Sīsū–Ko ʻEne Moʻuí mo ʻEne Ngāue Fakafaifekau

Ko Sīsū mo ha Pule Koloaʻia Kei Talavou

ʻI HE fononga atu ʻa Sīsū ʻi he vahefonua ʻo Pēleá ʻo huʻu ki Selusalemá, naʻe lele mai ha tangata kei talavou ʻo tō tuʻulutui ʻi muʻa ʻiate ia. Ko e tangata naʻe ui ko e pule, ʻo ʻuhinga nai naʻe ʻi ai hono tuʻunga mahuʻinga ʻi he sinakoke fakalotofonuá pe ko ha mēmipa ia ʻo e Sanetalimí. Pea naʻe toe fuʻu koloaʻia foki. Naʻá ne ʻeke: “Faiako Lelei, ko e ha te u fai, kae tō moʻoku ʻa e moʻui taʻengata?”

Naʻe tali ʻe Sīsū: “Ko e ha ʻoku ke ui ai au ko e lelei? ʻoku ʻikai ha taha ʻoku lelei, ngata pe ʻi he ʻOtua toko taha.” ʻOku ngalingali naʻe ngāueʻaki ʻe he tangata kei talavoú ni ʻa e “lelei” ko ha hingoa fakalakanga, ko ia naʻe fakahā ʻe Sīsū kiate ia ke ne ʻilo ko e hingoa fakalakanga peheé ʻoku ʻa e ʻOtuá pē ia.

Naʻe hoko atu ʻe Sīsū: “Ka ʻo kapau ko ho loto ke ke hu ki he moʻui, pea ke ke tauhi ʻa e ngāhi fekau.”

Naʻe ʻeke ʻe he tangatá: “ʻA e fē fua?”

Naʻe tali ʻe Sīsū ʻo lave ki he nima ʻo e Fekau ʻe Hongofulú: “ʻA ʻeni, ʻE ʻikai te ke fakapō, ʻE ʻikai te ke feʻauaki, ʻE ʻikai te ke kaihaʻa, ʻE ʻikai te ke tukuaki, Fakaʻapaʻapa ki hoʻo tamai mo hoʻo faʻe.” Pea ʻi hono tānaki atu mo e fekau mahuʻinga ange ʻe taha, naʻe pehē ʻe Sīsū: “Te ke ʻofa ki ho kaungaʻapi ʻo hange pe ko hoʻo ʻofa kiate koe.”

Naʻe tali mai ʻe he tangatá mo e loto-moʻoni: “Ko e ngaahi lao ko ia kuo u tauhi ki ai kotoa pē talu mei heʻeku tamasiʻi. Ko e ha ʻaku ʻoku kei toe ke fai?”

ʻI he fanongo ki he kole vivili mo fakamātoato ʻa e tangatá, naʻe ongoʻi ʻofa ai ʻa Sīsū ki he tangatá. Ka naʻe ʻiloʻi ʻe Sīsū ʻa ʻene pipiki ki he ngaahi koloa fakamatelié, peá ne fakahā atu ʻa e meʻa naʻe fiemaʻu kiate iá: “Ko e meʻa pē taha ʻoku ke tōmui ai: mole pē ʻo fakatau atu ʻa e meʻa kotoa pē ʻoku ke maʻu, pea foaki hono paʻanga ki he masiva, pea ʻe ai ha koloa ʻe faʻoaki maʻau ʻi he langi: pea ke haʻu ʻo kau ʻi hoku lahi.”

ʻOku ʻikai ha veiveiua ʻa e sio atu pē ʻa Sīsū mo e ʻofa ʻi he malanga hake ʻa e tangatá ʻo tafoki mo e loto-mamahi lahi. Naʻe fakakuihi ia ʻe heʻene koloaʻiá mei he mahuʻinga ʻo e koloa moʻoní. Naʻe pehē ʻe Sīsū: “Hono ʻikai faingataʻa ki he kakai maʻu paʻanga ke hu ki he puleʻanga ʻo e ʻOtua!”

Naʻe moʻutāfuʻua ʻa e kau ākongá ʻi he ngaahi lea ʻa Sīsuú. Ka naʻa nau toe ofo lahi ange ʻi he hoko atu ʻe Sīsū ʻo ne fakahā ha lao fakalūkufua: “He ʻoku faingofua ke hū ha kāmeli ʻi ha avaʻi hui tuitui, ʻi he hū ʻa ha koloaʻia ki he puleʻanga ʻo e ʻOtua.”

Naʻe fieʻilo ʻa e kau ākonga: “Ko hai nai ʻe ala moʻui?”

Pea siofia kinautolu ʻe Sīsū ʻo ne pehē: “ʻI he vakai ʻa e tangata ʻe ʻikai lava, ka ʻoku ʻikai pehe ki he ʻOtua: he ʻoku malava ʻa e meʻa kotoa pē ki he ʻOtua.”

ʻI he fakatokangaʻi kuo nau fai ha fili naʻe mātuʻaki faikehekehe ia mei he toko taha pule kei talavoú, naʻe pehē ai ʻe Pita: “Vakai, ko kimautolu kuo mau liʻaki ʻa e meʻa kotoa pe, ʻo mau muimui kiate koe.” Ko ia naʻá ne ʻeke: “Ko e ha ai ha meʻa te mau maʻu?”

Naʻe talaʻofa ʻe Sīsū: “Ka hoko ʻa e fakatupu foʻou, pea nofo ʻa e Fanautama ʻa tangata ʻi hono taloni langilangiʻia, pea ko kimoutolu kuo mou muimui ʻiate au ʻe fakanofo kimoutolu foki ki ha taloni ʻe hongofulu ma ua, ʻo mou fakamāu ʻa e matakali ʻe hongofulu ma ua ʻo ʻIsileli.” ʻIo, naʻe fakahā ʻe Sīsū ʻe ʻi ai ʻa e fakafoʻou ʻo e ngaahi tuʻunga ʻi he māmaní pea ʻe hoko ʻa e ngaahi meʻa aí ʻo hangē pē ko ia naʻe ʻi he ngoue ko ʻĪtení. Pea ko Pita mo e kau ākonga kehé te nau maʻu ʻa e pale ko e pule fakataha mai mo Kalaisi ki he Palataisi ko eni ʻi māmani lahí. Ko e moʻoni, ko ha pale maʻongoʻonga pehē ʻoku tuha mo ha faʻahinga feilaulau!

Kaekehe, naʻa mo e taimí ni ʻoku ʻi ai ʻa e ngaahi pale, ʻo hangē ko ia naʻe fakamamafaʻi ʻe Sīsū: “ʻOku ʻikai ha taha kuo ne liʻaki ha fale, pē ha ngaahi tokoua, pe ha ngaahi tuofāfine, pe ha faʻē, pe ha tamai, pe ha fanau, pe ha ngaahi tokanga ngoue, koeʻuhia ko au, pea koeʻuhi ko e kōsipeli, ka te ne maʻu ni, ʻi he nofo ko eni, ʻo lōteau, ha ngaahi fale, mo ha ngaahi tokoua, mo ha ngaahi tuofāfine, mo ha ngaahi faʻē, mo ha fānau, mo ha ngaahi tokanga ngoue, ʻo ō pe mo e ngaahi fakatanga; pea ʻi he maama ka haʻu ko e moʻui taʻengata.”

Hangē ko ia naʻe talaʻofa mai ʻe Sīsuú, ʻi ha ʻalu ʻene kau ākongá ki ha feituʻu pē ʻi he māmaní, te nau fiefia ʻi ha vahaʻangatae mo e kaungā-Kalisitiane ʻa ia ʻoku ofi ange ia mo mahuʻinga ange ʻi he vahaʻangatae mo e ngaahi mēmipa ʻo hono fāmili totonú. ʻOku hā mahino naʻe ʻikai ke maʻu ʻe he pule koloaʻia kei talavou ko ení ʻa e pale ko ʻení pea pehē ki he moʻui taʻengata foki ʻi he Puleʻanga fakahēvani ʻo e ʻOtuá.

Ki mui mai naʻe tānaki atu ʻe Sīsū: “Ka ko e tokolahi ʻoku muʻomuʻa te nau muimui, pea ko e tokolahi ʻoku muimui te nau muʻomuʻa.” Ko e hā ʻa ʻene ʻuhingá?

Naʻá ne ʻuhingá ko e kakai tokolahi naʻa nau “muʻomuʻa” ʻi he faingamālie ki he ngaahi monūʻia fakalotú, ʻo hangē ko e pule koloaʻia kei talavoú, ʻe ʻikai ke hū ki he Puleʻangá. Te nau “muimui.” Ka ko e tokolahi, kau ai mo e kau ākonga anga-fakatōkilalo ʻa Sīsuú, ʻa ia naʻe sio lalo ki ai ʻa e kau Fālesi fie-māʻoniʻoní ʻo pehē ko e “muimui”​—ko e kakai ʻo e kelekelé, pe ‛am ha·’aʹrets—​te nau hoko ʻo “muʻomuʻa.” Ko ʻenau hoko ʻo “muʻomuʻa” ʻoku ʻuhingá te nau maʻu ʻa e monūʻia ke hoko ko e kaungā-pule mo Kalaisi ʻi he Puleʻangá. Maʻake 10:​17-31; Mātiu 19:​16-30; Luke 18:​18-30.

◆ ʻOku hā mahino, ko e faʻahinga pule fēfē ʻa e tangata koloaʻia kei talavoú?

◆ Ko e hā naʻe fakafisi ai ʻa Sīsū ke ui ia ko e leleí?

◆ ʻOku anga-fēfē ʻa e fakatātaaʻi ʻe he meʻa naʻe hokosia ʻe he pule kei talavoú ʻa e fakatuʻutāmaki ʻo e koloaʻiá?

◆ Ko e hā ʻa e ngaahi pale naʻe talaʻofa ʻe Sīsū ki hono kau muimuí?

◆ ʻOku anga-fēfē ʻa e hoko ʻa e muʻomuʻá ʻo muimuí, pea muʻomuʻa ʻa e muimuí?