Fakamaau

20 Ko ia ai, naʻe haʻu ʻa e kau ʻIsilelí kotoa mei Tani+ ʻo aʻu ki Pea-sipa pea mei he fonua ko Kiliatí,+ pea naʻe fakatahataha fāʻūtaha mai* ʻa e fuʻu fakatahá fakakātoa ki he ʻao ʻo Sihová ʻi Misipā.+ 2 Ko ia ko e ngaahi ʻeiki ʻo e kakaí mo e ngaahi matakali kotoa ʻo ʻIsilelí naʻa nau tuʻu ʻi honau tuʻuʻangá ʻi he fakatahaʻanga ʻo e kakai ʻa e ʻOtuá—ko e kau sōtia ʻalu lalo ʻe toko 400,000 naʻe toʻo heletā.+

3 Naʻe fanongo ʻa e haʻa Penisimaní naʻe ʻalu hake ʻa e kau tangata ʻo ʻIsilelí ki Misipā.

Pea naʻe pehē ʻe he kau tangata ʻo ʻIsilelí: “Tala mai angé, naʻe anga-fēfē ʻa e hoko ʻa e meʻa fakalilifu ko ení?”+ 4 ʻI he meʻá ni ko e tangata Līvaí,+ ʻa e husepāniti ʻo e fefine naʻe fakapōngí, naʻá ne tali ange ʻo pehē: “Naʻá ku ʻalu ki Kīpea+ ʻo Penisimaní mo ʻeku sinifú ke mohe ai. 5 Pea ko e kakai* ʻo Kīpeá naʻa nau tuʻu hake kiate au pea nau takatakaiʻi ʻa e falé ʻi he poʻulí. Ko ʻenau ʻuhingá ke tāmateʻi au, ka ʻi hono kehé naʻa nau tohotohoʻi ʻa ʻeku sinifú, peá ne mate.+ 6 Ko ia naʻá ku ʻave ai ʻa e sino ʻo ʻeku sinifú ʻo tuʻutuʻu pea ʻave ʻa e ngaahi kongokongá ki he feituʻu kotoa ʻo e tofiʻa ʻo ʻIsilelí,+ koeʻuhí kuo nau fai ha tōʻonga fakamā mo ngali vale ʻi ʻIsileli. 7 Ko eni ʻa kimoutolu ʻa e kakai kotoa ʻo ʻIsilelí, fai mai haʻamou faleʻi mo ha fakahinohino+ ʻi he meʻá ni.”

8 Pea ko e kakaí kotoa naʻa nau tuʻu fakataha hake* ʻo nau pehē: “ʻE ʻikai ʻalu ha taha ʻo kimautolu ki hono tēnití pe foki ki hono falé. 9 Pea ko e meʻa eni te mau fai ki Kīpeá: Te mau fai ha lulu+ pea ʻalu hake ki ai. 10 Te mau toʻo ʻa e kau tangata ʻe toko 10 mei he toko 100 ʻi he ngaahi matakali kotoa ʻo ʻIsilelí, mo e toko 100 mei he toko 1,000 pea mo e toko 1,000 mei he toko 10,000 ke tānaki mai ha meʻakai ki he kau taú, koeʻuhí ke nau lava ʻo fai ha meʻa ki Kīpea ʻo Penisimaní, ʻi he vakai atu ki he tōʻonga fakamā naʻa nau fai ʻi ʻIsilelí.” 11 Ko ia naʻe fakatahataha mai ʻa e kau tangata kotoa ʻo ʻIsilelí ʻo nau kau fakataha* ke faitau mo e koló.

12 Naʻe fekau atu leva ʻe he ngaahi matakali ʻo ʻIsilelí ha kau tangata ki he kau tangata kotoa ʻi he matakali ʻo Penisimaní, ʻo nau pehē: “Ko e hā ʻa e meʻa fakalilifu ko eni kuo hoko ʻi homou lotolotongá? 13 Ko ia tuku mai ʻa e kau tangata ko e koto taʻeʻaonga ko ia mei Kīpeá,+ koeʻuhí ke mau tāmateʻi kinautolu pea fakamaʻa ai ʻa e koví ni mei ʻIsileli.”+ Ka naʻe fakafisi ʻa e haʻa Penisimaní ke fanongo ki honau fanga tokoua ʻIsilelí.

14 Naʻe fakatahataha mai leva ʻa e haʻa Penisimaní mei he ngaahi koló ki Kīpea ke nau ʻalu ʻo tau mo e kau tangata ʻo ʻIsilelí. 15 ʻI he ʻaho ko iá naʻe ui mai ʻe he haʻa Penisimaní mei honau ngaahi koló ʻa e kau tangata toʻo heletā ʻe toko 26,000, tuku kehe ʻa e kau tangata ʻe toko 700 kuo fili mei Kīpeá. 16 Naʻe ʻi he kau tau ko ení ha kau tangata ʻe toko 700 kuo fili ʻa ia naʻa nau hema. Ko e tokotaha taki taha ʻi he kau tangatá ni naʻe lava ke ne makataaʻi naʻa mo ha manifi ʻo ha fulufuluʻiʻulu ʻo ʻikai hala.

17 Naʻe ui mai ʻe he kau tangata ʻo ʻIsilelí ha kau tangata toʻo heletā+ ʻe toko 400,000, tuku kehe ʻa Penisimani, pea ko e tangata taki taha ko ha pāteʻi tau. 18 Naʻa nau tuʻu hake ʻo ʻalu ki Pēteli ke kumi ki he tataki ʻa e ʻOtuá.+ Pea naʻe pehē ʻe he kakai ʻo ʻIsilelí: “Ko hai ʻiate kimautolu ʻe ʻalu hake ʻo takimuʻa ʻi he tau mo e haʻa Penisimaní?” Naʻe tali ange ʻe Sihova: “Ko Siuta ʻe takimuʻá.”

19 ʻI he hili iá, naʻe tuʻu pongipongi hake ʻa e kau ʻIsilelí ke nau tauʻi ʻa Kīpea.

20 Naʻe ʻalu atu leva ʻa e kau tangata ʻo ʻIsilelí ke tau mo Penisimani; naʻa nau teuteu ke tau mo kinautolu ʻi Kīpea. 21 Ko ia naʻe hū ki tuʻa mei Kīpea ʻa e haʻa Penisimaní ʻo nau taaʻi ʻa e kau tangata ʻe toko 22,000 ʻo ʻIsileli ʻi he ʻaho ko iá. 22 Kae kehe, naʻe fakahāhā ʻe he kau tangata tau ʻo ʻIsilelí ʻa e loto-toʻa ʻo nau toe teuteu tau ʻi he feituʻu tatau pē ko ia ne nau ʻi ai ʻi he ʻuluaki ʻahó. 23 Naʻe ʻalu hake leva ʻa e kau ʻIsilelí ʻo tangi ʻi he ʻao ʻo Sihová ʻo aʻu ki he efiafi pea naʻa nau ʻeke kia Sihova: “Te mau toe ʻalu ke tauʻi ʻa homau fanga tokouá, ʻa e kakai ʻo Penisimaní?”+ ʻI he meʻá ni naʻe folofola ange ai ʻa Sihova: “ʻAlu atu ʻo tauʻi kinautolu.”

24 Ko ia naʻe fakaofiofi atu ai ʻa e kau ʻIsilelí ki he haʻa Penisimaní ʻi he ʻaho hono uá. 25 Ko ia naʻe hū ki tuʻa ʻa Penisimani mei Kīpea ke fakafetaulaki kiate kinautolu ʻi he ʻaho hono uá pea naʻa nau taaʻi ha toe kau ʻIsileli+ ʻe toko 18,000, ʻa ia ko kinautolú kotoa naʻa nau toʻo heletā. 26 Ko ia naʻe ʻalu hake ai ʻa e kau tangata kotoa ʻo ʻIsilelí ki Pēteli. Naʻa nau tangi pea nau tangutu ai ʻi he ʻao ʻo Sihová,+ pea nau ʻaukai+ ʻi he ʻaho ko iá ʻo aʻu ki he efiafi pea ʻohake ha ngaahi feilaulau tutu+ mo e ngaahi feilaulau feʻinasiʻaki+ ʻi he ʻao ʻo Sihová. 27 ʻI he hili iá, naʻe kumi ʻa e kau tangata ʻo ʻIsilelí ki ha tataki meia Sihova,+ he ko e ʻaʻake ʻo e fuakava ʻa e ʻOtua moʻoní naʻe ʻi ai ʻi he ngaahi ʻaho ko iá. 28 Pea ko Fineasi+ ko e foha ʻo ʻEliesa, ko e foha ʻo ʻĒloné, naʻá ne fakahoko fatongia* ʻi muʻa ʻi he ʻaʻaké ʻi he ngaahi ʻaho ko iá. Naʻa nau ʻeke: “Te mau toe ʻalu atu ke tauʻi ʻa homau fanga tokouá, ʻa e kau tangata Penisimaní, pe ʻe tuku?”+ Naʻe tali ange ʻe Sihova: “ʻAlu atu, koeʻuhi ko ʻapongipongí te u tuku atu ai kinautolu ki ho nimá.” 29 Naʻe fakatoka leva ʻe ʻIsileli ʻa e kau tangata ke nau malumu+ takatakai ʻi Kīpea kotoa.

30 Naʻe ʻalu hake ʻa e kau ʻIsilelí ke tauʻi ʻa e haʻa Penisimaní ʻi he ʻaho hono tolú, pea naʻa nau teuteu ke tauʻi ʻa Kīpea ʻo hangē pē ko e ongo taimi ko eé.+ 31 ʻI he taimi naʻe ʻalu atu ai ʻa e haʻa Penisimaní ke fakafetaulaki ki he kau taú, naʻe tohoakiʻi kinautolu ʻo mamaʻo mei he koló.+ Pea hangē pē ko ia ʻi he ongo taimi ko eé, naʻa nau kamata ke ʻohofi ʻo tāmateʻi ha niʻihi ʻo e kau tangatá ʻi he ngaahi hala lahí, ko e taha ai ʻoku ʻalu hake ki Pēteli pea ko e taha ki Kīpea, ʻo mate ai ha kau tangata ʻIsileli nai ʻe toko 30 ʻi he manafá.+ 32 Ko ia naʻe pehē ai ʻe he haʻa Penisimaní: “ʻOku nau foʻi ʻi hotau ʻaó ʻo hangē pē ko ia ki muʻá.”+ Ka naʻe pehē ʻe he kau ʻIsilelí: “Te tau holomui ʻo tohoakiʻi kinautolu ke nau mamaʻo mei he koló ʻo taki ki he ngaahi hala lahí.” 33 Ko ia naʻe tuʻu hake ʻa e kau tangata kotoa ʻo ʻIsilelí mei honau ngaahi feituʻú pea nau teuteu ki he tau ʻi Pēali-tama lolotonga ia ko e kau ʻIsileli naʻe malumú naʻa nau ʻoho atu mei honau ngaahi toitoiʻangá ʻi he ngaahi feituʻu ofi ki Kīpeá. 34 Ko ia naʻe haʻu ʻi muʻa ʻi Kīpea ʻa e kau tangata ʻe toko 10,000 kuo fili mei he kotoa ʻo ʻIsilelí, pea naʻe fakamanavahē ʻa e taú. Ka naʻe ʻikai ʻiloʻi ʻe he haʻa Penisimaní naʻe tuʻunuku mai ha fakatamaki.

35 Naʻe ikunaʻi ʻe Sihova ʻa Penisimani+ ʻi he ʻao ʻo ʻIsilelí, pea ʻi he ʻaho ko iá naʻe taaʻi ai ʻe he kau ʻIsilelí ʻa e kau tangata ʻe toko 25,100 ʻi Penisimani, ko kinautolú kotoa naʻa nau toʻo heletā.+

36 Kae kehe, naʻe fakakaukau ʻa e haʻa Penisimaní ʻe ikunaʻi ʻa e kau tangata ʻo ʻIsilelí ʻi heʻenau holomui mei Penisimaní,+ ka naʻa nau holomuí koeʻuhí naʻa nau falala ki he malumu naʻe fai ki Kīpeá.+ 37 Naʻe ngāue fakavave ʻa e kau malumú ʻo nau ʻoho atu ki Kīpea. Pea naʻe mafola atu ʻa e malumú ʻo nau taaʻi ʻa e koló kotoa ʻaki ʻa e heletaá.

38 Pea ko e kau tangata ʻo ʻIsilelí naʻa nau fokotuʻutuʻu ki he kau tangata naʻa nau malumu ʻi he koló ke nau ʻai ke ʻalu hake mei ai ha kohu ko ha fakaʻilonga.

39 ʻI he holomui ʻa e kau ʻIsilelí mei he taú, naʻe kamata ʻohofi ai ʻe he kau tangata Penisimaní ʻo tāmateʻi ha kau tangata ʻIsileli+ nai ʻe toko 30, pea naʻa nau pehē: “ʻOku hā mahino ʻoku nau toe foʻi ʻi hotau ʻaó, ʻo hangē pē ko ia ʻi he tau ki muʻá.”+ 40 Ka naʻe kamata ke ʻalu hake ʻa e kohu matolu mei he koló ko ha fakaʻilonga. ʻI he hanga hake ʻa e kau tangata Penisimaní, naʻa nau sio atu ki he puho hake ki he ʻataá ʻa e koló kotoa. 41 Naʻe maliu ai ʻo foki mai ʻa e kau tangata ʻo ʻIsilelí, pea naʻe manavasiʻi ʻa e kau tangata Penisimaní, he naʻa nau vakai kuo maʻu kinautolu ʻe he fakatamakí. 42 Ko ia naʻa nau holomui mei he kau tangata ʻo ʻIsilelí ki he toafá, ka naʻe maʻu kinautolu ʻe he taú; ko e kau tangata naʻa nau hū mai mei he ngaahi koló naʻa nau kau ʻi hono taaʻi kinautolú. 43 Naʻa nau takatakaiʻi ʻa e haʻa Penisimaní pea nau tuli taʻemālōlō kinautolu. Naʻa nau tāmalaki kinautolu ʻi muʻa tonu ʻi Kīpea ki he tafaʻaki fakahahaké. 44 Naʻe faifai pē ʻo tō ʻa e kau tangata Penisimani ʻe toko 18,000, ko e kau toʻa kotoa ʻi he taú.+

45 Naʻe tafoki ʻa e kau tangata Penisimaní ʻo hola ki he toafá ki he fuʻu maka ko Līmoní,+ pea naʻe tāmateʻi ʻe he kau ʻIsilelí* ʻa honau toko 5,000 ʻi he ngaahi hala lahí, pea naʻa nau hanganaki tuli kinautolu ʻo aʻu ki Kītomi; ko ia naʻa nau taaʻi ai ha toe kau tangata ʻe toko 2,000. 46 Ko e faʻahinga kotoa ko ia ʻo Penisimani naʻe tō ʻi he ʻaho ko iá naʻe feʻunga mo e kau tangata ʻe toko 25,000 naʻa nau toʻo heletā,+ ko e kau toʻa kotoa ʻi he taú. 47 Ka naʻe holomui ʻa e toko 600 ki he toafá ki he fuʻu maka ko Līmoní, pea naʻa nau nofo ʻi he fuʻu maka ko Līmoní ʻi he māhina ʻe fā.

48 Pea naʻe toe foki ʻa e kau tangata ʻo ʻIsilelí ki he haʻa Penisimaní ʻo taaʻi ʻa e faʻahinga ko ia ʻo e koló ʻaki ʻa e heletaá, mei he tangatá ki he fanga manú, ʻa ia kotoa naʻe toé. Pehē foki, naʻa nau tutu ʻa e ngaahi kolo kotoa naʻa nau ʻalu atu aí.