Maʻu Tohi Fakamoʻoni Ako Hono 123 ʻi Kiliatí

Ekinaki ki he Kau Maʻu Tohi Fakamoʻoni Ako ʻi Kiliatí Ke Nau “Kamata Keli”

ʻI HE ʻaho Tokonaki ʻo Sepitema 8, 2007, naʻe fakatahataha ai ha fuʻu kakai ʻe toko 6,352 mei he ngaahi fonua ʻe 41 ʻi he maʻu tohi fakamoʻoni ako ʻa e kalasi hono 123 ʻo e Akoʻanga Tohi Tapu Taua Leʻo ko Kiliatí. ʻI he 10:00 pongipongí, naʻe talitali lelei ai ʻa e kau fanongó ʻe he sea ʻo e polokalamá, ko Anthony Morris mei he Kulupu Pulé. Hili ha lea kamata, naʻá ne fakafeʻiloaki mai leva ʻa e ʻuluaki tokotaha malangá ko Gary Breaux mei he Kōmiti Vaʻa ʻi ʻAmeliká.

Naʻe fakapapauʻi ʻe Tokoua Breaux ki he kau akó tatau ai pē pe ʻoku fēfē honau fōtungá, ko kinautolu ʻoku nau fai ʻa e finangalo ʻo Sihová ʻoku nau fakaʻofoʻofa ʻi Heʻene ʻafio maí. (Sel. 13:11) Naʻá ne fakaʻaiʻai ʻa e kau maʻu tohi fakamoʻoni akó ke nau tauhi maʻu ʻa e faʻahinga fakaʻofoʻofa ko iá. Ko hono hokó, naʻe fakamamafaʻi ʻe Gerrit Lösch ʻo e Kulupu Pulé ʻo pehē ʻoku totonu ke ʻamanaki ki ha pale ʻi he taimi ʻoku tau tauhi ai kia Sihová. (Hep. 11:6) Kae kehe, ʻoku totonu ko ʻetau fakaueʻilotó ko ha ʻofa taʻesiokita.

Ko e ʻovasia ʻo e Potungāue Akoʻanga Fakateokalatí, ko William Samuelson, naʻá ne hoko atu ʻi hono fakaʻaiʻai ʻa e kau maʻu tohi fakamoʻoni akó ke nau pipiki ki he vāhenga-ngāue fakangeingeia ko hono fanongonongo ʻa e Tuʻi pulé pea ke fakahāhā honau tuʻunga ngeiá ʻaki ʻenau ʻulungāanga lelei.a Ko Sam Roberson, ko e ʻovasia tokoni ʻo e Potungāue Akoʻanga Fakateokalatí, naʻá ne fakalototoʻaʻi ʻa e kau maʻu tohi fakamoʻoni akó ke nau fakasio maʻu pē ʻa e lelei ʻa e niʻihi kehé. ʻE malava lelei ange leva ai ʻa e kau maʻu tohi fakamoʻoni akó ke nau “ʻofa ki he feohiʻanga fakakātoa ʻo e fanga tokouá.”—1 Pita 2:17, NW.

Hili ʻa e ngaahi malanga fakaueʻiloto ko iá, naʻe fakaʻekeʻeke ʻe he faiako ʻi Kiliati ko Mark Noumair ha kau maʻu tohi fakamoʻoni ako ʻa ia naʻa nau fakamatala ki heʻenau ngaahi hokosia ʻi he malaʻe malangá lolotonga ʻa e ako ʻi Kiliatí. Naʻe lava ke mahino taʻetoeveiveiua ki heʻenau kau fanongó ʻa ʻenau manako ʻi he ngāue fakafaifekaú mo ʻenau holi ke tokoniʻi ʻa e niʻihi kehé. Ko Kent Fischer ʻo e ʻŌfisi Pēteli ʻi Patterson naʻá ne hoko atu ʻo fakaʻekeʻeke ʻa e kau mēmipa ʻo e Kōmiti Vaʻa mei he fonua ʻe tolu ʻa ia ʻoku ʻi ai foki ʻa e kau misinale ai. Ko e ngaahi lea ʻa e fanga tokoua lelei ko ení naʻe fakapapauʻi ai ki he kau fanongó, ʻa ia naʻe kau ki ai ʻa e ngaahi mātuʻa tokolahi ʻa e kau maʻu tohi fakamoʻoni akó, ʻoku tokangaʻi lelei ʻa e kau misinale foʻoú ʻi honau ngaahi vāhenga-ngāué. Naʻe hoko atu ʻa Izak Marais ʻo e Potungāue Ngaahi Ngāue ki he Liliu Leá ʻo fakaʻekeʻeke ha kau misinale fuoloa, ʻa ia ko ʻenau ngaahi hokosiá naʻe tomuʻa fakaʻali ai ki he kau maʻu tohi fakamoʻoni akó ʻa e fiefia te nau hokosiá.

Ko e malanga tefito ʻo e polokalamá, naʻe fakahoko ia ʻe Geoffrey Jackson mei he Kulupu Pulé, ko hono kaveingá “ʻI he Meʻa Kotoa Kuo Mou Fanongoá—Ko e Hā Leva Te Mou Faí?” Ko Tokoua Jackson, ʻa ia naʻá ne ngāue ko ha misinale ʻi he meimei taʻu ʻe 25 ʻi he Pasifiki Sauté, naʻá ne lāulea ki he fakamulituku ʻo e Malanga ʻi he Moʻungá. ʻI he malanga ko iá, naʻe lea ai ʻa Sīsū fekauʻaki mo e ongo tangata ʻe toko ua, ko e tangata poto mo e tangata vale ʻa ia naʻe fai ʻena langa fale. Naʻe fakahaaʻi ʻe he tokotaha malangá ko e ongo falé naʻá na tuʻu nai ʻi he feituʻu tatau. Kae kehe, naʻe langa ʻa e tangata valé ʻi ʻolunga, ʻi he ʻoneʻoné, lolotonga ia naʻe keli ʻa e tangata potó kae ʻoua kuo tau ki he maká ke fakavaʻe mei ai ʻene langá. ʻI he hoko mai ha afā lahí, naʻe tuʻu pē ʻa e fale ne langa ʻi he maká ka ko e fale ne langa ʻi he ʻoneʻoné naʻe holofa.—Mt. 7:24-27; Lk. 6:48.

Naʻe fakamatala ʻa Sīsū ko e tangata valé naʻe tatau ia mo e faʻahinga naʻe fanongo ʻataʻatā pē ki he ngaahi akonaki ʻa Sīsuú. Naʻe tatau ʻa e tangata potó mo e faʻahinga naʻa nau fanongo pea fai ki he akonaki ʻa Sīsuú. Naʻe pehē ʻe Tokoua Jackson ki he kau maʻu tohi fakamoʻoni akó, “ʻI he taimi te mou ngāueʻaki ai ʻi he malaʻe ngāue fakamisinalé ʻa e meʻa kuo mou akó, te mou hangē ai ko e tangata potó.” Ko ia ʻi he fakaʻosi ʻo e malangá, naʻá ne fakaʻaiʻai ai ʻa e kau maʻu tohi fakamoʻoni akó ke nau “kamata keli” ʻi honau ngaahi vāhenga-ngāue fakamisinalé.

Naʻe fakamulitukuʻaki hono maʻu ʻe he kau maʻu tohi fakamoʻoni akó ʻa honau tipilomá mo e ngaahi vāhenga-ngāué, pea naʻe fai ʻe Tokoua Morris ha ekinaki fakaʻosi. Naʻá ne fakalotolahiʻi ʻa e kau maʻu tohi fakamoʻoni akó ke nau muimui maʻu pē ʻia Sīsū pea ʻoua ʻaupito ʻe tuku ʻa e falala ko ia kia Sihova ki ha mālohí. Naʻe ngata leva ai ʻa e polokalama maʻu tohi fakamoʻoni akó.

[Fakamatala ʻi lalo]

[Puha ʻi he peesi 31]

ʻŪ FIKA ʻO E KALASÍ

Lahi ʻo e fonua naʻe fakafofongaʻí: 10

Lahi ʻo e ngaahi fonua naʻe vaheʻi ki aí: 24

Tokolahi ʻo e kau akó: 56

ʻAvalisi ʻo e taʻumotuʻá: 33.5

ʻAvalisi ʻo e taʻu he moʻoní: 17.9

ʻAvalisi ʻo e taʻu he ngāue fakafaifekau taimi-kakató: 13.8

[Fakatātā ʻi he peesi 32]

Kalasi Maʻu Tohi Fakamoʻoni Ako Hono 123 ʻa e Akoʻanga Tohi Tapu Taua Leʻo ko Kiliatí

ʻI he lisi ʻi laló, ko e ngaahi ʻotú ʻoku fakafika ia mei muʻa ki mui, ko e ngaahi hingoá ʻoku fakahokohoko ia mei he toʻohemá ki he toʻomataʻú ʻi he ʻotu taki taha.

(1) Esparza, E.; Papaya, S.; Bilal, A.; Suárez, M.; Evers, E.; Dimichino, K. (2) Rosa, M.; Fujii, R.; Ratey, O.; Leveton, J.; Van Leemputten, M. (3) Boscaino, A.; Beck, K.; Budanov, H.; Braz, C.; Peltz, K.; Siaw, A. (4) Leveton, S.; Santikko, H.; Conte, S.; Wilson, J.; Rylatt, J.; Pierce, S.; Fujii, K. (5) Rosa, D.; Boscaino, M.; Austin, V.; Rodiel, P.; Bilal, P.; Dimichino, P. (6) Ratey, B.; Czyzyk, D.; Clarke, C.; Riedel, A.; Esparza, F.; Siaw, P.; Van Leemputten, T. (7) Rodiel, J.; Evers, J.; Green, J.; Czyzyk, J.; Santikko, M.; Rylatt, M. (8) Peltz, L.; Austin, D.; Riedel, T.; Beck, M.; Pierce, W.; Conte, S.; Green, S. (9) Suárez, J.; Clarke, J.; Papaya, S.; Budanov, M.; Wilson, R.; Braz, R.