Naʻe ʻAhiʻahiʻi ʻe Siosifa Hono Ngaahi Tokouá

NAʻE fiemaʻu ʻe Siosifa ke ne ʻilo pe ʻoku kei anga-kovi mo anga-taʻeʻofa ʻa hono ngaahi taʻoketé. Ko ia naʻá ne pehē kiate kinautolu: ‘Ko e kau sipai kimoutolu. Kuo mou ōmai ke ʻilo ʻa e vaivaiʻanga ʻo homau fonuá.’

‘ʻIkai, ʻoku ʻikai te mau pehē,’ ko ʻenau talí ia. ‘Ko e kau tangata faitotonu kimautolu. Ko e ngaahi tokoua kotoa pē kimautolu. Naʻa mau toko 12. Ka ko homau tokoua ʻe taha kuo ʻikai ke kei moʻui, pea ko e siʻisiʻi taha ʻoku ʻi ʻapi mo ʻemau tamai.’

Naʻe fakangalingali pē ʻe Siosifa ʻoku ʻikai te ne tui kiate kinautolu. Naʻá ne tuku pilīsone ʻa e tokoua ko Simioné, pea tuku ange ʻa e toengá ke ʻalu mo e meʻakaí ki honau ʻapí. Ka naʻá ne tala ange kiate kinautolu: ‘ʻI hoʻomou toe foki maí, kuo pau ke mou ōmai mo homou tokoua siʻisiʻi tahá.’

ʻI heʻenau foki ki honau ʻapi ʻi Kēnaní, naʻe fakahā ʻe he ngaahi tokouá ki heʻenau tamai ko Sēkopé ʻa e meʻa kotoa pē naʻe hokó. Naʻe loto-mamahi ʻaupito ʻa Sēkope. Naʻá ne kaila: ‘Kuo ʻikai ke kei moʻui ʻa Siosifa, pea ko ʻeni kuo ʻikai ke ʻi heni mo Simione. Heʻikai te u toe fakangofua ke mou ʻalu mo hoku foha siʻisiʻi taha ko Penisimaní.’ Ka ʻi he kamata ke mei ʻosi ʻenau meʻakaí, kuo pau ke fakangofua ʻe Sēkope ke nau ʻalu mo Penisimani ki ʻIsipite kae lava ke toe maʻu mai ha meʻakai.

Naʻe sio atu ʻa Siosifa ki hono ngaahi tokouá ʻoku haʻu. Naʻá ne fiefia ʻaupito ʻi heʻene sio atu ki hono tokoua siʻisiʻi taha ko Penisimaní. Ko hono moʻoní, naʻe ʻikai ha taha ʻo kinautolu naʻá ne ʻilo ko e tangata mahuʻinga ko ʻení ko Siosifa ia. Naʻe hanga leva ʻe Siosifa ʻo fai ha meʻa ke ʻahiʻahiʻi ʻaki hono ngaahi tokoua tamai taha ko ʻeni ʻe toko 10.

Naʻá ne fekau ʻene kau sevānití ke fakafonu meʻakai ʻa ʻenau ngaahi tangaí kotoa. Ka naʻe ʻikai ke ʻai ke nau ʻilo, naʻá ne ʻai ke faʻo ʻa ʻene ipu siliva makehe ʻi he tangai ʻa Penisimaní. ʻI he hili ʻenau ʻalu ʻo mamaʻo siʻi atu pē ʻi he halá, naʻe fekau ʻe Siosifa ʻene kau sevāniti ke nau tulimui kiate kinautolu. ʻI hono maʻu kinautolú, naʻe pehē ʻe he kau sevānití: ‘Ko e hā kuo mou kaihaʻasi ai ʻa e ipu siliva ʻa homau ʻeikí?’

Naʻe pehē kotoa mai ʻe he ngaahi tokouá: ‘Naʻe ʻikai te mau kaihaʻasi ʻe kimautolu ʻene ipú. Kapau te mou maʻu ʻa e ipú ʻi ha taha ʻo kimautolu, pea tāmateʻi ʻa e tokotaha ko iá.’

Ko ia naʻe hua ʻe he kau sevānití ʻa e ngaahi tangaí hono kotoa, pea nau maʻu ʻa e ipú ʻi he tangai ʻa Penisimaní, ʻo hangē pē ko ia ʻokú ke sio ki ai ʻi hení. Pea naʻe pehē ʻe he kau sevānití: ‘‘Mou ʻalu kimoutolu, ka kuo pau ke mau ʻalu mo Penisimani.’ Ko e hā leva ʻa e meʻa naʻe fai ʻe he ngaahi tokoua tamai taha ʻe toko 10?

Naʻa nau toe foki hono kotoa pē mo Penisimani ki he fale ʻo Siosifá. Naʻe pehē ʻe Siosifa ki hono ngaahi tokouá: ‘ʻE lava ke mou foki hono kotoa ki homou ʻapí, ka kuo pau ke nofo ʻa Penisimani ʻi heni ko ʻeku pōpula.’

Naʻe toki lea hake ʻa Siuta ʻo pehē: ‘Kapau te u foki ki ʻapi kae tuku ʻa e tamasiʻí, ʻe mate ʻeku tamaí koeʻuhi he ʻoku fuʻu ʻofa lahi ʻiate ia. Ko ia fakamolemole, tauhi au ko hoʻo pōpula, kae tuku ange ʻa e tamasiʻí ke foki ki ʻapi.’

Naʻe sio ʻa Siosifa kuo liliu ʻa hono ngaahi tokouá. Naʻe ʻikai te nau kei anga-kovi mo anga-taʻeʻofa. Tau sio ange pe ko e hā ʻa e meʻa naʻe toki fai ʻe Siosifá.