Ko ha Tuʻi Koloaʻia mo Poto

ʻOkú ke fakakaukau ʻe ʻai koe ʻe he koloaʻiá ke ke fiefia? Kapau ʻe ʻoatu kiate koe ʻe ha taha ha fuʻu paʻanga lahi, ʻikai te ke leleiʻia ai? Mahalo pē te ke pehē. Ngalingali ʻe lava ke ke fakakaukau ki ha ngaahi founga ke ngāueʻaki ai iá.

ʻOKU fakamoʻoniʻi ʻoku lahi ʻa e ngaahi meʻa ke fakatau mai ke ʻai ʻa e moʻuí ke fakafiemālie mo fiefia ange. ʻOku toe lava foki ʻa e paʻangá ke ngāue “ko e maluʻanga” mei he ngaahi palopalema taʻeʻamanekina, hangē ko e ngaahi mahakí pe taʻemaʻu ha ngāué.​—Koheleti 7:12.

Ka ko e hā ʻa e felāveʻi ʻi he vahaʻa ʻo e paʻangá mo e fiefiá? ʻOkú ke fakakaukau ʻo hangē ko ia ko e tokolahi, ko e fiefiá ko ha ola ia ʻoku tānaki mai ʻi he koloaʻiá? Ko hono maʻu ʻa e ngaahi tali ki he ongo fehuʻi ko ʻení ʻe faingataʻa nai koeʻuhi he ko e paʻangá ʻoku faingofua pē ʻa e lava ke fua ia, pe lau, lolotonga ia ʻoku ʻikai lava ke pehē ʻa e fiefiá ia. Heʻikai te ke lava ʻo tuku ʻa e fiefiá ʻi ha meʻafua pea fua ia.

Pehē foki, ʻoku hā ngali fiefia ʻa e kakai koloaʻia ʻe niʻihi, lolotonga ia ʻoku loto-mamahi ʻa e niʻihi kehé. Ko e meʻa tatau pē ʻoku hoko moʻoni ki he faʻahinga ko ia ʻoku masivá. Ka, ko e tokolahi taha ʻo e kakaí​—naʻa mo e faʻahinga ko ia kuo nau ʻosi koloaʻiá​—ʻoku nau tui ko e lahi ange ʻa e paʻangá te ne ʻomai ai kiate kinautolu ʻa e fiefia lahi ange.

Ko e tokotaha ʻa ia naʻe tohi fekauʻaki mo e ngaahi meʻa peheé ko Tuʻi Solomone ʻo ʻIsileli ʻi he kuonga muʻá. Ko e taha ia ʻi he kau tangata koloaʻia taha kuo nau moʻuí. ʻE lava ke ke lau ha fakamatala fekauʻaki mo e lahi fau ʻo ʻene koloá ʻi he vahe hono 10 ʻo e tohi ʻUluaki Tuʻí ʻi he Tohitapú. Ko e fakatātaá, fakatokangaʻi ʻoku pehē ʻe he veesi 14: “Ko e fua ʻo e koula naʻe aʻu kia Solomone ʻi he taʻu ʻe taha ko e taleniti koula ʻe onongeau ma onongofulu ma ono.” Ko e fika ko iá ko e tatau ia ʻo e toni koula ʻe 25. ʻI he ʻahó ni, ko e koula lahi ko iá ʻe mahuʻinga lahi hake ia ʻi he $200,000,000, U.S.!​—Fakaʻītali ʻamautolu.

Ka, naʻe ʻikai ke koloaʻia pē ʻa Solomone; naʻe tāpuakiʻiʻaki ia ʻe he ʻOtuá ʻa e potó. ʻOku pehē ʻe he Tohitapú: “Naʻe hulu ʻa Kingi Solomone ʻi he tuʻi kotoa pe ʻo mamani ʻi he koloa mo e poto. Pea naʻe haʻu ʻa e ngaahi fonua kotoa pe ko e fie feʻiloaki mo Solomone, ke fanongo ki he poto kuo ʻai ʻe he ʻOtua ki hono loto.” (1 Tuʻi 10:​23, 24) Ko kitautolu foki ʻe lava ke tau maʻu ʻa e ʻaonga mei he poto ʻo Solomoné, koeʻuhi he ko ʻene ngaahi tohí ʻoku faʻuʻaki ia ʻa e konga ʻo e lēkooti ʻi he Tohitapú. Tau sio angé ki he meʻa naʻe pau ke ne leaʻaki fekauʻaki mo e felāveʻi ʻi he vahaʻa ʻo e koloá mo e fiefiá.

[Maʻuʻanga ʻo e Tā ʻi he peesi 3]

Reproduced from Die Heilige Schrift - Übersetzt von Dr. Joseph Franz von Allioli. Druck und Verlag von Eduard Hallberger, Stuttgart