Pale ʻo e Faileleí

KO E meʻa ia ʻoku ʻoange ʻe he Feohiʻanga ʻo e Kau Kongó mo e Kau Faiongoongo ʻAfiliká ki he Fakalakalaka (AJOCAD) ʻi he Lepupilika Temokalati ʻo Kongó ke “fakapaleʻi ʻaki ha faʻahinga tāutaha pe ngaahi kautaha fakasōsiale ʻoku nau fakafaikehekeheʻi kinautolu fakafou ʻi heʻenau tokoni ki he fakalakalaka ʻi [Kongó].”

ʻI Nōvema 17, 2000, naʻe ʻoatu ai ʻa e Pale ʻo e Faileleí ki he Kau Fakamoʻoni ʻa Sihová ʻi “heʻenau tokoni ki he fakalakalaka ʻa e faʻahinga tāutaha ʻo Kongó [fakafou] ʻi he ako mo e akonaki ʻoku maʻu ʻi heʻenau ngaahi tohí.”

ʻI he fakamatala ki he palé, naʻe pehē ai ʻe he nusipepa Kinshasa ko e Le Phare: “ʻOku faingataʻa ke maʻu ha kakai Kongo ʻoku nau maʻu ʻa e ngaahi makasini Taua Leʻo mo e ʻĀ Hake! pe ngaahi tohi kehe ʻoku pulusi ʻe he Kau Fakamoʻoni ʻa Sihová kuo teʻeki te nau lau ia. Ko e ngaahi makasini ko ʻení ʻokú ne [fakamatalaʻi] ʻa e ngaahi tafaʻaki kotoa ʻo e moʻuí.” Naʻe toe lave ʻa e kupú ʻo pehē ʻoku fakahaaʻi ʻe he ngaahi tohí “ʻa e founga ke fekuki ai mo e ngaahi palopalema ʻo e ʻaho ní” pea tuhu ki he “ʻuhinga moʻoni ʻoku tuʻu mei mui ʻi he ngaahi meʻa ʻoku lolotonga hokó.” Ko e ʻīsiu taki taha ʻo e ʻĀ Hake! “ʻoku tuʻu-ʻatā fakapolitikale pea ʻoku ʻikai te nau hakeakiʻi ha matakali ʻe taha ʻo māʻolunga ange ia ʻi ha matakali ʻe taha.” Tānaki atu ki ai, ʻoku langa hake ʻe he ngaahi tohí ʻa e “tuipau ki he talaʻofa ʻa e Tokotaha-Fakatupú ki ha māmani melino mo malu ʻa ia ʻoku ʻamanaki ke ne fetongi ʻa e fokotuʻutuʻu ʻo e ngaahi meʻa fulikivanu mo maumau-lao lolotongá.”

Hangē ko ia naʻe fakatokangaʻi ʻe he AJOCAD, ko e ngaahi tohi ʻa e Kau Fakamoʻoni ʻa Sihová naʻe fakamoʻoniʻi ʻene ʻaonga ki he konga lahi ʻo e kakai ʻo Kongó. ʻI hono ala maʻu ʻi he ngaahi lea ʻe laui teaú, ko ʻenau pōpoaki fakatupu ʻamanakí ʻe lava ke ʻaonga foki kiate koe.

Kātaki ʻo vakaiʻi ʻa e fakamatala ʻi laló ke sio pe ʻe malava fēfē ke ke maʻu ha ʻaonga meiate kinautolu.