Ko e ʻUhinga ʻo e Lotú

“ʻI he lea faka-Hepeluú, ko e foʻi lea tefito ki he lotú ko e maʻu mei he ʻuhinga tefito ko e, ‘ke fakamaau,’ pea mo e founga fakatapa mai anga-maheni . . . ko hono ʻuhinga fakatufungaleá, ‘ke te fakamaauʻi pē kita.’” ʻOku pehē ʻa e lau ʻa e The Authorised Daily Prayer Book. Ko e meʻa ʻoku fokotuʻu mai ʻe he foʻi lea ko iá ʻoku pehē ko e taha ʻo e ngaahi ngāue ʻo e lotú ʻoku totonu ke tokoni ki he tokotaha ko iá ke ne ʻilo pe ʻokú ne aʻu ki he ngaahi tuʻunga mo e ngaahi fiemaʻu māʻoniʻoni ʻa e ʻOtuá.

Ko e ʻuhingá ʻeni, ʻoku fakahā ai kiate kitautolu ʻi he Tohitapú kotoa ʻe ʻikai ke fakahōifua ʻete ngaahi lotú kaeʻoua ke te fai ʻa e finangalo ʻo e ʻOtuá. “ʻOku mamaʻo ʻa Sihova mei he kau angahala: ka ko e lotu ʻo e faitotonu ʻoku ne ongoʻi.”​—Palōvepi 15:29; 1 Sione 5:14.

Ko e sivisiviʻi kita ʻi he ʻao ʻo e ʻOtua ko Sihová ko e moʻoni ʻoku totonu ke ne ʻai ʻa e tokotaha ʻokú ne fai ʻa e lotú ke ne anga-fakatōkilalo mo ongoʻi halaia. ʻOku toe poupouʻi mālohi ʻe he meʻá ni ʻa e talanoa fakatātā ʻa Sīsū ʻo kau ki he Fālesi loto-pōlepole mo e tangata tānaki tukuhau ongoʻi halaia naʻá na haʻu ki he temipalé ke fai ʻena lotu.​—Luke 18:​9-14.

Ko ia ai, tatau ai pē pe ʻoku tau fai ʻetau lotu kia Sihová ke fakamālō, mo e fakahīkihikiʻi, pe kole kiate ia, ko e lotú ko ha taimi ia ʻo e sivisiviʻi kita maʻu ai pē. ʻI he founga ko ʻení, ʻoku tohoaki ai ʻe he lotú ʻa kitautolu ʻo ofi ange kia Sihova pea mo ʻai ke mālohi ange ai ʻa hotau vahaʻangatae pea mo iá.