ʻĒmosi—Ko ha Tokotaha Tānaki pe ko ha Tokotaha Fakaavaava Sukamino?

ʻI HE senituli hono hiva K.M., naʻe fekauʻi ai ʻa e palōfita ko ʻĒmosí ʻe he fulikivanu ko ʻAmasaiá, ʻa ia ko ha taulaʻeiki naʻe lotu ki he pulú, ke tuku ʻene palofisai ʻi ʻIsilelí. Naʻe fakafepaki ki ai ʻa ʻĒmosi, ʻo ne pehē: “Ko e tauhimanu au, mo e tama teleʻi [fakaavaava, NW] sukamino: pea naʻe toʻo au ʻe Sihova mei he muimui ki he takanga, pea folofola mai ʻa Sihova, ʻAlu ʻo fai palofisai ki hoku kakai Isileli.” (Emosi 7:​14, 15) ʻIo, ko Sihova ia naʻá ne fekauʻi atu ʻa ʻĒmosi ko ha palōfitá; naʻe ʻikai ko ha fakakaukau pē ia ʻaʻana. Ka ko e hā e ʻuhinga ʻa ʻĒmosi ʻi heʻene pehē ko e “tama fakaavaava” sukamino ia?

Ko e kupuʻi lea faka-Hepelū ʻoku liliu ko iá ʻoku hā tuʻo taha pē ko eni ʻi he New World Translation. Ko e ngaahi liliu Tohi Tapu kehé ʻoku liliu ai ʻa e foʻi leá ko e “tokotaha tānaki,” “tokotaha ngoue,” “tokotaha teuteu,” pe “tokotaha tō,” kae ʻikai ko e tokotaha “fakaavaava” sukamino. Kae kehe, ko e pepa ko e Economic Botany ʻoku pehē ai ko ha liliu feʻungamālie ʻo e foʻi leá ko e “tokotaha hokohokaʻi” koeʻuhi ʻoku fakahaaʻi ʻi he foʻi leá ni ha ngāue makehe ʻa e tokotaha ngoue sukaminó.

Ko e ngāue ʻo hono fakaavaava, pe hokohokaʻí, ʻa ia ko hono ʻai ha fanga kiʻi matafatafa iiki ʻi he fuaʻi sukaminó, kuo ʻiloa ia ʻi ʻIsipite mo Saipalo talu pē mei he kuonga muʻá. Ko hono hokohokaʻi, pe fakaavaavá, ʻoku ʻikai kei fai ia ʻi ʻIsileli he ʻahó ni koeʻuhi ko e lahi ʻo e sukamino kehekehe kuo tupu ʻi he fonuá. Kae kehe, naʻe fai hono fakaavaava ʻe he kau ʻIsileli ʻi he ʻaho ʻo ʻĒmosí, koeʻuhi ko e sukamino naʻe tupu ʻi ʻIsileli he taimi ko iá ko e haʻu ia mei he ngaahi kalasi kehekehe ʻi ʻIsipite.

ʻOku ngalingali, ko hono hokohokaʻi ʻo e fuaʻi sukaminó ʻoku ʻai ai ke ne mimisi ʻa e vaí pea hoko ai ʻo huhuʻa lahi. ʻOku toe fakalahi ai hono faʻu ʻo e kasa ʻefiliní, ʻa ia ʻokú ne fakavaveʻi ʻa ʻene momohó, pea iku ai ki ha fua fōlalahi ange mo melie ange. Tānaki atu ki ai, ʻoku ʻikai maumauʻi ʻe he fanga kiʻi pī kainikaveá ʻa e fuá koeʻuhi ko ʻene momoho vavé.

Neongo ʻa hono puipuituʻa māʻulalo ko ha tauhi-sipi mo ha tokotaha fakaavaava sukaminó, naʻe ʻikai ke ilifia ʻa ʻĒmosi ʻi hono ngaahi filí. ʻI hono kehé, naʻá ne talaki loto-toʻa ʻa e pōpoaki fakaefakamaau ʻa Sihova ki ʻIsilelí. Ko ha faʻifaʻitakiʻanga lelei moʻoni ia ki he kau sevāniti ʻa e ʻOtuá he ʻaho ní, ʻa ia kuo pau ke nau talaki pehē ha pōpoaki ʻoku ʻikai manakoa!​—Mātiu 5:​11, 12; 10:22.