Tangata Malanga

4 Naʻá ku toe fakahanga ʻeku tokangá ki he kotoa ʻo e ngaohikovia ʻoku hoko ʻi he lalo laʻaá. Naʻá ku sio ki he tangi ʻa e faʻahinga kuo ngaohikoviá, pea naʻe ʻikai ha taha ke ne fakafiemālieʻi kinautolu.+ Pea ko e faʻahinga naʻa nau ngaohikovia kinautolú naʻa nau maʻu ʻa e mafaí, pea naʻe ʻikai ha taha ke ne fakafiemālieʻi kinautolu. 2 Pea naʻá ku fakahaaʻi ko e faʻahinga kuo ʻosi maté ʻoku nau lelei ange kinautolu ʻi he faʻahinga ʻoku kei moʻuí.+ 3 Pea ʻoku lelei ange ʻiate kinaua fakatouʻosi ʻa e tokotaha kuo teʻeki ke fanauʻí,+ ʻa ia kuo teʻeki ke ne mamata ʻi he ngaahi ngāue fakamamahi ʻoku fai ʻi he lalo laʻaá.+

4 Pea naʻá ku mamata ki he lahi ʻo e feinga* mo e ngāue pōtoʻi ʻoku tupu mei he feʻauʻauhi ʻi he vahaʻa ʻo e kakaí;+ ko e muna mo eni foki, ko ha tuli pē ki he matangí.

5 Ko e tokotaha valé ʻokú ne tangutu pē ʻo fakafehauaki ʻa hono ongo nimá lolotonga ia ʻa e ʻauʻaunga hono kakanó.*+

6 ʻOku lelei ange ke fonu ʻa e nima ʻe taha ʻi he mālōloó ʻi he fonu ʻa e nima ʻe ua ʻi he ngāue mālohi mo tuli pē ki he matangí.+

7 Naʻá ku fakahanga ʻeku tokangá ki ha toe fakatātā ʻe taha ʻo e muná ʻi he lalo laʻaá: 8 ʻOku ʻi ai ha tangata ʻoku toko taha pē ʻo ʻikai hano kaungāmeʻa; ʻoku ʻikai hano foha pe tokoua, ka ʻoku ʻikai ke ʻi ai hano ngataʻanga ʻo e kotoa ʻo ʻene ngāue mālohí. Ko hono matá ʻoku ʻikai ʻaupito ke fiemālie ʻi heʻene koloá.+ Ka ʻokú ne ʻeke hifo nai kiate ia, ‘Ko hai ia ʻoku ou ngāue mālohi ki aí mo fakamasivaʻi ai au ʻi he ngaahi meʻa leleí’?+ Ko e muna mo eni foki mo ha ngāue fakamamahi.+

9 Ko e toko uá ʻoku lelei ange ia ʻi he toko tahá+ koeʻuhí ʻokú na maʻu ha totongi lelei* ʻi heʻena ngāue mālohí. 10 He ʻo kapau ʻe tō ha toko taha ʻiate kinaua, ʻe lava ʻe he tokotaha ʻe tahá ke tokoniʻi hake ia. Ka ko e hā ʻe hoko ki he tokotaha ʻoku toó ʻi he ʻikai ha tokotaha ke ne tokoniʻi hake iá?

11 ʻIkai ngata aí, kapau ʻe tākoto fakataha ha toko ua, te na māfana ai pē, ka ʻe malava fēfē ke māfana ha toko taha pē? 12 Pea ʻe malava ke ikunaʻi ʻe ha tokotaha ha foʻi toko taha, ka ʻi he tuʻu fakataha ha toko ua ʻe malava ke na fakafepakiʻi ia. Pea ko ha afo lōtolu ʻe ʻikai ke motu vave* ia.

13 ʻOku lelei ange ha kiʻi tama masiva ka ʻoku poto ʻi ha tuʻi taʻumotuʻa ka ʻoku vale,+ ʻa ia ʻoku ʻikai ke ne kei fakapotopoto feʻunga ke tokanga ki ha fakatokanga.+ 14 He naʻá ne* ʻalu atu mei he pilīsoné ke hoko ko e tuʻi,+ neongo naʻe fanauʻi ia ko e masiva ʻi he malumalu ʻo e pule ʻa e tuʻi taʻumotuʻá.+ 15 Naʻá ku vakai ki he faʻahinga kotoa pē ʻoku moʻui ʻa ia ʻoku nau ʻaʻeva holo ʻi he lalo laʻaá, pea pehē ki he kiʻi tama ʻa ia ʻokú ne fetongi ʻa e tuʻí. 16 Neongo ʻoku ʻikai ha ngataʻanga ki he kotoa ʻo hono kau poupoú, ko e faʻahinga ʻe haʻu ʻamuí ʻe ʻikai ke nau fiefia ʻiate ia.+ Ko e muna mo eni foki, ko ha tuli pē ki he matangí.