Sīsū—Ko ʻEne Moʻui mo ʻEne Ngāue Fakafaifekau

Ko e Kumi ʻa e Faʻahinga Kuo Mole

ʻOKU vēlevele ʻa Sīsū ke kumi mo maʻu ʻa kinautolu te nau anga-fakatōkilalo ʻo tauhi ʻa e ʻOtuá. Ko ia ʻokú ne kumi atu mo malanga ki he tokotaha kotoa pē ʻo kau ki he Puleʻangá, kau ai mo e kau angahala ongoongoa he faikoví. Ko e faʻahinga pehe ní ʻoku nau ʻunuʻunu ofi ke fanongo kiate ia.

ʻI he vakai ki he meʻá ni, ʻoku fakaangaʻi ʻe he kau Fālesí mo e kau sikalaipé ʻa Sīsū ko ʻene feohi mo e kakai ʻa ia ʻoku nau lau ʻoku taʻe taaú. ʻOku nau muhu: “Ko e siana ni ʻoku ne tali ʻa e kau angahala, mo ne keinanga mo kinautolu.” Ko ha toki meʻa māʻulalo ē kiate kinautolu! ʻOku ngaohikoviʻi ʻe he kau Fālesí mo e kau sikalaipé ʻa e kakai lāuvalé ʻo hangē ha ʻuli ʻi honau ʻaofi vaʻé. Ko hono moʻoní, naʻa nau ngāueʻaki ʻa e kupuʻi lea faka-Hepelū ko e ‛am ha·’aʹrets, ko e “kakai ʻo e kelekele [fonua],” ke fakahā ʻenau paetaku ki he faʻahinga peheé.

ʻI he tafaʻaki ʻe tahá, ʻoku feangainga ʻa Sīsū mo e tokotaha kotoa pē ʻaki ʻa e fakaʻapaʻapa, angaʻofa, mo e manavaʻofa. Ko hono olá, ko e tokolahi ʻo e faʻahinga ʻi he tuʻunga māʻulalo ko ʻení, kau ai mo e faʻahinga ʻoku ʻiloa ʻi heʻenau toutou faihalá, ʻoku nau vēkeveke ke fanongo kiate ia. Ka fēfē ʻa e fakaanga ʻa e kau Fālesí kia Sīsū ʻo kau ki heʻene ʻosiʻosi-ivi kiate kinautolu ʻoku nau lau ʻoku taʻe taaú?

ʻOku tali ʻe Sīsū ʻenau fakafepakí ʻaki hono ngāueʻaki ha fakatātā. ʻOkú ne lea mei he anga ʻo e fakakaukau ʻa e kau Fālesí, ʻa ia ʻoku nau māʻoniʻoni pea ʻoku nau malu ʻi he lotoʻā ʻa e ʻOtuá, lolotonga ia kuo ʻalu hē ʻa e kau ‛am ha·’aʹrets fakafehiʻanekiná pea ʻoku nau ʻi ha tuʻunga mole. Fanongo ki heʻene ʻeké:

“Tau lau ko e toko taha ʻiate kimoutolu, ko e tangata, ʻoku ʻi ai ʻene fanga sipi ʻe toko teau pea kuo mole hanau taha, ʻikai te ne tuku ʻa e toko hivangofulu ma hiva ʻi he toafa, ka ne ʻalu ʻo kumi ʻa ia kuo mole kaeʻoua ke ne ʻilo ʻa e toko taha ko ia? Pea ka ʻilo leva ia, te ne fiefia, mo fua ia ʻi hono uma oʻona. Pea ʻi heʻene aʻu ki ʻapi, te ne fakataha hono ngaahi kaumeʻa, mo hono ngaahi kaungaʻapi, mo ne pehē kiate kinautolu, Tau fakafiefia; he kuo u ʻilo ʻeku sipi naʻe mole.”

ʻOku toki ʻai ʻe Sīsū ʻa e ʻuhinga ki heʻene talanoá, ʻo ne fakamatalaʻi: “Tala atu, ʻe pehē ha fiefia ʻi he langi ʻi he fakatomala ʻa ha foʻi angahala e toko taha, ʻio, ʻo hulu atu ʻi ha toko hivangofulu ma hiva faitotonu, ʻa ia ʻoku ʻikai haʻanau meʻa ke fakatomala ai.”

Ko e kau Fālesí ʻoku nau lau ko kinautolú ko e kau māʻoniʻoni ʻa ia ʻoku ʻikai te nau fiemaʻu ʻa e fakatomalá. ʻI hono fakaangaʻi ʻe ha niʻihi ʻo kinautolu ʻa Sīsū ʻi ha taʻu ʻe ua ki muʻa atu ʻi heʻene kai mo e kau tānaki tukuhaú mo e kau angahalá, naʻá ne tala kiate kinautolu: “Naʻe ʻikai te u haʻu ke ui ʻa e angatonu, ka ko e angahala.” Ko e kau Fālesi fie māʻoniʻoní, ʻa ia ʻoku ʻikai te nau ʻilo ʻenau fiemaʻu ke fakatomalá, ʻoku ʻikai ke ʻomai ai ha fiefia ʻi he langí. Ka ko e kau angahala fakatomala moʻoní ʻoku nau ʻomai ʻa e fiefiá.

ʻI hono ʻai ke mālohi ange ʻa e poini ʻa ia ko e fakafoki ʻo e kau angahala naʻe molé ko ha meʻa fakatupunga fiefia lahi, ʻoku toe tala ʻe Sīsū ha toe fakatātā ʻe taha. ʻOkú ne pehē: “Pea tau lau ko ha toko taha kehe, ko ha fefine, ʻoku ʻi ai ʻene paʻanga ʻe hongofulu; pea ka mole ha foʻi paʻanga ʻe taha, ʻikai te ne tutu ha māma, pea tafi ʻa e fale, ʻo kumi fakamātoato kaeʻoua ke ʻilo? Pea ʻi heʻene ʻilo leva te ne fakataha ʻa e kau fefine ʻoku nau kaumeʻa, mo e kaungaʻapi, mo ne pehē, Tau fakafiefia: he kuo u ʻilo ʻa e paʻanga naʻe mole.”

Ko Sīsū ʻokú ne ʻoatu ha ʻuhinga meimei tatau ʻo ne pehē: “Tala atu, ʻe hoko ha fiefia pehē ʻi he haʻohaʻonga ʻo e kau angelo ʻa e ʻOtua ʻi he fakatomala ʻa ha foʻi angahala e toko taha.”

Ko e toki meʻa fakaofo ē ʻa e tokanga anga-ʻofa ʻa e kau ʻāngelo ʻa e ʻOtuá ki he fakafoki ʻo e kau angahala kuo molé! ʻOku tautefito ʻeni koeʻuhi ko e faʻahinga naʻe ʻi he tuʻunga māʻulalo mo taʻe tokaʻi ko ení, ko e ‛am ha·’aʹrets, ʻe faifai atu pē ʻo nau hoko ki he tuʻunga ke hoko ko ha mēmipa ʻi he Puleʻanga fakahēvani ʻo e ʻOtuá. Ko hono olá, ʻoku nau maʻu ha tuʻunga ʻi hēvani ʻo māʻolunga ange ʻi he kau ʻāngeló! Ka ʻi he ʻikai te nau ongoʻi meheka pe taʻe tokaʻí, ʻoku houngaʻia anga-fakatōkilalo ʻa e kau ʻāngeló ʻi he moʻoniʻi meʻa ko e kau tangata angahalaʻia ko ʻení kuo nau fehangahangai mo lavaʻi ʻa e ngaahi tuʻunga ʻi he moʻuí ʻa ia ʻe teuteuʻi ai kinautolu ke hoko ko e kau tuʻi mo e kau taulaʻeiki fakahēvani manavaʻofa mo mohu meesi. Luke 15:​1-10; Mātiu 9:13; 1 Kolinitō 6:​2, 3; Fakahā 20:6.

◆ Ko e hā ʻa e ʻuhinga ʻoku feohi ai ʻa Sīsū mo e kau fai angahala ʻiloá, pea tohoaki ai ʻa e fakaanga fēfē mei he kau Fālesí?

◆ ʻOku anga-fēfē ʻa e vakai ʻa e kau Fālesí ki he kakai lāuvalé?

◆ Ko e hā ʻa e ngaahi fakatātā ʻoku ngāueʻaki ʻe Sīsū, pea ko e hā ʻe lava ke tau ako mei aí?

◆ Ko e hā ʻoku fakaofo ai ʻa e fiefia ʻa e kau ʻāngeló?