Līpooti ʻa e Kau Fanongonongo ʻo e Puleʻangá

Ako ʻa e Moʻoní ʻe ha Tokotaha Fakafepaki Ki Muʻa

KUO līpooti ʻa e ngaahi meʻa lahi ʻi he ongoongó ʻo fekauʻaki mo e tau fakalotofonua ʻi Laipīliá. Naʻe mole ai ʻa e moʻui ʻe laui mano, pea fakaheeʻi naʻa mo e tokolahi ange. Neongo ʻa e ngaahi tuʻunga faingataʻá ni, ʻoku hokohoko atu pē ʻa hono koloaʻaki ʻe he kakai loto-totonú ʻa e moʻoní, ʻo hangē ko ia ʻoku fakahāhaaʻi ʻi he meʻa hono hoko naʻe hokosiá.

Mei heʻene taʻu hongofulú, naʻe akoʻi ʻa James ʻe he Siasi Lūteló. Hili ʻene hoko ko ha ʻētita ʻo ha pepa fakasiasi, naʻá ne ngāueʻaki ʻa hono tuʻungá ke tohi fakafepaki ai ki he Kau Fakamoʻoni ʻa Sihová. Naʻe fai eni neongo ʻa e moʻoniʻi meʻa ko ia ne teʻeki ai ʻaupito ke ne fetaulaki mo ha taha ʻo kinautolu.

ʻI he faai atu ʻa e taimí, naʻe mavahe ai ʻa James mei he pepa fakasiasí peá ne hoko ko ha pule lavameʻa ʻo ha mōtele. ʻI ha ʻaho ʻe taha ʻi heʻene tangutu ʻi he feituʻu talitali kakai ʻo hono mōtelé, naʻe ʻaʻahi mai ai ha ongo tuofāfine teunga-lelei kiate ia. ʻI heʻene sio ki hona teunga māú, naʻá ne fakaafeʻi kinaua ki loto. Ka ʻi heʻena fakamatalaʻi ʻa e taumuʻa ʻo ʻena ʻaʻahí, naʻá ne pehē ange, “ʻOku ou femoʻuekina ʻaupito ke talanoa.” Naʻe tuʻuaki ange ʻe he ongo Fakamoʻoní kiate ia ha ongo tukuhau ki he ngaahi makasini Taua Leʻo mo e Awake!, pea naʻá ne tali ia koeʻuhi pē ke mavahe ai meiate kinaua. Naʻe haʻu ʻa e ngaahi makasiní ʻi he māhina ʻe 12 ki hono ʻapí, ka naʻá ne tuku ia ki ha tangai milemila ʻo teʻeki ke toʻo honau ngaahi kofukofú.

Naʻe lahi fakaʻulia ha tau fakalotofonua, ko ia naʻe faʻoaki ai ʻe James ha tangai paʻanga mo ha ngaahi meʻa mahuʻinga koeʻuhi ke hola ʻi he ʻuluaki fakaʻilonga pē ʻo e ʻohofí. ʻI he pongipongi ʻe taha naʻe pā ai ha foʻi koloneiti ʻi hono tuʻa matapā ki muí, pea ʻi he manavaheé naʻá ne toʻo ʻene tangaí pea lele ʻo kumi moʻui. ʻI he kau fakataha mo e laui afe ʻo e kau siviliane toitoí, naʻe pau ke ne fakalaka ai ʻi ha ngaahi faiʻanga-hua. ʻI aí, naʻe faʻa kaihaʻasia ai pea tāmateʻi ʻa e kau siviliane tonuhiá ʻo taʻehanoʻuhinga.

ʻI he ʻuluaki faiʻanga-huá, naʻe ʻeke ai ha ngaahi fehuʻi kia James pea tala ange leva ke fakaava ʻa ʻene tangaí. ʻI heʻene fai iá, naʻá ne sio hifo ki heʻene tangaí pea ʻikai te ne tui ki he meʻa naʻá ne sio ki aí. ʻI heʻene tailiilí naʻá ne sio ai ko e tangai naʻá ne ʻomaí naʻe ʻikai ko ia ia naʻe ʻi ai ʻene ngaahi meʻa mahuʻingá. ʻI heʻene manavaheé, naʻá ne toʻo ai ʻe ia ʻa e tangai naʻe ʻi ai ʻa e kotoa ʻo e ngaahi makasini Taua Leʻo mo e Awake! ne teʻeki ke fakaavá. Kae kehe, ʻi he sio ʻa e sōtiá ki he ngaahi makasiní mo lau hono hingoa ʻi he ngaahi leipoló, naʻá ne pehē ange: “ʻOó, ko e taha koe ʻo e Kau Fakamoʻoni ʻa Sihová. ʻOku ʻikai te mau kumi ki he kakai ko kimoutolú, he ʻoku mau ʻiloʻi ʻoku ʻikai te mou loi.” Hili hano toʻo hake ha ngaahi makasini mei he tangaí, naʻe tala ange ʻe he sōtiá kia James ke ʻalu.

Naʻe hoko ʻa e meʻa tatau he faiʻanga-hua kehekehe ʻe hiva, ʻi he pehē ʻe he kau komanitaá kotoa ko James ko e taha ia ʻo e Kau Fakamoʻoni ʻa Sihová pea nau tukuange ia ke ʻalu taʻefai ki ai ha meʻa. Naʻe houngaʻia ʻa James ʻi he taimi ko iá ʻi he ʻikai te ne ʻomai ʻene ngaahi koloa mahuʻingá koeʻuhi mei he meʻa naʻá ne sio ki aí, naʻe meimei tāmateʻi pau ia koeʻuhi ko ʻene koloá.

ʻI he faifai ʻo ne aʻu ki he faiʻanga-hua fakaʻosi mo manavaheeʻi lahi tahá, naʻá ne ilifia lahi ʻi he sio ki he ngaahi sino mate lahi ʻoku tākoto takai holo. ʻI he manavahē lahi, naʻá ne ui ki he huafa ʻo Sihová. Naʻá ne lotu ʻo pehē kapau ʻe tokoniʻi ia ʻe Sihova ʻi he feituʻu tāmate ko ení, te ne tauhi kiate ia ʻi he toenga ʻo ʻene moʻuí.

Naʻe ʻoange ʻe James ʻene tangaí ki he kau sōtiá, pea nau toe pehē ai pē: “ʻOku ʻikai te mau kumi ki he kakai ko ení.” ʻI heʻenau hanga ange kiate iá, naʻa nau tānaki mai ki ai: “Ko e taha ʻo ho fanga tokouá ʻoku nofo ia he talalo ʻo e moʻunga ko ení. ʻAlu ʻo nofo mo ia.” ʻI he aʻu mai ki he taimi ko ení ne ʻosi liliu fakaʻaufuli ai ʻa e fakakaukau ʻa James fekauʻaki mo e Kau Fakamoʻoní. Naʻá ne fetuʻutaki leva ki he tokouá, pea naʻe fai ʻa e ngaahi fokotuʻutuʻu ki ha ako Tohitapu ʻi he tohi ko e Te Ke Malava ʻo Moʻui Taʻengata he Palataisi ʻi he Māmaní.a

ʻI ha ngaahi ʻaho siʻi ki mui ai, naʻe fakamālohiʻi ia ʻi ha ʻohofi ke hola ai mei he feituʻú. ʻI he taimi ko ení, naʻe lele ai ʻa James ki ʻuta mo puke maʻu pē ʻa ʻene tohi Moʻui Taʻengata! pē! Lolotonga ʻa e māhina ʻe 11 ʻo e nofo mavahe mei he Kau Fakamoʻoní, naʻá ne ako ai ʻi heʻene tohí ʻo tuʻo nima. ʻI he faifai peá ne malava ʻo foki ki he koló, naʻá ne toe fai ʻene ako Tohitapu mo e Kau Fakamoʻoní peá ne fai ha fakalakalaka vave. ʻI ha taimi nounou ki mui ai, naʻá ne papitaiso, pea ʻokú ne ngāue anga-tonu he taimí ni mo hono fanga tokoua fakalaumālié.

[Fakamatala ʻi lalo]