Ko e Hā ke Mahuʻingaʻia Ai he Lotú?

ʻI HE fonua kotoa pē ʻi he māmaní, ʻoku ʻi ai ʻa e mahuʻingaʻia ʻi he lotú. ʻI he tafaʻaki ʻe taha, ʻoku ʻi ai foki mo e tokolahi ia ʻoku nau mātuʻaki lea hangatonu ʻo pehē ʻoku ʻikai te nau mahuʻingaʻia ʻi he lotú. Ka ʻoku pehē maʻu ai pē ʻa e anga ʻo ʻenau ongoʻí?

Ko e natula ʻo e faʻahinga ʻo e tangatá ʻoku ʻikai ke fiemālie moʻoni ha tokotaha ia ʻi he ngaahi meʻa fakamatelié pē. ʻOku fiemaʻu ki he faʻahinga ʻo e tangatá ʻa e tuʻunga fakalaumālie. ʻI he ʻaho ki he ʻaho ʻa ia ʻoku fakahanga ki he maʻu pē ʻa e ngaahi meʻa ʻoku fiemaʻu ki he moʻui fakamatelié, mo e ngaahi vahaʻa taimi ʻo e fakafiefiá, ʻoku ʻikai te ne fakafiemālieʻi kakato ʻa e ngaahi fiemaʻu ʻi he lotoʻi loto ʻo ha tokotaha. ʻOku ʻikai te nau hangē ko e fanga monumanú, ʻoku fiemaʻu ʻe he tangatá ia ke ne ʻilo, ‘Ko e hā ʻa e taumuʻa ʻo e moʻuí?’ ‘Ko e moʻui fuonounou ko ʻení, ʻa ia ʻoku kau ai ʻa e ngaahi meʻa lahi ʻoku fakaʻofoʻofa ka ʻoku toe lahi foki mo e meʻa ʻoku palakū, ko hono ngataʻangá pē ia kotoa?’ Kuó ke ʻeke ha ngaahi fehuʻi hangē ko ʻení?

Ka neongo ia, ko e kakai ʻe laui laui miliona ʻoku nau moʻui ʻi he ʻahó ni naʻa nau tupu hake ʻi he ngaahi ʻātakai ʻoku fakalotosiʻi ai ha mahuʻingaʻia moʻoni ʻi he lotú. Ko e tākiekina ko iá kuo hoko mai nai mei heʻenau ngaahi mātuʻá, mei he kau faiakó, mei ngaahi toʻumeʻá, pea naʻa mo e puleʻangá.

Ko ha tangata kei talavou mei ʻAlipēnia, ko Skalabrino, naʻá ne fakamatala ʻo pehē ʻi he pule faka-Kominiusí naʻe akoʻi ki he kakaí ʻoku ʻikai ke ʻi ai ha ʻOtua ia. ʻIkai ko ia pē, naʻe fakatuʻutāmaki kiate kinautolu ke nau talanoa ʻo fekauʻaki mo e lotú; ʻi he fai peheé ʻe malava ke iku atu ki he nofo pilīsone. Ka neongo ia, ʻi heʻene ʻi Suisalani ʻi he 1991 ko haʻane kumi hūfanga, naʻe ʻoange ai kiate ia ha faingamālie ke ne ako ʻa e Tohi Tapú. Naʻá ne tali ke ako. Ko e hā ʻa hono ʻuhingá?

ʻI heʻene kei ʻi ʻAlipēniá naʻá ne fanongo ai ʻoku ʻi ai ʻa e tohi ko e Tohi Tapu, ka naʻe ʻikai te ne ʻilo moʻoni ha meʻa ʻo fekauʻaki mo e tohi ko iá. Ko ia, ʻi he kamataʻangá naʻe ʻikai nai ko e holi ke maʻu ʻa e mahino ki he Tohi Tapú naʻá ne ueʻi iá. ʻI hono tala ange ki ai te ne ako ʻo fekauʻaki mo e taumuʻa ʻa e ʻOtuá ki he faʻahinga ʻo e tangatá mo e māmaní, naʻá ne toe sio foki ki ai ko ha faingamālie ia ke fakaleleiʻi ange ai ʻa ʻene ngāueʻaki ʻa e lea fakafonuá. Neongo iá, naʻe vave ʻa ʻene ʻilo ko e meʻa naʻá ne akó naʻe fakafiemālieʻi ai ha fakaʻamu fakalaumālie mālohi ʻi loto ʻiate ia. Naʻá ne ongoʻi fiefia mo fiemālie ʻi heʻene ako ʻo fekauʻaki mo e talaʻofa ʻa e ʻOtuá ki ha māmani foʻou ʻe tolonga ai ʻa e melinó, ko ha māmani ʻe malava ke moʻui taʻengata ai ʻa e kakaí mo maʻu ʻo hulu fau ʻa e ngaahi meʻa hono kotoa pē ʻoku fiemaʻu ki he moʻuí. Naʻe toe māʻolunga ange ʻa ʻene fiefiá ʻi heʻene ʻilo ko ia mo hono fāmilí ʻe malava ke nau hoko ko e konga ʻo e māmani foʻou ko ʻení. Naʻe ʻikai te ne malava ke tuku pē ʻa e ongoongo leleí ʻiate ia pē, naʻá ne telefoni ki hono fāmilí ki ʻAlipēnia ke fakahā ia kiate kinautolu.

Ko Aleksei, ʻa ia naʻe nofo ʻi Lūsia, naʻá ne ʻohovale foki ʻi he malava ke ueʻi ʻe he ʻilo kānokano ʻo e Tohi Tapú ʻa e moʻui ʻa ha tokotaha. ʻI he taulōfuʻu ʻa e ngaahi palopalemá mo e ʻikai ke maʻu ha fakamatala fakafiemālie ki he taumuʻa ʻo e moʻuí, naʻá ne palani ke ne taonakita. Ka naʻá ne ʻuluaki ʻalu ki Finilani ke ʻaʻahi ki hono kaumeʻa. Naʻá ne lea ʻo fekauʻaki mo ʻene ngaahi palopalemá ki ha kaungā pāsese ʻi he lēlue naʻá ne ʻalu aí. Naʻe ʻi ai ha taha ʻo e Kau Fakamoʻoni ʻa Sihová ʻi honau lotolotongá, ʻa ia naʻá ne enginaki kiate ia ke ako ʻa e Tohi Tapú koeʻuhi he ʻoku maʻu mei ai ʻa e ngaahi fakaleleiʻanga ki he ngaahi palopalema peheé. Naʻá ne fakakaukau lahi ki ai. ʻI heʻene fokí, naʻá ne hokosia ha meʻa meimei tatau pē. Ko ha fefine Fakamoʻoni ʻe taha naʻá ne lea ange ki ai ʻo ne tala ange kiate ia naʻe faʻa hoko ki ai ʻa e ngaahi palopalema pehē pea naʻe tokoni ʻa e Tohi Tapú kiate ia ke ne lavaʻi ʻa e ngaahi meʻa ko iá. Naʻe toe fakalototoʻaʻi ia ʻe he fefiné ni ke ne ako ʻa e Tohi Tapú. ʻI heʻene aʻu ki hono ʻapí, naʻe tatangi ʻa e telefoní. Ko hano kaumeʻa ia ʻe taha, naʻá ne ako mo e Kau Fakamoʻoní pea naʻá ne fuʻu fiefia ʻaupito. Naʻe kamata ke fakatokangaʻi ʻe Aleksei ʻoku ngalingali ko e Tohi Tapú ʻe malava moʻoni ke maʻu mei ai ʻa e meʻa ʻoku fiemaʻu kiate iá, pea naʻá ne ʻilo ka ʻikai ke fai ha tokoni ange ki ai ʻe ʻikai te ne maʻu ʻa e mahino ki he Tohi Tapú. Naʻá ne loto ke fai ha ako Tohi Tapu tuʻumaʻu mo e Kau Fakamoʻoni ʻa Sihová, pea naʻe kamata ke ne kau ki heʻenau ngaahi fakatahá. Naʻe ʻikai ke fuoloa kuó ne maʻu ʻa e mahino ki he ʻuhinga ʻoku fuʻu fiefia ai ʻa e faʻahinga ʻoku nau liliu ʻa ʻenau moʻuí ʻo fakatatau ki he ngaahi meʻa ʻoku akoʻi ʻe he Tohi Tapú, neongo ʻoku nau fehangahangai pē mo e ngaahi palopalema ʻoku anga maheni mo e faʻahinga ʻo e tangatá.

ʻI he ʻiloʻilo ʻo fekauʻaki mo e anga ʻo hono faʻu ʻo e tangatá, naʻe pehē ʻe Sīsū Kalaisi: “Oku ikai moʻui ʻa e tangata ʻi he ma pe.” (Mātiu 4:​4.) Naʻá ne toe pehē: “Monūʻiaā ka ko kinautolu ʻoku ongoʻi masiva honau laumalie.” (Mātiu 5:3) ʻOku hoko mai ʻa ʻenau fiefiá koeʻuhi ko ʻenau ʻilo ʻa e fiemaʻu kiate kinautolú, ʻo nau fai ʻa e ngaahi laka totonu ke fakafiemālieʻi ai iá, pea maʻu mo e tāpuaki mei he ʻOtuá. Kae kehe, ko e ngaahi fiemaʻu fakalaumālie kiate kitautolú ʻoku ʻikai ke fakalato pē ia ʻi ha kau ki ha siasi pe kau ki ha ngaahi fakataha fakalotu. Ko e lotu ʻoku lahi ai ʻa e ngaahi ouaú ʻoku fakamānako nai ki ha ngaahi ongoʻi ʻa ha tokotaha, ka ʻokú ne tokonaki mai ha ngaahi fakaleleiʻanga ʻaonga ki he ngaahi palopalema ʻo e moʻuí? Pea neongo kuo fanongonongo ʻe ha lotu ʻa e ngaahi tuʻutuʻuni pau ʻoku ngali ʻe tokonaki mai ai ʻa e mahino moʻoni ʻo fekauʻaki mo e taumuʻa moʻoni ʻo e moʻuí, te ne fakalato ʻa hoʻo fiemaʻu fakalaumālié? Ko e meʻa ke tokanga lahi ange ki aí, ko hono fai ʻo e lotu peheé ʻe iku atu ai ki ha vahaʻangatae lelei mo e ʻOtuá? Kapau ʻe ʻikai ke maʻu ʻa e meʻa ko iá, ʻe ʻikai ke maʻu ʻa e fiemālie moʻoní ia.

ʻI he fekauʻaki mo e meʻa ko ʻení ʻoku fekumi ʻa e kakai tokolahi ki ha meʻa ʻoku teʻeki ai ke nau maʻu.

[Fakatātā ʻi he peesi 3]

ʻE fakalato moʻoni ʻa e ngaahi meʻa fakalaumālie ʻoku fiemaʻu kiate koé ʻi haʻo kau ki ha siasi?

[Fakatātā ʻi he peesi 4]

Ko e tokolahi kuo nau ʻilo ʻi heʻenau maʻu ʻa e mahino ki he Tohi Tapú, ʻoku ʻi ai ʻa e ʻuhinga foʻou ia ki he moʻuí