Līpooti ʻa e Kau Fanongonongo ʻo e Puleʻangá

Ko ha Tohi Meia Alejandra

KO E faitohí kuo fuoloa hono fakamoʻoniʻi ko ha founga ola lelei ia ʻo hono fai ha fakamoʻoní. Neongo ʻoku hā ngali taʻepau nai ʻa e olá ʻi he taimi ʻe niʻihi, ko e faʻahinga ʻoku nau kīvoi ʻi hono ngāueʻaki ʻa e meʻangāue ko ení kuo tāpuakiʻi lahi kinautolu. ʻOku nau manatuʻi ʻa e faleʻi fakapotopoto ʻa e Tohi Tapú: “ʻI he pongipongi to hoʻo tenga, pea ʻi he efiafi ofi ʻa e poʻuli ʻoua taʻofi ho nima: he ʻoku ʻikai te ke ʻilo pe ko e fe ʻe tuʻumalie, ʻa é pe ko é; pea naʻa fakatou lelei.”—Koheleti 11:6.

Ko Alejandra, ko ha Fakamoʻoni finemui ia ʻa ia naʻe ngāue ʻi he ʻōfisi vaʻa ʻo e Kau Fakamoʻoni ʻa Sihova ʻi Mekisikoú ʻi he taʻu nai ʻe hongofulu, naʻá ne hokosia ha faitoʻo kemikale ki he kanisaá. Naʻe ʻalu ki he kovi ange ʻa hono tuʻungá, pea naʻá ne hoko ʻo fuʻu vaivai ke fakahoko ʻa ʻene founga-tuʻumaʻu fakaʻahó. Kae kehe, ʻi he ʻikai loto ke liʻaki ʻa ʻene ngāue fakafaifekaú, naʻe fili ai ʻa Alejandra ke ne fai ha ngaahi tohi. Naʻá ne tohi fekauʻaki mo e fokotuʻutuʻu ako Tohi Tapu taʻetotongi ʻi ʻapí pea fakakau ai ʻa e fika telefoni ʻa ʻene faʻeé. Naʻá ne ʻoange leva ʻa e ngaahi tohí ki heʻene faʻeé ke ne ʻave ʻo tuku ʻi he ngaahi ʻapi nofoʻanga ʻa ia naʻe ʻikai ke ʻi ʻapi ai ʻa e kakaí lolotonga ʻa ʻene ngāue fakafaifekau fale-ki-he-falé.

Lolotonga iá, ko Diojany, ko ha kiʻi taʻahine mei Kuatemala, naʻá ne ngāue ko ha tauhi-ʻapi ʻi Cancún, Mekisikou. Lolotonga ʻene ʻi aí, naʻá ne fetuʻutaki ai mo e Kau Fakamoʻoni ʻa Sihová peá ne fiefia ʻi he ngaahi fetalanoaʻaki Fakatohitapu mo kinautolú. Ki mui ai, naʻe fili ai ʻa hono ongo pulé ke hiki ki he Kolo Mekisikoú peá na loto ai ke ʻalu fakataha mo ia. Naʻe toumoua ʻa Diojany ke hiki koeʻuhi ʻe ʻuhinga iá ko e mole ʻa ʻene fetuʻutaki mo e Kau Fakamoʻoni ʻa Sihová.

“ʻOua ʻe hohaʻa,” ko e fakapapauʻi ange ia ʻe hono ongo pulé, “ʻoku ʻi he feituʻu kotoa pē ʻa e Kau Fakamoʻoní. Te ma kumi kia kinautolu ʻi heʻetau aʻu pē ki aí.” ʻI he ʻamanaki fiefia ko iá, naʻe loto ai ʻa Diojany ke ʻalu mo kinaua. ʻI heʻenau ʻi he Kolo Mekisikoú pē, naʻe kumi leva ʻa e ongo pule ʻo Diojany ki he Kau Fakamoʻoní. ʻI ha faʻahinga ʻuhinga, naʻe ʻikai malava ke na maʻu kinautolu, neongo naʻe ʻi ai ʻa e Kau Fakamoʻoni laka hake he toko 41,000 mo e ngaahi fakatahaʻanga ʻe 730 ʻi he kolo ko iá.

Naʻe vave ʻa e hoko ʻa Diojany ʻo loto-siʻi koeʻuhi ko e ʻikai te ne malava ʻo maʻu ʻa e Kau Fakamoʻoní ke toe hoko atu ʻa ʻene ngaahi fetalanoaʻaki Fakatohitapú. ʻI he ʻaho ʻe taha, naʻe haʻu ai ʻa hono pule fefiné ʻo ne pehē ange kiate ia: “Ko e meʻa fakaʻohovale! Kuo fanongo mai ʻa ho ʻOtuá ki hoʻo ngaahi lotú.” ʻI hono ʻoange kiate ia ha tohi, naʻá ne pehē: “Kuo tuku mai ʻe he Kau Fakamoʻoní ʻa e tohí ni kiate koe.” Ko ha tohi ia meia Alejandra.

Naʻe fetuʻutaki ʻa Diojany mo e faʻē pea mo e tokoua ʻo Alejandra ko Blanca, peá ne tali ha ako Tohi Tapu. Hili ha ngaahi uike, naʻá ne fetaulaki ai mo Alejandra pea naʻe fakalotomāfana ʻa ʻena feʻiloakí. Naʻe fakalototoʻaʻi ia ʻe Alejandra ke hokohoko atu ʻa ʻene ako Tohi Tapú koeʻuhi ke lava ʻo ne fai ha fakalakalaka fakalaumālie.

ʻI ha ngaahi māhina siʻi mei ai, ʻi Siulai 2003, naʻe mate ai ʻa Alejandra, ʻo ne tuku mai ki hono ngaahi kaungātuí ha faʻifaʻitakiʻanga lelei ʻo e tui mo e loto-toʻa. ʻI he putú, naʻe maongo ki he tokolahi ʻa e taimi naʻa nau feʻiloaki ai mo Diojany ʻo fanongo ki heʻene pehē: “Kuo hoko ʻa Alejandra mo hono fāmilí ko ha faʻifaʻitakiʻanga fakaofo kiate au. ʻOku ou fakapapauʻi ke tauhi kia Sihova pea hoko leva ʻo papitaiso. He fakaʻamua ē ʻe au ke toe sio kia Alejandra ʻi he Palataisi ka hoko maí!”

ʻIo, ko e tohí ko ha kiʻi meʻa siʻisiʻi nai. Ka ko ha ngaahi ola lelei mo tuʻuloa ē ʻe lava ke maʻu aí!