“Ko e Hā Tū ʻa e Moʻoní?”

KO E fehuʻi ko iá naʻe fai ʻi he tāufehiʻa kia Sīsū ʻe he Kōvana Loma ko Ponitō Pailató. Naʻe ʻikai ke mahuʻingaʻia ke fai ange ha tali, pea naʻe ʻikai ʻoange ki ai ʻe Sīsū ha tali. Mahalo pē naʻe vakai ʻa Pailato ki he moʻoní naʻe fuʻu faingataʻa ke mahinoʻi.—Sione 18:38.

Ko e fakakaukau tāufehiʻa ko eni ki he moʻoní ʻoku maʻu ia ʻe he tokolahi he ʻahó ni, ʻo kau ai ʻa e kau taki lotú, kau faiakó mo e kau politikí. ʻOku nau tui ko e moʻoní—tautefito ki he moʻoni fakaeʻulungāangá mo e fakalaumālié—ʻoku ʻikai papau ka ʻoku fai fakatuʻunga pea feliliuaki. Ko e meʻá ni, ko e moʻoni ʻoku fakahuʻunga ai ko e kakaí ʻoku lava ke nau fakapapauʻi ʻia kinautolu pē ʻa e meʻa ʻoku tonú mo ia ʻoku halá. (Aisea 5:​20, 21) ʻOku toe fakaʻatā ai ʻa e kakaí ke nau siʻaki ai ʻo pehē kuo ʻosi e taimi ʻo e ngaahi meʻa mahuʻinga mo e ngaahi tuʻunga fakaeʻulungāanga naʻe muimui ki ai ʻa e ngaahi toʻutangata he kuohilí.

Ko e fakamatala naʻá ne langaʻi ʻa e fehuʻi ʻa Pailató ʻoku taau ke fakatokangaʻi. Naʻe pehē ʻe Sīsū: “Ko e meʻa ko ia naʻe fanauʻi ai au, pea ko e meʻa ko ia kuo u haʻu ai ki māmani, koeʻuhi ke u fakahāʻi ʻa e moʻoni.” (Sione 18:37) Ko e moʻoní kia Sīsū naʻe ʻikai ko ha fakakaukau ʻikai māʻalaʻala pe taʻealamahinoʻi. Naʻá ne talaʻofa ki heʻene kau ākongá: “ʻE faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.”—Sione 8:32.

Ko fē ʻe lava ke maʻu ai ʻa e moʻoni ko iá? ʻI he taimi ʻe taha, naʻe pehē ai ʻe Sīsū heʻene lotu ki he ʻOtuá: “Ko e folofola aʻau ko e moʻoni ia.” (Sione 17:17) Ko e Tohi Tapú, ʻi hono tohi ʻi he malumalu ʻo e fakamānavaʻi fakaʻotuá, ʻoku fakahaaʻi ai ʻa e moʻoni ʻokú ne ʻomai fakatouʻosi ʻa e tataki falalaʻanga mo ha ʻamanaki papau ki he kahaʻú​—ko e moʻui taʻengata.​—2 Timote 3:​15-​17.

Naʻe siʻaki taʻetokanga ʻe Pailato ʻa e faingamālie ke ako ai ʻa e moʻoni ko iá. Fēfē koe? Fēfē ke ke ʻeke ki he Kau Fakamoʻoni ʻa Sihová pe ko e hā ʻa e “moʻoni” naʻe akoʻi ʻe Sīsuú! Te nau fiefia ke vahevahe atu kiate koe ʻa e moʻoní.