ʻE Lava ke Liliu ʻa e Faʻahinga ʻOku Faikoví?

ʻIKAI ko e meʻa lelei moʻoni kapau naʻe fai ʻe he tokotaha kotoa pē ʻa e meʻa naʻe leleí?— Ka ʻoku ʻikai ha taha ʻokú ne fai maʻu pē ʻa e ngaahi meʻa ʻoku leleí. ʻOkú ke ʻilo ʻa e ʻuhinga ʻoku tau fai kotoa ai ʻi ha taimi ʻa e ngaahi meʻa ʻoku koví neongo ʻoku tau loto ke fai ʻa e meʻa ʻoku leleí?— Koeʻuhí he ʻoku fanauʻi kotoa mai kitautolu mo e angahala. Ka ʻoku lahi ʻa e ngaahi meʻa mātuʻaki kovi ʻaupito ʻoku fai ʻe he kakai ʻe niʻihi. ʻOku nau fehiʻa ʻi he kakai kehé pea fakalaveaʻi loto-lelei kinautolu. ʻOkú ke fakakaukau ʻe lava ke nau liliu pea ako ke failelei?—

Sio ki he talavou ko ena ʻokú ne tokangaʻi ʻa e ngaahi kofu tuʻa ʻo e faʻahinga ʻoku nau tolomakaʻi ʻa Sitīvení. Ko hono hingoa faka-Hepeluú ko Saula, ka ko hono hingoa faka-Lomá ko Paula. ʻOkú ne fiefia ʻi hono tāmateʻi ʻo Sitīvení, ʻa ia ko ha ākonga ʻa e Faiako Lahí. Ta sio angé ki he ʻuhinga ʻoku fai ai ʻe Saula ʻa e ngaahi meʻa kovi ko iá.

Ko Saulá ʻoku kau ki ha kulupu lotu Siu ʻoku ui ko e kau Fālesi. ʻOku maʻu ʻe he kau Fālesí ʻa e Folofola ʻa e ʻOtuá, ka ʻoku lahi ange ʻenau tokanga ki he ngaahi akonaki ʻa e niʻihi ʻo honau kau taki lotú. ʻOku ʻai ʻe he meʻá ni ʻa Saula ke ne fai ʻa e ngaahi meʻa ʻoku koví.

ʻI hono puke ʻo Sitīveni ʻi Selusalemá, ʻoku ʻi ai tonu ʻa Saula. ʻOku ʻave ʻa Sitīveni ki he fakamaauʻangá, ʻa ia ko e niʻihi ʻo e kau fakamāú ko e kau Fālesi. Neongo ʻoku leaʻaki ʻa e ngaahi meʻa ʻoku kovi ʻo fekauʻaki mo Sitīveni, ʻoku ʻikai te ne ilifia. ʻOkú ne lea loto-toʻa pea fai ki he kau fakamāú ha fakamoʻoni lelei ʻo fekauʻaki mo Sihova ko e ʻOtuá pea mo Sīsū.

Ka ko e kau fakamaau ko iá ʻoku ʻikai te nau saiʻia ʻi he meʻa ʻoku nau fanongo ki aí. ʻOku nau ʻosi ʻilo lahi ʻo fekauʻaki mo Sīsū. Ko hono moʻoní, ʻi ha taimi nounou pē ki muʻa ʻi he meʻá ni, naʻa nau ʻai ai ʻa Sīsū ke tāmateʻi! Ka ʻi he hili iá, naʻe fakafoki ʻe Sihova ʻa Sīsū ki hēvani. ʻI he ʻikai liliu ʻi he taimi ko ení ʻa ʻenau ngaahi foungá, ʻoku fakafepakiʻi ʻe he kau fakamāú ʻa e kau ākonga ʻa Sīsuú.

ʻOku puke ʻe he kau fakamāú ʻa Sitīveni ʻo ʻave ia ki he tuʻa koló. ʻOku nau tukiʻi ia ʻo ne tō ki lalo pea tolomakaʻi ia. Pea hangē ko ia ʻokú ke sio ki ai ʻi he fakatātaá, ʻoku ʻi ai ʻa Saula ʻo mamata. ʻOkú ne fakakaukau ʻoku tonu ke tāmateʻi ʻa Sitīveni.

ʻOkú ke ʻilo ʻa e ʻuhinga naʻe fakakaukau pehē ai ʻa Saulá?— Sai, ʻi he kotoa ʻo e moʻui ʻa Saulá ko ha Fālesi ia, pea naʻá ne tui ko e ngaahi akonaki ʻa e kau Fālesí naʻe tonu. Naʻá ne vakai ki he kau tangata ko iá ko ha faʻifaʻitakiʻanga, ko ia naʻá ne faʻifaʻitaki kia kinautolu.—Ngāue 7:​54-60.

Hili hono tāmateʻi ʻo Sitīvení, ko e hā ʻoku fai ʻe Saulá?— ʻOkú ne feinga ke fakaʻauha ʻa e toenga ʻo e kau ākonga ʻa Sīsuú! ʻOkú ne hū hangatonu atu ki honau ngaahi ʻapí pea toho ki tuʻa ʻa e kakai tangata mo e kakai fefine fakatouʻosi. Pea ʻokú ne ʻai leva ke lī kinautolu ki he pilīsoné. Ko e tokolahi ʻo e kau ākongá kuo pau ke nau mavahe mei Selusalema, ka ʻoku ʻikai ke tuku ʻa ʻenau malanga ʻo fekauʻaki mo Sīsuú.—Ngāue 8:​1-4.

ʻOku ʻai ʻe he meʻá ni ke toe lahi ange ʻa e fehiʻa ʻa Saula ʻi he kau ākonga ʻa Sīsuú. Ko ia, ʻokú ne ʻalu ki he Taulaʻeiki Lahi ko Kaiafasí ʻo maʻu mei ai ha ngofua ke puke ʻa e kau Kalisitiane ʻi he kolo ko Tāmasikusí. ʻOku fiemaʻu ʻe Saula ke ʻomai kinautolu ko e kau pōpula ki Selusalema ke fai hanau tautea. Ka ʻi heʻene ʻi he hala ki Tāmasikusí, ʻoku hoko ha meʻa fakaofo.

ʻOku tapa mai ha maama mei hēvani, pea ʻoku pehē mai ʻe ha leʻo: “ʻE Saula, ʻe Saula, ko e ha ʻoku ke fakatangaʻi ai au?” Ko Sīsū ia ʻoku lea mai mei hēvani! ʻOku fuʻu ngingila ʻaupito ʻa e māmá ʻo ne ʻai ai ke kui ʻa Saula, pea ko e kakai naʻe ō mo Saulá ʻoku pau ke nau taki ia ki Tāmasikusi.

ʻI he hili ʻa e ʻaho ʻe tolu mei ai, ʻoku hā ʻa Sīsū ʻi ha vīsone ki he taha ʻo ʻene kau ākonga ʻi Tāmasikusi ko hono hingoá ko ʻAnanaia. ʻOku tala ʻe Sīsū kia ʻAnanaia ke ne ʻaʻahi kia Saula, ke toʻo ʻa ʻene kuí, pea ke lea kiate ia. ʻI he lea ʻa ʻAnanaia kiate iá, ʻoku tali ʻe Saula ʻa e moʻoni ʻo fekauʻaki mo Sīsuú. ʻOku toe sai ʻa ʻene sió. Ko ʻene founga moʻuí kotoa ʻoku liliu, pea ʻokú ne hoko ko ha sevāniti faitōnunga ʻa e ʻOtuá.—Ngāue 9:​1-22.

ʻOkú ke sio he taimí ni ki he ʻuhinga naʻe faʻa fai ai ʻe Saula ʻa e ngaahi meʻa naʻe koví?— Naʻe peheé koeʻuhí he naʻe akoʻi kiate ia ʻa e ngaahi meʻa hala. Naʻá ne muimui ʻi he kau tangata naʻe ʻikai te nau faitōnunga ki he ʻOtuá. Pea naʻá ne kau ki ha kulupu ʻa ia naʻa nau ʻai ʻa e ngaahi fakakaukau ʻa e tangatá ke mahuʻinga ange ia ʻi he Folofola ʻa e ʻOtuá. Ka ko e hā ʻoku liliu ai ʻe Saula ʻa ʻene moʻuí pea kamata ke failelei, neongo ʻoku hokohoko atu ʻa e fakafepaki ia ʻa e kau Fālesi kehé ki he ʻOtuá?— ʻOku peheé koeʻuhi ko Saulá ʻoku ʻikai te ne fehiʻa moʻoni ʻi he moʻoní. Ko ia, ʻi he taimi ʻoku fakahā ai kiate ia ʻa e meʻa ʻoku tonú, ʻokú ne mateuteu ke fai ia.

ʻOkú ke ʻilo ʻa e tuʻunga naʻe hoko ki ai ʻa Saula ki muí?— ʻIo, naʻe hoko ʻo ʻiloa ia ko e ʻapositolo ko Paulá, ko ha ʻapositolo ʻa Sīsū. Pea manatuʻi, naʻe lahi ange ʻa e ngaahi tohi ʻo e Tohitapú naʻe hiki ʻe Paulá ʻi ha toe taha kehe.

ʻOku ʻi ai ʻa e kakai tokolahi hangē ko Saulá ʻe lava ke nau liliu. Ka ʻoku ʻikai ke faingofua koeʻuhí he ʻoku ʻi ai ʻa e tokotaha ʻoku ngāue mālohi ke ʻai ʻa e kakaí ke nau fai ʻa e ngaahi meʻa ʻoku koví. ʻOkú ke ʻilo pe ko hai ʻa e tokotaha ko iá?— Naʻe lea ʻa Sīsū ʻo kau kiate ia ʻi he taimi naʻe hā ai ʻa Sīsū kia Saula ʻi he hala ki Tāmasikusí. Naʻe lea ai ʻa Sīsū kia Saula mei hēvani ʻo ne pehē: ‘ʻOku ou fekau atu koe ke fakaʻā ʻa e mata ʻo e kakaí, ke fakatafoki kinautolu mei he poʻulí ki he māmá pea mei he puleʻia ʻe Sētané ki he ʻOtuá.’—Ngāue 26:​17, 18.

ʻIo, ko Sētane ko e Tēvoló ʻokú ne feinga ke ʻai ʻa e tokotaha kotoa pē ke ne fai ʻa e ngaahi meʻa ʻoku koví. ʻOku faingataʻa kia koe ʻi ha taimi ke fai ʻa e meʻa ʻoku tonú?— ʻOku tau pehē kotoa pē. ʻOku ʻai ʻe Sētane ke faingataʻa. Ka ʻoku toe ʻi ai ʻa e ʻuhinga ʻoku ʻikai ke faingofua maʻu pē ai ke fai ʻa e meʻa ʻoku tonú. ʻOkú ke ʻilo ʻa e ʻuhinga ko iá?— ʻOku hoko iá koeʻuhí ʻoku fanauʻi mai kitautolu mo e angahala.

Ko e angahala ko ení ʻokú ne faʻa ʻai ke faingofua ange kia kitaua ke fai ʻa e meʻa ʻoku halá ʻi hono fai ʻa e meʻa ʻoku tonú. Ko ia, ko e hā ʻoku fiemaʻu ke ta faí?— ʻIo, kuo pau ke ta faitau ke fai ʻa e meʻa ʻoku tonú. ʻI heʻeta fai iá, ʻoku lava ke ta fakapapauʻi ko Sīsū, ʻa ia ʻoku ʻofa ʻia kitauá, te ne tokoniʻi kitaua.

ʻI he taimi naʻe ʻi māmani ai ʻa Sīsuú, naʻá ne hoko ʻo ʻofa ʻi he kakai naʻa nau fai ʻa e ngaahi meʻa naʻe kovi ka naʻa nau liliú. Naʻá ne ʻiloʻi ʻa e faingataʻa ko ia kia kinautolu ke liliú. Ko e fakatātaá, naʻe ʻi ai ʻa e kakai fefine naʻa nau fehokotaki fakasino mo e kakai tangata tokolahi. ʻOku moʻoni, ko e meʻá ni naʻe kovi. ʻOku ui ʻe he Tohitapú ʻa e kakai fefine ko ení ko e kau feʻauaki pe paʻumutu.

ʻI he taimi ʻe taha, naʻe ʻi ai ha fefine pehē naʻe fanongo ʻo fekauʻaki mo Sīsū, pea naʻá ne haʻu ki he feituʻu naʻe ʻi aí ʻi he fale ʻo ha Fālesi. Naʻá ne lingi ha lolo ʻi he vaʻe ʻo Sīsuú pea holo ʻa hono loʻimatá mei hono vaʻé ʻaki ʻa hono louʻulú. Naʻá ne mātuʻaki fakatomala ʻi heʻene ngaahi angahalá, ko ia naʻe fakamolemoleʻi ai ia ʻe Sīsū. Ka naʻe fakakaukau ʻa e Fālesí naʻe ʻikai totonu ke fakamolemoleʻi ia.—Luke 7:​36-50.

ʻOkú ke ʻilo ʻa e meʻa naʻe leaʻaki ʻe Sīsū ki he niʻihi ʻo e kau Fālesí?— Naʻá ne tala ange kia kinautolu: ‘Ko e kau feʻauakí ʻoku nau takimuʻa kiate kimoutolu ʻi he hū ki he Puleʻanga ʻo e ʻOtuá.’ (Mātiu 21:31) Naʻe leaʻaki eni ʻe Sīsuú koeʻuhí ko e kau feʻauaki ko ení naʻa nau tui kiate ia, pea naʻa nau liliu ʻenau ngaahi founga koví. Ka naʻe kei fai pē ʻe he kau Fālesí ia ʻa e ngaahi meʻa naʻe koví ki he kau ākonga ʻa Sīsuú.

Ko ia, ʻi he taimi ʻoku fakahaaʻi ai ʻe he Tohitapú ʻoku kovi ʻa e meʻa ʻokú ta faí, ʻoku totonu ke ta loto-lelei ke liliu. Pea ʻi heʻeta ʻilo ʻa e meʻa ʻoku fiemaʻu mai ʻe Sihova ke ta faí, ʻoku totonu ke ta vēkeveke ke fai ia. ʻE fiefia leva ʻa Sihova ʻia kitaua pea te ne foaki mai kia kitaua ʻa e moʻui taʻengatá.