Founga ʻe Lava Ke Ta ʻIlo Ai ʻOku Ofi ʻa ʻĀmaketoné

ʻOKÚ KE ʻilo ʻa e fakaʻilongá, ʻikai ko ia?— ʻI he Vahe 46 naʻá ta lau ai ʻo fekauʻaki mo e fakaʻilonga naʻe foaki ʻe he ʻOtuá ʻa ia ʻe ʻikai ʻaupito te ne toe fakaʻauha ʻa e māmaní ʻaki ha lōmaki. ʻIkai ngata aí, naʻe kole ʻa e kau ʻapositoló ki ha fakaʻilonga koeʻuhi ke nau ʻilo ai ʻa e taimi ʻe toe foki mai ai ʻa Sīsuú mo e taimi ʻoku ofi ai ke ngata ʻa e māmaní, pe ko e fokotuʻutuʻu ʻo e ngaahi meʻá.—Mātiu 24:⁠3.

Koeʻuhi ʻe taʻehāmai ʻa Sīsū ʻi hēvani, naʻe fiemaʻu ha fakaʻilonga ʻe lava ke sio ki ai ʻa e kakaí ke fakahaaʻi ai naʻá ne ʻosi kamata pule. Ko ia, naʻe fakamatala ai ʻa Sīsū ʻo fekauʻaki mo e ngaahi meʻa ʻoku totonu ke tokanga ki ai ʻa ʻene kau ākongá ʻi heni ʻi he māmaní. ʻI he taimi ʻe hoko ai ʻa e ngaahi meʻa ko ení, ʻe ʻuhinga iá kuó ne toe foki pea kuó ne kamata pule ʻi hēvani ko e Tuʻi.

Ke akoʻi ʻa ʻene kau ākongá ki he mahuʻinga ʻo e leʻo hokohokó, naʻe tala ange ʻe Sīsū kia kinautolu: “Mou vakai ʻa e fiki, mo e ngaahi ʻakau kehekehe: ka nau ka talamuka leva, ʻoku mou lāuʻilo ʻi hoʻomou sio ki ai, ʻoku ofi ʻa e faʻahitaʻu māfana.” (Fakaʻītali ʻamautolu.) ʻOkú ke ʻilo ʻa e founga ke tala ai ʻoku ofi ʻa e taimi māfaná. Pea ʻe lava ke ke tala ʻa e ofi ʻa ʻĀmaketoné ʻi he taimi te ke sio ai ʻoku hoko ʻa e ngaahi meʻa naʻe lea ki ai ʻa Sīsuú.—Luke 21:​29, 30.

ʻI he pēsí ni mo e peesi hoko maí, te ta sio ai ki he fakatātā ʻo e ngaahi meʻa naʻe pehē ʻe Sīsū ʻe hoko ko e konga ʻo e fakaʻilonga ʻoku ofi ʻa e Puleʻanga ʻo e ʻOtuá. ʻI he taimi ʻe hoko kotoa ai ʻa e ngaahi meʻa ko ení, ʻe laiki ai ʻe he Puleʻanga ʻo e ʻOtuá ʻa ia ko Kalaisi ʻa hono tokotaha Pulé ʻa e ngaahi puleʻanga kehe kotoa pē, hangē ko ia naʻá ta lau ʻi he Vahe 46.

Ko ia, sio fakalelei ki he ngaahi fakatātā ʻi he ongo peesi ki muʻá, pea te ta talanoa leva ʻo fekauʻaki mo ia. ʻI he Mātiu 24:​6-14 mo e Luke 21:​9-11, ʻe lava ke ke lau ai ʻo fekauʻaki mo e meʻa ʻokú ke sio ki ai ʻi he ngaahi fakatātā ko ení. Toe fakatokangaʻi foki ʻa e kiʻi mataʻifika ʻi he fakatātā taki taha. Ko e mataʻifika tatau pē ia ʻoku hā ʻi he kamataʻanga ʻo e palakalafi ʻokú ne fakamatalaʻi ʻa e fakatātā ko iá. Ta sio leva he taimí ni pe ʻoku fakahoko he ʻahó ni ʻa e ngaahi konga lahi ʻo e fakaʻilonga naʻe ʻomai ʻe Sīsuú.

(1) Naʻe pehē ʻe Sīsū: ‘Te mou fanongo ki he ngaahi tau mo e ongoongo ʻo e tau: . . . ʻe tuʻu hake ʻa e kakai ki he kakai, mo e puleʻanga ki he puleʻanga.’ Kuó ke fanongo ʻi ha ngaahi ongoongo ʻo fekauʻaki mo e taú?— Ko e ʻuluaki tau ʻa māmaní naʻe fakahoko ia ʻi he 1914 ki he 1918, pea naʻe hoko mo e Tau II ʻa Māmaní, ʻi he 1939 ki he 1945. Naʻe teʻeki ai ʻaupito ke hoko ki muʻa ha tau ʻa e māmani! ʻI he taimí ni, ʻoku ʻi ai ʻa e ngaahi tau ʻi he māmaní kotoa. ʻOku ngalingali ko e ʻaho kotoa pē ʻi he TV, ʻi he letioó, pea ʻi he nusipepá, ʻokú ta fanongo ai pe lau ʻo fekauʻaki mo e taú.

(2) Naʻe toe pehē ʻe Sīsū: “ʻE ai ha ngāhi honge . . . ʻi he ngāhi potu kehekehe.” Hangē nai ko ia ʻokú ke ʻiló, ʻoku ʻikai ke maʻu ʻe he tokotaha kotoa pē ha meʻakai feʻunga ke nau kai. ʻI he ʻaho kotoa pē ʻoku mate ʻa e laui afe ʻo e kakaí koeʻuhi ko e ʻikai te nau maʻu ha meʻakai feʻungá.

(3) Naʻe tānaki mai ʻe Sīsū: ‘ʻE ʻi ai ʻa e ngaahi mahaki fakaʻauha ʻi he ngaahi potu kehekehe.’ ʻOkú ke ʻilo ko e hā ʻa e mahaki fakaʻauha?— Ko ha puke ia, pe mahaki ʻokú ne tāmateʻi ha kakai tokolahi. Ko e mahaki fakaʻauha lahi ʻe taha naʻe ui ko e fulū Sipeiní, naʻá ne tāmateʻi ʻa e kakai ʻe toko 20 miliona nai ʻi he foʻi taʻu pē ʻe taha pe ofi ki ai. ʻI he ʻahó ni, ʻoku tokolahi ange ai ʻa e kakai te nau mate nai ʻi he ʻeitisí. Pea ko e kanisaá, mahaki mafú, mo e ngaahi mahaki kehé ʻokú ne tāmateʻi ʻa e laui afe lahi ʻo e kakaí ʻi he taʻu kotoa pē.

(4) Naʻe ʻomai ʻe Sīsū ʻa e konga ʻe taha ʻo e fakaʻilongá, ʻi heʻene pehē: “ʻE ai . . . ha ngāhi mofuike ʻi he ngāhi potu kehekehe.” ʻOkú ke ʻilo ko e hā ʻa e mofuike?— Ko e mofuiké ʻokú ne ʻai ʻa e kelekelé ke ngalulu ʻi lalo ʻi ho vaʻé. ʻOku holo ʻa e ngaahi falé, pea ʻoku faʻa mate ai ʻa e kakaí. Talu mei he taʻu 1914, kuo ʻi ai ʻa e ngaahi mofuike lahi ʻi he taʻu kotoa pē. Kuó ke fanongo ʻi ha ngaahi mofuike?—

(5) Naʻe pehē ʻe Sīsū ko e toe konga ʻe taha ʻo e fakaʻilongá ko e ‘fakautuutu ʻa e koví.’ Ko e ʻuhinga ia ʻoku lahi ʻaupito ai ʻa e kaihaʻá mo e fakamālohí. ʻOku ilifia ʻa e kakai ʻi he feituʻu kotoa pē naʻa feinga nai ha taha ke hae honau ngaahi ʻapí. Kuo ʻikai ʻaupito ke ʻi ai ha faihia mo ha fakamālohi lahi pehē ki muʻa ʻi he feituʻu kotoa pē ʻo e māmaní ʻo hangē ko ia he taimi ní.

(6) Naʻe ʻomai ʻe Sīsū ha konga mātuʻaki mahuʻinga ʻo e fakaʻilongá ʻi heʻene pehē: “ʻE ʻoua ke fanongonongo ki mamani katoa ʻa e ongoongolelei ko eni ʻo e puleʻanga, ke ai ha fakamatala ki he ngāhi kakai kotoa pe, pea toki hoko ʻa e ngataʻanga.” (Mātiu 24:14) Kapau ʻokú ke tui ki he “ongoongolelei ko eni,” ʻoku totonu leva ke ke talanoa ia ki he niʻihi kehé. ʻI he meʻa ko iá, ʻe malava ai ke ke kau ʻi hono fakahoko ʻa e konga ko eni ʻo e fakaʻilongá.

ʻE pehē nai ʻe he kakai ʻe niʻihi ko e ngaahi meʻa naʻe tomuʻa tala ʻe Sīsuú kuo hoko maʻu pē ia. Ka kuo teʻeki ai ke hoko kotoa ki muʻa ʻa e ngaahi meʻa ia ko iá ʻi ha ngaahi feituʻu lahi ʻo e māmaní pea ʻi he taimi tatau pē. Ko ia, ʻokú ke mahinoʻi ʻa e ʻuhinga ʻo e fakaʻilongá?— ʻOku ʻuhinga iá ʻi he taimi te ta sio ai ʻoku hoko kotoa ʻa e ngaahi meʻa ko ení, ʻe vavé ni ke fetongi ʻa e māmani kovi ko ení ʻe he māmani foʻou ʻa e ʻOtuá.

ʻI he taimi naʻe ʻomai ai ʻe Sīsū ʻa e fakaʻilonga ko ení, naʻá ne toe lea foki ʻo fekauʻaki mo ha taimi makehe ʻo e taʻú. Naʻá ne pehē: “Mou lotua ke ʻoua naʻa hoko hoʻomou hola ʻi he faʻahitaʻu momoko.” (Mātiu 24:​20) Ko e hā hoʻo fakakaukau ki heʻene ʻuhinga ki he meʻa ko iá?—

Sai, kapau ʻe hola ha taha mei ha fakatuʻutāmaki lolotonga ʻa e taimi momokó, ʻa ia ʻe ʻai ai ʻe he ʻeá ke mātuʻaki faingataʻa pe aʻu ʻo fakatuʻutāmaki ke fononga, ko e hā ʻe lava ke hokó?— Kapau te ne lava ʻo hola, ʻe hoko ia ʻi he tuʻunga faingataʻa lahi. ʻIkai ʻe fakamamahi ki ha taha ke mate ʻi ha afā koeʻuhi pē naʻá ne fuʻu femoʻuekina ʻi he fai ʻo e ngaahi meʻa kehé ke kamata ai ki muʻa ʻa ʻene fonongá?—

ʻOkú ke mahinoʻi ʻa e fakakaukau naʻe fakamatalaʻi ʻe Sīsū ʻi heʻene talanoa ʻo fekauʻaki mo e ʻikai tatali kae ʻoua ke hoko ʻa e taimi momokó pea toki holá?— Naʻá ne tala mai kia kitaua koeʻuhi ʻokú ta ʻilo ʻoku ofi ʻa ʻĀmaketone, ʻoku ʻikai fiemaʻu ke toe tatali ʻeta ngāue ke fakamoʻoniʻi ʻokú ta ʻofa ki he ʻOtuá ʻaki ʻa e tauhi kiate ia. Kapau te ta tatali, ʻe fuʻu tōmui nai ia kia kitaua. Ko ia, te ta hangē tofu pē ai ko e faʻahinga ʻi he taimi ʻo e fuʻu Lōmaki lahí ʻa ia naʻa nau fanongo kia Noa kae ʻikai te nau hū ki he ʻaʻaké.

Ko hono hokó, ta talanoa leva pe ʻe fēfē ʻa e taimi ʻe ʻosi ai ʻa e tau lahi ʻo ʻĀmaketoné. Te ta ako ai ki he meʻa kuo teuteu mai ʻe he ʻOtuá ki he faʻahinga kotoa ʻo kitautolu ʻoku ʻofa mo tauhi kiate ia he taimi ní.