Nōmipa

20 ʻI he ʻuluaki māhiná, naʻe haʻu ai ʻa e fuʻu fakataha fakakātoa ʻo e kau ʻIsilelí ki he toafa Siniá, pea naʻe kamata nofo ʻa e kakaí ʻi Kētesi.+ Ko e feituʻu ia naʻe mate ai ʻa Meliamé+ pea naʻe tanu aí.

2 Pea naʻe ʻikai ha vai maʻá e fuʻu fakatahá,+ pea naʻa nau fakatahataha mai ʻo fakafepaki kia Mōsese mo ʻĒlone. 3 Naʻe fakakē ʻa e kakaí kia Mōsese,+ ʻo nau pehē: “Pehē ange mai naʻa mau mate ʻi he taimi naʻe mate ai homau fanga tokouá ʻi he ʻao ʻo Sihová! 4 Ko e hā kuó mo ʻomai ai ʻa e fakatahaʻanga ʻa Sihová ki he toafá ni ke mau mate heni+ mo ʻemau fanga manú? 5 Pea ko e hā kuó mo taki mai ai kimautolu mei ʻIsipite ke ʻomai kimautolu ki he feituʻu koví ni?+ ʻOku ʻikai ko ha feituʻu ia ki he tengaʻi ʻakaú mo e fikí mo e kālepí mo e pomikānité, pea ʻoku ʻikai ʻi ai ha vai ke inu.”+ 6 Naʻe haʻu leva ʻa Mōsese mo ʻĒlone mei he ʻao ʻo e fakatahaʻangá ki he hūʻanga ʻo e tēniti feʻiloakiʻangá ʻo na fakatōmapeʻe hifo ki he kelekelé, pea naʻe kamata ke hā kiate kinaua+ ʻa e lāngilangi ʻo Sihová.

7 Naʻe folofola leva ʻa Sihova kia Mōsese: 8 “Toʻo ʻa e tokotokó pea ui ʻa e fuʻu fakatahá ke nau fakatahataha mai, ʻe koe mo ʻĒlone ko ho tokouá, peá mo lea ki he maká ʻi honau ʻaó ke ne tuku ange mai hono vaí, pea te ke ʻomai ha vai maʻanautolu mei he maká pea ʻoange ki he fuʻu fakatahá mo ʻenau fanga manú ha meʻa ke nau inu.”+

9 Ko ia naʻe toʻo ʻe Mōsese ʻa e tokotokó mei he ʻao ʻo Sihová,+ ʻo hangē tofu pē ko ʻEne tuʻutuʻuni kiate iá. 10 Naʻe ui mai leva ʻe Mōsese mo ʻĒlone ʻa e fakatahaʻangá ke nau fakatahataha mai ki muʻa ki he maká, peá ne pehē kiate kinautolu: “Fanongo mai, ʻi he taimí ni, ʻa kimoutolu kau angatuʻu! Kuo pau koā ke ma ʻomai ha vai maʻamoutolu mei he maká ni?”+ 11 Naʻe hiki hake leva ʻe Mōsese hono nimá ʻo ne taaʻi tuʻo ua ʻaki hono tokotokó ʻa e maká, pea naʻe kamata ke puna mai mei ai ha vai lahi, pea naʻe kamata ke inu+ ʻa e fuʻu fakatahá mo ʻenau fanga manú.

12 Ki mui ai, naʻe pehē ʻe Sihova kia Mōsese mo ʻĒlone: “Koeʻuhi naʻe ʻikai te mo fakahaaʻi ʻa e tui kiate au ʻo fakamāʻoniʻoniʻi au ʻi he ʻao ʻo e kakai ʻo ʻIsilelí, ʻe ʻikai te mo ʻomai ʻa e fakatahaʻangá ni ki he fonua te u foaki kiate kinautolú.”+ 13 Ko e vai eni ʻo Mēlipá,*+ ʻa ia naʻe fakakē ai ʻa e kau ʻIsilelí kia Sihova, ko ia naʻe fakamāʻoniʻoniʻi ai ia ʻi honau lotolotongá.

14 Naʻe fekauʻi atu leva ʻe Mōsese ha kau talafekau mei Kētesi ki he tuʻi ʻo ʻĪtomí+ ke tala kiate ia: “Ko eni ʻa e meʻa ʻoku leaʻaki ʻe ho tokoua ko ʻIsilelí,+ ‘ʻOkú ke ʻiloʻi lelei ʻa e faingataʻa kotoa kuo mau hokosiá. 15 Naʻe ʻalu ʻemau ngaahi tamaí ki ʻIsipite,+ pea naʻa mau nofo ʻi ʻIsipite ʻi ha ngaahi taʻu*+ lahi, pea naʻe ngaohikoviʻi kimautolu mo ʻemau ngaahi tamaí+ ʻe he kau ʻIsipité. 16 Faifai atu pē naʻa mau tangi kia Sihova,+ pea naʻá ne fanongo mai kiate kimautolu peá ne fekauʻi mai ha ʻāngelo+ ʻo ne ʻomai kimautolu mei ʻIsipite, pea ko eni ʻoku mau ʻi Kētesi, ko ha kolo ʻi he kauʻāfonua ʻo ho feituʻú. 17 Kātaki muʻa ʻo tuku ke mau fou atu ʻi ho fonuá. ʻE ʻikai te mau fou atu ʻi ha ngoueʻanga pe ko ha ngoue kālepi, pea ʻe ʻikai te mau inu ha vai ʻo ha vaikeli pē. Te mau laka atu ʻi he Hala Tuʻí ʻo ʻikai ha afe ki he toʻomataʻú pe ki he toʻohemá kae ʻoua kuo mau fakalaka atu ʻi ho feituʻú.’”+

18 Kae kehe, naʻe pehē ʻe ʻĪtomi kiate ia: “Heʻikai lava ke ke fou mai ʻi homau feituʻú. Kapau te ke fai pehē, te u ʻalu atu mo e heletaá ke fakafetaulaki ʻaki kiate koe.” 19 Naʻe pehē ange leva ʻe he kau ʻIsilelí kiate ia: “Te mau ʻalu hake pē ʻi he hala lahí, pea kapau te mau inu mo ʻemau fanga manú haʻo vai, te mau fai ha totongi ki ai.+ ʻOku ʻikai mo ha toe meʻa te mau fiemaʻu ka ke mau lue+ atu pē ʻo fou atu ai.” 20 Ka naʻá ne kei pehē mai pē: “Heʻikai te ke fou mai.”+ Naʻe haʻu leva ʻa ʻĪtomi ke fakafetaulaki kiate ia mo ha fuʻu kakai tokolahi mo ha kau tau* mālohi. 21 Ko ia naʻe fakafisi ʻa ʻĪtomi ke fakaʻatā ʻa ʻIsileli ke fou mai ʻi hono feituʻú; ko ia ai, naʻe tafoki ʻa ʻIsileli meiate ia.+

22 Naʻe mavahe ʻa e kakai ʻo ʻIsilelí, ʻa e fuʻu fakatahá fakakātoa mei Kētesi ʻo nau haʻu ki Moʻunga Hoa.+ 23 Naʻe folofola leva ʻa Sihova kia Mōsese mo ʻĒlone ʻi Moʻunga Hoa ʻi he veʻe kauʻāfonua ʻo ʻĪtomí: 24 “ʻE fakatahaʻi ʻa ʻĒlone ki hono kakaí.*+ Heʻikai te ne hū ki he fonua ko ia te u foaki ki he kau ʻIsilelí, koeʻuhí naʻá mo fakatou angatuʻu ki heʻeku tuʻutuʻuni fekauʻaki mo e vai ʻo Mēlipá.+ 25 ʻAve ʻa ʻĒlone mo ʻEliesa ko hono fohá pea ʻohake kinaua ki Moʻunga Hoa. 26 Vete ʻa e ngaahi kofu ʻo ʻĒloné+ ʻo fakatui ia ʻia ʻEliesa+ ko hono fohá, pea ʻe mate ai ʻa ʻĒlone.”

27 Ko ia naʻe fai ʻe Mōsese ʻo hangē tofu pē ko ia naʻe tuʻutuʻuni ʻe Sihová, pea naʻa nau kaka ʻi Moʻunga Hoa ʻi he ʻao ʻo e fuʻu fakatahá kotoa. 28 Naʻe vete leva ʻe Mōsese ʻa e ngaahi kofu ʻo ʻĒloné ʻo fakatui ia ʻia ʻEliesa ko hono fohá. ʻI he hili iá naʻe mate ai ʻa ʻĒlone ʻi he tumutumu ʻo e moʻungá.+ Pea naʻe hifo ʻa Mōsese mo ʻEliesa mei he moʻungá. 29 ʻI he taimi naʻe sio ai ʻa e fuʻu fakatahá kotoa kuo mate ʻa ʻĒloné, naʻe tengihia ʻe he fale kotoa ʻo ʻIsilelí ʻa ʻĒlone ʻi he ʻaho ʻe 30.+