TALI ʻO E NGAAHI FEHUʻI FAKATOHITAPÚ

Ko hotau ngaahi mēmipa fakafāmilí kotoa ʻoku ʻi ai honau ngaahi hingoa fakafoʻituitui. Naʻa mo e fanga monumanu pusiakí ʻoku ʻi ai honau hingoa! ʻIkai ʻoku feʻungamālie ki he ʻOtuá ke ʻi ai hano huafa? ʻI he Tohi Tapú, ʻoku lahi ʻa e ngaahi hingoa fakalakanga ʻo e ʻOtuá, hangē ko e ʻOtua Māfimafi Aoniu, ʻEiki Hau mo e Tokotaha-Fakatupu ka ʻoku ʻi ai hono huafa fakafoʻituitui.—Lau ʻa e ʻAisea 42:8.

ʻOku lahi ʻa e ngaahi liliu Tohi Tapu ʻoku nau ngāueʻaki ʻa e huafa fakafoʻituitui ʻo e ʻOtuá ʻi he Saame 83:18. Ko e fakatātaá, ʻoku pehē ai: “ʻIo ko ho huafa ko Sihova ʻoku hope atu ʻi mamani katoa.”

ʻOku fiemaʻu ʻe he ʻOtuá kitautolu ke tau ngāueʻaki hono huafa fakafoʻituituí. ʻOku tau ngāueʻaki ʻa e ngaahi hingoa fakafoʻituituí ʻi he taimi ʻoku tau talanoa ai mo e faʻahinga ʻoku tau ʻofa aí, hangē ko hotau kaungāmeʻa ofí—tautefito kapau ʻoku tala mai ke te fai pehē. ʻOku totonu ke kehe ia ʻi he taimi ʻoku tau talanoa ai ki he ʻOtuá? Tānaki atu ki aí, naʻe fakalototoʻaʻi ʻe Sīsū Kalaisi ke ngāueʻaki ʻa e huafa ʻo e ʻOtuá.—Lau ʻa e Mātiu 6:9; Sione 17:26.

Kae kehe, ke hoko ko e kaumeʻa ʻo e ʻOtuá, ʻoku fiemaʻu ke tau maʻu ʻa e ʻilo lahi ange kiate ia ʻi hono huafá pē. Hangē ko ení, ʻoku fēfē ʻa e ʻOtuá? ʻOku faingofua moʻoni ke hoko ʻo ofi ki he ʻOtuá? ʻOku lava ke ke maʻu ʻa e ngaahi tali ki he ngaahi fehuʻi ko iá ʻi he Tohi Tapú.