ʻIsikeli

6 “‘Ka ʻo kapau ʻoku sio ʻa e tangata leʻó ki he hoko mai ʻa e heletaá pea ʻikai te ne ifiʻi ʻa e meʻaifí+ pea ʻikai maʻu ai ʻe he kakaí ha fakatokanga pea hoko mai ʻa e heletaá ʻo ne toʻo ʻa e moʻui ʻa ha taha ʻo kinautolu, ʻe mate ʻa e tokotaha ko iá ʻi heʻene faihala pē ʻaʻaná, ka te u ʻeke ʻa hono totó ki he tangata leʻó.’*+

7 “Ko e meʻa kiate koé, foha ʻo e tangata, kuó u fakanofo koe ko ha tangata leʻo ki he fale ʻo ʻIsilelí; pea ʻi hoʻo fanongo ki ha lea mei hoku ngutú, kuo pau ke ke ʻoatu ʻeku fakatokanga ko ení kiate kinautolu.+ 8 ʻI heʻeku pehē ki ha tokotaha fulikivanu, ‘ʻE tokotaha fulikivanu, kuo pau ke ke mate,’+ ka ʻoku ʻikai te ke lea ʻo fai ha fakatokanga ki he tokotaha fulikivanú ke liliu ʻa hono ʻalungá, te ne mate koeʻuhi ko ʻene faihala pē ʻaʻaná he ko ha tangata fulikivanu ia,+ ka te u ʻeke ʻa hono totó kiate koe. 9 Ka ʻo kapau te ke fai ha fakatokanga ki ha tokotaha fulikivanu ke tafoki mei hono ʻalungá pea ʻokú ne fakafisi ke liliu ʻa hono ʻalungá, te ne mate ʻi heʻene faihalá,+ ka ko hono moʻoní te ke fakahaofi ʻe koe ʻa hoʻo moʻuí tonu.+

10 “Pea ko koe, foha ʻo e tangata, lea ki he fale ʻo ʻIsilelí, ‘Kuo mou pehē: “Ko ʻetau angatuʻú mo ʻetau angahalá kuó ne fakamafasiaʻi kitautolu, ʻo ne ʻai kitautolu ke tau kaʻanga;+ ko ia ʻe lava fēfē ke tau kei moʻui?”’+ 11 Tala kiate kinautolu, ‘“ʻOku ou fuakava ʻiate au,”* ko e fakahaaʻi ia ʻe he ʻEiki Hau ko Sihová, “ʻoku ʻikai te u leleiʻia ʻi he mate ʻa ha tokotaha fulikivanu,+ ka ke liliu ʻe he tokotaha fulikivanú ʻa hono ʻalungá+ ka ne moʻui.+ Mou tafoki, mou tafoki mei homou ngaahi ʻalunga koví,+ he ko e hā ke mou mate ai, ʻe fale ʻo ʻIsileli?”’+

12 “Pea ko koe, foha ʻo e tangata, tala ki he ngaahi foha ʻo ho kakaí, ‘Ko e māʻoniʻoni ʻa e tangata māʻoniʻoní heʻikai te ne fakahaofi ia ʻi heʻene angatuʻú;+ pea ko e anga-fulikivanu ʻa e tangata fulikivanú heʻikai te ne ʻai ia ke ne humu ʻi heʻene tafoki mei heʻene anga-fulikivanú;+ pea heʻikai lava ʻe he māʻoniʻoni ʻa ha taha ʻo ʻai ia ke ne moʻui ai pē koeʻuhi ko ʻene māʻoniʻoní ʻi he ʻaho ʻo ʻene faiangahalá.+ 13 ʻI haʻaku pehē ki he tokotaha māʻoniʻoní: “Kuo pau ke ke moʻui,” pea ʻokú ne falala ki heʻene māʻoniʻoni ʻaʻaná ʻo ne fai ha meʻa ʻoku hala,*+ heʻikai ha taha ʻo ʻene ngaahi tōʻonga māʻoniʻoní ʻe manatua, ka te ne mate koeʻuhi ko e hala kuó ne faí.+

14 “‘Pea ʻi haʻaku pehē ki he tokotaha fulikivanú: “Kuo pau ke ke mate,” peá ne tafoki mei heʻene angahalá ʻo ne fai ʻa e meʻa ʻoku totonu mo māʻoniʻoní,+ 15 pea fakafoki ʻe he tokotaha fulikivanú ʻa e meʻa maluʻí+ pea totongi fakafoki ʻa e meʻa naʻe kaihaʻasí,+ peá ne ʻaʻeva ʻi he ngaahi tuʻutuʻuni ʻo e moʻuí ʻo ʻikai te ne fai ha meʻa ʻoku hala, kuo pau ke ne moʻui ai pē.+ Heʻikai te ne mate. 16 Heʻikai ha taha ʻo e ngaahi angahala naʻá ne faí ʻe kei lau kiate ia.*+ He ʻi hono fai ʻa e meʻa ʻoku totonu mo māʻoniʻoní, kuo pau ke ne moʻui ai pē.’+

17 “Ka kuo pehē ʻe ho kakaí, ‘Ko e founga ʻa Sihová ʻoku taʻetotonu,’ lolotonga ia ko ʻenau foungá ʻoku taʻetotonú.

18 “ʻI he taimi ʻoku liʻaki ai ʻe he tokotaha māʻoniʻoní ʻa ʻene māʻoniʻoní peá ne fai ʻa e meʻa ʻoku halá, kuo pau ke ne mate koeʻuhí ko ia.+ 19 Ka ʻi he taimi ʻe tafoki ai ʻa e tokotaha fulikivanú mei heʻene anga-fulikivanú ʻo ne fai ʻa e meʻa ʻoku totonu mo māʻoniʻoní, te ne moʻui ai pē ʻi heʻene fai peheé.+

20 “Ka kuo mou pehē, ‘Ko e founga ʻa Sihová ʻoku taʻetotonu.’+ Te u fakamāuʻi ʻa e tokotaha taki taha ʻo kimoutolu ʻo fakatatau ki hono ngaahi ʻalungá, ʻe fale ʻo ʻIsileli.”

21 ʻI he ofi ke ngata ʻa e taʻu hono 12 ʻo hono ʻave fakamālohi kimautolú, ʻi he māhina hono hongofulú, ʻi he ʻaho hono nima ʻo e māhiná, naʻe ʻi ai ha tangata naʻe hola mei Selusalema ʻo ne haʻu kiate au+ ʻo pehē mai: “Kuo taaʻi ʻa e koló!”+

22 Pea ʻi he efiafi ki muʻa pea haʻu ʻa e tangata naʻe holá, naʻe hoko mai ʻa e nima ʻo Sihová kiate au, pea naʻá ne fakaava ʻa hoku ngutú ki muʻa ke aʻu mai ʻa e tangatá kiate au ʻi he pongipongi hono hokó. Ko ia naʻe ava ʻa hoku ngutú, pea naʻe ʻikai te u kei noa.+

23 Pea naʻe hoko mai ʻa e folofola ʻa Sihová kiate au, ʻo pehē: 24 “Foha ʻo e tangata, ko e kakai ʻo e ngaahi feituʻu maumaú ni+ ʻoku nau pehē ʻo fekauʻaki mo e fonua ko ʻIsilelí, ‘Ko ʻĒpalahamé ko ha tangata pē ʻe toko taha, ka naʻá ne maʻu ʻe ia ʻa e fonuá.+ Ka ko kitautolú ʻoku tau tokolahi; ko hono moʻoní kuo foaki mai ʻa e fonuá kiate kitautolu ko hotau tofiʻa.’

25 “Ko ia ai, ke ke pehē kiate kinautolu, ‘Ko e folofola eni ʻa e ʻEiki Hau ko Sihová: “ʻOku mou kai ʻa e meʻakaí fakataha mo e toto,+ pea ʻoku hanga homou matá ki hoʻomou ngaahi ʻaitoli fakalieliá,* pea ʻoku mou hanganaki lingitoto.+ Ko ia ko e hā ke mou maʻu ai ʻa e fonuá? 26 Kuo mou falala ki hoʻomou heletaá,+ ʻoku mou kau ʻi he ngaahi tōʻonga fakalielia, pea kuo ʻuliʻi ʻe he tokotaha taki taha ʻo kimoutolu ʻa e uaifi ʻo hono kaungāʻapí.+ Ko ia ko e hā ke mou maʻu ai ʻa e fonuá?”’+

27 “Ko e meʻa eni te ke leaʻaki kiate kinautolú, ‘Ko e folofola eni ʻa e ʻEiki Hau ko Sihová: “ʻOku ou fuakava ʻiate au,* ko e faʻahinga ʻoku nofo ʻi he ngaahi feituʻu maumaú te nau tō ʻi he heletā; ko e faʻahinga ʻoku ʻi he manafá, te u foaki kinautolu ko ha meʻakai ki he fanga manu fekaí; pea ko e faʻahinga ʻoku nau ʻi he ngaahi kolotaú mo e ngaahi ʻaná te nau mate ʻi he mahaki.+ 28 Te u ʻai ʻa e fonuá ke hoko ʻo mātuʻaki maomaonganoa,+ pea fakangata ʻa ʻene mātuʻaki loto-pōlepolé, pea ʻe hoko ʻa e ngaahi ʻotu moʻunga ʻo ʻIsilelí ʻo lala,+ ʻo ʻikai ha taha ʻe fou ai. 29 Pea kuo pau ke nau ʻilo ko Sihova au ʻi heʻeku ʻai ʻa e fonuá ke mātuʻaki maomaonganoa+ koeʻuhi ko e ngaahi meʻa fakalielia kotoa kuo nau faí.”’+

30 “Ko e meʻa kiate koé, foha ʻo e tangata, ʻoku fetalanoaʻaki ho kakaí ʻo fekauʻaki mo koe ʻi he ngaahi veʻe ʻaá pea ʻi he ngaahi hūʻanga ʻo e ngaahi falé.+ ʻOku nau fepehēʻaki, ʻa e tokotaha taki taha ki hono tokoua, ‘Mou haʻu, pea tuku ke tau fanongo ki he folofola ʻoku haʻu meia Sihová.’ 31 Te nau matua mai ʻo tangutu ʻi ho ʻaó ʻi he tuʻunga ko hoku kakai; pea te nau fanongo ki hoʻo ngaahi leá, ka heʻikai te nau fai ki ai.+ He ʻoku nau fakahekehekeʻi koe ʻaki honau ngutú,* ka ko honau lotó ʻoku mānumanu ki he meʻa ʻoku maʻu ʻi he taʻefaitotonú. 32 Vakai! ʻOkú ke hangē kiate kinautolu ha foʻi hiva ʻeva, ʻoku hivaʻi ʻaki ha leʻo lelei pea mālie hono taá ʻi ha meʻalea filo. Te nau fanongo ki hoʻo ngaahi leá, ka heʻikai ha taha te ne fai ki ai. 33 Pea ʻi he taimi ʻe hoko ai iá—pea ʻe hoko ia—kuo pau ke nau ʻilo naʻe ʻi ai ha palōfita ʻi honau lotolotongá.”+