Ki he Kau Loma

7 ʻOku ʻikai koā te mou ʻiloʻi, fanga tokoua, (he ko ʻeku leá ki he faʻahinga ʻoku nau ʻiloʻi ʻa e laó) ko e Laó ʻoku pule ia ki ha tangata lolotonga ʻene kei moʻuí? 2 Hangē ko ení, ko ha fefine mali ʻoku haʻisia ia ʻe he laó ki hono husepānití lolotonga ʻa e kei moʻui ʻa e husepānití; ka ʻo kapau ʻe mate ʻa hono husepānití, ʻoku fakaʻatā leva ia mei he lao ʻa hono husepānití.+ 3 Ko ia ai, lolotonga ʻa e kei moʻui ʻa hono husepānití, ʻe ui ia ko ha fefine tono kapau naʻá ne hoko ko ha uaifi ʻo ha tangata kehe.+ Ka ʻo kapau ʻe mate hono husepānití, ʻokú ne ʻatā leva mei he lao ʻa hono husepānití, ko ia ʻoku ʻikai ai ko ha fefine tono ia kapau ʻokú ne hoko ko ha uaifi ʻo ha tangata kehe.+

4 Ko ia ʻe hoku fanga tokoua, naʻa mou haʻisia foki ki he Laó.* Kae fakafou ʻi he feilaulau ʻa e Kalaisí, ʻoku ʻikai ai te mou kei haʻisia,+ ka ʻi hono kehé ʻoku mou hoko ko e meʻa ʻaʻana, ʻa e tokotaha naʻe toetuʻú,+ koeʻuhí ke tau fakatupu ai ʻa e fua ki he lāngilangi ʻo e ʻOtuá.+ 5 He ʻi he taimi naʻa tau moʻui ai ʻo fakatatau ki he kakanó, ko e ngaahi holi ʻoku taki atu ki he angahalá ʻa ia naʻe fakaeʻa ʻe he Laó naʻe ngāue ia ʻi hotau sinó* ʻo tau fakatupu ai ʻa e fua ʻoku iku ai ki he mate.+ 6 Ka ʻi he taimi ní ʻoku ʻikai te tau kei haʻisia ki he Laó,+ ko ia ai, ʻe lava ke tau hoko ko e kau pōpula ʻi ha founga foʻou, ʻa ia ko e muimui ki he tataki ʻa e laumālie māʻoniʻoní,+ ʻo ʻikai ʻi he founga motuʻá ko e muimui ʻi he tataki ʻa e lao kuo tohí.+

7 Ko e hā leva haʻatau lau? ʻOku angahala ʻa e Laó? ʻIkai ʻaupito! Ko e moʻoni, naʻe ʻikai te u mei hoko ʻo ʻilo ʻa e angahalá ka ne taʻeʻoua ʻa e Laó.+ Ko e fakatātaá, naʻe ʻikai te u mei ʻilo ʻa e mānumanú ka ne taʻeʻoua ʻa e pehē ʻe he Laó: “Kuo pau ke ʻoua naʻá ke mānumanu.”+ 8 Ka naʻe ngāueʻaki ʻe he angahalá ʻa e laó ʻo ne fakatupunga ʻiate au ʻa e faʻahinga mānumanu kotoa pē, he ʻi he ʻikai ʻi ai ha laó naʻe ʻikai ha mālohi ʻo e angahalá.+ 9 Ko hono moʻoní, ki muʻa ke ʻi ai ha Laó naʻá ku moʻui. Ka ʻi he aʻu mai ʻa e Laó, naʻe toe moʻui mai ʻa e angahalá, pea naʻá ku mate ai.+ 10 Pea ko e fekau ko eni ʻa ia naʻe fakataumuʻa ke taki atu ki he moʻuí,+ naʻá ku ʻilo ʻoku taki atu ia ki he maté. 11 He kuo ngāueʻaki ʻe he angahalá ʻa e Laó ke ne fakataueleʻi au pea fai ai mo hoku tāmateʻí. 12 Ko ia ko e Laó ʻiate ia pē ʻoku māʻoniʻoni, pea ko e fekaú ʻoku māʻoniʻoni mo totonu mo lelei.+

13 Ko ia ai, naʻe tāmateʻi au ʻe he meʻa ʻoku leleí?* ʻIkai ʻaupito! Ka ko e angahalá ia naʻá ne tāmateʻi aú. Fakafou ʻi he meʻa ʻoku leleí naʻe ʻomai ai ʻe he angahalá ʻa e maté kiate au+ koeʻuhi ke fakaeʻa ai ʻa e angahalá. Pea ʻoku fakaeʻa ʻe he laó ʻa e kovi ʻaupito ʻa e angahalá.+ 14 He ʻoku tau ʻiloʻi ko e Laó ʻoku fakalaumālie ia, ka ko aú ʻoku ou fakakakano, pea kuo fakatau atu au ke hoko ko e pōpula ʻa e angahalá.+ 15 He ʻoku ʻikai te u mahinoʻi ʻa e meʻa ʻoku ou faí. He ʻoku ʻikai te u fai ʻa e meʻa ʻoku ou loto ki aí, ka ʻoku ou fai ʻa e meʻa ʻoku ou fehiʻa aí. 16 Kae kehe, ʻoku ou tali ko e Laó ʻoku lelei, ka ʻoku kei ʻikai pē ke u fai ʻa e meʻa lelei ʻoku ou loto ke faí. 17 Ka ko eni ʻoku ʻikai ko e tokotaha au ʻoku ou kei fai iá, ka ko e angahala ko ia ʻoku nofo ʻiate aú.+ 18 He ʻoku ou ʻiloʻi ko e meʻa kiate aú, ʻa ia, ʻi hoku kakanó, ʻoku ʻikai nofo ai ha meʻa ʻoku lelei; he ʻoku ou maʻu ʻa e holi ke fai ʻa e meʻa ʻoku leleí kae ʻikai ko e malava ke fakahoko iá.+ 19 He ʻoku ʻikai te u fai ʻa e meʻa lelei ʻoku ou loto ki aí, ka ko e kovi ʻa ia ʻoku ʻikai te u loto ki aí ko e meʻa ia ʻoku ou tōʻongaʻakí. 20 Kapau leva, ʻoku ou fai ʻa e meʻa ʻoku ʻikai te u loto ki aí, ʻoku ʻikai ko au ia ʻa e tokotaha ʻoku ou fakahoko iá, ka ko e angahala ko ia ʻoku nofo ʻiate aú.

21 ʻI hoku tuʻungá leva ʻoku ou ʻilo ai ʻa e lao ko ʻení: ʻI he taimi ʻoku ou loto ai ke fai ʻa e meʻa ʻoku totonú, ʻoku ʻiate au ʻa e hehema ke fai ʻa e meʻa ʻoku koví.+ 22 ʻOku ou manako moʻoni ʻi he lao ʻa e ʻOtuá ʻo fakatatau ki hoku tangata ʻi lotó,*+ 23 ka ʻoku ou mātā ʻi hoku sinó* ha toe lao ia ʻe taha ʻokú ne faitau mo e lao ʻo hoku ʻatamaí+ mo ne taki pōpula au ki he lao ʻa angahalá+ ʻa ia ʻoku ʻi hoku sinó.* 24 He toki tangata fakaʻofa ē ka ko au! Ko hai te ne fakahaofi au mei he sino ʻokú ne fakatupunga ʻa e mate ko ení? 25 Fakafetaʻi ki he ʻOtuá fakafou ʻia Sīsū Kalaisi ko hotau ʻEikí! Ko ia leva, ʻi hoku ʻatamaí, ko aú ko ha pōpula au maʻá e lao ʻa e ʻOtuá, ka ʻi hoku kakanó ko ha pōpula au maʻá e lao ʻa angahalá.+