Toʻutupu ʻOku Nau Fai ha Fakamoʻoni Mālohi

ʻOku tokolahi ʻa e toʻutupu Fakamoʻoni ʻa Sihova ʻoku nau talanoa loto-toʻa ʻo fekauʻaki mo ʻenau tuí fakatouʻosi ʻi he ʻapiakó pea ʻi he ngāue fakafaifekau faka-Kalisitiané, pea kuo ʻi ai ha lavameʻa lahi ʻi heʻenau fai peheé. Vakai angé ki he ngaahi fakatātā ko ení.a

“ʻI heʻeku kalasi tolú,” ko e lau ia ʻa Kristina, “naʻe ʻomai ʻe he faiakó kia kimautolu taki taha ha tohi ke mau hiki ai ʻa e ngaahi meʻa naʻa mau fai fakaʻahó. Naʻe lau ʻe he faiakó ʻemau ʻū tohí peá ne hiki mai leva ai ha meʻa kia kimautolu. Naʻá ku pehē ke u hiki ʻi heʻeku tohí ʻa ʻeku malanga ʻoku ʻamanaki ke fai ʻi he Ako Fakafaifekau Fakateokalatí. Naʻe hā ngali maongo eni ki he faiakó, ko ia naʻá ku fakaafeʻi ia ke haʻu ki he Fale Fakatahaʻangá ʻo fanongo ʻi heʻeku malangá. Naʻe ʻikai ke ngata pē ʻi heʻene haʻú ka naʻe haʻu foki mo ʻeku faiako ʻi heʻeku kalasi tahá. ʻI he ʻapiakó, naʻe tala ange ai ʻe he faiakó ki he kalasí kātoa ʻa ʻene saiʻia ʻi heʻeku malangá. Naʻá ku fiefia ʻaupito. Ka ʻoku ʻikai ko ia pē. ʻI he taʻu nai ʻe taha mei ai, naʻe malava ke u fakamatala ki he meʻa naʻá ku hokosiá ʻi ha ʻasemipilī fakasēketi ʻa e Kau Fakamoʻoni ʻa Sihová, pea naʻe toe haʻu foki ʻa ʻeku faiakó ki he fakataha ko iá. Ki mui ai, naʻá ku ʻaʻahi mo haku kaungāmeʻa tāimuʻa kiate ia pea fakaʻaliʻali ange ai ʻa e tohi ʻIlo ʻA Ia ʻOku Taki Atu ki he Moʻui Taʻengatá. Naʻe aʻu ʻo ne haʻu ki he taha ʻo ʻetau ngaahi fakataha-lahi fakavahé!”

ʻI he taʻu ono ʻo Sydnee, naʻá ne poto ʻaupito ʻi he talanoa loto-toʻa ki heʻene kalasí ʻo fekauʻaki mo e ngaahi moʻoni ʻo e Folofola ʻa e ʻOtuá, kau ai ʻa e tuʻunga ʻo e kau maté mo e tuʻunga ʻo Sīsū ʻi heʻene felāveʻi ki he ʻOtuá. ʻOku pehē ʻe heʻene faʻeé: “Ko ha kiʻi faifekau faivelenga mo taʻemanavahē ia.” ʻI he ngataʻanga ʻo hono ʻuluaki taʻu ʻi he akó, naʻe fakahaaʻi ai ʻe Sydnee ʻene loto-mamahi. “ʻOku ou hohaʻa ki heʻeku kalasí,” ko ʻene leá ia. “ʻE anga-fēfē haʻanau ako ʻo fekauʻaki mo Sihova?” Naʻe ʻi ai leva ha foʻi fakakaukau ʻa Sydnee. ʻI he ʻaho fakaʻosi ʻo e akó, naʻá ne ʻoange ki he tokotaha ako taki taha ha meʻaʻofa kuo ʻosi kofukofu fakameʻaʻofa. Ko e tohi ia Ko ʻEku Tohi ʻo e Ngaahi Talanoa Fakatohitapú. Naʻe tufa ʻe Sydnee ʻa e tatau fakakātoa ʻe 26, ʻo ne tala ange ki he tamaiki akó ke nau toki fakaava pē ʻenau meʻaʻofá ʻi ʻapi fakataha mo ʻenau ongo mātuʻá. ʻOku ʻai ʻe Sydnee ʻa ʻene kalasí ko hano feituʻu fakamoʻoni fakafoʻituitui ia. Naʻe aʻu ʻo ne telefoni kia kinautolu ke sio pe naʻe fēfē ʻenau lau ʻa e tohí. Naʻe pehē ʻe ha kiʻi taʻahine ʻe taha ʻokú ne lau ʻa ʻene tohí ʻi he pō kotoa fakataha mo ʻene faʻeé.

ʻI he taimi naʻe taʻu 15 ai ʻa Ellen, naʻá ne ʻoange ki heʻene faiako hisitōliá ha ngaahi ʻīsiu ʻo e ʻĀ Hake! “Naʻá ne saiʻia ai,” ko e lau ia ʻa Ellen, “pea ko e taʻu ʻaki eni ʻe ua ʻene lau ʻa e ʻĀ Hake!” ʻOku hoko atu ʻe Ellen: “Naʻá ku toki ʻoange kiate ia ʻa e tohi Ko ʻEku Tohi ʻo e Ngaahi Talanoa Fakatohitapú, pea naʻá ne tala mai naʻe saiʻia ʻaupito ai ʻa hono ongo ʻofefiné. Ko ia naʻá ku ʻoange leva kiate ia ʻa e tohi Ako mei he Faiako Lahí. Ki mui ai, naʻá ne ʻomai kiate au ha kaati. Naʻe pehē ai: ‘Fakamālō lahi atu ki he ongo tohí. ʻOku ou manako ʻaupito ai mo e ongo tamaikí. ʻOku fakafiefia ʻaupito ke sio ki ha tokotaha kei siʻi ʻoku tuʻu mālohi mo līʻoa hangē ko koé. ʻOku ʻikai ha meʻaʻofa ʻe lava ke fakahoa ki he meʻaʻofa ʻo hoʻo tuí. Kuó ke akoʻi kiate au ʻa e meʻa lahi ange ʻi he meʻa ʻoku malava ke u akoʻi kiate koé!’ Ko e meʻa ko eni naʻe hokó naʻe fakahaaʻi mai ai kiate au ʻa hono fakamahuʻingaʻi ʻe he kakaí ʻa e moʻoni ʻo e Tohi Tapú ʻi heʻetau fai ha feinga ke ʻoatu ia kiate kinautolú.”

Naʻe taʻu ono ʻa Daniel ʻi he taimi naʻá ne kamata ai ʻene ʻuluaki ako Tohi Tapú. ʻOkú ne pehē: “Naʻá ku ʻalu ʻi ha ngaahi ako Tohi Tapu mo ʻeku fineʻeikí, ka naʻá ku loto ke u akoʻi pē ʻe au ha taha.” Naʻe fili ʻe Daniel ʻa Mrs. Ratcliff—ko ha fineʻeiki ʻa ia naʻá ne tuku ai ha tohi Fakatohitapu. Naʻá ne tala ange kiate ia: “ʻOku ou fie fakahā atu ʻa e tohi ʻoku ou saiʻia taha aí, Ko ʻEku Tohi ʻo e Ngaahi Talanoa Fakatohitapú,” peá ne tānaki atu: “ʻOku ou loto ke u ʻilo pe ʻe lava ke u haʻu ʻi he uike kotoa pē ʻo lau atu ia kiate koe.” Naʻe tali ʻe Mrs. Ratcliff ʻa e tuʻuaki ʻa Daniel. “Ki mui ʻi he ʻaho pē ko iá naʻa mau kamata ako ai mo Mrs. Ratcliff,” ko e lau ia ʻa Laura, ko e faʻē ʻa Daniel. “Naʻe taufetongi ʻa Daniel mo Mrs. Ratcliff ʻi hono lau ʻa e ʻū palakalafí, pea naʻe kole ange leva ʻe Daniel ki he fineʻeikí ke ne lau ʻa e ngaahi konga Tohi Tapu kuo fili naʻe hā ʻi he fakaʻosinga ʻo e talanoá. Naʻá ku ʻalu mo Daniel, ka naʻe hā ngali tokanga pē ʻa Mrs. Ratcliff ia ke lāulea ki he ngaahi meʻá ni mo Daniel pē!” ʻI he faai atu ʻa e taimí, naʻe kamata ke ako ʻe Daniel mo Mrs. Ratcliff ʻa e tohi Te Ke Malava ʻo Moʻui Taʻengata he Palataisi ʻi he Māmaní. Ka ʻi he taimi ko ení ko e kiʻi tuofefine siʻisiʻi ʻo Daniel ko Natalie naʻe ʻosi lahi feʻunga ia ke lautohi, ko ia naʻá ne kau mo ia ʻi he akó. Naʻe lahi ʻa e ngaahi fehuʻi ʻa Mrs. Ratcliff—ko e niʻihi ai naʻe faingataʻa. Ka naʻe ngāueʻaki ʻe Daniel mo Natalie ʻa e kiʻi tohi Ngaahi Tuʻunga Lea Fakatohitapu ke Fetalanoaʻaki Ai pea mo e konikōtieni ʻi mui ʻi he Tohi Tapú ke ne tokoniʻi kinaua ke na ʻoatu ha ngaahi tali Fakatohitapu. Naʻe fiefia lahi ʻaupito ʻa Mrs. Ratcliff, ko ha tokotaha tupuʻi Katolika, ʻi he meʻa naʻá ne akó. Naʻá ne pehē ʻi he ʻosi ha ako ʻe taha: “ʻOku ou fakaʻamu ange naʻe kamata mai ʻeku ako ʻa e Tohi Tapú ʻi he ngaahi taʻu kuohilí!” Ko e meʻa fakamamahí, naʻe toki mālōloó ni ʻa Mrs. Ratcliff ʻi hono taʻu 91. Ka naʻe malava ʻi heʻene ako ʻa e Tohi Tapú ke ne hoko ai ʻo maheni mo e ngaahi moʻoni mahuʻingá, kau ai ʻa e ʻamanaki Fakatohitapu ʻo ha toetuʻu ki ha māmani palataisí. ʻOku taʻu hongofulu he taimí ni ʻa Daniel pea ʻokú ne fai ʻa e ako Tohi Tapu ʻe ua. Ko Natalie ʻoku taʻu valu he taimí ni, ʻokú ne ako ʻa e Tohi Tapú mo ha kiʻi taʻahine ʻi hono toʻú.

Ko e toʻutupu hangē ko Kristina, Sydnee, Ellen, Daniel mo Natalie ʻoku nau ʻomai ʻa e fiefia ki heʻenau ngaahi mātuʻa Kalisitiané. Ko e meʻa ʻoku mahuʻinga angé, ʻoku nau ʻai ʻa e loto ʻo Sihová ke fiefia, pea ʻe ʻikai ngalo ʻiate ia ʻa e ʻofa ʻoku fakahāhā ʻe he fānaú ni ki hono huafá.—Palovepi 27:11; Hepelu 6:10.

[Fakamatala ʻi lalo]

[Fakatātā ʻi he peesi 20]

Kristina (ʻi ʻolungá) mo Sydnee

[Fakatātā ʻi he peesi 21]

Daniel mo Natalie

[Fakatātā ʻi he peesi 21]

Ellen