Founga ke ʻAi Ai ke Fiefia ʻa e ʻOtuá

KO E HĀ ʻe lava ke ta fai ke ʻai ai ke fiefia ʻa e ʻOtuá? ʻE lava ke ta foaki kiate ia ha faʻahinga meʻa?— ʻOku pehē ʻe Sihova: “Ko e manu ʻo e vao ʻoku aʻaku kotoa pe.” ʻOkú ne toe pehē: “ʻOku aʻaku ʻa e siliva, pea aʻaku ʻa e koula.” (Sāme 24:1; 50:10; Hakeai 2:⁠8) Neongo ia, ʻoku ʻi ai ha meʻa ʻe lava ke ta foaki ki he ʻOtuá. Ko e hā ʻa e meʻa ko iá?—

ʻOku fakaʻatā ʻe Sihova ke ta fili pe te ta tauhi kiate ia pe ʻikai. ʻOku ʻikai te ne fakamālohiʻi kitaua ke ta fai ʻa e meʻa ʻokú ne fiemaʻu mai ke ta faí. Ta feinga angé ke ʻilo ʻa e ʻuhinga naʻe ngaohi ai ʻe he ʻOtuá kitaua koeʻuhi ke ta lava ai ke fili pe te ta tauhi kiate ia pe ʻikai.

Mahalo pē ʻokú ke ʻilo nai ʻa e lōpotí. Ko ha mīsini ia ʻoku ngaohi koeʻuhi ke ne fai ha meʻa pē ʻoku fiemaʻu ʻe he tokotaha naʻá ne ngaohi iá ke ne faí. Ko ia, ʻoku ʻikai ke ʻi ai ha fili ʻa e lōpotí. Naʻe mei malava ke ngaohi kotoa kitautolu ʻe Sihova ke tau hangē ha lōpotí. Naʻe mei malava ke ne ngaohi kitaua ke ta fai pē ʻa e meʻa ʻokú ne fiemaʻu ke ta faí. Ka naʻe ʻikai ke fai ia ʻe he ʻOtuá. ʻOkú ke ʻilo ʻa hono ʻuhingá?— Sai, ko e ngaahi meʻa-vaʻinga ʻe niʻihi ko e lōpoti. ʻI he taimi ʻoku lomiʻi ai ʻa e meʻa-lomí, ʻoku nau fai ʻa e meʻa tofu pē naʻe faʻu kinautolu ʻe he tokotaha naʻá ne ngaohi ʻa e meʻa-vaʻinga ko iá ke nau faí. Kuó ke sio nai ʻi ha meʻa-vaʻinga pehē?— ʻOku faʻa taʻeoliʻia ʻa e kakaí ʻi he vaʻinga mo ha meʻa-vaʻinga ʻokú ne fai pē ʻa e meʻa naʻe ngaohi, pe fakapolokalamaʻi ia ke ne faí. ʻOku ʻikai ke fiemaʻu ʻe he ʻOtuá ke ta talangofua ange kiate ia koeʻuhí ko ha lōpoti kitaua ʻoku fakapolokalamaʻi ke tauhi kiate ia. ʻOku fiemaʻu ʻe Sihova ke ta tauhi ia koeʻuhí ko ʻeta ʻofa kiate iá pea koeʻuhi ʻokú ta loto ke talangofua kiate ia.

ʻOku anga-fēfē hoʻo fakakaukau ki he ongoʻi ʻa ʻeta Tamai fakahēvaní ʻi heʻeta talangofua kiate ia koeʻuhí pē ko ʻeta loto ki aí?— Sai, tala mai angé, ʻoku anga-fēfē ʻa e ongoʻi ʻa hoʻo ongo mātuʻá ʻi he anga ʻo hoʻo tōʻongá?— ʻOku pehē ʻe he Tohitapú, ko ha foha poto “ko e fiefiaʻanga o ʻene tamai” ka ko ha tama vale “ko e fakamamahi oʻene faʻe.” (Palovepi 10:⁠1) Kuó ke fakatokangaʻi ʻi he taimi ʻokú ke fai ai ʻa e meʻa ʻoku kole atu ʻe hoʻo faʻeé mo hoʻo tamaí ke ke faí, ʻoku ʻai ai kinaua ke na fiefia?— Ka ʻoku fēfē ʻa ʻena ongoʻí ʻi hoʻo talangataʻa kia kinauá?—

Sai, ta fakakaukau angé ki heʻeta Tamai fakahēvaní, ʻa Sihova. ʻOkú ne tala mai kia kitaua ʻa e founga ʻe lava ke ta ʻai ai ia ke ne fiefiá. Fēfē ke ke toʻo mai hoʻo Tohitapú pea fakaava ia ki he Palovepi 27:​11 (PM). ʻOku lea mai ai ʻa e ʻOtuá kia kitaua: ‘ʻE hoku foha [pe te ta pehē nai, ʻe hoku ʻofefine], ke ke poto koe, peá ke fakafiefiaʻi hoku lotó, koeʻuhi ke u faʻa tali ia ʻa ia ʻoku manuki kiate aú.’ ʻOkú ke ʻilo ʻa e ʻuhinga ke manukiʻi ha taha?— Sai, ʻe manukiʻi nai koe ʻe ha taha ʻaki ʻene kataʻi koe peá ne pehē atu ʻoku ʻikai te ke lava ʻo fai ʻa e meʻa naʻá ke pehē te ke lava ʻo faí. ʻOku anga-fēfē hono manukiʻi ʻe Sētane ʻa Sihová?— Ta sio angé.

Manatuʻi, naʻá ta ako ʻi he Vahe 8 ʻo e tohí ni ʻoku fiemaʻu ʻe Sētane ke Fika ʻUluaki pea ʻokú ne fiemaʻu ʻa e tokotaha kotoa ke talangofua ange kiate ia. ʻOku pehē ʻe Sētane ʻoku lotu pē ʻa e kakaí kia Sihová koeʻuhí he ʻe foaki ange ʻe Sihova kia kinautolu ʻa e moʻui taʻengatá kapau te nau fai pehē. ʻI he hili hono ʻai ʻe Sētane ʻa ʻĀtama mo ʻIvi ke na talangataʻa kia Sihová, naʻe fakakikihiʻi ai ʻe Sētane ʻa e ʻOtuá. Naʻá ne tala ki he ʻOtuá: ‘ʻOku tauhi pē ʻa e kakaí kia koe koeʻuhi ko e meʻa ʻoku nau maʻu meia koé. Tuku mai ʻa e faingamālié, pea ʻe lava ke u fakatafokiʻi ha taha pē meia koe.’

Ko e moʻoni, ʻoku ʻikai ke hā ʻa e ngaahi lea tofu pē ko iá ʻi he Tohitapú. Ka ʻi heʻeta lautohi ʻo fekauʻaki mo e tangata ko Siopé, ʻoku hoko ʻo hā mahino naʻe leaʻaki ʻe Sētane ha meʻa meimei tatau ki he ʻOtuá. Naʻe mahuʻinga moʻoni, kia Sētane pea mo Sihova, pe naʻe faitōnunga ʻa Siope ki he ʻOtuá pe ʻikai. Ta fakaava hake ʻeta Tohitapú ki he Siope vahe 1 mo e vahe 2 ke ta sio ki he meʻa naʻe hokó.

Fakatokangaʻi ʻi he Siope vahe 1 ʻoku ʻi ai tonu ʻa Sētane ʻi hēvani ʻi he haʻu ʻa e kau ʻāngeló kia Sihová. Ko ia, ʻoku ʻeke ʻe Sihova kia Sētane: “Ko hoʻo haʻu mei fe?” ʻOku tali ʻe Sētane naʻá ne takai holo ʻo mamata ʻi he māmaní. Ko ia, ʻoku ʻeke ange ʻe Sihova: ‘Kuó ke fakatokangaʻi ʻa Siope, ʻa ia ʻokú ne tauhi kiate au pea ʻoku ʻikai te ne fai ha kovi?’—Siope 1:​6-8.

ʻI he taimi pē ko iá ʻoku kumi tonuhia ʻa Sētane. ‘Ko e lotu pē ʻa Siope kia koé koeʻuhí ko e ʻikai ke hoko ha kovi kiate iá. Kapau te ke toʻo ʻa hoʻo maluʻí mo hoʻo tāpuakí meiate ia, te ne lauʻikoviʻi koe ʻi ho fofongá.’ Ko ia, ʻoku tali ʻe Sihova: ‘ʻOku lelei, ʻe Sētane, fai pē ha meʻa kiate ia ʻokú ke loto ki aí, kae ʻoua te ke fakalaveaʻi ʻa Siope.’—Siope 1:​9-12.

Ko e hā ʻoku fai ʻe Sētané?— ʻOkú ne ʻai ha kakai ke nau kaihaʻasi ʻa e fanga pulu mo e fanga ʻasi ʻa Siopé pea tāmateʻi ʻa e faʻahinga ʻoku nau tokangaʻi iá. ʻOku hoko mai leva ha ʻuhila, ʻo ne tāmateʻi ʻa e fanga sipí mo honau kau tauhí. Ki mui ai, ʻoku haʻu ha kakai ʻo kaihaʻasi ʻa e fanga kāmelí pea tāmateʻi ʻa e faʻahinga ʻoku nau tokangaʻi kinautolú. Fakaʻosí, ʻoku ʻai ʻe Sētane ha matangi mālohi ʻa ia ʻokú ne holoki ʻa e fale ʻoku ʻi ai ʻa e fānau ʻe toko hongofulu ʻa Siopé, pea ʻoku nau mate kotoa ai. Neongo ʻa e ngaahi meʻa kotoa ko ení, ʻoku kei tauhi pē ʻa Siope kia Sihova.—Siope 1:​13-22.

ʻI he toe fetaulaki ʻa Sihova mo Sētané, ʻoku ʻohake ʻe Sihova ʻa e kei faitōnunga ʻa Siopé. ʻOku kumi tonuhia ʻa Sētane, ʻo ne pehē: ‘Kapau te ke tuku mai pē ke u fakalaveaʻi hono sinó, te ne lauʻikoviʻi koe ʻi ho fofongá.’ Ko ia, ʻoku fakaʻatā ʻe Sihova ʻa Sētane ke ne fakalaveaʻi ʻa e sino ʻo Siopé ka ʻokú ne fakatokanga kiate ia ke ʻoua te ne tāmateʻi ʻa Siope.

ʻOku fakamamahiʻi ʻe Sētane ʻa Siope ʻo kamata ke hā ha ngaahi pala ʻi hono sinó kotoa. ʻOku nanamu ʻaupito ʻa e ngaahi palá ni ʻo ʻikai ai ha taha ʻe fie ofi kiate ia. Naʻa mo e uaifi ʻo Siopé ʻokú ne tala ange kiate ia: “Lea kovi ki he Otua, ka ke mate.” Ko e faʻahinga ʻoku fakangalingali ko e ngaahi kaumeʻa ʻo Siopé ʻoku nau omi ke ʻaʻahi pea ʻoku nau ʻai ke toe kovi ange ʻa ʻene ongoʻí ʻaki ʻenau pehē kuo pau pē naʻá ne fai ha ngaahi meʻa ʻoku kovi ʻaupito ʻoku hoko ai ʻa e ngaahi faingataʻá ni kotoa. Kae kehe, neongo ʻa e faingataʻa mo e mamahi kotoa ʻoku fakatupunga ʻe Sētane kia Siopé, ʻoku kei hokohoko atu pē ʻa e tauhi faitōnunga ia ʻa Siope kia Sihová.—Siope 2:​1-13, PM; Siope 7:5; 19:​13-20.

ʻOku anga-fēfē hoʻo fakakaukau ki he ongoʻi ʻa Sihova ki he faitōnunga ʻa Siopé?— Naʻá ne ʻai ia ke ne fiefia koeʻuhí he naʻe lava ke tala ʻe Sihova kia Sētane: ‘Vakai kia Siope! ʻOkú ne tauhi kiate au koeʻuhí he ko hono lotó ia.’ Te ke hangē ko Siopé, ʻo hoko ko ha tokotaha ʻe malava ke ʻohake ʻe Sihova ko ha faʻifaʻitakiʻanga ʻoku fakamoʻoniʻi ai ko Sētané ko ha tokotaha loi?— Ko hono moʻoní, ko ha monū ia ke ʻoatu ha tali ki he pehē ʻe Sētane ʻe lava ke ne fakatafokiʻi ha taha pē mei hono tauhi ʻa Sihová. Naʻe vakai moʻoni ki ai ʻa Sīsū ko ha monū.

Naʻe ʻikai ʻaupito ke fakaʻatā ʻe he Faiako Lahí ʻa Sētane ke ne ʻai Ia ke ne fai ha meʻa naʻe hala. Fakakaukau atu ki he hoko ʻo fiefia ʻa ʻene Tamaí ʻi heʻene faʻifaʻitakiʻangá! Naʻe malava ke ʻohake ʻe Sihova ʻa Sīsū peá ne tali kia Sētane: ‘Vakai ki hoku ʻAló! Kuó ne tauhi faitōnunga kakato kiate au koeʻuhí he ʻokú ne ʻofa ʻiate au!’ Fakakaukau atu foki ki he fiefia naʻe maʻu ʻe Sīsū ʻi hono ʻai ke fiefia ʻa e loto ʻo ʻene Tamaí. Koeʻuhi ko e fiefia ko iá, naʻe aʻu ʻo kātakiʻi ʻe Sīsū ʻa e pekia ʻi ha ʻakau fakamamahí.—Hepelu 12:⁠2.

ʻOkú ke loto ke hangē ko ʻeta Faiako Lahí ʻo ʻai ke fiefia ʻa Sihova?— Ko ia, hokohoko ako ʻo fekauʻaki mo e meʻa ʻoku fiemaʻu ʻe Sihova ke ke faí, pea ʻai ia ke ne fiefia ʻaki hono fai ia!