Ua Sāmiuela

3 Ko e tau ʻi he vahaʻa ʻo e fale ʻo Saulá pea mo e fale ʻo Tēvitá naʻe hokohoko atu pē; pea naʻe fakaʻaʻau ai pē ke mālohi ange ʻa Tēvita,+ pea ko e fale ʻo Saulá naʻe fakaʻaʻau ke toe vaivai ange.+

2 Lolotonga iá, naʻe fanauʻi ha ngaahi foha kia Tēvita ʻi Hepeloni.+ Ko hono ʻuluaki fohá ko ʻAmanoni+ ʻia ʻAhinoami+ mei Sisililí. 3 Ko hono foha fika uá ko Kiliapi ʻia ʻApikale,+ ʻa ia naʻe hoko ko e uaifi ʻo Nāpale ko e tangata Kāmelí; pea ko e fika tolú ko ʻApisalome+ ko e tama ʻa Maaka, ko e ʻofefine ʻo Talimai+ ko e tuʻi ʻo Kēsulí. 4 Ko e fika faá ko ʻAtunaisa+ ko e tama ʻa Hakití, pea ko e fika nimá ko Sefataia ko e tama ʻa ʻApitalí. 5 Ko e fika onó ko ʻItilami ʻi he uaifi ʻo Tēvita ko ʻĒkelá. Ko kinautolu eni naʻe fanauʻi kia Tēvita ʻi Hepeloní.

6 Lolotonga ʻa e kei hoko atu ʻa e tau ʻi he vahaʻa ʻo e fale ʻo Saulá mo e fale ʻo Tēvitá, naʻe hanganaki fakaivimālohiʻi ai ʻe ʻĀpina+ ʻa hono tuʻungá ʻi he fale ʻo Saulá. 7 Pea naʻe ʻi ai ha sinifu ʻa Saula ko hono hingoá ko Līsipa,+ ko e ʻofefine ʻo ʻAia. Naʻe pehē ʻe ʻIsi-pōseti+ ki mui kia ʻĀpina: “Ko e hā naʻá ke mohe* ai mo e sinifu ʻa ʻeku tamaí?”+ 8 Naʻe hoko ʻa ʻĀpina ʻo ʻita lahi ʻaupito ʻi he lea ʻa ʻIsi-pōsetí peá ne pehē: “Ko ha ʻuluʻi kulī au mei Siuta? Kuo aʻu mai ki he ʻahó ni mo ʻeku fakahāhā ʻa e ʻofa mateaki ki he fale ʻo hoʻo tamai ko Saulá pea ki hono fanga tokouá mo hono ngaahi kaungāmeʻá, pea kuo ʻikai te u lavakiʻi koe ki he nima ʻo Tēvitá; ka ʻi he ʻahó ni ʻokú ke ʻekeʻi au ʻi ha faihala fekauʻaki mo ha fefine. 9 ʻOfa ke fai pehē ʻa e ʻOtuá kia ʻĀpina pea hulu atu ai kapau ʻe ʻikai te u fai kia Tēvita ʻo hangē ko e meʻa naʻe fuakava ʻaki ʻe Sihova kiate iá:+ 10 Ke ʻave ʻa e puleʻangá mei he fale ʻo Saulá pea ke fokotuʻu maʻu ʻa e taloni ʻo Tēvitá ki ʻIsileli pea ki Siuta, mei Tani ki Pea-sipa.”+ 11 Naʻe ʻikai malava ke ne fai ha tali kia ʻĀpina ʻaki ha foʻi lea ʻe taha, he naʻá ne ilifia ʻiate ia.+

12 Naʻe fekauʻi atu ʻi he taimi pē ko iá ʻe ʻĀpina ha kau talafekau kia Tēvita, ʻo ne pehē: “Ko hai ʻoku ʻoʻona ʻa e fonuá?” Naʻá ne hoko atu: “Fai ha fuakava mo au, pea te u fai ha meʻa pē te u lavá* ke fakafoki atu ʻa ʻIsileli kotoa kiate koe.”+ 13 ʻI he meʻá ni naʻá ne tali ange: “ʻOku lelei! Te u fai ha fuakava mo koe. Ko e meʻa pē ʻe taha ʻoku ou kole atu kiate koé ke ʻoua naʻá ke feinga ke sio ki hoku matá kae ʻoua kuó ke ʻuluaki ʻomai ʻa Maikale,+ ʻa e ʻofefine ʻo Saulá, ʻi hoʻo haʻu ke sio mai kiate aú.” 14 Pea naʻe fekauʻi atu ʻe Tēvita ha kau talafekau kia ʻIsi-pōseti+ ko e foha ʻo Saulá, ʻo ne pehē: “ʻOmi hoku uaifi ko Maikalé, ʻa ia naʻá ku fakamaʻu kiate ia ʻo faiʻaki ʻa e muʻa kili ʻe 100 ʻo e fakatangata ʻo e kau Filisitiá.”+ 15 Ko ia naʻe fai ʻe ʻIsi-pōseti ha fekau ke ʻomi ia mei hono husepānití, ʻa Palatieli*+ ko e foha ʻo Laisí. 16 Ka naʻe haʻu fakataha ai pē mo ia ʻa hono husepānití, ʻo ne tangi pē ʻi heʻene muimui mai ʻiate iá ʻo aʻu ki Pahulimi.+ Pea naʻe pehē ange ʻe ʻĀpina kiate ia: “ʻAlu, foki koe!” Ko ia naʻá ne foki.

17 Lolotonga iá, naʻe ʻoatu ʻe ʻĀpina ha fekau ki he kau mātuʻa ʻo ʻIsilelí, ʻo ne pehē: “Naʻe ʻi ai ʻa e taimi naʻa mou loto ai ke ʻai ʻa Tēvita ke tuʻi kiate kimoutolu. 18 Ko ia ke mou fai ha meʻa, he naʻe folofola ʻa Sihova kia Tēvita: ‘Fakafou ʻi he nima ʻo ʻeku sevāniti ko Tēvitá+ te u fakahaofi ai ʻa hoku kakai ko ʻIsilelí mei he nima ʻo e kau Filisitiá pea mei he nima ʻo honau ngaahi filí kotoa.’” 19 Pea naʻe lea ʻa ʻĀpina ki he kakai ʻo Penisimaní.+ Naʻe toe ʻalu foki ʻa ʻĀpina ke talanoa mo Tēvita fakaekinaua pē ʻi Hepeloni ke tala kiate ia ʻa e meʻa kuo loto ki ai ʻa ʻIsileli mo e fale kotoa ʻo Penisimaní.

20 ʻI he aʻu ʻa ʻĀpina mo e kau tangata ʻe toko 20 kia Tēvita ki Hepeloní, naʻe fai ʻe Tēvita ha kātoanga kai maʻa ʻĀpina mo e kau tangata naʻe ʻiate iá. 21 Naʻe pehē ange leva ʻe ʻĀpina kia Tēvita: “Tuku ke u ʻalu ʻo tānaki fakataha mai ʻa ʻIsileli kotoa ki hoku ʻeiki ko e tuʻí, koeʻuhí ke nau fai ha fuakava mo koe, pea te ke hoko ko e tuʻi ki he faʻahinga kotoa te ke loto ki aí.” Ko ia naʻe tuku atu ʻe Tēvita ʻa ʻĀpina ke ne ʻalu, pea naʻá ne ʻalu atu ʻi he melino.

22 Feʻunga mo e taimi ko ení, naʻe foki atu ai ʻa e kau sevāniti ʻa Tēvitá mo Sioape hili ia haʻanau fai ha ʻohofi, ʻo nau foki mai mo ha fuʻu koloa vete.* Naʻe ʻikai ke ʻia Tēvita ʻa ʻĀpina ʻi Hepeloni, he naʻá ne ʻosi tuku atu ia ke ne ʻalu ʻi he melino. 23 ʻI he aʻu atu ʻa Sioape+ mo e kau tau kotoa naʻe ʻiate iá, naʻe fakahā kia Sioape: “Naʻe haʻu ʻa ʻĀpina+ ko e foha ʻo Naá+ ki he tuʻí, pea kuó ne tuku atu ia, pea kuó ne ʻalu atu ʻi he melino.” 24 Ko ia naʻe hū ʻa Sioape ki he tuʻí ʻo ne pehē: “Ko e hā ʻa e meʻa kuó ke faí? Ko ena naʻe haʻu ʻa ʻĀpina kiate koe. Ko e hā naʻá ke tuku atu ai ia ke ne mavahe fiemālie atu peé? 25 ʻOkú ke ʻiloʻi ʻa ʻĀpina ko e foha ʻo Naá! Naʻá ne haʻu ki hení ke kākaaʻi koe pea ke ne ʻiloʻi hoʻo ngaʻunu kotoa pē pea mo ʻiloʻi ʻa e meʻa kotoa pē ʻokú ke faí.”

26 Ko ia naʻe mavahe ʻa Sioape meia Tēvita ʻo ne fekauʻi atu ha kau talafekau ke tulimui kia ʻĀpina, pea naʻa nau fakafoki mai ia mei he lepa ko Silahá; ka naʻe ʻikai ke ʻilo ʻe Tēvita ha meʻa ʻe taha fekauʻaki mo ia. 27 ʻI he foki mai ʻa ʻĀpina ki Hepeloní,+ naʻe ʻave ia ʻe Sioape ki he tafaʻakí ki loto ʻi he matapā ʻo e koló ke na talanoa fakaekinaua pē. Kae kehe, naʻá ne hokaʻi ai ia ʻi hono keté ʻo ne mate;+ naʻá ne fai eni koeʻuhí ko ʻene tāmateʻi* ʻa hono tokoua ko ʻAsaelí.+ 28 ʻI he fanongo ʻa Tēvita ki mui aí, naʻá ne pehē: “ʻOku ou ʻataʻatā au mo hoku puleʻangá ʻo taʻengata ʻi he ʻao ʻo Sihová mei he halaia ʻi he toto+ ʻo ʻĀpina ko e foha ʻo Naá. 29 ʻOfa ke foki ia ki he tumuʻaki ʻo Sioapé+ pea ki he fale kotoa ʻo ʻene tamaí. ʻOfa ke ʻoua ʻaupito naʻa hala ʻa e fale ʻo Sioapé ʻi ha tangata ʻe faingataʻaʻia ʻi he ʻaú+ pe ko ha kilia+ pe ko ha tangata ʻoku ngāue ʻi he takaiʻanga filó* pe ko ha taha ʻe tō ʻi he heletaá pe ko ha taha ʻe masiva meʻakai!”+ 30 Ko ia naʻe tāmateʻi ai ʻe Sioape mo hono tokoua ko ʻApisaí+ ʻa ʻĀpina+ koeʻuhí ko ʻene tāmateʻi ʻa hona tokoua ko ʻAsaelí ʻi he tau+ ʻi Kipioné.

31 Pea naʻe pehē ʻe Tēvita kia Sioape mo e kakai kotoa naʻe ʻiate iá: “Hae homou ngaahi kofú pea mou ʻai tauangaʻa pea tengihia ʻa ʻĀpina.” Ko Tuʻi Tēvita tonu naʻá ne muimui atu pē ʻi he fata ʻo e putú. 32 Naʻa nau tanu ʻa ʻĀpina ʻi Hepeloni; pea naʻe tangi leʻo-lahi ʻa e tuʻí ʻi he fonualoto ʻo ʻĀpiná, pea naʻe tangi mo e kakaí kotoa. 33 Naʻe tangilāulau ʻa e tuʻí ʻia ʻĀpina ʻo ne pehē:

“ʻE mate koā ʻa ʻĀpina ʻi he mateʻanga ʻo ha tokotaha taʻeʻatamai?

Ko hoʻo toó naʻe hangē ko e tō ʻa ha taha ʻi he ʻao ʻo e kau faihiá.”*+

Ko ia naʻe toe tangi ʻa e kakaí kotoa ʻiate ia.

35 Ki mui ai, naʻe omi kotoa ʻa e kakaí ke ʻoange kia Tēvita ha mā ke faiʻaki ha fakanonga* lolotonga naʻe kei ʻahó, ka naʻe fai ʻe Tēvita ha fakapapau: “ʻOfa ke fai pehē ʻa e ʻOtuá kiate au pea hulu atu ai ʻo kapau te u kai ha mā pe ko ha momoʻi meʻa ʻe taha+ ki muʻa ke tō ʻa e laʻaá!” 36 Naʻe sio ki ai ʻa e kakaí kotoa, pea naʻa nau leleiʻia ai. Naʻe pehē pē mo e meʻa kotoa naʻe fai ʻe he tuʻí, naʻe leleiʻia ai ʻa e kakaí kotoa. 37 Ko ia naʻe ʻiloʻi ʻe he kakaí kotoa pea mo ʻIsileli kotoa ʻi he ʻaho ko iá naʻe ʻikai ha kaunga ʻa e tuʻí ki hono tāmateʻi ʻo ʻĀpina ko e foha ʻo Naá.+ 38 Naʻe pehē leva ʻe he tuʻí ki heʻene kau sevānití: “ʻOku ʻikai koā te mou ʻilo kuo tō he ʻahó ni ha ʻeiki mo ha tangata lahi ʻi ʻIsileli?+ 39 ʻOku ou vaivai he ʻahó ni, neongo kuo pani au ko e tuʻi,+ pea ko e ongo tangatá ni, ʻa e ongo tama ʻa Seluvaiá,+ ʻokú na fuʻu anga-fakamamahi kiate au.+ ʻOfa ke totongi ʻe Sihova ki he tokotaha faikoví ʻo fakatatau ki heʻene kovi ʻaʻaná.”+