Naʻe ʻAi ʻe he Meʻa ko Iá ke Toe Fakafoki ʻa e Ongo Foʻi Mamá ki Hona Nimá

“VAKAI mai ki hoku nimá. ʻOkú ke vakai ai ki ha faʻahinga meʻa ʻoku kehe?” Ko e hiki hake ia ʻe ha tangata hono nimá ki ha fefine, ko e taha ʻo e Kau Fakamoʻoni ʻa Sihová, ʻa ia naʻá ne vakai ki ai ʻo ne fakatokangaʻi leva kuo puli hono mama malí. Naʻá ne fakamatalaʻi ange ko ia mo hono uaifí ʻoku ʻikai te na kei fakataha, ko ia kuó na fakakaukau ai ke na vete.” “ʻIkai!” ko e lea atu ia ʻa e Fakamoʻoní. “Toʻo ʻa e tohi ko ʻení pea lau ia. ʻE tokoni ia kiate koe ki hoʻo nofo malí.” ʻI he meʻa ko iá , naʻá ne ʻoange ai kiate ia ha tatau ʻo e tohi makatuʻunga ʻi he Tohitapú ko e ʻIlo ʻA Ia ʻOku Taki Atu ki he Moʻui Taʻengatá.a

ʻI ha ngaahi ʻaho ki mui ai naʻe toe foki mai ʻa e tangatá ki he Fakamoʻoní ʻokú ne ongoʻi fiefia. Naʻá ne fakahā ange kiate ia hono nimá. ʻI he taimi ko ʻení naʻá ne tui ai hono mama malí. Naʻá ne tala ange kiate ia ko ia mo hono uaifí kuó na lau ʻa e tohi ʻIlo pea ko ia ai, ʻi he taimi ní kuó na fiefia ʻaupito. Kuo toe fakafoki moʻoni ʻe he tohí ʻa e ongo foʻi mamá ki hona nimá.

ʻOku lava ʻe he akonaki ʻa e Tohitapú ke tokoniʻi ha husepāniti mo ha uaifi ke na fakahā ʻa e ʻofa moʻoní ʻiate kinaua. ʻOku pehē ʻení koeʻuhi ko e faʻu-tohi ʻo e Tohitapú ʻoku ʻikai ko ha toe taha kehe ka ko hotau Tokotaha-Fakatupú, ʻa ia ʻokú ne pehē: “Ko au Sihova ko ho ʻOtua, ʻoku ou ako koe ke fai meʻa ʻaonga, ʻoku ou tataki koe ʻi he hala ʻoku totonu ke ke fou ai.”—Aisea 48:17.

[Fakamatala ʻi lalo]