ʻI he Hala ki Tāmasikusí

ʻOKÚ KE ʻilo pe ko hai ʻoku tokoto ʻi he kelekelé? Ko Saula ia. Manatuʻi, ko ia naʻá ne tokangaʻi ʻa e ngaahi kote ʻo e kau tangata naʻa nau tolomakaʻi ʻa Sitīvení. Sio ki he maama ngingila ko ʻení! Ko e hā ʻa e meʻa ʻoku hokó?

ʻI he ʻosi hono tāmateʻi ʻo Sitīvení, naʻe takimuʻa ʻa Saula ʻi hono kumi ʻa e kau muimui ʻo Sīsuú ke fakamamahiʻi kinautolu. Naʻá ne hū ki he ngaahi falé ʻo toho ʻa e kau muimuí ki tuʻa pea lī ki he pilīsoné. Naʻe hola ʻa e kau ākonga tokolahi ki he ngaahi kolo kehé mo kamata ke malangaʻaki ʻa e “ongoongo lelei” ʻi ai. Ka naʻe toe ʻalu pē ʻa Saula ki he ngaahi kolo kehé ke kumi ʻa e kau muimui ʻo Sīsuú. Naʻá ne fononga atu ʻeni ki Tāmasikusi. Ka ʻi he lolotonga ʻene fonongá, ko e meʻa fakaofo ʻeni naʻe hokó:

Fakafokifā naʻe huhulu ha maama mei he langí ʻo takatakai ʻia Saula. Naʻá ne tō ki he kelekelé, ʻo hangē ko ia ʻoku tau sio ki aí. Pea pehē mai ʻe ha leʻo: ‘ʻE Saula, ʻe Saula! Ko e hā ʻokú ke fakamamahiʻi ai au?’ Ko e kau tangata naʻe ʻia Saulá naʻa nau sio ki he maamá mo fanongo ki he leʻó, ka naʻe ʻikai ke mahino kiate kinautolu ʻa e meʻa naʻe leaʻakí.

Naʻe ʻeke ʻe Saula: ‘ʻEiki, ko hai koe?’

Naʻe pehē mai ʻe he leʻó: ‘Ko Sīsū au, ʻa e tokotaha ʻokú ke fakamamahiʻí.’ Naʻe lea pehē ʻa Sīsū koeʻuhi ʻi hono fakamamahiʻi ʻe Saula ʻa e kau muimui ʻo Sīsuú, naʻe ongoʻi ʻe Sīsū ʻo hangē pē ko ia tonu ʻoku fakamamahiʻí.

Naʻe toki ʻeke atu ʻe Saula: ‘ʻEiki, ko e hā ʻa e meʻa te u faí?’

Naʻe pehē mai ʻe Sīsū: ‘Tuʻu hake ʻo ʻalu ki Tāmasikusi. ʻE fakahā atu ai kiate koe ʻa e meʻa kuo pau ke ke faí.’ ʻI he tuʻu hake ʻa Saula ʻo ʻāʻā hono matá, naʻe ʻikai te ne lava ke sio ki ha meʻa. Naʻá ne kui! Ko ia naʻe taki nima ia ʻe he kau tangata naʻe ʻiate iá ki Tāmasikusi.

Naʻe lea leva ʻa Sīsū ki he taha ʻo ʻene kau ākonga ʻi Tāmasikusí, ʻo pehē: ‘ʻE ʻĀnanaia, tuʻu hake. ʻAlu ki he hala ʻoku ui ko Totonú. ʻI he fale ʻo Siutasí ʻeke ai ki ha tangata ʻoku hingoa ko Saula. Kuó u fili ia ke hoko ko ʻeku sevāniti makehe.’

Naʻe talangofua ʻa ʻĀnanaia. ʻI heʻene fetaulaki mo Saulá, naʻá ne hilifaki hono nimá kiate ia mo pehē: ‘Kuo fekau mai au ʻe he ʻEikí koeʻuhi ke lava ke ke toe sio pea mo fonu ʻi he laumālie māʻoniʻoní.’ Naʻe tō mai leva ha meʻa ʻoku hangē ko ha ngaahi ʻunoʻi iká mei he mata ʻo Saulá, pea naʻe malava ke ne toe sio.

Naʻe ngāueʻaki ʻa Saula ʻi ha founga mālohi ke malanga ki he kakai ʻo e ngaahi puleʻanga lahi. Naʻe hoko ia ʻo ʻiloa ko e ʻapositolo ko Paula, ʻa ia te tau toe ako lahi ange ʻo fekauʻaki mo ia. Ka tau ʻuluaki ako ke ʻilo pe ko e hā naʻe fekau ʻe he ʻOtuá kia Pita ke faí.