau ʻIsilelí ʻa e kakai fefine mo e fānau ʻa Mitianí. Naʻa nau faʻao fakamālohi foki ʻa ʻenau fanga pulú kotoa, mo ʻenau fanga sipí kotoa, pea mo ʻenau ngaahi koloá kotoa. 10 Pea naʻa nau tutu honau ngaahi kolo kotoa ʻa ia naʻa nau nofo aí pea mo honau ngaahi ʻapitangá* kotoa ʻaki ʻa e afi. 11 Pea naʻa nau toʻo ʻa e koloa veté* kotoa mo e koloa naʻe faʻao fakamālohí kotoa, fakatouʻosi ʻa e tangata mo e manu. 12 Naʻa nau ʻomi leva ʻa e kau pōpulá, ko e koloa naʻe faʻao fakamālohí, mo e koloa veté kia Mōsese mo ʻEliesa ko e taulaʻeikí pea ki he fuʻu fakataha ʻo e kau ʻIsilelí, ki he ʻapitanga ʻi he toafa ʻo Mōapé+ ofi ki Sioatani, pea ofi ki Sielikō.

13 Naʻe ʻalu atu leva ʻa Mōsese mo ʻEliesa ko e taulaʻeikí pea mo e ngaahi ʻeiki kotoa ʻo e fuʻu fakatahá ke fakafetaulaki kiate kinautolu ʻi he tuʻa ʻapitangá. 14 Ka naʻe hoko ʻo ʻita ʻa Mōsese ʻi he kau tangata kuo fakanofo ke nau pule ki he ngaahi kongakaú, ʻa e ngaahi ʻeiki ʻo e ngaahi toko afé pea mo e ngaahi ʻeiki ʻo e ngaahi toko teaú ʻa ia naʻa nau omi mei he taú. 15 Naʻe pehē ange ʻe Mōsese kiate kinautolu: “Kuo mou fakahaofi moʻui koā ʻa e kakai fefiné kotoa? 16 Vakai! Ko kinautolu ia ʻa e faʻahinga ʻa ia ʻi he lea ʻa Pēlamí naʻa nau fakaʻaiʻai ai ʻa e kau ʻIsilelí ke nau taʻefaitōnunga+ kia Sihova ʻi he meʻa fekauʻaki mo Peolí,+ ko ia naʻe hoko mai ai ʻa e malá ki he fuʻu fakataha ʻa Sihová.+ 17 Pea ko eni ʻoku totonu ke mou tāmateʻi ʻa e tamaiki tangata kotoa pē ʻi he fānaú pea tāmateʻi ʻa e fefine kotoa pē kuo mohe* mo ha tangata. 18 Ka te mou fakahaofi moʻui ʻa e finemui kotoa pē kuo ʻikai ke mohe mo ha tangata.+ 19 Pea ʻoku totonu ke mou ʻapitanga ʻi he tuʻa ʻapitangá ʻo ʻaho fitu. Ko e tokotaha kotoa pē ʻiate kimoutolu kuó ne tāmateʻi ha taha mo e tokotaha kotoa pē ʻiate kimoutolu kuó ne ala ki ha taha naʻe tāmateʻi,+ ʻoku totonu ke ne fakamaʻa ia+ ʻi he ʻaho hono tolú pea ʻi he ʻaho hono fitú, ʻa kimoutolu mo hoʻomou kau pōpulá. 20 Pea ʻoku totonu ke mou fakamaʻa mei he angahalá ʻa e kofu kotoa pē, ko e meʻa kotoa pē kuo ngaohi mei he kiliʻimanú, ko e meʻa kotoa pē kuo ngaohi mei he fulufuluʻikosí, pea mo e meʻa kotoa pē kuo ngaohi mei he ʻakaú.”

21 Naʻe pehē ange leva ʻe ʻEliesa ko e taulaʻeikí ki he kau tangata ʻi he kau taú ʻa ia naʻa nau ʻalu atu ʻi he taú: “Ko e lao eni ʻa ia kuo tuʻutuʻuni ʻe Sihova kia Mōsesé, 22 ‘Ko e koulá pē, mo e silivá, mo e kopá, mo e ukameá, mo e kapá, pea mo e pulú, 23 ʻa e meʻa kotoa pē ʻe lava ke ne matuʻuaki ʻa e afí, ʻoku totonu ke mou ʻai ia ki he afí, pea ʻe maʻa ia. Kae kehe, ʻoku totonu foki ke toe fakamaʻa ʻaki ia ʻa e vai ki he fakamaʻá.+ Ko e meʻa kotoa pē ʻe ʻikai lava ke ne matuʻuaki ʻa e afí, ʻoku totonu ke mou ʻai ia ki he vaí. 24 Pea ʻoku totonu ke mou fō homou ngaahi kofú ʻi he ʻaho hono fitú pea mou hoko ai ʻo maʻa, pea ʻe lava leva ke mou hū mai ki he ʻapitangá.’”+

25 Naʻe folofola leva ʻa Sihova kia Mōsese ʻo peheni: 26 “Ke ke ʻai ha lisi ʻo e koloa naʻe faʻao fakamālohí, ʻo lau ʻa e kau pōpulá, fakatouʻosi ʻa e tangata mo e manu; te ke fai eni fakataha mo ʻEliesa ko e taulaʻeikí pea mo e ngaahi ʻulumotuʻa ʻo e ngaahi fale ʻo e ngaahi tamai ʻo e fuʻu fakatahá. 27 Vaheʻi ʻa e koloa naʻe faʻao fakamālohí ki he konga ʻe ua ke vahe ia ʻi he faʻahinga ʻi he kau taú naʻa nau kau ʻi he taú pea mo e toenga kotoa ʻo e fuʻu fakatahá.+ 28 ʻOku totonu ke ke toʻo mei he kau sōtia naʻa nau ʻalu atu ʻi he taú ke hoko ko ha tukuhau maʻa Sihova ʻa e toko taha mei he toko 500 kotoa pē, ʻi he kakaí, ʻi he fanga pulú, fanga ʻasí, pea mo e fanga sipí. 29 ʻOku totonu ke mou toʻo ia mei he vaeua ʻanautolú pea ʻoange ia kia ʻEliesa ko e taulaʻeikí ko ha meʻaʻofa kia Sihova.+ 30 ʻOku totonu ke ke toʻo mei he vaeua naʻe ʻoange ki he kau ʻIsilelí ʻa e toko taha mei he toko 50, ʻi he kakaí, ʻi he fanga pulú, ʻi he fanga ʻasí, ʻi he fanga sipí, pea mo e faʻahinga kotoa pē ʻo e manu lalatá, pea ʻoange kinautolu ki he kau Līvaí,+ ʻa ia ʻoku nau tokangaʻi ʻa e ngaahi fatongia ʻoku felāveʻi mo e tāpanekale ʻo Sihová.”+

31 Ko ia naʻe fai ʻe Mōsese mo ʻEliesa ko e taulaʻeikí ʻo hangē tofu pē ko e tuʻutuʻuni ʻa Sihova kia Mōsesé. 32 Ko e ngaahi koloa veté, ʻa e toenga ʻo e koloa faʻao fakamālohi ʻa ia naʻe toʻo ʻe he kakai naʻe ō ʻi he taú, naʻe feʻunga mo e fanga sipi ʻe 675,000, 33 fanga pulu ʻe 72,000, 34 pea mo e fanga ʻasi ʻe 61,000. 35 Ko e kakai fefine ʻa ia naʻe ʻikai te nau mohe mo ha tangatá+ naʻe feʻunga mo e kakai fefine ʻe toko 32,000. 36 Ko e vaeua ʻa ia ko e ʻinasi ia ʻo e faʻahinga naʻe ʻalu atu ʻi he taú naʻe feʻunga ia mo e fanga sipi ʻe 337,500. 37 Ko e tukuhau maʻa Sihova mei he fanga sipí naʻe feʻunga mo e 675. 38 Pea naʻe 36,000 ʻa e fanga pulú, pea ko e tukuhau ai maʻa Sihová ko e 72. 39 Pea naʻe 30,500 ʻa e fanga ʻasí, pea ko e tukuhau ai maʻa Sihová ko e 61. 40 Pea naʻe toko 16,000 ʻa e kakaí, pea ko e tukuhau ai maʻa Sihová ko e toko 32. 41 Naʻe ʻoatu leva ʻe Mōsese ʻa e tukuhau ko e meʻaʻofa kia Sihová kia ʻEliesa ko e taulaʻeikí,+ ʻo hangē tofu pē ko e tuʻutuʻuni ʻa Sihova kia Mōsesé.

42 Mei he vaeua ʻa e kau ʻIsilelí, ʻa ia naʻe vaheʻi ʻe Mōsese mei he ʻinasi ʻo e kau tangata naʻe kau ʻi he taú, 43 ko e vaeua ko ia ʻo e fanga sipí naʻe feʻunga mo e 337,500, 44 pea ko e fanga pulú ko e 36,000, 45 pea ko e fanga ʻasí ko e 30,500, 46 pea ko e kakaí ko e toko 16,000. 47 Naʻe toʻo leva ʻe Mōsese mei he vaeua ʻa e kau ʻIsilelí ʻa e toko taha mei he toko 50, ʻi he kakaí mo e fanga manú, pea ʻoange kinautolu ki he kau Līvaí,+ ʻa ia naʻa nau tokangaʻi ʻa e fatongia ʻi he tāpanekale ʻo Sihová,+ ʻo hangē tofu pē ko e tuʻutuʻuni ʻa Sihova kia Mōsesé.

48 Ko e kau tangata leva ʻo e kau tau ʻe laui afe naʻe fakanofó,+ ʻa e ngaahi ʻeiki ʻo e ngaahi toko afé mo e ngaahi ʻeiki ʻo e ngaahi toko teaú, naʻa nau ʻunuʻunu mai kia Mōsese, 49 pea nau pehē kia Mōsese: “Ko hoʻo kau sevānití kuo nau lau ʻa e kau tangata tau ʻoku nau ʻi he malumalu ʻo ʻemau tuʻutuʻuní, pea kuo ʻikai ha taha kuo fakahaaʻi mai kuo puli meiate kimautolu.+ 50 Ko ia tuku ke mau taki taha foaki ʻa e meʻa kuó ne maʻú ko ha feilaulau kia Sihova, ʻa e ngaahi meʻa koula, ngaahi sēini vaʻe, ngaahi vesa, ngaahi mama sila, ngaahi hau, mo e meʻa-teuteu kehe, koeʻuhí ke faiʻaki ha ʻufiʻufi angahala maʻamautolu ʻi he ʻao ʻo Sihová.”

51 Ko ia naʻe tali ʻe Mōsese mo ʻEliesa ko e taulaʻeikí ʻa e koulá meiate kinautolu, ʻa ia ko e meʻa-teuteú kotoa. 52 Ko e koula kotoa ʻo e meʻaʻofa naʻa nau foaki kia Sihová naʻe feʻunga mo e sikeli* ʻe 16,750, mei he ngaahi ʻeiki ʻo e ngaahi toko afé mo e ngaahi ʻeiki ʻo e ngaahi toko teaú. 53 Ko e kau tangata ʻi he kau taú naʻa nau taki taha toʻo maʻana ha koloa faʻao fakamālohi. 54 Naʻe tali ʻe Mōsese mo ʻEliesa ko e taulaʻeikí ʻa e koulá mei he ngaahi ʻeiki ʻo e ngaahi toko afé mo e ngaahi toko teaú pea fakahū ia ki he tēniti feʻiloakiʻangá ko ha fakamanatu maʻá e kakai ʻo ʻIsilelí ʻi he ʻao ʻo Sihová.