Nōmipa

4 Naʻe folofola leva ʻa Sihova kia Mōsese mo ʻĒlone, ʻo pehē: 2 “ʻOku totonu ke fai ha tohi kakai ʻo e ngaahi foha ʻo Kōhaté+ mei he lotolotonga ʻo e ngaahi foha ʻo Līvaí, ʻi honau ngaahi fāmilí pea fakatatau ki he ngaahi fale ʻo ʻenau ngaahi tamaí, 3 ʻa e faʻahinga kotoa mei he taʻu 30+ ki he 50+ ʻa ia ʻoku nau ʻi he kulupu kuo vaheʻi ke ngāue ʻi he tēniti feʻiloakiʻangá.+

4 “Ko e ngāue eni ʻa e ngaahi foha ʻo Kōhaté ʻi he tēniti feʻiloakiʻangá.+ Ko ha meʻa mātuʻaki toputapu ia: 5 ʻE hū ki loto ʻa ʻĒlone mo hono ongo fohá* ʻi he taimi ʻe mavahe ai ʻa e ʻapitangá ʻo tuku hifo ʻa e puipui vahevahé+ pea ʻufiʻufiʻi ʻaki ia ʻa e ʻaʻake+ ʻo e Fakamoʻoní.* 6 Te nau ʻai ha ʻufiʻufi kiliʻisila ʻi ʻolunga ai pea folahi hifo mei ʻolunga ai ha tupenu lanu pulū ʻataʻatā pea fakahū ʻa hono ongo vaʻakau haʻamó+ ki hona tuʻuʻangá.

7 “Te nau folahi foki ha tupenu pulū ʻi he funga tēpile ʻo e mā foakí,+ pea te nau hili ki ai ʻa e ngaahi tisí, ko e ngaahi ipú, ko e ngaahi poulú, pea mo e ngaahi sioki ʻo e feilaulau inú;+ ʻoku totonu ke kei tuku pē ai ʻa e mā ʻoku foaki tuʻumaʻú.+ 8 Te nau folahi ʻi ʻolunga ai ha tupenu kula ʻahoʻaho pea ʻufiʻufiʻi ia ʻaki ha ʻufiʻufi kiliʻisila pea fakahū ʻa hono ongo vaʻakau haʻamó+ ki hona tuʻuʻangá. 9 Te nau toʻo leva ha tupenu pulū ʻo ʻufiʻufiʻaki ʻa e tuʻunga-māmá,+ fakataha mo hono ngaahi māmá,+ ko hono ngaahi tongí, ko hono ngaahi tānakiʻanga ʻo e vavae maama ʻosiʻosí,+ mo hono ngaahi ʻaiʻanga lolo kotoa pē ʻoku ngāueʻaki ki hono tokangaʻi iá. 10 Te nau kofukofu ia mo hono ngaahi naunaú kotoa ʻaki ha ʻufiʻufi kiliʻisila pea ʻai ia ki ha vaʻakau haʻamo. 11 Pea te nau folahi ha tupenu pulū ʻi he funga ʻōlita koulá,+ ʻo ʻufiʻufi ia ʻaki ha ʻufiʻufi kiliʻisila, pea fakahū hono ongo vaʻakau haʻamó+ ki hona tuʻuʻangá. 12 Te nau toʻo leva ʻa e kotoa ʻo e ngaahi naunau+ ngāue ʻa ia ʻoku nau ngāueʻaki maʻu pē ʻi he potu toputapú ʻo ʻai ia ʻi ha tupenu pulū pea ʻufiʻufiʻaki ia ha ʻufiʻufi kiliʻisila pea ʻai ia ki ha vaʻakau haʻamo.

13 “ʻOku totonu ke nau toʻo ʻa e efuefú* mei he ʻōlitá+ pea folahi ʻi ʻolunga ai ha tupenu fulufuluʻisipi vāleti. 14 Te nau hili ki ai ʻa hono ngaahi naunau kotoa pē ʻoku ngāueʻaki ʻi heʻenau ngāue ʻi he ʻōlitá: ʻA e ngaahi ʻaiʻanga malalá, ko e ngaahi fuʻu huhú, ko e ngaahi sāvoló, pea mo e ngaahi poulú, ʻa e ngaahi naunau kotoa pē ʻo e ʻōlitá;+ pea te nau folahi ʻi ʻolunga ai ha ʻufiʻufi kiliʻisila pea fakahū ʻa hono ongo vaʻakau haʻamó+ ki hona tuʻuʻangá.

15 “Ko ʻĒlone mo hono ongo fohá kuo pau ke nau fakaʻosi ʻa hono ʻufiʻufi ʻo e potu toputapú+ mo e ngaahi naunau kotoa pē ʻo e potu toputapú ʻi he taimi ʻe mavahe ai ʻa e ʻapitangá. ʻE haʻu leva ʻa e ngaahi foha ʻo Kōhaté ke fua ia,+ ka kuo pau ke ʻoua naʻa nau ala ki he potu toputapú telia naʻa nau mate.+ Ko e ngaahi meʻá ni ko e fatongia ia ʻo e* ngaahi foha ʻo Kōhaté ʻi he felāveʻi mo e tēniti feʻiloakiʻangá.

16 “Ko e fatongia ʻo ʻEliesa+ ko e foha ʻo ʻĒlone ko e taulaʻeikí ke tokangaʻi ʻa e lolo ke uloʻakí,+ ko e ʻinisēnisi namu-kakalá,+ ko e feilaulau meʻakai* tuʻumaʻú, pea mo e lolo paní.+ Te ne tokangaʻi ʻa e tāpanekalé kotoa mo e meʻa kotoa ʻoku ʻi aí, ʻo kau ai ʻa e potu toputapú mo hono ngaahi naunaú.”

17 Naʻe toe folofola ʻa Sihova kia Mōsese mo ʻĒlone, ʻo pehē: 18 “ʻOua naʻa tuku ke tuʻusi ʻa e matakali ʻo e ngaahi fāmili ʻo e haʻa Kōhaté+ mei he lotolotonga ʻo e kau Līvaí. 19 Kae fai ʻa e meʻá ni maʻanautolu ke nau moʻui ai pē ʻo ʻikai mate koeʻuhí ko ʻenau fakaofiofi ki he ngaahi meʻa mātuʻaki toputapú.+ ʻE haʻu ʻa ʻĒlone mo hono ongo fohá ʻo vaheʻi kinautolu taki taha ki heʻene ngāué mo e meʻa te ne fuá. 20 Kuo pau ke ʻoua naʻa nau haʻu ʻo sio ki he ngaahi meʻa toputapú naʻa mo e ʻi ha mōmeniti, telia naʻa nau mate.”+

21 Naʻe folofola leva ʻa Sihova kia Mōsese, ʻo pehē: 22 “ʻOku totonu ke fai ha tohi kakai ʻo e ngaahi foha ʻo Kēsoní+ ʻo fakatatau ki he ngaahi fale ʻo ʻenau ngaahi tamaí mo honau ngaahi fāmilí. 23 Te ke lēsisita ʻa e faʻahinga kotoa mei he taʻu 30 ki he 50 ʻa ia ʻoku nau ʻi he kulupu kuo vaheʻi ke ngāue ʻi he tēniti feʻiloakiʻangá. 24 Ko e meʻa eni ʻoku vaheʻi ki he ngaahi fāmili ʻo e haʻa Kēsoní ke nau tokangaʻí pea ke nau fuá:+ 25 Te nau fua ʻa e ngaahi tupenu tēniti ʻo e tāpanekalé,+ mo e tēniti feʻiloakiʻangá, ko hono ngaahi ʻufiʻufí mo e ʻufiʻufi kiliʻisila ʻoku ʻi ʻolunga aí,+ ko e puipui ʻo e hūʻanga ʻo e tēniti feʻiloakiʻangá,+ 26 ko e puipui ʻo e lotoʻaá,+ ko e puipui ʻo e hūʻanga ʻo e lotoʻaá+ ʻa ia ʻoku takatakai ki he tāpanekalé mo e ʻōlitá, ko honau ngaahi afo tēnití mo honau ngaahi naunau kotoa mo e meʻa kotoa pē ʻoku ngāueʻaki ʻi he ngāue ʻi aí. Ko e ngāue eni kuo vaheʻi kiate kinautolú. 27 Ko e ngāue mo e ngaahi kavenga kotoa pē ʻa e haʻa Kēsoní+ ʻoku totonu ke tokangaʻi ia ʻe ʻĒlone mo hono ongo fohá; te mou vaheʻi ʻa e ngaahi kavenga kotoa ko ení ko honau fatongiá ia. 28 Ko e ngāue eni ʻe fakahoko ʻe he ngaahi fāmili ʻo e haʻa Kēsoní ʻi he tēniti feʻiloakiʻangá,+ pea ko honau ngaahi fatongiá ʻe ʻi he malumalu ia ʻo e tataki ʻa ʻĪtama+ ko e foha ʻo ʻĒlone ko e taulaʻeikí.

29 “Ko e meʻa ki he ngaahi foha ʻo Mēlalí,+ te ke lēsisita kinautolu ʻi honau fāmilí pea fakatatau ki he fale ʻo ʻenau ngaahi tamaí. 30 Te ke lēsisita kinautolu mei he taʻu 30 ki he 50, ʻa e faʻahinga kotoa ʻi he kulupu kuo vaheʻi ki he ngāue ʻi he tēniti feʻiloakiʻangá. 31 Ko e meʻa eni ʻa ia ko honau fatongia ia ke fua+ ʻi he felāveʻi mo ʻenau ngāue ʻi he tēniti feʻiloakiʻangá: Ko e ngaahi tokotuʻu tapafā lōloa+ ʻo e tāpanekalé, ko hono ngaahi vaʻakaú,+ ko hono ngaahi poú,+ ko hono ngaahi tuʻuʻangá;+ 32 ko e ngaahi pou+ ʻo e lotoʻaá takatakai, ko honau ngaahi tuʻuʻangá,+ ko honau ngaahi pine tēnití,+ mo honau ngaahi afo tēnití fakataha mo honau naunau kotoa pē mo e ngāue kotoa pē naʻe felāveʻi mo e ngaahi meʻá ni. Te mou vaheʻi kiate kinautolu ʻi honau hingoá ʻa e naunau ʻa ia ko honau fatongia ia ke fuá. 33 ʻE peheni ʻa e anga ʻo e ngāue ʻa e ngaahi fāmili ʻo e ngaahi foha ʻo Mēlalí+ ʻi he tēniti feʻiloakiʻangá, ʻi he malumalu ʻo e tataki ʻa ʻĪtama ko e foha ʻo ʻĒlone ko e taulaʻeikí.”+

34 Naʻe lēsisita leva ʻe Mōsese mo ʻĒlone pea mo e ngaahi ʻeiki+ ʻo e fuʻu fakatahá ʻa e ngaahi foha ʻo e haʻa Kōhaté+ ʻi honau ngaahi fāmilí pea fakatatau ki he fale ʻo ʻenau ngaahi tamaí, 35 ʻa e faʻahinga kotoa mei he taʻu 30 ki he 50 ʻa ia naʻe ʻi he kulupu kuo vaheʻi ki he ngāue ʻi he tēniti feʻiloakiʻangá.+ 36 Ko e fakakātoa ʻo e faʻahinga naʻe lēsisita ʻi honau ngaahi fāmilí ko e toko 2,750.+ 37 Ko e faʻahinga eni naʻe lēsisita mei he ngaahi fāmili ʻo e haʻa Kōhaté, ʻa e faʻahinga kotoa naʻe ngāue ʻi he tēniti feʻiloakiʻangá. Naʻe lēsisita kinautolu ʻe Mōsese mo ʻĒlone ʻi he tuʻutuʻuni ʻa Sihova fakafou ʻia Mōsesé.+

38 Ko e ngaahi foha ʻo Kēsoní+ naʻe lēsisita kinautolu ʻi honau ngaahi fāmilí pea fakatatau ki he fale ʻo ʻenau ngaahi tamaí, 39 ʻa e faʻahinga kotoa mei he taʻu 30 ki he 50 ʻa ia naʻe ʻi he kulupu kuo vaheʻi ki he ngāue ʻi he tēniti feʻiloakiʻangá. 40 Ko e fakakātoa ʻo e faʻahinga naʻe lēsisita ʻi honau ngaahi fāmilí pea fakatatau ki he fale ʻo ʻenau ngaahi tamaí ko e toko 2,630.+ 41 Ko e lēsisita eni ʻo e ngaahi fāmili ʻo e ngaahi foha ʻo Kēsoní, ʻa e faʻahinga kotoa naʻe ngāue ʻi he tēniti feʻiloakiʻangá. Naʻe ʻai ʻe Mōsese mo ʻĒlone ke lēsisita kinautolu ʻi he tuʻutuʻuni ʻa Sihová.+

42 Ko e ngaahi foha ʻo Mēlalí naʻe lēsisita kinautolu ʻi honau ngaahi fāmilí pea fakatatau ki he fale ʻo ʻenau ngaahi tamaí, 43 ʻa e faʻahinga kotoa mei he taʻu 30 ki he 50 ʻa ia naʻe ʻi he kulupu kuo vaheʻi ki he ngāue ʻi he tēniti feʻiloakiʻangá.+ 44 Ko e fakakātoa ʻo e faʻahinga ʻiate kinautolu naʻe lēsisita ʻi honau ngaahi fāmilí ko e toko 3,200.+ 45 Ko e lēsisita eni ʻo e ngaahi fāmili ʻo e ngaahi foha ʻo Mēlalí, ʻa ia naʻe lēsisita ʻe Mōsese mo ʻĒlone ʻi he tuʻutuʻuni ʻa Sihova fakafou ʻia Mōsesé.+

46 Naʻe lēsisita ʻe Mōsese mo ʻĒlone pea mo e ngaahi ʻeiki ʻo ʻIsilelí ʻa e kotoa ʻo e kau Līvai ko ení ʻi honau ngaahi fāmilí pea fakatatau ki he ngaahi fale ʻo ʻenau ngaahi tamaí; 47 naʻa nau mei he taʻu 30 ki he 50, pea naʻe vaheʻi kotoa kinautolu ke nau ngāue mo fua ʻa e ngaahi kavenga felāveʻi mo e tēniti feʻiloakiʻangá.+ 48 Ko e fakakātoa ʻo e faʻahinga naʻe lēsisitá ko e toko 8,580.+ 49 Naʻe lēsisita kinautolu ʻi he tuʻutuʻuni ʻa Sihova fakafou ʻia Mōsesé, ʻa e tokotaha taki taha ʻo fakatatau ki he ngāue kuo vaheʻi kiate iá mo ʻene kavengá; naʻe lēsisita kinautolu ʻo hangē tofu pē ko e tuʻutuʻuni ʻa Sihova kia Mōsesé.