Vahe 89

Ko ha Fononga ʻo e Meesi ki Siutea

ʻI HE ngaahi uike ki muʻá, lolotonga ʻa e Kātoanga Fakatapuí ʻi Selusalema, naʻe feinga ai ʻa e kau Siú ke tāmateʻi ʻa Sīsū. Ko ia naʻá ne fononga ki he tokelaú ki ha feituʻu naʻe ʻikai ke mamaʻo mei he Tahi Kālelí.

Naʻá ne toe fononga ki he tongá ki mui mai ai ʻo huʻu ki Selusalema, ʻo malanga ʻi heʻene fonongá ʻi he ngaahi kolo ʻo Pēleá, ko ha vahefonua ki he hahake ʻo e Vaitafe Sioataní. ʻI he hili ʻa ʻene fai ʻa e talanoa fakatātā ʻo kau ki he tangata koloaʻiá mo Lasalosí, naʻá ne hoko atu hono akoʻi ʻene kau ākongá ki he ngaahi meʻa naʻá ne akoʻaki ki muʻa atu he lolotonga ʻenau ʻi Kālelí.

Ko e fakatātaá, naʻá ne pehē, ʻe lelei ange ki ha taha ke ne “tau ha makatukinga ʻi hono kiá, pea lī ia ki tahi” ʻi heʻene fakatūkiaʻi ha foʻi toko taha ʻo e siʻi “tamaiki iikí ni” ʻa e ʻOtuá. Naʻá ne toe fakamamafaʻi ʻa hono fiemaʻu ʻo e fakamolemolé, ʻo ne fakamatala: “Pea neongo ʻe tuʻo fitu ʻi he ʻaho ʻene faihala [ʻa ho tokouá] kiate koe, kae tuʻo fitu ʻene tafoki kiate koe, ʻo ne pehē, ‘ʻA, ʻoku ou fakatomala,’ ka pehē, te ke fakamolemole ia.”

ʻI he kole ʻa e kau ākongá, “Ke ke fakalahi ʻemau tuí,” naʻe tali ʻe Sīsū: “Ka ne ai haʻamou tui, ʻo tatau mo e foʻi tengaʻi mūsitá hono lahí, pea ʻi haʻamou kamata lea ki he fuʻu fikimolí ni, ‘Fei mo mataʻaki koe, pea hiki ʻo tuʻu ʻi tahi!’ kuó ne fai leva ʻo hangē ko hoʻomou talá.” Ko ia naʻa mo ha kiʻi tui siʻisiʻi ʻoku lava ke ne fakahoko ha ngaahi meʻa lahi.

Ko hono hokó, naʻe lave ʻa Sīsū ki he tuʻunga moʻoni ʻo e moʻuí ʻa ia ʻokú ne fakatātaaʻi ʻa e fakakaukau totonu ʻa ha sevāniti ʻa e ʻOtua māfimafi-aoniú. “Pea tau lau ko e toko taha ʻiate kimoutolu ʻoku ʻi ai ʻene tamaioʻeiki ʻoku ngoue, pe tauhi manu,” ko e fakamatala ia ʻa Sīsuú, “pea ʻi he faifai peá ne haʻu mei he ngoué, te ke pehē koā ki ai, ‘Haʻu ange leva, ʻo tokoto ke kai, ʻo’? ʻA, ʻikai ko hoʻo leá ʻe pehē, ‘Ke ke teuteu mai muʻa haʻaku tina, pea ke huke ho kofú ʻo tauhi au, kaeʻoua ke ʻosi ʻeku kaí mo ʻeku inú, pea hili iá, peá ke kai mo inu koe’? Ka ʻokú ke pehē koā, ko e meʻa ke fakafetaʻia ʻa e fai ʻe heʻene tamaioʻeikí ʻa e ngaahi meʻa naʻe tuʻutuʻuní? Pehē foki mo kimoutolu, neongo kuo mou fai kotoa pē ʻa e ngaahi meʻa naʻe tuʻutuʻuni atú, ka mou pehē, ‘Ko e kau tamaioʻeiki taʻeʻaonga ai pē kimautolu. Kuo mau fai pē ʻa e meʻa naʻe totonu ke mau faí.’” Ko ia, ko e kau sevāniti ʻa e ʻOtuá ʻoku totonu ke ʻoua ʻaupito te nau ongoʻi ʻoku nau fai ha lelei maʻá e ʻOtuá ʻi heʻenau ngāue kiate iá. Ka ʻoku totonu ke nau manatuʻi maʻu pē ko e monū ʻoku nau maʻu ke lotu kiate ia ko ha kau mēmipa falalaʻanga ʻo hono falé.

ʻOku hā mahino ko e taimi siʻi pē mei hono fakahā ʻe Sīsū ʻo e talanoa fakatātā ko ʻení pea aʻu mai ha talafekau. Ko e fekau mai ia ʻe Mele mo Māʻata, ko e ongo tuofāfine ʻo Lasalosí, ʻa ia naʻá na nofo ʻi Pētani ʻi Siutea. “ʻEiki, ke ke meaʻi ko e siana ʻokú ke ʻofa aí ʻoku puke,” ko e fakamatala ia ʻa e talafekaú.

Naʻe tali ʻe Sīsū: “Ko e mahaki ko ʻení kuo ʻikai hoko mai ke ne pekia ai, ka ko hono ʻuhingá ko e lāngilangi ʻo e ʻOtuá, koeʻuhi ke fakalāngilangiʻi ai ʻa e ʻAlo ʻo e ʻOtuá.” Hili ʻene nofo pē ai ʻi ha ʻaho ʻe ua, naʻe pehē ʻe Sīsū ki heʻene kau ākongá: “Tau toe ō ki Siutea.” Kae kehe, naʻa nau toe fakamanatu kiate ia: “Lāpai, naʻe toki feinga ʻe haʻa Siu ke tolongi koe, pea ko hoʻo toe ʻalu koā ki ai?”

“ʻIkai ʻoku hongofulu mā ua ʻa e houa ʻi he ʻahó?” ko e ʻeke ia ʻe Sīsū ʻi heʻene talí. “Kapau ʻe luelue ha taha lolotonga ʻoku ʻaho, ʻe ʻikai te ne tūkia, koeʻuhi ʻokú ne mamata ki he maama ʻo māmaní. Ka ʻo kapau ʻe luelue ha taha ʻi he poʻulí te ne tūkia, koeʻuhi ʻoku ʻikai ʻiate ia ʻa e maamá.”

ʻOku hā mahino ko e ʻuhinga ʻa Sīsuú ko e ngaahi “houa ʻi he ʻahó” pe ko e taimi kuo vaheʻi ʻe he ʻOtuá ki he ngāue fakafaifekau ʻa Sīsū ʻi he māmaní, naʻe teʻeki ai ke ʻosi, pea ʻi heʻene peheé, ʻe ʻikai malava ʻe ha taha ke fakalaveaʻi ia. Naʻá ne fiemaʻu ke ne ngāuekakatoʻaki ʻa e kiʻi taimi nounou ʻo e “ʻahó” naʻe toe maʻaná, koeʻuhi he ki mui aí ʻe hoko mai ʻa e “poʻulí” ʻa ia ʻe tāmateʻi ai ia ʻe hono ngaahi filí.

Naʻe tānaki atu ʻe Sīsū: “Ko siʻota kaumeʻa ko Lasalosi kuo mohe, ka ko ʻeku ʻalú ni ke u fafangu ia.”

ʻI he fakakaukau atu ʻoku mālōlō pē ʻa Lasalosi ʻo mohé pea ko ha fakaʻilonga lelei ia te ne toe ʻā peé naʻe tali ange ʻe he kau ākongá: “ʻEiki, kapau kuó ne mohe te ne moʻui.”

Ko ia naʻe lea fakapatonu ai ʻa Sīsū kiate kinautolu: “Kuo pekia ʻa Lasalosi. Pea ʻoku ou fiefia ʻi he ʻikai te u ʻi aí, koeʻuhi ko kimoutolu, koeʻuhiā ke mou tui. Ka tau ō pē kiate ia.”

ʻI he ʻilo ʻe malava ke tāmateʻi ʻa Sīsū ʻi Siuteá, ka ʻi heʻene holi ke poupouʻi iá, naʻe fakalototoʻaʻi ai ʻe Tōmasi ʻa hono kaungā-ākongá: “Tau ō foki, ke tau mate mo ia.” Ko ia naʻe fakatuʻutāmaki ki heʻenau moʻuí, ka naʻe fononga fakataha pē ʻa e kau ākongá mo Sīsū ʻi he fononga ʻo e meesi ko ʻeni ki Siuteá. Luke 13:22; 17:​1-10; Sione 10:​22, 31, 40-42; 11:​1-16.

▪ Naʻe malanga ki mui mai ʻa Sīsū ʻi fē?

▪ Ko e hā ʻa e ngaahi akonaki naʻe toe fakamanatu ʻe Sīsuú, pea ko e hā ʻa e tuʻunga moʻoni ʻo e moʻuí naʻá ne fakamatalaʻi ke fakatātāʻaki ʻa e poini ko e hā?

▪ Ko e hā ʻa e ongoongo naʻe maʻu ʻe Sīsuú, pea ko e hā ʻene ʻuhinga ki he “ʻahó” mo e “poʻulí”?

▪ Ko e hā ʻa e ʻuhinga ʻa Tōmasi ʻi heʻene pehē, ‘Tau ō ke tau mate mo ia’?