Ko Kitione mo ʻEne Kau Tangata ʻe Toko 300

ʻOKÚ KE sio ki he meʻa ʻoku lolotonga hokó? Ko e kau tangata tau kotoa ʻeni ʻa ʻIsilelí. Ko e kau tangata ʻoku nau punoú ko ʻenau inu. Ko e Fakamaau ko Kitioné ʻokú ne tuʻu ʻo ofi kiate kinautolú. ʻOkú ne vakaiʻi ʻa e anga ʻo ʻenau inu ʻa e vaí.

Vakai fakalelei ange ki he ngaahi founga kehekehe ʻa e inu ʻa e kau tangatá. Ko e niʻihi ʻoku nau hanga honau matá ki he vaí. Ka ko e toko taha ia ʻokú ne ʻohake pē ʻa e vaí ʻaki hono nimá, kae lava ke ne sio ki he meʻa ʻe hoko takatakai ʻiate iá. ʻOku mahuʻinga eni, he naʻe tala ʻe Sihova kia Kitione ke ne fili pē ʻa e kau tangata ʻoku nau sio holo lolotonga ʻenau inú. Naʻe pehē ʻe he ʻOtuá ke fekau hono toé ke foki ki ʻapi. Tau sio ange pe ko e hā hono ʻuhingá.

Naʻe toe faingataʻaʻia lahi ʻa e kau ʻIsilelí. Ko hono ʻuhingá ko e ʻikai te nau talangofua kia Sihová. Naʻe puleʻi mo fakamamahiʻi kinautolu ʻe he kakai Mitiané. Ko ia naʻe tangi ʻa e kakai ʻIsilelí kia Sihova ke tokoni, pea naʻe fanongo ʻa Sihova ki heʻenau tangí.

Naʻe tala ʻe Sihova kia Kitione ke ʻai ha kau tau, ko ia naʻe fakatahaʻi ʻe Kitione ha kau tangata tau ʻe toko 32,000. Ka naʻe ʻi ai ʻa e kau tangata tau ia ʻe toko 135,000 naʻe tuʻu mai ke faitau ki ʻIsileli. Ka naʻe tala ʻe Sihova kia Kitione: ‘ʻOku fuʻu tokolahi hoʻo kau tangatá.’ Ko e hā naʻe lea pehē ai ʻa Sihová?

Ko hono ʻuhingá he kapau ʻe ikuna ʻe ʻIsileli ʻa e taú, te nau fakakaukau nai ko e ikuna pē ʻanautolu. Te nau fakakaukau nai naʻe ʻikai fiemaʻu kiate kinautolu ha tokoni meia Sihova ka nau toki ikuna. Ko ia naʻe tala ʻe Sihova kia Kitione: ‘Tala ki he kau tangata kotoa ʻoku nau ilifiá ke foki ki honau ʻapí.’ ʻI hono fai ʻeni ʻe Kitioné, ko e toko 22,000 ʻo ʻene kau tangatá naʻa nau foki ki honau ngaahi ʻapí. Naʻe toe pē ʻa e kau tangata tau ʻe toko 10,000 ke faitau mo e kau sōtia ʻe toko 135,000 ko ʻení.

Ka ke fanongo! Naʻe pehē ʻe Sihova: ‘ʻOku kei fuʻu tokolahi pē ʻa e kau tangatá ia.’ Ko ia naʻá ne tala kia Kitione ke ʻai ʻa e kau tangatá ke nau inu ʻi he vaitafe ko ʻení pea fakafoki leva ki ʻapi ʻa e kakai kotoa pē naʻe hanga honau matá ki he vaí ʻi heʻenau inú. Naʻe talaʻofa ʻe Sihova: ‘Te u ʻoatu kiate koe ʻa e ikuná ʻaki ʻa e kau tangata ʻe 300 naʻa nau sio takai holo lolotonga ʻenau inú.’

Naʻe hoko ʻa e taimi ke fai ʻa e taú. Naʻe ʻai ʻe Kitione ʻene kau tangata ʻe toko 300 ki ha kulupu ʻe tolu. Naʻá ne ʻoange ki he tangata taki taha ha meʻa fakalea mo ha siā ʻoku faʻo ai ha tūhulu. ʻI he aʻu ki he tuʻuapō, naʻa nau ʻātakaiʻi ʻa e ʻapitanga ʻo e kau sōtia ko e filí. Pea naʻa nau ifi ʻi he taimi tatau pē ʻenau ngaahi meʻaleá pea haʻaki ʻenau ngaahi siā mo nau kaila: ‘Ko e heletā ʻa Sihova mo Kitione!’ ʻI he ʻā hake ʻa e kau sōtia ko e filí, naʻa nau puputuʻu mo ilifia. Naʻa nau kamata ke hola, pea naʻe ikuna ʻe he kau ʻIsilelí ʻa e taú.