Fafanga ʻe Sīsū ʻa e Laui Afe

Ki muʻa pē ʻi he Pāsova ʻo e taʻu 32 T.S., naʻe foki mai ai ʻa e kau ʻapositoló mei haʻanau malanga. Naʻa nau helaʻia, ko ia naʻe ʻave ai kinautolu ʻe Sīsū ʻi ha vaka ki Petesaita, ʻa ia naʻe lava ke nau mālōlō ai. Ka ʻi he ofi atu ʻa e vaká ki ʻutá, naʻe sio atu ʻa Sīsū ki he kakai ʻe laui afe naʻa nau muimui ʻiate kinautolu ki ai. Neongo naʻe loto ʻa Sīsū ke ne ʻi ai pē mo ʻene kau ʻapositoló, naʻá ne talitali anga-ʻofa ʻa e kakaí. Naʻá ne fakamoʻui ʻenau kau puké pea kamata ke akoʻi kinautolu. ʻI he ʻahó kotoa, naʻe akoʻi ai ʻe Sīsū kinautolu fekauʻaki mo e Puleʻanga ʻo e ʻOtuá. ʻI heʻene efiafí, naʻe omi kiate ia ʻene kau ʻapositoló ʻo nau pehē: ‘ʻOku pau pē ʻoku fiekaia ʻa e kakaí. Fekau ke nau ō ʻo kumi ha meʻakai ke nau kai.’

Naʻe pehē ange ʻe Sīsū: ‘ʻOku ʻikai fiemaʻu ia ke nau mavahe. Mou ʻoange ha meʻa ke nau kai ʻi heni.’ Naʻe ʻeke ange ʻe he kau ʻapositoló: ‘ʻOkú ke loto ke mau ō ʻo fakatau mai ha mā maʻanautolu?’ Ko Filipe, ʻa e taha ʻo e kau ʻapositoló, naʻá ne pehē: ‘Neongo pe ʻoku lahi ʻetau paʻangá, heʻikai lava ke tau fakatau mai ha mā feʻunga ki he fuʻu kakaí ni.’

Naʻe ʻeke ange ʻe Sīsū: ‘Ko e hā ʻa e lahi ʻo e meʻakai ʻoku tau maʻú?’ Naʻe pehē ʻe ʻAnitelū: ‘ʻOku tau maʻu ʻa e foʻi mā ʻe nima mo e kiʻi mataʻiika ʻe ua. ʻOku ʻikai ʻaupito ke feʻunga ia.’ Naʻe pehē ange ʻe Sīsū: ‘ʻOmai ʻa e maá mo e iká.’ Naʻá ne tala ange ki he kakaí ke nau tangutu ʻi he musié ʻi he ngaahi kulupu ʻo e toko 50 mo e toko 100. Naʻe toʻo ʻe Sīsū ʻa e maá mo e iká, peá ne hanga hake ki he langí, ʻo ne lotu. Naʻá ne ʻoange leva ʻa e meʻakaí ki he kau ʻapositoló, pea naʻa nau tufa ia ki he kakaí. Ko e kakai tangata mo e kakai fefine mo e fānau ʻe toko 5,000 naʻa nau kai ʻo aʻu ki heʻenau mākona. Hili iá, naʻe tānaki ʻe he kau ʻapositoló ʻa e meʻa naʻe toé, koeʻuhí ke ʻoua naʻa maumau ha meʻa. Naʻe feʻunga mo e kato naʻe fonu ʻe 12! Ko ha mana fakaofo ia, ʻikai ko ia?

Naʻe maongo lahi ia ki he kakaí ʻo nau loto ke fakanofo ʻa Sīsū ko honau tuʻi. Naʻe ʻiloʻi ʻe Sīsū naʻe ʻikai ko e taimi ia ʻa Sihova ke ne hoko ai ko e tuʻí. Ko ia naʻá ne fekau ʻa e fuʻu kakaí ke nau ō pea tala ange ki heʻene kau ʻapositoló ke nau ō ki he tafaʻaki ʻe taha ʻo e Tahi Kālelí. Naʻa nau heka ʻi honau vaká, pea naʻe ʻalu toko taha pē ʻa Sīsū ki he moʻungá. Ko e hā hono ʻuhingá? Koeʻuhí naʻá ne fiemaʻu ʻa e taimi ke lotu ai ki heʻene Tamaí. Tatau ai pē pe naʻá ne femoʻuekina, naʻe vaheʻi maʻu pē ʻe Sīsū ʻa e taimi ke lotu ai.