Nōmipa

19 Naʻe toe folofola ʻa Sihova kia Mōsese mo ʻĒlone, ʻo pehē: 2 “Ko e lao eni ʻa ia kuo tuʻutuʻuni ʻe Sihová, ‘Tala ki he kau ʻIsilelí ke nau toʻo maʻau ha pulu lelei kulokula ʻa ia ʻoku ʻikai hano mele+ pea kuo teʻeki ke ʻai ki ai ha ʻioke. 3 Te mo ʻoange ia kia ʻEliesa ko e taulaʻeikí, pea te ne taki ia ki he tuʻa ʻapitangá, pea ʻe tāmateʻi ia ʻi hono ʻaó. 4 Ko ʻEliesa leva ko e taulaʻeikí te ne toʻo ha konga ʻo hono totó ʻaki hono tuhú pea afuhi tuʻo fitu ʻa e totó ʻo fakahangatonu atu ki he mata tēniti feʻiloakiʻangá.+ 5 ʻE tutu leva ʻa e pulú ʻo ne mamata ki ai. Ko hono kilí mo hono kakanó mo hono totó fakataha mo hono kinohaʻá ʻe tutu ia.+ 6 Pea ko e taulaʻeikí te ne toʻo ha vaʻa sita, ʻīsope,+ pea mo e tupenu kula ʻahoʻaho pea lī kinautolu ki he afi ʻa ia ʻoku tutu ai ʻa e pulú. 7 ʻE fō leva ʻe he taulaʻeikí ʻa hono ngaahi kofú pea ʻe kaukau ia* ʻi he vai, pea ʻi he hili iá ʻe lava ke ne hū ki he ʻapitangá; ka ʻe taʻemaʻa ʻa e taulaʻeikí ʻo aʻu ki he efiafi.

8 “‘Ko e tokotaha naʻá ne tutu ʻa e pulú te ne fō hono ngaahi kofú ʻi he vai peá ne kaukau* ʻi he vai, pea te ne taʻemaʻa ʻo aʻu ki he efiafi.

9 “‘ʻE tānaki ʻe ha tangata ʻoku maʻa ʻa e efuefu ʻo e pulú+ ʻo tuku ia ʻi he tuʻa ʻapitangá ʻi ha feituʻu ʻoku maʻa, pea ʻoku totonu ke tauhi ia ʻe he fuʻu fakataha ʻo e kau ʻIsilelí ke ngaohiʻaki ha vai ʻa ia ʻe ngāueʻaki ki he fakamaʻá.+ Ko ha feilaulau angahala ia. 10 Ko e tokotaha ʻokú ne tānaki ʻa e efuefu ʻo e pulú te ne fō hono ngaahi kofú peá ne taʻemaʻa ʻo aʻu ki he efiafi.

“‘ʻE hoko eni ki he kau ʻIsilelí pea mo e muli ʻoku nofo ʻi honau lotolotongá ko ha tuʻutuʻuni taʻengata.+ 11 Ko ha taha pē ʻe ala ki ha taha pē kuo mate te ne taʻemaʻa ʻi he ʻaho ʻe fitu.+ 12 Ko e tokotaha ko iá ʻoku totonu ke ne fakamaʻa ʻa ia tonu ʻaki ʻa e vai ʻi he ʻaho hono tolú, pea ʻi he ʻaho hono fitú te ne maʻa. Ka ʻo kapau ʻe ʻikai te ne fakamaʻa ia ʻi he ʻaho hono tolú, ʻe ʻikai te ne maʻa ʻi he ʻaho hono fitú. 13 Ko e tokotaha kotoa pē ʻoku ala ki he ʻangaʻanga ʻo ha taha pē kuo mate pea ʻikai te ne fakamaʻa ia kuó ne ʻuliʻi ʻa e tāpanekale+ ʻo Sihová, pea ko e tokotaha ko iá kuo pau ke tuʻusi ia mei ʻIsileli.*+ Koeʻuhi kuo ʻikai ke afuhi ʻiate ia ʻa e vai ki he fakamaʻá,+ ʻe hokohoko atu ai ʻene taʻemaʻá. Te ne taʻemaʻa ai pē.

14 “‘Ko e lao eni ʻe ngāueʻaki ʻi he taimi ʻe mate ai ha tangata ʻi ha tēniti: Ko e tokotaha kotoa pē ʻe hū ki he tēnití pea ko e tokotaha kotoa pē ne ʻosi ʻi he tēnití te ne taʻemaʻa ʻi he ʻaho ʻe fitu. 15 Ko e ʻaiʻanga meʻa kotoa pē ʻoku fakaava ʻo ʻikai haʻihaʻi ai hono tāpuní ʻoku taʻemaʻa ia.+ 16 Ko e tokotaha kotoa pē ʻokú ne ʻi tuʻa ʻo ne lave ki ha taha naʻe tāmateʻi ʻaki ʻa e heletaá pe ki ha ʻangaʻanga pe ki he hui ʻo ha tangata pe ko ha tanuʻanga te ne taʻemaʻa ʻi he ʻaho ʻe fitu.+ 17 ʻOku totonu ke nau toʻo maʻá e tokotaha taʻemaʻá ha konga ʻo e efuefu ʻo e feilaulau angahala naʻe tutú ʻo ʻai ki ha ʻaiʻanga meʻa pea lingi ki ai ʻa e vai maʻa. 18 ʻE toʻo leva ʻe ha tangata ʻoku maʻa+ ha ʻīsope+ ʻo ne unu ia ʻi he vaí peá ne afuhi ʻaki ia ʻa e tēnití mo e ngaahi ʻaiʻanga meʻa kotoa pē mo e kakai naʻe ʻi aí pea mo e tokotaha naʻe ala ki he huí pe ki he tokotaha naʻe tāmateʻí pe ki he ʻangaʻangá pe ki he tanuʻangá. 19 Ko e tokotaha ʻoku maʻá te ne afuhi ʻaki ia ʻa e tokotaha taʻemaʻá ʻi he ʻaho hono tolú pea ʻi he ʻaho hono fitú, pea te ne fakamaʻa ia mei he angahalá ʻi he ʻaho hono fitú;+ ʻoku totonu leva ke ne fō hono ngaahi kofú pea kaukau ʻi he vai, pea te ne hoko ai ʻo maʻa ʻi he efiafí.

20 “‘Ka ko e tangata ʻa ia ʻoku taʻemaʻa pea ʻikai te ne fakamaʻa iá, kuo pau ke tuʻusi ʻa e tokotaha ko iá mei he fakatahaʻangá,*+ koeʻuhí kuó ne ʻuliʻi ʻa e feituʻu toputapu ʻo Sihová. Naʻe ʻikai ke afuhi ʻaki ia ʻa e vai ki he fakamaʻá, ko ia ʻokú ne taʻemaʻa ai.

21 “‘ʻE hoko eni ko ha tuʻutuʻuni taʻengata kiate kinautolu: Ko e tokotaha ʻokú ne afuhi ʻa e vai ki he fakamaʻá+ ʻoku totonu ke ne fō hono ngaahi kofú, pea ko e tokotaha ʻokú ne ala ki he vai ki he fakamaʻá te ne taʻemaʻa ʻo aʻu ki he efiafi. 22 Ko ha meʻa pē ʻoku ala ki ai ʻa e tokotaha taʻemaʻá ʻe taʻemaʻa ia, pea ko e tokotaha ʻoku ala ki aí te ne taʻemaʻa ʻo aʻu ki he efiafi.’”+