Nōmipa

16 Naʻe tuʻu hake leva ʻa Kola+ ko e foha ʻo ʻIsaʻā,+ ko e foha ʻo Kōhate,+ ko e foha ʻo Līvaí,+ fakataha mo Tētani mo ʻApilami ko e ongo foha ʻo ʻEliapí,+ pea mo ʻOni ko e foha ʻo Pēlati ʻo e ngaahi foha ʻo Lūpení.+ 2 Naʻa nau tutuʻu hake kia Mōsese fakataha mo e kau tangata ʻIsileli ʻe toko 250, ko e ngaahi ʻeiki ʻo e fuʻu fakatahá, ko e faʻahinga ʻo e fakatahaʻangá kuo fili, ko e kau tangata tuʻu-ki-muʻa. 3 Ko ia naʻa nau fakatahataha mai+ kia Mōsese mo ʻĒlone ʻo nau pehē kiate kinaua: “Kuo mau foʻi ʻiate kimoua! ʻOku māʻoniʻoni+ ʻa e fuʻu fakatahá kotoa, ʻa kinautolu kotoa, pea ʻoku ʻi honau lotolotongá ʻa Sihova.+ Ko e hā leva ʻokú mo hiki hake ai kimoua ʻo māʻolunga ʻi he fakatahaʻanga ʻa Sihová?”

4 ʻI he fanongo ʻa Mōsese ki he meʻá ni, naʻá ne fakatōmapeʻe hifo leva. 5 Naʻá ne pehē ange leva kia Kola mo e kotoa ʻo hono kau poupoú: “ʻI he pongipongi ʻapongipongí ʻe fakaʻilo mai ai ʻe Sihova ʻa kinautolu ʻoku ʻaʻaná+ mo kinautolu ʻoku māʻoniʻoní pea mo kinautolu ʻoku totonu ke fakaofiofi ange kiate iá,+ pea ʻilonga ʻa ia te ne filí+ te ne fakaofiofi ange kiate ia. 6 Fai ʻa e meʻá ni: Toʻo ha ngaahi ʻaiʻanga afi,+ ʻe koe Kola mo e kotoa ʻo ho kau poupoú,+ 7 pea ʻai ki ai ʻa e afi pea ʻai ki ai mo e ʻinisēnisi ʻi he ʻao ʻo Sihová ʻapongipongi, pea ko e tangata ko ia ʻe fili ʻe Sihová,+ ko e tokotaha ia ʻoku māʻoniʻoní. Ko kimoutolu ngaahi foha ʻo Līvaí+ kuo mou fiematamuʻa!”

8 Naʻe pehē ange leva ʻe Mōsese kia Kola: “Kātaki muʻa ʻo fanongo mai, ʻa kimoutolu ngaahi foha ʻo Līvaí. 9 ʻOku hā ngali ko ha meʻa siʻi koā ia kiate kimoutolu ʻa hono fakamavaheʻi kimoutolu ʻe he ʻOtua ʻo ʻIsilelí mei he fuʻu fakataha ʻo ʻIsilelí+ pea fakaʻatā kimoutolu ke mou fakaofiofi kiate ia ke fakahoko ʻa e ngāue ʻi he tāpanekale ʻo Sihová pea ke tuʻu ʻi he ʻao ʻo e fuʻu fakatahá ke fai fatongia kiate kinautolu,+ 10 peá ne ʻomi koe ke ke ofi kiate ia fakataha mo e kotoa ʻo ho fanga tokouá, ʻa e ngaahi foha ʻo Līvaí? Te mou toe feinga koā kimoutolu ke maʻu mo e tuʻunga taulaʻeikí?+ 11 ʻI he ʻuhinga ko ení, ko koe pea mo e kotoa ho kau poupou ʻoku fakatahatahá ʻoku mou fakafepaki kia Sihova. Ka kia ʻĒlone, ko hai ia ke mou lāunga ai kiate iá?”+

12 Ki mui ai, naʻe fekau atu ʻa Mōsese ke haʻu ʻa Tētani mo ʻApilami+ ko e ongo foha ʻo ʻEliapí, ka naʻá na pehē: “ʻE ʻikai te ma ō atu kimaua! 13 Ko ha meʻa siʻi koā ʻa hoʻo ʻomi kimautolu mei ha fonua ʻoku mahutafea ʻi he huʻakau mo e honé ke tāmateʻi kimautolu ʻi he toafá?+ Pea ʻokú ke toe loto koā koe ke ke puleʻi fakaʻaufuli kimautolu? 14 Hangē ko ia ʻoku hokó, kuo ʻikai te ke ʻomi kimautolu ki ha fonua ʻoku mahutafea ʻi he huʻakau mo e hone+ pe foaki mai hamau tofiʻa ʻi he ngoué mo e ngoue kālepí. Te ke kapeʻi koā ʻe koe ʻa e mata ʻo e kau tangata ko iá? ʻE ʻikai te ma ō atu kimaua!”

15 Ko ia naʻe hoko ʻo ʻita lahi ʻa Mōsese peá ne pehē kia Sihova: “ʻOua naʻá ke hāngaifofonga hifo ki heʻenau feilaulau meʻakaí. Kuo ʻikai te u toʻo ha ʻasi ʻe taha meiate kinautolu, pea kuo ʻikai te u fai ha kovi ki ha taha ʻo kinautolu.”+

16 Naʻe pehē ange leva ʻe Mōsese kia Kola: “Te ke hā mo e kotoa ho kau poupoú ʻi he ʻao ʻo Sihová ʻapongipongi, ʻa koe mo kinautolu pea mo ʻĒlone. 17 ʻOku totonu ke toʻo ʻe he tokotaha taki taha ʻene ʻaiʻanga afi pea ʻai ki ai ha ʻinisēnisi, pea ʻe ʻoatu ʻe he tokotaha taki taha ʻene ʻaiʻanga afí ki he ʻao ʻo Sihová, ko e ʻaiʻanga afi ʻe 250, fakataha mo koe pea mo ʻĒlone, ko e tokotaha taki taha mo ʻene ʻaiʻanga afi.” 18 Ko ia naʻe toʻo ʻe he tokotaha taki taha ʻo kinautolú ʻene ʻaiʻanga afi ʻo nau ʻai ki ai ʻa e afi mo e ʻinisēnisi pea nau tuʻu ʻi he hūʻanga ʻo e tēniti feʻiloakiʻangá fakataha mo Mōsese pea mo ʻĒlone. 19 ʻI hono fakatahatahaʻi mai ʻe Kola ʻa hono kau poupoú+ kiate kinaua ki he hūʻanga ʻo e tēniti feʻiloakiʻangá, naʻe hā ʻa e lāngilangi ʻo Sihová ki he fuʻu fakatahá kotoa.+

20 Naʻe tala leva ʻe Sihova kia Mōsese mo ʻĒlone: 21 “Mo mavahe mai mei he lotolotonga ʻo e kulupú ni, ka u fakaʻauha ʻosi kinautolu ʻi he taimí ni pē.”+ 22 ʻI he meʻá ni, naʻá na fakatōmapeʻe hifo ki he kelekelé ʻo na pehē: “ʻE ʻOtua, ko e ʻOtua ʻo e laumālie ʻo e kakai kotoa pē,*+ ʻe fakatupunga koā ʻe he angahala ʻa e tangata ʻe toko tahá ke ke hoko ai ʻo houhau ki he fuʻu fakatahá fakakātoa?”+

23 Naʻe folofola leva ʻa Sihova kia Mōsese: 24 “Lea ki he fuʻu fakatahá ʻo tala kiate kinautolu, ‘Mou mavahe mei he feituʻu takatakai ʻi he ngaahi tēniti ʻo Kola, Tētani, mo ʻApilamí!’”+

25 Naʻe tuʻu hake leva ʻa Mōsese ʻo ne ʻalu kia Tētani mo ʻApilami, pea naʻe ʻalu fakataha mo ia ʻa e kau mātuʻa+ ʻo ʻIsilelí. 26 Naʻá ne tala ange ki he fuʻu fakatahá: “Mou kātaki ʻo mavahe mei he ngaahi tēniti ʻo e kau tangata fulikivanu ko ení pea ʻoua naʻa ala ki ha meʻa pē ʻoku ʻanautolu, koeʻuhí ke ʻoua naʻa tafiʻi atu kimoutolu ʻi he kotoa ʻo ʻenau angahalá.” 27 Naʻa nau mavahe leva he taimi pē ko iá mei he ngaahi tēniti ʻo Kola, Tētani, mo ʻApilamí, mei he tafaʻaki kotoa pē, pea naʻe hū mai ʻa Tētani mo ʻApilami ki tuʻa, ʻo na tuʻu ʻi he hūʻanga ʻo hona tēnití, fakataha mo hona ongo uaifí, ko hona ngaahi fohá, pea mo ʻena fānau īkí.

28 Naʻe pehē ange leva ʻe Mōsese: “Ko e meʻa eni te mou ʻilo ai kuo fekauʻi mai au ʻe Sihova ke u fai ʻa e ngaahi meʻa kotoa ko ení, ʻa ia ʻoku ʻikai mei hoku lotó: 29 Kapau ʻe mate ʻa e kakaí ni ʻo hangē pē ko e mate ʻa e kau tangata kotoa pē pea kapau ko honau tauteá ʻoku tatau ia mo e tautea ʻo e faʻahinga kotoa ʻo e tangatá, tā kuo ʻikai ke fekauʻi mai au ʻe Sihova.+ 30 Ka ʻo kapau ʻe fai ʻe Sihova ha meʻa anga-kehe kiate kinautolu pea fakamanga hake ʻa e* kelekelé ʻo ne folo kinautolu mo e meʻa kotoa pē ʻoku ʻanautolú pea nau ʻalu hifo moʻui ki he Faʻitoká,* te mou ʻiloʻi moʻoni ai ko e kau tangatá ni kuo nau fai taʻefakaʻapaʻapa kia Sihova.”

31 ʻI he ʻosi atu pē ʻene leaʻaki ʻa e ngaahi leá ni kotoa, naʻe mavaeua+ leva ʻa e kelekele ʻi lalo ʻiate kinautolú. 32 Pea naʻe fakamanga hake ʻa e* kelekelé ʻo ne folo kinautolu, fakataha mo honau ngaahi fāmilí mo e faʻahinga kotoa pē naʻe kau kia Kolá+ pea mo ʻenau koloá kotoa. 33 Ko ia ko kinautolu mo e faʻahinga kotoa naʻe kau mo kinautolú naʻa nau ʻalu hifo moʻui ki he Faʻitoká,* pea naʻe ʻufiʻufi kinautolu ʻe he kelekelé ʻo nau ʻauha ai mei he lotolotonga ʻo e fakatahaʻangá.+ 34 Ko e kau ʻIsileli kotoa naʻa nau tuʻu takatakai ʻiate kinautolú naʻa nau hola ʻi heʻenau kaikailá, he naʻa nau pehē: “ʻOku mau ilifia telia naʻa folo kimautolu ʻe he kelekelé!” 35 Naʻe ʻalu hifo leva ha afi meia Sihova+ ʻo ne keina ʻa e kau tangata ʻe toko 250 naʻa nau ʻoatu ʻa e ʻinisēnisí.+

36 Naʻe folofola leva ʻa Sihova kia Mōsese: 37 “Tala kia ʻEliesa ko e foha ʻo ʻĒlone ko e taulaʻeikí ke ne toʻo mai ʻa e ngaahi ʻaiʻanga afí+ mei he afí, he ʻoku toputapu ia. Tala foki kiate ia ke ne veteki ke mamaʻo atu ʻa e afí. 38 Ko e ngaahi ʻaiʻanga afi ʻa e kau tangata naʻa nau faiangahala ʻo mole ai ʻenau moʻuí ʻoku totonu ke ngaohiʻaki ia ha ngaahi lauʻimētale manifi ke kofuʻaki ʻa e ʻōlitá,+ koeʻuhí he naʻa nau ʻoatu ia ʻi he ʻao ʻo Sihová, pea naʻe hoko ai ia ʻo toputapu. ʻOku totonu ke hoko ia ko ha fakaʻilonga ki he kau ʻIsilelí.”+ 39 Ko ia naʻe toʻo ʻe ʻEliesa ko e taulaʻeikí ʻa e ngaahi ʻaiʻanga afi kopá ʻa ia naʻe ʻoatu ʻe he faʻahinga ko ia naʻe velá, pea nau tuki ia ke kofuʻaki ʻa e ʻōlitá, 40 ʻo hangē tofu pē ko ia naʻe tala ʻe Sihova kiate ia fakafou ʻia Mōsesé. Ko ha fakamanatu ia ki he kau ʻIsilelí ʻe ʻikai totonu ki ha tokotaha taʻefakamafaiʻi* ʻa ia ʻoku ʻikai ko ha taha mei he fānau ʻa ʻĒloné ke ne fakaofiofi mai ke tutu ʻinisēnisi ʻi he ʻao ʻo Sihová+ pea ke ʻoua naʻa hoko ha taha ʻo hangē ko Kola mo hono kau poupoú.+

41 ʻI he ʻaho pē hono hokó, naʻe kamata ke lāunga ʻa e fuʻu fakataha fakakātoa ʻo e kau ʻIsilelí kia Mōsese mo ʻĒlone,+ ʻo pehē: “Ko kimoua kuó mo tāmateʻi ʻa e kakai ʻa Sihová.” 42 ʻI he fakatahataha mai ʻa e fuʻu fakatahá kia Mōsese mo ʻĒloné, naʻa nau hanga hake leva ki he tēniti feʻiloakiʻangá, pea vakai, naʻe ʻufiʻufi ia ʻe he ʻaó, pea naʻe kamata ke hā mai ʻa e lāngilangi ʻo Sihová.+

43 Naʻe ʻalu atu ʻa Mōsese mo ʻĒlone ki muʻa ki he tēniti feʻiloakiʻangá,+ 44 pea naʻe folofola ʻa Sihova kia Mōsese: 45 “Ko kimoua ongo tangata, mo mavahe mei he lotolotonga ʻo e fuʻu fakatahá ni, koeʻuhí ka u fakaʻauha ʻosi kinautolu ʻi he taimí ni pē.”+ Naʻá na fakatōmapeʻe leva ai ki he kelekelé.+ 46 Naʻe pehē ange leva ʻe Mōsese kia ʻĒlone: “Toʻo ʻa e ʻaiʻanga afí ʻo ke ʻai ki ai ha afi mei he ʻōlitá+ pea ʻai ki ai mo ha ʻinisēnisi peá ke ʻalu fakavave ki he fuʻu fakatahá ʻo fai ha feilaulau ʻufiʻufi angahala maʻanautolu,+ he kuo hoko mai ʻa e houhau ʻa Sihová. Kuo kamata ʻa e malá!” 47 Naʻe toʻo leva ia ʻe ʻĒlone, ʻo hangē tofu pē ko e lea ʻa Mōsesé, peá ne lele ki he lotolotonga ʻo e fakatahaʻangá, pea vakai, kuo kamata ʻa e malá ʻi he lotolotonga ʻo e kakaí. Ko ia naʻá ne ʻai ʻa e ʻinisēnisí ki he ʻaiʻanga afí ʻo ne kamata fai ha feilaulau ʻufiʻufi angahala maʻá e kakaí. 48 Naʻá ne hanganaki tuʻu ai pē ʻi he vahaʻa ʻo e kau maté mo e kau moʻuí, pea naʻe faai atu pē ʻo tuʻu ʻa e malá. 49 Ko e faʻahinga naʻe mate mei he malá naʻe feʻunga mo e toko 14,700, tuku kehe ʻa e faʻahinga naʻe mate ʻi he meʻa fekauʻaki mo Kolá. 50 ʻI he faifai pea foki ʻa ʻĒlone kia Mōsese ki he hūʻanga ʻo e tēniti feʻiloakiʻangá, naʻe ʻosi tuʻu ʻa e malá ia.