ʻOkú Ke Manatuʻi?

Kuó ke ʻilo ʻoku mahuʻinga mo ʻaonga ʻa e ngaahi ʻīsiu fakamuimui ʻo e Taua Leʻo kiate koe? Ko e hā leva ʻoku ʻikai ai te ke siviʻi ʻa hoʻo manatú ʻaki ʻa e ngaahi fehuʻi hokó?

◻ Ko e hā ʻa e faikehekehe ʻi he vahaʻa ʻo e “ʻaho ʻo e ʻEiki” mo e “ʻaho ʻo Sihová”? (Fakahā 1:​10; Sioeli 2:​11, NW)

Ko e “ʻaho ʻo e ʻEiki” ʻoku kau ai ʻa hono fakahoko ʻo e ngaahi vīsone ʻe 16 naʻe fakamatalaʻi ʻi he Fakahā vahe 1 ki he 22 mo e ngaahi meʻa tefito naʻe hoko, ʻa ia naʻe tomuʻa tala ʻe Sīsū ʻi he tali ki he fehuʻi ʻa ʻene kau ākongá fekauʻaki mo e fakaʻilonga ʻo ʻene ʻi aí. ʻI he tumutumu ʻo e ʻaho ʻo e ʻEikí, ʻe mapuna hake ai ʻa e ʻaho fakamanavahē ʻo Sihová ʻa ia te ne fakahoko ai ʻa e fakamaau ki he māmani fakameleʻi ʻo Sētané. (Mātiu 24:​3-​14, PM; Luke 21:​11, PM)​—1/1, peesi 9.

◻ Ko e hā ʻa e ngaahi tafaʻaki tuʻu-ki-muʻa ʻe niʻihi ʻo e Tohitapu Makalió?

ʻOku hā ʻa e huafa Sihová ʻo laka hake he tuʻo 3,500 ʻi he Tohitapu Makalió. Naʻe pehē ʻe ha mataotao ʻe taha ʻi he tohi fakalotu faka-Lūsiá: “[Ko e] liliú ʻoku faitotonu ia ki he konga tohi faka-Hepeluú, pea ko e lea ʻo e liliú ʻoku maʻa pea feʻunga mo e tuʻunga-leá.”​—w-E 12/15, peesi 27.

◻ Ko e hā ʻa e “moʻoni” naʻe pehē ʻe Sīsū te ne fakatauʻatāinaʻi kitautolú? (Sione 8:32)

ʻAki “ʻa e moʻoni,” naʻe ʻuhinga ʻa Sīsuú ki he fakahinohino fakamānavaʻi fakaʻotuá​—tautefito ki he fakahinohino fekauʻaki mo e finangalo ʻo e ʻOtuá—ʻa ia ʻoku fakatolonga ʻi he Tohitapú.​—1/1, peesi 3.

◻ Ko hai ʻa e Sehu mo e Sionatapi ʻi onopōní?

ʻOku fakatātaaʻi ʻe Sehu ʻa Sīsū Kalaisi, ʻa ia ʻoku fakafofongaʻi ʻi he māmaní ʻe he “Isileli faka-ʻOtua,” ko e kau Kalisitiane paní. (Kaletia 6:​16; Fakahā 12:17) Hangē pē ko e ʻalu atu ʻa Sionatapi ke fakafetaulaki kia Sehú, ko ha “fuʻu kakai lahi” mei he ngaahi puleʻangá kuo nau haʻu ke poupouʻi ʻa e kau fakafofonga fakaemāmani ʻo Sīsuú. (Fakahā 7:​9, 10; 2 Tuʻi 10:15)​—1/1, peesi 27.

◻ Ko e hā ʻa e ʻuhinga ʻo e ‘ʻaʻeva mo e ʻOtuá’? (Senesi 5:​24; 6:9, PM)

ʻOku ʻuhinga ʻení ko e faʻahinga ʻoku fai peheé, hangē ko ʻĪnoke mo Noá, naʻa nau ʻulungaangaʻaki ʻiate kinautolu ʻi ha founga ʻa ia naʻá ne fakamoʻoniʻi ʻa e tui mālohi ki he ʻOtuá. Naʻa nau fai ʻa e meʻa naʻe fekau ʻe Sihova kiate kinautolú pea tataki ʻenau moʻuí ʻo fehoanakimālie mo e meʻa naʻa nau ʻilo fekauʻaki mo ia, ʻi heʻene feangainga mo e faʻahinga ʻo e tangatá.​—1/15, peesi 13.

◻ Ko e hā ʻoku totonu ai ki ha taha ke tomuʻa palani ʻi he ala lava ko ia ke ne maté?

ʻI ha ʻuhinga, ko e fai ʻo e ngaahi fokotuʻutuʻu peheé ko ha meʻaʻofa ia ki he fāmili ʻo e tokotaha ko iá. ʻOku fakahaaʻi ai ʻa e ʻofa. ʻOku fakamoʻoniʻi ai ha holi ke ‘tokanga ki he kau mēmipa ko ia ʻo hono fāmilí’ naʻa mo e ʻikai te ne kei ʻi ai mo kinautolú. (1 Timote 5:8)​—1/15, peesi 22.

◻ Ko e hā naʻe lavaʻi ʻe he “fuakava motuʻa”? (2 Kolinito 3:​14)

ʻOkú ne tomuʻa fakatātaaʻi mai ai ʻa e fuakava foʻoú, pea ʻi heʻene ngaahi feilaulau naʻe fai hokohokó, naʻe fakahaaʻi ai ʻa e mātuʻaki fiemaʻu ki he tangatá ʻa e huhuʻi mei he angahalá mo e maté. Ko ha “fakaleʻo ia maʻa Kalaisi.” (Kaletia 3:​24)​—2/1, peesi 13.

◻ ʻI he ngaahi founga fē ʻoku taʻengata ai ʻa e fuakava foʻoú? (Hepelu 13:20)

ʻUluakí, ʻi he ʻikai hangē ko e fuakava Laó, ʻe ʻikai toe fetongi ia. Uá, ko e ngaahi ola ʻo ʻene ngāué ʻoku tuʻuloa. Pea tolú, ko e faʻahinga ia ʻa e Puleʻanga ʻo e ʻOtuá ʻe nofo ʻi he māmaní ʻe hokohoko atu ʻenau maʻu ʻa e ʻaonga mei he fokotuʻutuʻu ʻa e fuakava foʻoú lolotonga ʻa e Taʻu ʻe Afé.​—2/1, peesi 22.

◻ Ko e hā ʻa e ngaahi ʻaonga ko e ola ia ʻo e houngaʻiá?

Ko e māfana ʻoku aʻusia ʻe ha taha koeʻuhi ko e loto-houngaʻiá ʻoku tānaki ia ki heʻene fiefiá mo e melinó. (Fakafehoanaki mo Palovepi 15:​13, 15.) ʻI heʻene hoko ko ha anga ʻoku paú, ʻoku maluʻi ʻe he houngaʻiá ha taha mei he ngaahi ongoʻi taʻepau pehē hangē ko e ʻitá, meheká, mo e loto-tāufehiʻá.​—2/15, peesi 4.

◻ Ko e hā ʻa e ongo fuakava kuo kau ki ai ʻa e faʻahinga kuo fanauʻi ʻe he laumālié?

Ko e fuakava foʻou, ʻa ia ʻoku fai ʻe Sihova mo e kau mēmipa ʻo e ʻIsileli fakalaumālié, pea mo e fuakava ki he Puleʻangá, ʻa ia ʻoku fai ʻe Sīsū mo hono kau muimui, ʻi hono topuvaʻe paní. (Luke 22:​20, 28-​30)​—2/15, peesi 16.

◻ Ko e hā ʻa e ngaahi kātoanga lalahi ʻe tolu naʻe fekauʻi ki he kau ʻIsilelí ke nau maʻú?

Ko e Kātoanga Tapulēvaní, naʻe fai ʻo hoko atu pē ʻi he Pāsova ʻo Nīsani 14; ko e Kātoanga Lau-Uiké, ʻi he ʻaho hono 50 mei Nīsani 16; pea mo e Kātoanga Utu-Taʻú, pe Kātoanga Fale-Louʻakaú, ʻi he māhina hono fitú. (Teutalonome 16:​1-​15)​—3/1, peesi 8, 9.

◻ Ko e hā ko ha monū ia ʻa hono maʻu ʻa e ngaahi fakataha faka-Kalisitiané?

Naʻe pehē ʻe Sīsū: “Ko e potu kuo fakataha ai ha toko ua pe ha toko tolu ki hoku hingoa, ʻoku ou ʻi he potu ko ia au ʻi honau lotolotonga.” (Mātiu 18:20; 28:20) Pehē foki, ko ha founga mahuʻinga ʻo hono fai ʻo e fafanga fakalaumālié ʻoku fakafou ia ʻi he ngaahi fakataha ʻa e fakatahaʻangá mo e ngaahi fakataha lalahi angé. (Mātiu 24:​45, PM)​—3/1, peesi 14.

◻ Ko e hā ʻa e tupuʻanga ʻo e hingoa Nimiloté?

ʻOku kau fakataha ʻa e kau mataotao ʻe niʻihi ʻi he fakakaukau ko e hingoa Nimiloté naʻe ʻikai ko ha hingoa ia naʻe ʻoange ʻi hono fanauʻí. Ka, ʻoku nau vakai ki ai ko ha hingoa naʻe toki ʻoange ki mui ke hoa mo hono ʻulungaanga angatuʻú hili ʻa hono fakaeʻá.​—3/15, peesi 25.

◻ ʻOku mahuʻinga fēfē ʻa e fāmilí ki he sōsaieti ʻo e faʻahinga ʻo e tangatá?

Ko e fāmilí ko ha fiemaʻu ia ʻa e tangatá. ʻOku fakahā ʻe he hisitōliá ʻi he mōlia atu ʻa e fokotuʻutuʻu fakafāmilí, ʻoku vaivai ai ʻa e mālohinga ʻo e ngaahi feituʻú mo e ngaahi puleʻangá. Ko ia ʻoku uesia fakahangatonu ʻe he fāmilí ʻa e tuʻumaʻu ʻa e sōsaietí mo e tuʻunga lelei ʻa e fānaú mo e toʻutangata ʻi he kahaʻú.​—4/1, peesi 6.

◻ Ko e hā ʻa e fakamoʻoni hokohoko ʻe tolu ko e Tohitapú ko e Folofola ʻa e ʻOtuá?

(1) ʻOku totonu fakasaienisi ia; (2) ʻokú ne maʻu ʻa e ngaahi tefitoʻi moʻoni taʻefakangatangata ʻoku ʻaonga ki he moʻui ʻi onopōní; (3) ʻokú ne maʻu ʻa e ngaahi kikite pau kuo fakahoko, hangē ko ia ʻoku fakamoʻoniʻi ʻe he ngaahi moʻoniʻi meʻa fakahisitōliá.​—4/1, peesi 15.