Sīsū—Ko ʻEne Moʻuí mo ʻEne Ngāue Fakafaifekau

Ko e ʻAmanaki ʻo e Toetuʻu

KUO aʻu mai eni ʻa Sīsū ki he matakolo ʻo Pētaní, ko ha kolo ʻoku kilomita nai ʻe tolu mei Selusalema. Ko e hili atu pē ia ha ngaahi ʻaho siʻi mei he mate mo e tanu ʻo Lasalosí. Ko hono ongo tuofāfine ko Mele mo Māʻatá ʻokú na kei tangi, pea kuo haʻu ʻa e tokolahi ki honau ʻapi ke fakafiemālie kiate kinaua.

Lolotonga ʻa ʻena tangi, ʻoku fakahā atu ʻe ha tokotaha kia Māʻata ʻo pehē ʻoku haʻu ʻa Sīsū. Ngalingali ʻoku ʻikai te ne tala ki hono tokouá, ka ʻokú ne ʻalu fakavave leva ke fakafetaulaki kiate ia. ʻI heʻene aʻu kia Sīsuú, ʻoku toe ʻai ʻe Māʻata ʻa e meʻa naʻá na leaʻaki mo hono tokouá ʻo tā tuʻo lahi lolotonga ʻa e ʻaho ʻe fā kuo maliu atú: “Ka ne ke ʻi heni pehē ne ʻikai pekia hoku tuongaʻane.”

Kaekehe, ʻoku fakahāhā ʻe Māʻata ha ʻamanaki, ʻo fakahuʻuhuʻu ʻe fai nai ʻe Sīsū ha meʻa ki hono tuongaʻané. ʻOkú ne pehē: “Ka ʻoku ou ʻilo, ne ongo pē ko e ha haʻo kole ʻe fai ki he ʻOtua, ʻe ʻatu pē, ʻe he ʻOtua.”

ʻOku talaʻofa ai ʻa Sīsū: “ʻE toetuʻu ho tuongaʻane.”

ʻOku mahino kia Māʻata ko e lea ʻa Sīsū ʻo kau ki ha toetuʻu ʻi he kahaʻú ʻi māmani, ʻa ia naʻe ʻamanaki ki ai ʻa ʻĒpalahame mo e kau sevāniti kehe ʻa e ʻOtuá. Ko ia ʻokú ne tali ange: “ʻOku ou ʻilo te ne toetuʻu ʻi he toetuʻu ʻi he ʻaho fakamui.”

Kaekehe, ʻoku ʻoatu ʻe Sīsū ha ʻamanaki ke vave ai ʻene fiemālié, ʻo ne tali: “Ko au pē ko e toetuʻu, pea mo e moʻui.” ʻOkú ne fakamanatu kia Māʻata kuo ʻosi ʻoange ʻe he ʻOtuá kiate ia ʻa e mālohi ki he maté, ʻaki ʻene pehē: “Ko ia ʻoku tui pikitai kiate au, ne ongo kuo pekia, ka te ne moʻui pē: pea ʻilonga ʻa ia ʻoku moʻui mo tui pikitai kiate au ʻe ʻikai ʻaupito te ne mate, ʻo taʻengata.”

ʻOku ʻikai ko e fokotuʻu atu ʻe Sīsū kia Māʻata ʻo pehē ko e kau angatonu ʻoku lolotonga moʻuí ʻe ʻikai ʻaupito te nau toe mate. ʻIkai, ka ko e meʻa ʻokú ne fakahaá ko e tui pikitai kiate iá ʻe lava ke iku ai ki he moʻui taʻengatá. Ko e faʻahinga moʻui pehē ʻe maʻu ʻe he tokolahi taha ʻo e kakaí ko e ola ia ʻo honau toe fokotuʻu mei he maté ʻi he ʻaho fakamuí. Ka ko e niʻihi ʻoku angatonú te nau hao moʻui atu ʻi he ngataʻanga ʻo e fokotuʻutuʻu ko ʻeni ʻi he māmaní, pea ki he faʻahinga ko ʻení ʻe moʻoni ai ʻa e ngaahi lea ʻa Sīsū ʻo fekauʻaki mo kinautolú. ʻE ʻikai ʻaupito te nau toe mate kinautolu! ʻI he ʻosi ʻa e fakamatala fakaofo ko ʻení, ʻoku ʻeke ʻe Sīsū kia Māʻata: “ʻOku ke tui ki he meʻa ko ia, ʻo?”

ʻOkú ne tali atu: “ʻIo, ʻEiki: kuo u tui ko e Misaia koe, ko e ʻAlo ʻo e ʻOtua, ko e Toko Taha ka hoko mai ki mamani.”

Ko ia ʻoku foki fakavavevave ʻa Māʻata ke fekau hono tokouá ke haʻu, ʻo ne tala fakafufū pē ki ai: “Kuo meʻa mai ʻa e Tangataʻeiki, pea ʻoku ne fiemaʻu koe.” ʻOku ʻalu atu leva ʻa Mele mei he falé. Pea ʻi he sio ʻa e niʻihi kehé ki heʻene ʻalú, ʻoku nau muimui ai, ʻo pehē pē ko ʻene ʻalu ki he faʻitoka fakamanatú.

ʻI he aʻu atu kia Sīsuú, ʻoku tō ʻa Mele ki he vaʻe ʻo Sīsuú mo tangi. ʻOkú ne pehē: “ʻEiki, ka ne ke ʻi heni, pehē ne ʻikai pekia siʻoku tuongaʻane.” ʻOku ueʻi loloto ʻa Sīsū ʻi heʻene sio ʻoku tangi ʻa Mele mo e fuʻu kakai ʻoku nau muimui mai aí. Peá ne pehē: “Kuo mou telio ia ʻi fē?”

ʻOku nau tali atu: “ʻEiki, ke ke meʻa mai, ʻo meʻa ki ai.”

ʻOku tangi foki mo Sīsū, ʻo fakatupunga ai ke pehē ʻe he kau Siú: “Vakai ā: ta naʻe lahi ʻene ʻofa kiate ia!”

ʻOku manatuʻi ʻe he niʻihi ʻi he lolotonga ʻo e Kātoanga Fale Louʻakaú ʻi ha ngaahi mahina siʻi ki muʻa atu, naʻe fakamoʻui ai ʻe Sīsū ha talavou naʻe fanauʻi kui, pea nau ʻeke: “ʻIkai ne mei lava ʻe he siana ni naʻe fakaʻā ʻa e mata ʻo e kui, ke ngaohi mo e toko taha ko ia ke ʻoua te ne pekia?” Sione 5:21; 6:40; 9:​1-7; 11:​17-37.

◆ ʻOku faifai pea aʻu fakakū ʻa Sīsū ʻo ofi ki Pētaní, pea ko e hā ʻa e meʻa ʻoku hoko ʻi aí?

◆ Ko e hā ʻa e makatuʻunga ʻo e tui ʻoku maʻu ʻe Māʻata ki he toetuʻú?

◆ ʻOku anga-fēfē hono ueʻi ʻo Sīsū ʻe he mate ʻa Lasalosí?