Ki he Kau Kalētia

1 Ko au Paula, ko ha ʻapositolo ʻa Kalaisi Sīsū fakafou ʻi he finangalo ʻo e ʻOtuá, ko e tohi atu ki he kakai tapu ʻoku nau ʻi ʻEfesō+ pea ʻoku nau faitōnunga ʻi he fāʻūtaha mo Kalaisi Sīsuú:

2 Fakatauange ke mou maʻu ʻa e ʻofa maʻataʻatā mo e melino mei he ʻOtuá ko ʻetau Tamaí pea mo e ʻEiki ko Sīsū Kalaisí.

3 Ke fakahīkihikiʻi ʻa e ʻOtua mo e Tamai ʻa hotau ʻEiki ko Sīsū Kalaisí, he kuó ne faitāpuekina kitautolu ʻaki ʻa e tāpuaki fakalaumālie kotoa pē ʻi he ngaahi potu fakahēvaní ko e meʻa ʻi heʻetau fāʻūtaha mo Kalaisí,+ 4 ʻi heʻene fili kitautolu ke tau fāʻūtaha mo ia* ki muʻa ia ʻi hono tanupou ʻo e māmaní,* ke tau hoko ʻo māʻoniʻoni mo taʻemele+ ʻi hono ʻaó ʻi he ʻofa. 5 He naʻá ne tomuʻa fili kitautolu+ ke tau hoko ʻo ohi ko hono ngaahi foha ʻoʻona+ fakafou ʻia Sīsū Kalaisi, ʻo fakatatau ki he meʻa ʻokú ne hōhōʻia aí mo finangalo ki aí,+ 6 ke fakahīkihikiʻi ai ʻa ʻene ʻofa maʻataʻatā+ lāngilangiʻiá ʻa ia naʻá ne foaki anga-ʻofa mai kiate kitautolu fakafou ʻi heʻene tokotaha ʻofeiná.+ 7 Fakafou ʻi hono ʻAló, kuo huhuʻi ai mo fakatauʻatāinaʻi kitautolu. ʻIo, kuo fakamolemoleʻi ʻetau ngaahi angahalá+ fakafou ʻi he taʻataʻa ʻo e tokotaha ko iá.+ He lahi moʻoni ē ko e ʻofa maʻataʻatā ʻa e ʻOtuá!

8 Naʻe foaki mai ʻe he ʻOtuá ʻa e ʻofa maʻataʻatā ko ení kiate kitautolu ʻo hulu fau ʻi he poto kotoa mo e mahino* kotoa pē 9 ʻaki ʻene fakaʻilo mai kiate kitautolu ʻa e fakalilolilo toputapu+ ʻo hono finangaló. ʻOku fakatatau ia ki he meʻa ʻokú ne hōhōʻia aí ʻa ia ʻokú ne fakataumuʻa ai ʻe ia tonu 10 ke ne fokotuʻutuʻu ʻa e ngaahi meʻá ʻi he kakato ʻa e taimi kuo kotofá, ke fakatahatahaʻi ʻa e ngaahi meʻa kotoa pē ʻi he Kalaisí, ʻa e ngaahi meʻa ʻi hēvaní mo e ngaahi meʻa ʻi he māmaní.+ ʻIo, ʻiate ia 11 ʻa e tokotaha ʻoku mau fāʻūtaha mo ia pea naʻe vaheʻi ai kimautolu ko e ngaahi ʻea,+ koeʻuhi naʻe tomuʻa fili kimautolu ʻo fakatatau ki he taumuʻa ʻa e ʻOtuá, ʻa e tokotaha ʻokú ne fakahoko ʻa e meʻa kotoa pē kuó ne fili ki ai ʻo fakatatau ki hono finangaló, 12 koeʻuhí ke mau ngāue, ʻa kimautolu ne mau tomuʻa ʻamanaki ki he Kalaisí, ke fakahīkihikiʻi ai pē ʻa hono lāngilangí. 13 Ka naʻa mou ʻamanaki foki mo kimoutolu kiate ia ʻi he hili hoʻomou fanongo ki he moʻoní, ʻa e ongoongo lelei fekauʻaki mo homou fakamoʻuí. ʻI he hili hoʻomou tuí, naʻe silaʻi+ kimoutolu fakafou ʻiate ia ʻaki ʻa e laumālie māʻoniʻoni ne talaʻofaʻakí, 14 ʻa ia ko ha tomuʻa fakapapauʻiʻanga* ʻo hotau tofiʻá,+ ʻi he taumuʻa ko hono fakatauʻatāinaʻi ʻa e kakai ʻa e ʻOtuá+ ʻaki ha huhuʻi,+ ke fakahīkihikiʻi ai hono tuʻunga lāngilangiʻiá.

15 Ko e ʻuhinga ia, ʻi heʻeku fanongo ko ia ki hoʻomou tui ki he ʻEiki ko Sīsuú pea mo hoʻomou ʻofa ki he kotoa ʻo e kakai tapú, 16 ʻoku ʻikai tuku ai ʻeku fai ʻa e fakamālō koeʻuhi ko kimoutolú. ʻOku hokohoko atu ʻeku fakakau kimoutolu ʻi heʻeku ngaahi lotú, 17 ke hanga ʻe he ʻOtua ʻo hotau ʻEiki ko Sīsū Kalaisí, ʻa e Tamai ʻo e lāngilangí, ʻo ʻoatu kiate kimoutolu ha mālohi ke mou hoko ʻo poto pea mahinoʻi ʻa e ngaahi meʻa ʻokú ne fakahaaʻi maí, pea te mou maʻu ai ʻa e ʻilo totonu kiate iá.+ 18 Kuó ne fakamaama ʻa e mata ʻo homou lotó koeʻuhi ke mou ʻilo ai pe ko e hā ʻa e ʻamanaki naʻá ne ui kimoutolu ki aí, ko e hā ʻa e ngaahi koloa lāngilangiʻia ʻokú ne tuku tauhi ko ha tofiʻa maʻá e kakai tapú,+ 19 pea ke mou ʻilo ai ʻa e hulu fau ʻa e mālohi kuó ne fakahaaʻi mai kiate kitautolu ko e kau tuí.+ Kuo fakaeʻa ia ʻi he ngaahi ngāue kuo fakahoko ʻaki ʻa e māfimafi ʻo hono iví, 20 ʻa ia naʻá ne ngāueʻaki kia Kalaisi ʻi heʻene fokotuʻu hake ia mei he pekiá ʻo ne fakanofo ia ki hono nima toʻomataʻú+ ʻi he ngaahi potu fakahēvaní, 21 ʻo māʻolunga mamaʻo ia ʻi he puleʻanga mo e mafai mo e mālohi mo e tuʻunga ʻeiki kotoa pē mo e hingoa kotoa pē,+ ʻo ʻikai ngata pē ʻi he fokotuʻutuʻu ko ení,* kae pehē foki ʻi he fokotuʻutuʻu ka hoko maí. 22 Naʻá ne fakamoʻulaloaʻi foki ʻa e ngaahi meʻa kotoa pē ki he lalo vaʻe ʻo Kalaisí,+ peá ne ʻai ia ko e ʻulu ki he ngaahi meʻa kotoa pē ʻoku fekauʻaki mo e fakatahaʻangá,+ 23 ʻa ia ko hono sinó ia,+ pea ʻoku fakafonuʻaki ʻa hono ngaahi ʻulungāngá, pea ko ia ʻa e tokotaha ʻokú ne fakakakato ʻa e meʻa kotoa pē.