Nōmipa

1 Pea naʻe folofola ʻa Sihova kia Mōsese ʻi he toafa Sainaí,+ ʻi he tēniti feʻiloakiʻangá,+ ʻi he ʻuluaki ʻaho ʻo e māhina hono uá, ʻi he taʻu hono ua ʻo ʻenau haʻu mei he fonua ko ʻIsipité.+ Naʻá ne pehē: 2 “Fai ha tohi kakai+ ʻo e fuʻu fakataha fakakātoa ʻo e kau ʻIsilelí* ʻo fakatāutaha* ʻo fakatatau ki honau ngaahi fāmilí, ʻo fakatatau ki he ngaahi fale ʻo ʻenau ngaahi tamaí, ʻo fakatatau ki he lau ʻo e ngaahi hingoa ʻo e kakai tangatá kotoa. 3 Te ke lēsisita mo ʻĒlone ʻo fakakulupu* ʻa e faʻahinga kotoa mei he taʻu 20 ʻo faai ki ʻolunga+ ʻa kinautolu ʻe lava ke nau ngāue ʻi he kau tau ʻi ʻIsilelí.

4 “ʻAlu mo kimoua ha tangata ʻe toko taha mei he matakali taki taha; ko e tokotaha taki taha te ne hoko ko ha ʻulumotuʻa ia ʻo e fale ʻo ʻene ngaahi tamaí.+ 5 Ko e ngaahi hingoa eni ʻo e kau tangata ʻa ia te nau tokoni kiate kimouá: Meia Lūpeni, ko ʻIlisua+ ko e foha ʻo Seteuló; 6 meia Simione, ko Selumiela+ ko e foha ʻo Siulisataí; 7 meia Siuta, ko Naʻasoni+ ko e foha ʻo ʻAminatapé; 8 meia ʻĪsaka, ko Netanili+ ko e foha ʻo Suʻá; 9 meia Sepuloni, ko ʻEliapi+ ko e foha ʻo Hēloní; 10 mei he ongo foha ʻo Siosifá: Meia ʻIfalemi,+ ko ʻElisama ko e foha ʻo ʻAmihutí; meia Manase, ko Kāmelieli ko e foha ʻo Petasulí; 11 meia Penisimani, ko ʻApitani+ ko e foha ʻo Kiteoní; 12 meia Tani, ko ʻAhiesa+ ko e foha ʻo ʻAmisataí; 13 meia ʻĀseli, ko Pakiela+ ko e foha ʻo ʻOkelaní; 14 meia Kata, ko ʻEliesafe+ ko e foha ʻo Teuelá; 15 meia Nafitalai, ko ʻAhila+ ko e foha ʻo ʻEinaní. 16 Ko e faʻahinga eni naʻe ui mei he fuʻu fakatahá. Ko e ngaahi ʻeiki+ kinautolu ʻo e ngaahi matakali ʻo ʻenau ngaahi tamaí, ko e ngaahi ʻulu ʻo e laui afe ʻo ʻIsilelí.”+

17 Ko ia naʻe ʻave ʻe Mōsese mo ʻĒlone ʻa e kau tangata ko eni ʻa ia kuo fakahaaʻi honau hingoá. 18 Naʻa nau fakatahatahaʻi ʻa e fuʻu fakatahá kotoa ʻi he ʻuluaki ʻaho ʻo e māhina hono uá, koeʻuhí ke lēsisita tāutaha kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí, mei he taʻu 20 ʻo faai ki ʻolunga,+ 19 ʻo hangē tofu pē ko e tuʻutuʻuni ʻa Sihova kia Mōsesé. Ko ia naʻá ne lēsisita kinautolu ʻi he toafa Sainaí.+

20 Ko e ngaahi foha ʻo Lūpení, ʻa e hako ʻo e ʻuluaki foha ʻo ʻIsilelí,+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau tāutaha kinautolu, 21 pea ko e tokolahi naʻe lēsisita ʻi he matakali ʻo Lūpení ko e toko 46,500.

22 Ko e hako ʻo Simioné+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau tāutaha kinautolu, 23 pea ko e tokolahi naʻe lēsisita ʻi he matakali ʻo Simioné ko e toko 59,300.

24 Ko e hako ʻo Katá+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 25 pea ko e tokolahi naʻe lēsisita ʻi he matakali ʻo Katá ko e toko 45,650.

26 Ko e hako ʻo Siutá+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 27 pea ko e tokolahi naʻe lēsisita ʻi he matakali ʻo Siutá ko e toko 74,600.

28 Ko e hako ʻo ʻĪsaká+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 29 pea ko e tokolahi naʻe lēsisita ʻi he matakali ʻo ʻĪsaká ko e toko 54,400.

30 Ko e hako ʻo Sepuloní+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 31 pea ko e tokolahi naʻe lēsisita ʻi he matakali ʻo Sepuloní ko e toko 57,400.

32 Ko e hako ʻo Siosifa fakafou ʻia ʻIfalemí+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 33 pea ko e tokolahi naʻe lēsisita ʻi he matakali ʻo ʻIfalemí ko e toko 40,500.

34 Ko e hako ʻo Manasé+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 35 pea ko e tokolahi naʻe lēsisita ʻi he matakali ʻo Manasé ko e toko 32,200.

36 Ko e hako ʻo Penisimaní+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 37 pea ko e tokolahi naʻe lēsisita ʻi he matakali ʻo Penisimaní ko e toko 35,400.

38 Ko e hako ʻo Taní+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 39 pea ko e tokolahi naʻe lēsisita ʻi he matakali ʻo Taní ko e toko 62,700.

40 Ko e hako ʻo ʻĀselí+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 41 pea ko e tokolahi naʻe lēsisita ʻi he matakali ʻo ʻĀselí ko e toko 41,500.

42 Ko e hako ʻo Nafitalaí+ naʻe fakahokohoko kinautolu ʻo fakatatau ki honau hingoá, ki honau fāmilí, pea ki he ngaahi fale ʻo ʻenau ngaahi tamaí. Ko e kakai tangata kotoa pē mei he taʻu 20 ʻo faai ki ʻolunga ʻa ia naʻe lava ke nau kau ʻi he taú naʻe lau kinautolu, 43 pea ko e tokolahi naʻe lēsisita ʻi he matakali ʻo Nafitalaí ko e toko 53,400.

44 Naʻe lēsisita ʻa e faʻahingá ni ʻe Mōsese fakataha mo ʻĒlone pea mo e ngaahi ʻeiki ʻe toko 12 ʻo ʻIsilelí, ʻo nau taki taha fakafofongaʻi ʻa e fale ʻo ʻene ngaahi tamai. 45 Ko e kotoa ʻo e kau ʻIsilelí mei he taʻu 20 ʻo faai ki ʻolunga ʻa ia naʻe lava ke nau kau ʻi he taú ʻi ʻIsilelí naʻe lēsisita kinautolu ʻo fakatatau ki he fale ʻo ʻenau ngaahi tamaí, 46 pea ko e tokolahi fakakātoa naʻe lēsisitá ko e toko 603,550.+

47 Ka ko e kau Līvaí+ naʻe ʻikai ke lēsisita kinautolu ʻi honau lotolotongá ʻo fakatatau ki he matakali ʻo ʻenau ngaahi tamaí.+ 48 Ko ia naʻe tala ʻe Sihova kia Mōsese: 49 “Ko e matakali pē ʻo Līvaí ʻe ʻikai te ke lēsisitá, pea ʻe ʻikai te ke fakakau ʻa honau tokolahí ki he kau ʻIsileli kehé.+ 50 Te ke fakanofo ʻa e kau Līvaí ke nau tokangaʻi ʻa e tāpanekale ʻo e Fakamoʻoní+ mo e kotoa ʻo hono ngaahi naunaú pea mo e meʻa kotoa pē ʻoku kau ki aí.+ Te nau fua ʻa e tāpanekalé mo e kotoa ʻo hono ngaahi naunaú,+ pea te nau ngāue ʻi ai,+ pea te nau ʻapitanga takatakai ʻi he tāpanekalé.+ 51 Ko e taimi pē ʻe hiki ai ʻa e tāpanekalé, ʻe veteki ia+ ʻe he kau Līvaí; pea ko e taimi ko ē ʻe toe fokotuʻu ai ʻa e tāpanekalé, ʻe fokotuʻu ia ʻe he kau Līvaí; pea ko ha tokotaha taʻefakamafaiʻi* pē ʻoku haʻu ʻo ofi ki ai ʻoku totonu ke tāmateʻi ia.+

52 “Ko e tokotaha ʻIsileli taki taha te ne fokotuʻu hono tēniti ʻi hono ʻapitanga kuo vaheʻí, ko e tangata taki taha ʻo fakatatau ki hono vāhenga matakali ʻe tolú*+ ʻo fakatatau ki heʻenau ngaahi kulupú.* 53 Pea ko e kau Līvaí te nau ʻapitanga takatakai ʻi he tāpanekale ʻo e Fakamoʻoní, koeʻuhí ke ʻoua naʻa langaʻi ha houhau ki he fuʻu fakataha ʻo e kau ʻIsilelí;+ pea ko e kau Līvaí kuo pau ke ʻonautolu ʻa e fatongia ko hono tokangaʻi ʻa e* tāpanekale ʻo e Fakamoʻoní.”+

54 Ko e kakai ʻo ʻIsilelí naʻa nau fai ʻa e meʻa kotoa pē naʻe tuʻutuʻuni ʻe Sihova kia Mōsesé. Naʻa nau fai ʻa e meʻa tofu pē ko iá.