Ko ha Meʻa Fakamamahi Kuo Hoko

KO Owen, ko ha kiʻi tamasiʻi taʻu ua mo e konga, naʻá ne vaʻinga ʻi he fale kaukau ʻi hono ʻapí. Naʻá ne kaka hake ki ha tukuʻanga faitoʻo naʻe fakakaukau ʻene ongo mātuʻá heʻikai te ne lava ke aʻu ki ai. ʻI he lotolotonga ʻo e ngaahi meʻa naʻe ʻi aí, naʻá ne ʻilo ai ha foʻi hina naʻe tohoakiʻi ki ai ʻene tokangá. Naʻá ne fakaava ia ʻo inu ʻa e huhuʻa ʻi lotó. Naʻe hoko ai ʻa e meʻa fakamamahí.

Naʻe ʻi he foʻi hiná ha ʻēsiti vela, pea ko e meʻa fakamamahí, naʻe mate ai siʻi Owen. Naʻe loto-mamahi lahi ʻene ongo mātuʻá. Ko ʻene tamaí, ko Percy, naʻe kumi ki ha fakafiemālie mei hono siasí. “Ko e hā naʻe hoko ai ʻení?” ko ʻene ʻeké ia. Naʻe tali ange ʻe he faifekaú, “Naʻe fiemaʻu ʻe he ʻOtuá ha toe kiʻi ʻāngelo ʻe taha ʻi hēvani.” ʻI he lōmekina ʻe he mamahí, naʻe ongoʻi ai ʻe he motuʻa mamahí ni naʻe mātuʻaki taʻetotonu ʻa e meʻá ni. Naʻe fakataumuʻa moʻoni ʻa e ʻOtuá ke hoko ha meʻa fakamamahi pehē? ʻI he mole ʻa e ʻamanakí, naʻe fili ai ʻa Percy heʻikai ke toe feohi ia mo hono siasí.

ʻI he fakakaukau atu ki he meʻa naʻe hokó, naʻe fifili ʻa Percy: ‘ʻOku kei faingataʻaʻia ʻeku kiʻi tamasiʻí? Te u toe sio kiate ia ʻi ha taimi?’

Kuó ke fifili nai mo koe pe ko e hā ʻoku hoko ʻi he maté pea ʻe toe malava koā ke toe feohi ʻi he kahaʻú mo e faʻahinga naʻá te ʻofa ai kuo nau maté. ʻOku ʻomai ʻe he Folofola ʻa e ʻOtuá, ko e Tohi Tapú, ʻa e tali ki he ongo fehuʻí ni. ʻOku ʻi hono ngaahi pēsí ha ngaahi tali mahino mo fakafiemālie ki he faʻahinga kotoa kuo nau fehangahangai mo e ngaahi meʻa fakamamahi meimei tatau. ʻIkai ngata aí, ʻokú ne fakahaaʻi mai ha ʻamanaki lāngilangiʻia ʻa ia kuo talaʻofa mai ʻe he ʻOtuá—ko e toetuʻú.

Kātaki ʻo lau ʻa e kupu hoko maí ke ʻilo lahi ange ai fekauʻaki mo e ʻamanaki fakaofo ko ʻení.