Ko e Ngaahi Lelei ʻo e Fakatupu ʻa Sihová

“Naʻa mo e Ngaahi ʻAkau ʻa e ʻEiki ʻOku Topono”

KUO faifai ange peá ke tuʻu ʻi ha vaotā ʻi he hūhū mai ʻa e huelo ʻo e laʻaá ʻi he vahaʻa ʻo e ngaahi fuʻu ʻakau lalahí? ʻOku lava ke ke fanongo ki he ngahaha ʻi he hū mai ʻa e havilivilí ʻi he ngaahi lauʻiʻakaú?​—Aisea 7:2.

ʻI he ngaahi feituʻu ʻe niʻihi ʻo e māmaní lolotonga ʻa e konga ʻo e taʻú, ʻoku meimei ulo ai ʻa e lau ʻo e ʻakau kehekehe ʻi he ngaahi lanu kulokula, moli, engeenga, pea mo e ngaahi lanu kehe. Ko e moʻoni, ʻoku hangē ia ʻoku velá ʻa e loto vaó! ʻOku feʻunga lelei eni mo e fakakaukaú ni: “Haʻaki mai, ʻa e ngaahi moʻunga, hoʻomou fiefia; ʻa e vao, mo e ʻakau katoa ʻoku ʻi ai.”—Aisea 44:23.a

Ko e meimei vahe tolu ʻe taha ʻo e ʻēlia mōmoa ʻo e palanite ko Māmaní ʻoku ʻufiʻufi ia ʻe he vaotaá. ʻI ha founga fisifisimuʻa, ko e vaotaá mo e moʻui lahi fau ʻoku ʻi aí ʻoku nau fakalāngilangiʻi honau Tokotaha-Faʻufaʻú mo e Tokotaha-Fakatupú, ʻa Sihova ko e ʻOtuá. “Fakamalo kia Jihova,” ko e hiva ia ʻa e tokotaha-tohi-saame fakamānavaʻí, “ae gaahi akau fua, moe gaahi sita kotoabe.”—Sāme 148:​7-9, PM.

“Ko e ʻulu ʻakaú ʻoku mātuʻaki mahuʻinga ia ki he ʻi ai ʻa e tangatá fakatouʻosi ʻi he tuʻunga fakamatelié mo ʻene holi ki he fakaʻofoʻofá,” ko e fakamatala ia ʻa e tohi The Trees Around Us. ʻOku maluʻi, fakatolonga, pea fakaleleiʻi ʻe he ngaahi vaotaá ʻa e tokonaki vai maʻa ʻa e faʻahinga ʻo e tangatá. ʻOku toe fakamaʻa ʻe he ʻulu ʻakaú ʻa e ʻeá. Fakafou he ngāue fakaofo ʻa e fotosinifesisá, ʻoku liliu ʻe he fanga kiʻi sela ʻo e lauʻiʻakaú ʻa e kāponi taiʻokisaití, vaí, minuloló, mo e maama ʻo e laʻaá ki he meʻakai mo e ʻosikena.

Ko e vaotaá ko ha ngāue mataotao ia ʻo e fakaʻofoʻofa mo e tisaini. Ko e ngaahi fuʻu ʻakau lalahí ʻoku faʻa hoko ko e ngaahi mēmipa fakaueʻiloto taha ia ʻo e vaotaá. ʻOku tupu ʻi honau haʻohaʻongá ʻa e taʻefaʻalaua ʻo e hulufé, limú, ʻakau totoló, fanga kiʻi ʻakau īkí mo e fanga kiʻi ʻakau fakanamuleleí. ʻOku fakafalala ʻa e fanga kiʻi ʻakau peheé ki he ʻātakai ʻoku fakatupu ʻe he ʻulu ʻakaú, ʻi heʻenau tupu ʻi honau malumalú pea mimisi ʻa e hauhau ʻoku tokonaki mai ʻe he vaotaá.

ʻI he ngaahi vaotā fakatōlau ʻe niʻihi, ʻoku aʻu ai ki he lauʻiʻakau ʻe hongofulu miliona ʻoku ngangana nai ki ha ʻeka ʻe taha ʻo e kelekele ʻo e vaotaá ʻi he konga ki mui ʻo e taʻú. Ko e hā ʻoku hoko ki he ngaahi lauʻiʻakaú? Ko e fanga ʻinisēkité, talingelingá, fanga kelemutú, mo e ngaahi meʻamoʻui kehé ʻoku nau liliu ʻa e ngaahi naunau fakanatula kotoa ko ení ki he kelekele palangia, ko ha ʻelemēniti mātuʻaki mahuʻinga ia ʻo e kelekele leleí. ʻIo, ʻoku ʻikai ha meʻa ʻe maumauʻi ʻi he teuteu ʻe he kau ngāue fakalongolongo ko ení ʻa e kelekelé ki he tupu foʻoú.

ʻI lalo he ngaahi lauʻiʻakau ʻauʻaungá, ʻoku fonu ai ʻi he moʻuí ʻa e kelekele ʻo ha vaotā. Fakatatau ki he tohi The Forest, “ʻoku aʻu ki he lahi ʻo e meʻamoʻui ʻe 1,350 . . . ʻoku lava nai ke maʻu ʻi ha ʻēlia senitimita ʻe 30 pea ko ha senitimita ʻe 2.5 ʻa hono lolotó, pea ʻoku ʻikai ke kau ai ʻa e ngaahi meʻamoʻui ʻe laui piliona ʻoku hā ʻi he meʻa fakaʻata siemú ʻi he falukunga kelekele kotoa pē.” ʻIkai ko ia pē, ʻoku fonu ʻa e vaotaá ʻi he fanga manu ngaolo, fanga manupuna, fanga ʻinisēkite, mo e fanga manu totolo. Ko hai ʻoku totonu ke ne maʻu ʻa e fakahīkihiki ki he fakaʻofoʻofa mo e kehekehe ko ení? ʻOku feʻungamālie hono talaki ʻe honau Tokotaha-Fakatupú: “Ko e manu ʻo e vao ʻoku aʻaku kotoa pe, ʻa e manu ʻoku kaikai ʻi he moʻunga laui afe.”—Sāme 50:10.

Kuo fakatupu ʻa e fanga manu ʻe niʻihi fakataha mo ha malava fakaofo ke nau moheʻi ʻa e momokó pea hao ai ʻi he tuʻunga fefeka ʻo ha faʻahitaʻu momoko pea mo e ngaahi vahaʻa taimi lōloa ʻo e nounou fakameʻatokoní. Kae kehe, ʻoku ʻikai ke moheʻi ʻa e momokó ʻe he fanga manu kotoa pē. Naʻa mo e ʻi he uhouhonga ʻo e taimi momokó, te ke sio nai ai ki ha tākanga tia ʻoku nau topuna holo ʻi ha loto ʻataʻatā. ʻOku ʻikai ke moheʻi ‘ e he tiá ʻa e momokó pe tuku tauhi ha meʻakai, ka ʻoku nau hahalu meʻakai, ʻo lamu ʻa e fanga kiʻi vaʻa molū mo e moto ʻo e ʻakaú, hangē ko ia ʻoku lava ke ke sio ki ai ʻi he fakatātā ʻoku ʻoatu heni mei Siamané.

Ko e moʻui ʻa e ʻakaú ʻoku fakaeʻa mahino ia ʻi he Ngaahi Konga Tohi Tapú. Fakatatau ki he lau ʻe taha, ʻoku lave ʻa e Tohi Tapú ki he meimei ʻakau kehekehe ʻe 130, ʻo kau ai ʻa e faʻahinga ʻe 30 ʻo e ʻulu ʻakaú. ʻI he lave ki he mahuʻinga ʻo e fakamatala ko iá, ʻoku pehē ʻe ha toko taha ako ki he ʻakaú ko Michael Zohary: “Naʻa mo e ʻi he ʻū tohi anga-maheni ʻikai fakapalōfesinale fakamāmaní, ʻoku ʻikai maʻu ai ʻe ha taha ha tuʻunga mātuʻaki māʻolunga ʻo e lave ki he ʻakaú ʻi heʻene felāveʻi mo e ngaahi tafaʻaki kehekehe ʻo e moʻuí ʻo hangē ko ia ʻoku hā ʻi he Tohi Tapú.”

Ko e ʻulu ʻakaú mo e vaotaá ko e ngaahi meʻaʻofa fakaʻofoʻofa ia mei ha Tokotaha-Fakatupu ʻofa. Kapau kuo tau fakamoleki ha taimi ʻi he loto vaó, ko e moʻoni te tau loto-tatau mo e ngaahi lea ʻa e tokotaha-tohi-sāmé: “Naʻa mo e ngaahi ʻakau ʻa e ʻEiki ʻoku topono; ʻa e ngaahi sita ʻo Lepanoni ʻa ia kuo ne to. ʻA ia ʻoku ngaohi ai ʻe he fanga manu honau pununga.”—Sāme 104:​16, 17.

[Fakamatala ʻi lalo]

[Puha/Fakatātā ʻi he peesi 9]

Ko e taha ʻo e ʻakau fua fakaueʻiloto taha ʻi he Hahake Lotolotó ko e ʻalimoní. ʻI he konga ki muʻa ʻo e taʻú—ki muʻa ʻaupito ʻi he lahi taha ʻo e ngaahi ʻakau kehé—ʻoku ʻā ai ia mei heʻene mohé. Naʻe ui ʻe he muʻaki kau Hepeluú ʻa e fuʻu ʻalimoní ko e toko taha kuo ʻā, ko e ʻuhingá ki heʻene matala tōmuʻá. ʻOku hā ʻoku ʻā hake ʻa e ʻakaú fakataha mo hono teunga pingikī pelepelengesí pe ngaahi matala hinehiná.​—Koheleti 12:5.

ʻI he faʻahinga nai ʻe 9,000 ʻo e fanga manupuna ʻoku ʻiloʻí, ko e kalasi ʻe 5,000 nai ai ʻoku fakakalasi kinautolu ko e fanga manupuna hiva. ʻOku hanga ʻe heʻenau hivá ʻo toʻo ʻa e lōngonoa ʻo e fuʻu vaotaá. (Sāme 104:12) Hangē ko ení, ko e kiʻi foʻi misi ʻoku hivá ʻokú ne fakahoko ha hiva fakafiefia. Ko e fanga warbler tengihiá, hangē ko e taha ko ia ʻoku fakahaaʻi hení, ko e fanga kiʻi kau hiva ia ʻoku nau teunga mataʻāʻā ʻi he fio ʻo e lanu kulei, engeenga mo e lanu mata mālohi.​—Sāme 148:​1, 10.

[Fakatātā ʻi he peesi 9]

Vaotā ʻi Normandy, Falanisē