ʻOku Totonu Ke Tau Manavahē kia Sētane?

Hangē ko e kāponi monokisaité, ʻoku taʻehāmai ʻa Sētane, ʻo faingataʻa ke ʻiloʻi ʻe he faʻahinga ʻo e tangatá pea ʻoku fakatuʻutāmaki ʻaupito. Ka kuo ʻikai tuku taʻetokoniʻi kitautolu ʻe he ʻOtuá. ʻOku ʻikai fiemaʻu ke ke manavahē kia Sētane kapau te ke ngāueleleiʻaki ʻa e ngaahi meʻaʻofa ko eni kuo foaki atu ʻe he ʻOtuá.

Ko e mafai ke filí. ʻI he Sēmisi 4:7 ʻoku tala mai ai kiate kitautolu: “Talitekeʻi ʻa e Tēvoló, pea te ne hola meiate kimoutolu.” Neongo ʻoku mālohi ʻa Sētane, heʻikai lava ke ne fakamālohiʻi koe ke ke fai ʻa e ngaahi meʻa ko ia ʻoku ʻikai te ke loto ki aí. ʻOku ʻi ai ʻa e fili ke ke fai. ʻOku pehē ʻi he 1 Pita 5:9: “Mou tuʻu ʻo fakafepakiʻi ia [ʻa e Tēvoló], tuʻu maʻu ʻi he tuí.” Manatuʻi, naʻe mavahe ʻa Sētane hili hono talitekeʻi mālohi ʻe Sīsū ʻa e ngaahi ʻahiʻahi ʻe tolú. (Mātiu 4:11) ʻE lava ke ke fai ʻa e fili tatau ke talitekeʻi ʻa e ngaahi feinga ʻa Sētané.

Kaumeʻa mo e ʻOtuá. ʻI he Sēmisi 4:8 ʻoku fakalototoʻaʻi ai kitautolu ke “ʻunuʻunu ofi ki he ʻOtuá.” ʻOku fakaafeʻi fakafoʻituitui koe ʻe Sihova ke fakatupulekina ha kaumeʻa vāofi mo ia. ʻE lava fēfē ke ke fai ia? Ko e founga lelei taha ke kamata ʻakí ko e ako lahi ange fekauʻaki mo Sihova mei he Tohi Tapú. (Sione 17:3) ʻI hoʻo ako fekauʻaki mo iá te ne ueʻi ai koe ke ʻofa kiate ia, pea ko e ʻofa ko iá te ne ueʻi ai koe ke fai hono finangaló. (1 Sione 5:3) ʻI hoʻo ʻunuʻunu ofi ange ki hoʻo Tamai fakahēvaní, ʻe anga-fēfē ʻene talí? ʻoku hoko atu ʻe Sēmisi: ‘Ko e ʻOtuá ʻe ʻunuʻunu ofi mai kiate koe.’

Talaʻofa ki ha maluʻanga. ʻI he Palōveepi 18:10 ʻoku pehē ai: “Ko e huafa ʻo Sihova ko e taua malohi: ʻOku lele ki ai ʻa e faitotonu ʻo ne malu ai.” Ko e moʻoni, ʻoku ʻikai ʻuhinga ʻa e huafa fakafoʻituitui ʻo e ʻOtuá ko ha mana ʻomi monū. ʻI hono kehé, ʻoku ʻuhingá ko e faʻahinga ko ia ʻoku nau fakalangilangiʻi ʻa e huafa ʻo e ʻOtuá ʻe lava ke nau ui kiate ia ki ha maluʻanga ʻi ha faʻahinga taimi pē.

Ko ha faʻifaʻitakiʻanga lelei. ʻI he Ngāue 19:19 ʻoku tala mai ai kiate kitautolu ha fakamaama fekauʻaki mo e kau Kalisitiane toki tafoki foʻou ʻi ʻEfesoó: “Ko ha tokolahi ʻo e faʻahinga naʻa nau fai ʻa e ngaahi tōʻonga fakafaimaná naʻa nau ʻomai fakataha ʻenau ʻū tohí ʻo tutu kinautolu ʻi he ʻao ʻo e tokotaha kotoa. Pea naʻa nau fikaʻi fakakātoa ʻa honau mahuʻingá ʻo ʻilo ʻoku feʻunga mo e konga siliva ʻe 50,000.”a Naʻe fakaʻauha ʻe he kau Kalisitiane ko ení ha meʻa pē naʻe fekauʻaki mo e ngāue fakafaʻahikehé, tatau ai pē pe ko e hā hono mahuʻinga fakapaʻangá. ʻOku lava ke ʻomai ʻi he faʻifaʻitakiʻanga ko iá ha lēsoni lelei kiate kitautolu he ʻahó ni. ʻOku lotolotoi ʻi he māmani ko ení ʻa e faimaná mo e ngāue fakafaʻahikehé. Naʻa mo e ngaahi naunau mo e ngaahi tōʻonga fakafaʻahikehe ʻoku hā ngali lelei, te ne ʻomai nai ha ngaahi tākiekina fakatemeniō. ʻOku mātuʻaki mahuʻinga ke ke hanganaki mavahe mei he ngaahi meʻa kotoa ko iá ʻi ha faʻahinga tuʻunga pē.—Teutalōnome 18:10-12.

Ko Rogelio naʻe lave ki ai ʻi he kamataʻanga ʻo e kupu ʻi he konga hokohoko ko ení, naʻe ʻikai tui ki he Tēvoló ʻi he ʻuluaki ngaahi taʻu ʻe 50 ʻo ʻene moʻuí. Ka naʻá ne toe vakai ki he anga ʻene fakakaukaú. Ko e hā hono ʻuhingá? “Ko e ʻuluaki taimi eni ʻi heʻeku moʻuí ke u maʻu ai ha Tohi Tapu,” ko e manatu ia ʻa Rogelio. “Ko e ʻilo mei he Tohi Tapú naʻá ne fakatuipauʻi au ʻoku ʻi ai ʻa e Tēvolo. Ko e ʻilo tatau pē ʻokú ne maluʻi au he taimi ko ení mei hano maʻukovia ʻi heʻene tākiekiná.”

Te ke saiʻia ke ʻiloʻi ʻe ʻi ai ʻa e ʻaho heʻikai toe ʻi ai ʻa Setane? Te ke lava. ʻOku tomuʻa tala ʻi he Tohi Tapú fekauʻaki mo e taimi ʻi he kahaʻú ʻa ia ko e Tēvoló ʻokú ne takihalaʻi ʻa e fuʻu tokolahi, ʻe “lī . . . ki he ano ʻo e afi mo e sūlifá.” (Fakahā 20:10) Ko e moʻoni, ʻe ʻikai lava ʻe he afi mo e sūlifa moʻoní ʻo uesia ha meʻamoʻui laumālie taʻehāmai. Ko ia ai, kuo pau pē ko e ano ʻo e afí ʻokú ne fakatātaaʻi ʻa e fakaʻauha taʻengata. ʻE mole atu ʻa Sētane ʻo taʻengata. He taimi fakafiefia ē ʻe maʻu ʻe he kau ʻofa ki he ʻOtuá!

ʻI he taimi tatau, hokohoko atu hoʻo ako fekauʻaki mo Sihova mo ʻene ngaahi foungá ʻaki ʻa e kotoa hoʻo malavá.b Sioloto atu ki heʻetau moʻui ʻi he taimi ʻe fakahoko moʻoni ai ʻa e lea, “ʻOku ʻikai ʻi ai ʻa Sētane!”