ʻUluaki Tuʻi

2 ʻI he ofi ki he taimi ʻo e mate ʻa Tēvitá, naʻá ne ʻoange ki hono foha ko Solomoné ʻa e ngaahi fakahinohino ko ení: 2 “Ko aú kuó u mei mate.* Ko ia ai, ke ke tuʻu mālohi+ pea ʻai ke ngali tangata.+ 3 Kuo pau ke ke tauhi ho fatongia kia Sihova ko ho ʻOtuá ʻaki ʻa e ʻaʻeva ʻi heʻene ngaahi foungá pea ʻi hono tauhi ʻene ngaahi tuʻutuʻuní, ko ʻene ngaahi fekaú, ko ʻene ngaahi fakamāú, mo ʻene ngaahi fakamanatú ʻo hangē ko ia kuo hiki ʻi he Lao ʻa Mōsesé;+ pea te ke toki lavameʻa* ai ʻi he meʻa kotoa pē ʻokú ke faí pea ʻi he feituʻu kotoa pē ʻokú ke ʻalu ki aí. 4 Pea ʻe fakahoko ʻe Sihova ʻa ʻene talaʻofa naʻá ne fai ʻo fekauʻaki mo aú: ‘Kapau ʻe tokanga ʻa ho ngaahi fohá ki honau ʻalungá ʻi heʻenau ʻaʻeva faitōnunga ʻi hoku ʻaó ʻaki honau lotó mo ʻenau moʻuí+ kotoa, ʻe ʻikai ʻaupito ke taʻehoko hake ha tangata ʻi ho hakó* ki he taloni ʻo ʻIsilelí.’+

5 “ʻOkú ke ʻiloʻi lelei foki ʻa e meʻa naʻe fai ʻe Sioape ko e tama ʻa Seluvaiá kiate aú, ʻa e meʻa naʻá ne fai ki he ongo ʻeiki ʻo e ngaahi kau tau ʻa ʻIsilelí—ʻa ʻĀpina+ ko e foha ʻo Naá mo ʻĀmasa+ ko e foha ʻo Sētelí. Naʻá ne tāmateʻi kinaua ʻi ha taimi naʻe ʻikai ke fai ai ha taú, pea naʻá ne ʻai ke tau ʻi he leta ʻi hono kongalotó mo e senitolo ʻi hono vaʻé ʻa e toto+ ʻi he taú. 6 Kuo pau ke ke ngāue ʻo fakatatau ki ho potó pea ʻoua naʻa ʻohifo ʻa hono ʻulu hinaá ʻi he melino ki he Faʻitoká.*+

7 “Ka ki he ngaahi foha ʻo Pāsiliai ko e tangata Kiliatí,+ te ke fakahāhā ki ai ʻa e ʻofa mateaki, pea ke nau ʻi he lotolotonga ʻo e faʻahinga ko ia ʻoku kai ʻi hoʻo tēpilé, he naʻe pehē ʻenau tuʻu ʻi hoku tafaʻakí+ ʻi he taimi naʻá ku hola ai mei ho tokoua ko ʻApisalomé.+

8 “ʻOku ʻiate koe foki ʻa Simi ko e foha ʻo Kela ko e tangata Penisimani mei Pahulimí. Ko ia ʻa e tokotaha naʻá ne talatukiʻi au ʻaki ha talatuki kovi ʻaupito+ ʻi he ʻaho naʻá ku ʻalu ai ki Mehanemí;+ ka ʻi he taimi naʻá ne ʻalu hifo ai ke fakafetaulaki kiate au ʻi Sioataní, naʻá ku fai ha fakapapau kiate ia ʻia Sihova: ‘ʻE ʻikai te u tāmateʻi koe ʻaki ʻa e heletaá.’+ 9 Ko eni ʻoua naʻa tuku taʻetautea ia,+ he ko koé ko ha tangata poto pea ʻokú ke ʻiloʻi ʻa e meʻa ʻoku totonu ke ke fai kiate iá; kuo pau ke ke ʻohifo ʻa hono ʻulu hinaá ki he Faʻitoká* mo e toto.”+

10 Pea naʻe toka ʻa Tēvita ʻo mālōlō fakataha mo ʻene fanga kuí pea naʻe tanu ia ʻi he Kolo-ʻo-Tēvitá.+ 11 Ko e lōloa* ʻo e pule ʻa Tēvita ki ʻIsilelí ko e taʻu ʻe 40. Naʻá ne pule ʻi Hepeloni+ ʻi he taʻu ʻe 7, pea naʻá ne pule ʻi Selusalema ʻi he taʻu ʻe 33.+

12 Pea naʻe nofo ʻa Solomone ʻi he taloni ʻo Tēvita ko ʻene tamaí, pea naʻe faifai atu pē ʻo fokotuʻu maʻu+ ʻa hono tuʻunga-tuʻí.

13 Naʻe ʻalu ʻi ha taimi ʻa ʻAtunaisa ko e tama ʻa Hakití kia Pati-sepa, ko e faʻē ʻa Solomoné. Naʻe ʻeke ange ʻe Pati-sepa: “ʻOkú ke haʻu ʻi he melino pē?” Pea naʻá ne tali ange: “ʻOku ʻi he melino pē.” 14 Pea naʻá ne pehē ange: “ʻOku ʻi ai ʻa e meʻa ʻoku ou fie lea atu ai.” Ko ia naʻá ne pehē ange: “Lea mai.” 15 Naʻá ne hoko atu: “ʻOkú ke ʻiloʻi lelei pē ko e tuʻunga-tuʻí naʻe tonu ke ʻaʻaku ia, pea ko ʻIsileli kotoa naʻa nau ʻamanekina ko* au te u hoko ko e tuʻí;+ ka naʻe mole meiate au ʻa e tuʻunga-tuʻí pea maʻu ia ʻe hoku tokouá, he naʻe meia Sihova ʻa ʻene maʻu iá.+ 16 Ka ko eni ʻoku ʻi ai ʻeku kole pē ʻe taha te u fai atu. ʻOua naʻá ke fakasītuʻaʻi aú.” Ko ia naʻá ne pehē ange kiate ia: “Lea mai.” 17 Naʻá ne pehē ange leva: “Kole ange muʻa kia Solomone ko e tuʻí—koeʻuhí heʻikai te ne fakasītuʻaʻi koe—ke tuku mai kiate au ʻa ʻApisaki+ ko e taʻahine Sūnemí ke ne hoko ko hoku uaifi.” 18 ʻI he meʻá ni naʻe pehē ange ʻe Pati-sepa: “Lelei ʻaupito! Te u lea maʻau ki he tuʻí.”

19 Ko ia naʻe hū ʻa Pati-sepa kia Tuʻi Solomone ke lea kiate ia maʻa ʻAtunaisa. Naʻe mālanga hake ʻi he taimi pē ko iá ʻa e tuʻí ke fakafetaulaki kiate ia mo punou kiate ia. Pea naʻá ne nofo leva ʻi hono taloní pea ʻai ke fokotuʻu ha taloni maʻá e faʻē ʻa e tuʻí, koeʻuhí ke ne nofo ʻi hono toʻomataʻú. 20 Naʻá ne pehē ange leva: “ʻOku ʻi ai ha kiʻi kole te u fai atu kiate koe. ʻOua naʻá ke fakasītuʻaʻi aú.” Ko ia naʻe pehē ʻe he tuʻí kiate ia: “Fai mai ia, siʻeku faʻē; koeʻuhí heʻikai te u fakasītuʻaʻi koe.” 21 Naʻá ne pehē ange: “Tuku ke ʻave ʻa ʻApisaki ko e taʻahine Sūnemí ke ne hoko ko ha uaifi ʻo ho tokoua ko ʻAtunaisá.” 22 ʻI he meʻá ni naʻe tali ange ai ʻe Tuʻi Solomone ki heʻene faʻeé: “Ko e hā ʻokú ke kole ai ʻa ʻApisaki ko e taʻahine Sūnemí maʻa ʻAtunaisá? Kole ā ʻe koe mo e tuʻunga-tuʻí maʻana,+ he ko ia ʻa hoku tokoua lahí,+ pea ʻoku poupou kiate ia ʻa ʻĀpaiata ko e taulaʻeikí pea mo Sioape+ ko e tama ʻa Seluvaiá.”+

23 Ko ia naʻe fai ai ʻe Tuʻi Solomone ha fakapapau ʻia Sihova: “ʻOfa ke fai pehē ʻa e ʻOtuá kiate au pea hulu atu ai ʻo kapau ʻe ʻikai toʻo ʻa e moʻui ʻa ʻAtunaisá ʻi heʻene fai ʻa e kolé ni. 24 Pea ko eni, ʻoku ou fuakava ʻia Sihova ko e ʻOtua moʻuí, ʻa ia kuó ne fokotuʻu maʻu au+ pea ʻai au ke u nofo ʻi he taloni ʻo Tēvita ko ʻeku tamaí pea kuó ne fokotuʻu ha fale* moʻoku,+ ʻo hangē pē ko ia kuó ne talaʻofaʻakí, ʻe tāmateʻi+ ʻa ʻAtunaisa ʻi he ʻahó ni.” 25 Naʻe fekauʻi ʻi he taimi pē ko iá ʻe Tuʻi Solomone ʻa Penaia+ ko e foha ʻo Sihoiatá, ʻa ia naʻá ne ʻalu atu ʻo taaʻi ʻa ʻAtunaisa, ʻo ne mate.

26 Naʻe pehē ʻe he tuʻí kia ʻĀpaiata+ ko e taulaʻeikí: “ʻAlu ki ho kelekele ʻi ʻAnatotí!+ ʻOkú ke tuha mo e mate, ka ʻi he ʻaho ní ʻe ʻikai te u tāmateʻi koe koeʻuhí naʻá ke fua ʻa e ʻAʻake ʻa e ʻEiki Hau ko Sihová ʻi he ʻao ʻo Tēvita ko ʻeku tamaí+ pea koeʻuhí he naʻá ke kau mo ʻeku tamaí ʻi he ngaahi faingataʻa kotoa naʻá ne moʻua aí.”+ 27 Ko ia naʻe tuli ʻe Solomone ʻa ʻĀpaiata mei heʻene ngāue ko ha taulaʻeiki ʻa Sihová, ke fakahoko ai ʻa e folofola ʻa Sihova ʻi Sailo+ ki he fale ʻo ʻĪlaí.+

28 ʻI he aʻu atu ʻa e ongoongó kia Sioapé—he naʻe poupou ʻa Sioape kia ʻAtunaisa+ ka naʻe ʻikai te ne poupou kia ʻApisalome+—naʻe hola ʻa Sioape ki he tēniti ʻo Sihová+ ʻo ne piki ʻi he ngaahi meʻatui ʻo e ʻōlitá. 29 Pea naʻe tala kia Tuʻi Solomone: “Kuo hola ʻa Sioape ki he tēniti ʻo Sihová, pea ʻokú ne ʻi ai ʻi he veʻe ʻōlitá.” Ko ia naʻe fekauʻi ʻe Solomone ʻa Penaia ko e foha ʻo Sihoiatá, ʻo ne pehē: “ʻAlu atu ʻo taaʻi ia!” 30 Ko ia naʻe ʻalu atu ʻa Penaia ki he tēniti ʻo Sihová peá ne pehē kiate ia: “Ko e meʻa eni ʻoku folofola mai ʻaki ʻe he tuʻí, ‘Hū mai ki tuʻa!’” Ka naʻá ne pehē ange: “ʻIkai! Te u mate pē au ʻi heni.” Naʻe foki ʻa Penaia ʻo fakahā ki he tuʻí: “Ko e meʻa eni naʻe leaʻaki ʻe Sioapé, pea ko e tali eni naʻá ne fai mai kiate aú.” 31 Naʻe pehē ange leva ʻe he tuʻí kiate ia: “Fai ki he meʻa tofu pē naʻá ne leaʻakí; taaʻi ia pea tanu ia pea toʻo ai meiate au pea mei he fale ʻo ʻeku tamaí ʻa e toto naʻe lilingi taʻehanoʻuhinga+ ʻe Sioapé. 32 ʻE fakafoki ʻe Sihova ʻa hono totó ki hono tumuʻaki pē ʻoʻoná, koeʻuhi ʻi he ʻikai ke ʻiloʻi ʻe heʻeku tamai ko Tēvitá, naʻá ne taaʻi ʻo ne tāmateʻi ʻaki ʻa e heletaá ʻa e ongo tangata naʻá na māʻoniʻoni ange mo lelei ange ʻiate ia: Ko ʻĀpina+ ko e foha ʻo Naá, ʻa e ʻeikitau ʻo ʻIsilelí,+ pea mo ʻĀmasa+ ko e foha ʻo Sēteli, ko e ʻeikitau ʻo Siutá.+ 33 Ko hona totó ʻe foki ki he tumuʻaki ʻo Sioapé pea ki he tumuʻaki ʻo hono hakó ʻo taʻengata;+ ka kia Tēvita, ko hono hakó, ko hono falé, pea mo hono taloní, ʻofa ke ʻi ai ʻa e melino meia Sihová ʻo taʻengata.” 34 Pea ko Penaia ko e foha ʻo Sihoiatá naʻá ne ʻalu hake ʻo taaʻi ʻa Sioape pea tāmateʻi ia, pea naʻe tanu ia ʻi hono ʻapi ʻoʻoná ʻi he toafá. 35 Naʻe fakanofo leva ʻe he tuʻí ʻa Penaia+ ko e foha ʻo Sihoiatá ke ne pule ki he kau taú ʻo fetongi ia, pea naʻe fakanofo ʻe he tuʻí ʻa Sātoki+ ko e taulaʻeikí ke ne fetongi ʻa ʻĀpaiata.

36 Pea naʻe fekau atu ʻa e tuʻí kia Simi+ ke ne haʻu peá ne pehē kiate ia: “Langa moʻou ha fale ʻi Selusalema, peá ke nofo ai; ʻoua naʻá ke ʻalu mei ai ki ha toe feituʻu kehe. 37 ʻI he ʻaho te ke ʻalu atu ai peá ke kolosi ʻi he Teleʻa Kitiloné,+ ko e moʻoni te ke mate. Ko ho totó ʻe ʻi ho tumuʻaki pē ʻoʻoú.” 38 Naʻe tali ange ʻe Simi ki he tuʻí: “Ko e meʻa kuó ke folofolaʻakí ʻoku totonu. ʻE fai ʻa hoʻo sevānití ki he meʻa tofu pē kuo folofolaʻaki ʻe hoku ʻeiki ko e tuʻí.” Ko ia naʻe nofo ai ʻa Simi ʻi Selusalema ʻi ha ngaahi ʻaho lahi.

39 Ka ʻi he ʻosi ʻa e taʻu ʻe tolu, ko e toko ua ʻi he kau tamaioʻeiki ʻa Simí naʻá na hola kia ʻĀkisi+ ko e foha ʻo Maaka ko e tuʻi ʻo Katí. ʻI hono tala kia Simi: “Vakai! Ko hoʻo ongo tamaioʻeikí ē ʻokú na ʻi Kati,” 40 naʻe teuteu ʻe Simi ʻi he taimi pē ko iá ʻa ʻene ʻasí peá ne ʻalu ke sio kia ʻĀkisi ʻi Kati, ke kumi ʻa ʻene ongo tamaioʻeikí. ʻI he foki mai ʻa Simi mei Kati mo ʻene ongo tamaioʻeikí, 41 naʻe tala kia Solomone: “Kuo ʻalu atu ʻa Simi mei Selusalema ki Kati pea kuó ne foki mai.” 42 Ko ia naʻe fekau atu ai ʻa e tuʻí kia Simi ke ne haʻu peá ne pehē ange kiate ia: “ʻIkai naʻá ku fakafuakavaʻi koe ʻia Sihova pea fai atu ha fakatokanga kiate koe: ‘ʻI he ʻaho te ke ʻalu atu ai mei heni ki ha toe feituʻu kehé, ko e moʻoni te ke mate’? Pea ʻikai naʻá ke pehē mai kiate au, ‘Ko e meʻa ʻokú ke folofolaʻakí ʻoku totonu; te u talangofua ki ai’?+ 43 Ko e hā leva naʻe ʻikai te ke fai ai ki he fuakava naʻe fai ʻi he ʻao ʻo Sihová pea mo e tuʻutuʻuni naʻá ku fai atu kiate koé?” 44 Naʻe pehē ange leva ʻe he tuʻí kia Simi: “ʻOkú ke ʻiloʻi loto pē ʻa e kovi kotoa naʻá ke fai kia Tēvita ko ʻeku tamaí,+ pea ʻe ʻomi ʻe Sihova ʻa e kovi ko iá ki ho tumuʻaki ʻoʻoú.+ 45 Ka ʻe faitāpuekina+ ʻa Tuʻi Solomone, pea ko e taloni ʻo Tēvitá ʻe fokotuʻu maʻu ʻi he ʻao ʻo Sihová ʻo taʻengata.” 46 Ko ia naʻe tuʻutuʻuni ʻa e tuʻí kia Penaia ko e foha ʻo Sihoiatá, pea naʻá ne ʻalu atu ʻo ne taaʻi ʻa Simi, ʻo ne mate.+

Ko ia naʻe fokotuʻu maʻu ai ʻa e puleʻangá ʻi he nima ʻo Solomoné.+