Toe Fakakaukauʻi ʻa e Huhu Totó

ʻI HE kuonga fakapōpōʻuli ko ʻeni ʻo e ʻeitisí, ko e fakatuʻutāmaki lahi taha ki he moʻui ʻa ha tokotaha mahaki ʻi he falemahakí ʻe hoko nai ia ʻi he loki tafá. “ʻOku ʻikai ke ʻi ai ha founga ia ʻoku lava ai ke tau ʻai ʻa e totó ke maʻa mo ʻatā fakaʻaufuli mei he siemú,” ko e lau ia ʻa Dr. Richard Spence, ʻa ia kuo lahi hake ʻi he hongofuluʻi taʻu ʻa ʻene tokangaʻi ʻa e Senitā ki he Tafa ʻo ʻIkai Ngāueʻaki ha Totó ʻi he ʻUnivesiti-Falemahaki ko Cooper ko ha Senitā Fakafaitoʻo ʻi Camden, New Jersey, U.S.A.

ʻOku ʻikai ha ofo, ʻoku faitoʻo ʻi he senitaá ʻa e tokolahi ʻo e Kau Fakamoʻoni ʻa Sihová, ʻa ia ʻoku ʻiloa ʻa ʻenau fakafisingaʻi ʻa e huhu totó makatuʻunga ʻi he Tohitapú. (Livitikō 17:11; Ngāue 15:​28, 29) Kae kehe, ko e niʻihi ʻo e kau mahaki ʻoku ʻikai ko ha Fakamoʻoni kinautolu ia, ka ʻoku nau ʻalu ki he senitaá, ko e hohaʻa ʻo fekauʻaki mo e ngaahi fakatuʻutāmaki ʻo e huhu totó, ʻa ia ʻoku kau ki ai hono maʻu ʻa e hepataitisí, ʻeitisí, mo e ngaahi mahaki kehé. “Ko e ʻasi mai ʻa e ʻeitisí kuo hā ai ʻa e fiemaʻu ki hono sivi ʻo e totó,” ko e fakatokanga ia ʻa e Courier-Post Weekly Report on Science and Medicine. “Ka ʻi ha toto pē ʻoku kei lava pē ke hao ʻo ʻikai ke ʻilo ia ʻi hono fai ʻo e siví koeʻuhi he ʻoku lava ke maʻu ha tokotaha ia ʻe he vailasí ki muʻa ia pea toki hā ʻi hono siviʻí.”

Pea koeʻuhi ko e ngaahi fakatuʻutāmaki peheé, ʻoku ngāueʻaki ai ʻe he Senitā ki he Tafa ʻIkai Ngāueʻaki ha Totó ʻa e ngaahi meʻa kehe ʻo fetongiʻaki ʻa e huhu totó, kau ai mo hono toe ngāueʻaki pē ʻa e toto ʻo e tokotaha mahakí naʻe ʻuluaki toʻó​—ko ha founga ʻe ʻikai ke taukovi ia ki he kau Fakamoʻoni ʻe niʻihi ʻi he ngaahi tuʻunga ʻe niʻihi.a Ko e faitoʻo ʻe taha ko hono ngāueʻaki ʻa e ngaahi faitoʻo kona tapú ʻoku nau ueʻi ʻa hono ngaohi ʻo e toto pē ʻo e tokotaha mahakí. ʻIkai ko ia pē, ko ha faitoʻo fakakemikale ʻoku fetongiʻaki ʻa e totó ʻoku ngāueʻaki ʻi he taimi ki he taimi ke poupou ki hono tufaki ʻo e ʻokisisení kae ʻikai ke fiemaʻu ha huhu toto. “ʻOku fiemaʻu ʻe he Kau Fakamoʻoni ʻa Sihová ʻa e tokangaʻi fakafaitoʻo lelei tahá,” ko e lau ia ʻa Dr. Spence, “ka ʻoku nau fiemaʻu ʻa e ngaahi meʻa kehe ʻa ia ʻoku lava ke fetongiʻaki ʻa e huhu totó.”

ʻOku fakamālō ʻa e Kau Fakamoʻoni ʻa Sihová ki he ngāue fakataha mo e tokoni kuo nau maʻu mei he kau toketaá ʻa ia ʻoku nau tokaʻi ʻa ʻenau ngaahi tui pau fakalotú. Ko hono olá, kuo nau maʻu moʻoni ʻa e “tokangaʻi fakafaitoʻo lelei tahá” mo tauhi maʻu ʻa e konisēnisi maʻa ʻi he ʻao ʻo Sihova ko e ʻOtuá.​—2 Tīmote 1:3.

[Fakamatala ʻi lalo]