Ko e Hā ʻOku Nau Fai Ai Iá?

ʻI HE taʻu taki taha ʻoku laui afe ʻa e Kau Fakamoʻoni ʻa Sihova ʻi he māmaní takatakai ʻoku nau fakatahataha ʻi he ngaahi fakataha-lahí. ʻI aí, ʻoku nau fiefia ʻi he feohi mo e fanongo ʻi ha polokalama mātuʻaki lelei ʻo e fakahinohino faka-Tohitapu. Ko e niʻihi ʻoku nau fai ʻa e ngaahi feinga lahi ke maʻu ʻa e ngaahi fakataha-lahi ko ʻení. Ko e fakatātaá, ʻi he taʻu kuo ʻosí ʻi Malauī, ko ha ongo meʻa mali ʻi he vaeuaʻanga ʻo hona taʻu onongofulu tupú, naʻá na fononga pasikala atu fakataha mo hona fohá mo hono uaifí mo e pēpē, ʻi ha kilomita ʻe 80 ke maʻu ha fakataha-lahi. Naʻa nau mavahe mei honau koló ʻi he onó pongipongi pea aʻu ki he feituʻu faiʻanga fakataha-lahí hili ʻa e houa ʻe 15 mei ai.

ʻI Mosemipīki, naʻe fononga pasikala ha kulupu ʻi ha ʻaho ʻe tolu ke aʻu ki ha fakataha-lahi. ʻI he pō ʻe taha, lolotonga ʻenau kemi ʻi he lotoʻataʻataá, naʻa nau fanongo ʻoku tangi ofi mai ha fanga laione. Neongo naʻa nau tolongi atu ha ngaahi vaʻa fefie ki he feituʻu naʻa nau ʻi aí, naʻe nofo takai pē ʻa e fanga laioné ia ʻo aʻu ki he maʻa ʻa e ʻahó. Ko ha Fakamoʻoni ʻe taha naʻe fononga ki he fakataha-lahi tatau pē naʻe femātaaki tonu ia mo ha laione ʻi he halá. Naʻá ne tuʻu fakalongomate pē kaeʻoua kuo ʻalu e laioné. ʻI he fakataha-lahí naʻe talanoa fiefia ai ʻe he Kau Fakamoʻoni ko ení ʻa e anga hono ‘hamusi kinautolu mei he ngutu ʻo e laioné.’​—2 Timote 4:17.

ʻOku tokolahi ʻa e Kau Fakamoʻoni ʻa Sihova ʻoku nau fai ʻa e ngaahi feinga lahi ke maʻu ʻa e ngaahi fakataha-lahí ʻo aʻu pē ki he ngaahi fakataha fakauike ʻa e fakatahaʻangá ki he lotú. Ko e hā hono ʻuhingá? Ko e ngaahi kupu hoko maí ʻe tokoniʻi ai koe ke mahino pe ko e hā ʻoku mātuʻaki mahuʻinga ai ʻa e fakatahataha fakatahá.