Fekauʻi Atu ʻe Sihova ʻa Selemaia ke Malanga

Naʻe fili ʻe Sihova ʻa Selemaia ke ne hoko ko ha palōfita ki he kakai ʻo Siutá. Naʻá ne tala ange ke ne malanga ki he kakaí pea fakatokanga kiate kinautolu ʻoku fiemaʻu ke tuku ʻenau fai ʻa e ngaahi meʻa ʻoku koví. Naʻe pehē ʻe Selemaia: ‘Ka ko eni ʻe Sihova, ko ha tamasiʻi pē au. ʻOku ʻikai te u ʻiloʻi pe te u lea fēfē ki he kakaí.’ Naʻe tala ange ʻe Sihova: ‘ʻOua ʻe ilifia. Te u tala atu ʻa e meʻa ke ke leaʻakí. Te u tokoniʻi koe.’

Naʻe tala ʻe Sihova kia Selemaia ke ne fakatahatahaʻi mai ʻa e kau mātuʻa ʻi he kakaí, pea laiki ha siā ʻumea ʻi muʻa ʻiate kinautolu, peá ne pehē: ‘ʻE laiki ʻa Selusalema ʻo hangē pē ko ení.’ ʻI hono fai ʻe Selemaia ʻa e meʻa naʻe tala ange ʻe Sihová, naʻe ʻita lahi ai ʻa e kau mātuʻá. Naʻe tā ʻe ha taulaʻeiki ko Pasua ʻa Selemaia pea fakamaʻu ia ʻi ha ʻakau-kiiʻi. Naʻe ʻikai lava ke ngaue ʻa Selemaia ʻi he poó kotoa. Naʻe tuku ange ia ʻe Pasua ʻi he pongipongi hono hokó. Naʻe pehē ʻe Selemaia: ‘ʻOku ʻikai lava ke u kei kātaki. ʻE tuku ʻa ʻeku malangá.’ Ka naʻá ne foʻi moʻoni? ʻIkai. ʻI he toe fakakaukau ʻa Selemaia fekauʻaki mo iá, naʻá ne pehē: ‘Ko e fekau ʻa Sihová ʻoku hangē ia ha afi ʻi loto ʻiate aú. Heʻikai lava ke tuku ʻeku malangá.’ Naʻe hokohoko atu ʻa e fakatokanga ʻa Selemaia ki he kakaí.

Naʻe hili atu mei ai ha ngaahi taʻu, pea naʻe ʻi ai ha tuʻi foʻou ʻi Siuta. Naʻe fehiʻa ʻa e kau taulaʻeikí mo e kau palōfita loí ʻi he meʻa naʻe tala ʻe Selemaiá. Naʻa nau tala ki he houʻeikí: ‘ʻOku tonu ke mate ʻa e tangatá ni.’ Naʻe pehē ʻe Selemaia: ‘Kapau te mou tāmateʻi au, te mou tāmateʻi ha tangata tonuhia. ʻOku ou leaʻaki ʻa e lea ʻa Sihová, ʻo ʻikai ko haʻaku lea.’ ʻI he fanongo ki ai ʻa e houʻeikí, naʻa nau pehē: ‘ʻOku ʻikai tonu ke mate ʻa e tangatá ni.’

Naʻe hokohoko atu ʻa e malanga ʻa Selemaiá, pea naʻe ʻita lahi ʻa e houʻeikí. Naʻa nau kole ki he tuʻí ke tāmateʻi ʻa Selemaia. Naʻe tala ange ʻe he tuʻí ʻe lava ke nau fai kia Selemaia ha meʻa pē ʻoku nau loto ki ai. Naʻa nau ʻave ʻa Selemaia ʻo lī ki ha loto vai naʻe loloto mo pelepela, ʻi heʻenau ʻamanaki te ne mate ai. Naʻe kamata ke ngoto hifo ʻa Selemaia ʻi he pelepelá.

Naʻe tala ange leva ʻe ha ʻōfisa ʻi he lotoʻaá ko ʻĒpeti-meleki ki he tuʻí: ‘Kuo lī ʻe he houʻeikí ʻa Selemaia ki he loto vai! Kapau te tau liʻaki ia ai, te ne mate.’ Naʻe fekauʻi ʻe he tuʻí kia ʻĒpeti-meleki ke ne ʻalu mo e kau tangata ʻe toko 30 ʻo fusi hake ʻa Selemaia mei he loto vaí. ʻIkai ʻoku totonu ke tau hangē ko Selemaiá, ʻa ia naʻe ʻikai te ne fakaʻatā ha meʻa ke ne taʻofi ʻa ʻene malangá?