“Kuo Mau Ngāueʻi Homau Feituʻu Ngāué ʻo Tā Tuʻo Lahi!”

¹ ʻOkú ke ongoʻi ʻoku faʻa ngāueʻi maʻu pē ho feituʻu ngāué ʻo ʻikai ke toe ʻi ai ha kakai ia ai ʻe hangē ha sipí? Mahalo pē ʻokú ke fakakaukau: ‘ʻOku ou ʻilo ʻa e founga ʻe tali mai ai ʻa e kakaí. Ko e hā ke toutou foki ai ki he faʻahinga ʻoku ʻikai te nau mahuʻingaʻiá?’ Ko e moʻoni ʻoku toutou ngāueʻi ʻa e ngaahi feituʻu ngāue lahi. Kae kehe, ʻoku totonu ke fai ha fakakaukau pau ki he meʻá ni, ʻo ʻikai taʻepau. Ko e hā ʻoku pehē aí? Fakatokangaʻi ʻa e ʻuhinga ʻe fā ʻoku ʻomai ʻi laló.

² Kuo Tali ʻEtau Ngaahi Lotú: Naʻe pehē ʻe Sīsū: “Kuo lahi ʻa e taʻu kuo motuʻu, ka ʻoku kaungatāmaki ʻa e kau ngāue: ko ia ke mou kole ki he ʻEiki ʻoku aʻana ʻa e taʻu, ke ne kouna atu mo ha kau ngāue ke utu ʻene taʻu.” (Luke 10:2) ʻI ha ngaahi hongofuluʻi taʻu lahi naʻa tau kole ai kia Sihova ki ha tokoni lahi ange. ʻI he ngaahi feituʻu lahi, ʻoku tau maʻu he taimí ni ʻa e kau ngāue lahi ange naʻe fiemaʻú, pea ʻoku tau ngāueʻi tuʻo lahi ange ai ʻa e feituʻu ngāué. ʻIkai ʻoku totonu ke ueʻi kitautolu ke tau fiefia ʻi hono tali ʻe Sihova ʻetau ngaahi lotú?

³ Kītakí ʻOkú Ne ʻOmai ʻa e Fua Lelei: Naʻa mo e ngaahi feituʻu ʻoku toutou ngāueʻí, ʻoku tali ai ʻe he kakaí ʻa e pōpoaki ʻo e Puleʻangá pea ʻoku nau hoko mai ʻo ʻiloʻi ʻa e moʻoní. Ko ia ai, ʻoku totonu ke tau toutou ʻaʻahi ʻi he ʻamanaki ke maʻu ha faʻahinga loto-totonu lahi ange. (Ai. 6:​8-11) Hangē ko ia naʻe fai ʻe he muʻaki kau ākonga ʻa Sīsuú, naʻa nau “toutou ō” ki he kakai ʻi honau feituʻu ngāue naʻe vaheʻi angé, ʻo feinga ke langaʻi hake ʻenau mahuʻingaʻia ʻi he Puleʻanga ʻo e ʻOtuá.—Mt. 10:​6, 7, NW.

⁴ ʻI Potukali ʻoku ngāueʻi ai ʻe he ngaahi fakatahaʻanga lahi honau feituʻu ngāué ʻi he uike kotoa pē, ka ʻoku nau kei maʻu pē ai ʻa e faʻahinga hangē ha sipí. Naʻe maʻu ʻe ha tuofefine ʻe taha ha fakakaukau pau lahi ʻaupito. ʻOkú ne pehē: “Ki muʻa ke u ʻalu ki he ngāue fakamalangá ʻi he pongipongi kotoa pē, ʻoku ou lotu kia Sihova ke tokoniʻi au ke u maʻu ha taha mahuʻingaʻia ʻi hono ako ʻa e Tohitapú.” ʻI he ʻaho ʻe taha naʻá ne fokotuʻutuʻu ke ako mo e kau ngāue ʻo ha fale ngaahi ʻulu. Neongo ia, ki mui ai, ko e tokotaha pē naʻe haʻu ki he akó. Naʻe pehē ʻe he tokotaha ko iá: “ʻOku ʻikai ke mahuʻingaʻia ʻa e niʻihi kehé, ka ko au pē.” ʻI loto ʻi ha māhina ʻe taha naʻá ne fakahoko ai ha ako Tohitapu ʻe ua ʻiate ia pē. ʻI he hili pē ʻene papitaisó, naʻá ne hū leva ki mui ai ki he ngāue tāimuʻá!

⁵ Kuo Mei ʻOsi ʻa e Ngāué: ʻOku lolotonga malangaʻi ʻa e ongoongo leleí, hangē pē ko ia naʻe tomuʻa tala ʻe Sīsū ʻe hokó. (Mt. 24:14) Naʻa mo e ngaahi feituʻu ʻa ia ʻoku “ʻikai ke fie fanongo mai ai kiate [kitautolu]” ʻa e kakaí, ʻoku nau hoko ʻo fakatokangaʻi ʻa hono fai ʻa e ngāue fakamalangá. ʻOku tau ʻamanekina ʻe ʻikai ke tali ia ʻe ha niʻihi pe naʻa mo e fakafepaki ki he moʻoní. Ka, ko e faʻahinga peheé kuo pau ke fai ha fakatokanga totonu ki ai fekauʻaki mo e hoko mai ʻa e fakamaau meia Sihová.—Isi. 2:​4, 5; 3:​7, 8, 19, NW.

⁶ ʻOku Teʻeki Ai ke ʻOsi: ʻOku ʻikai ko kitautolu ʻoku fakatuʻunga mei ai ʻa e taimi ke taʻofi ai ʻa e ngāue fakamalangá. ʻOku ʻafioʻi ʻe Sihova ʻa e taimi totonu ʻoku totonu ke ngata aí. ʻOkú ne ʻafioʻi kapau ʻoku ʻi ai ha kakai ʻi hotau feituʻu ngāué te nau tali nai ʻa e ongoongo leleí. ʻI he ʻahó ni, ʻoku pehē ʻe he kakai ʻe niʻihi ʻoku ʻikai te nau mahuʻingaʻia, ka ko ha ngaahi liliu lahi ʻi heʻenau moʻuí—mole ʻa e ngāué, mahaki faingataʻa ʻaupito, mate ha taha ʻofaʻanga—te ne ʻai ai kinautolu ke nau fie fanongo lahi ange ʻi ha taimi kehe. Koeʻuhi ko e tomuʻa fehiʻá pe koeʻuhi ko e hoko pē ʻo fuʻu femoʻuekina ke fanongó, ʻoku ʻikai ʻaupito ai ke fanongo ʻa e kakai tokolahi ki he meʻa ʻoku tau malangaʻí. Ko e toutou ʻaʻahi anga-fakakaumeʻá te ne ʻai nai kinautolu ke nau fakatokangaʻi pea fanongo.

⁷ Ko e faʻahinga kuo nau tupu hake ʻi he ngaahi taʻu ki mui ní pea ʻoku nau maʻu he taimí ni ʻa e ngaahi fāmili pē ʻonautolu tonú ʻoku nau fuʻu tokanga fakamātoato lahi ange ki he moʻuí pea ʻoku nau ʻeke ha ngaahi fehuʻi ʻa ia ko e Folofola pē ʻa e ʻOtuá te ne lava ke talí. Ko ha faʻē kei siʻi naʻá ne fakaafeʻi ha Fakamoʻoni ʻe toko ua ki hono ʻapí peá ne pehē: “ʻI he tuʻunga ko ha kiʻi taʻahiné, naʻe ʻikai ʻaupito ke u mahinoʻi ʻa e ʻuhinga naʻe fakasītuʻaʻi ai ʻe heʻeku faʻeé ʻa e Kau Fakamoʻoní peá ne tala ange kiate kinautolu ʻoku ʻikai te ne mahuʻingaʻia, lolotonga iá ko e meʻa pē naʻa nau fiemaʻu ke faí ko e talanoa fekauʻaki mo e Tohitapú. Naʻá ku fakapapauʻi leva ʻi hoku ʻatamaí ʻi he taimi te u tupu hake ai ʻo mali, peá u maʻu mo haku ʻapi tonu, te u kole ki he Kau Fakamoʻoni ʻa Sihová ke nau haʻu ʻo fakamatalaʻi mai kiate au ʻa e Tohitapú.” Ko e meʻa ia naʻá ne faí, ʻo fiefia ai ʻa e Kau Fakamoʻoni naʻa nau ʻaʻahi kiate iá.

⁸ ʻE Lava Ke Ke Toe Ola Lelei Ange? ʻOku ʻikai nai ko e kakai ʻoku tau ʻaʻahi maʻu pē ki aí ʻoku nau ʻai ke ngali faingataʻa ʻa hono toutou ngāueʻi ʻa e feituʻu ngāué. ʻI he taimi ʻe niʻihi ko kitautolu pē ia. ʻOku tau kamataʻaki ha fakakaukau taʻepau? ʻE lava ʻe he meʻa ko iá ke ne uesia ʻetau fakakaukaú pea ngalingali ʻoku kau ai ʻa e tō hotau leʻó mo e anga ʻo ʻetau sió. Fakahāhā ha loto-pau pea mo ha fofonga fiefia. ʻAhiʻahi ha fakaofiofi foʻou. Liliu hoʻo lea kamatá, pea feinga ke fakaleleiʻi ia. Mahalo ʻe lava ke ke liliu hoʻo fehuʻi kamatá pe ngāueʻaki ha konga Tohitapu kehe ki he fetalanoaʻakí. ʻEke ki ha fanga tokoua mo ha fanga tuofāfine ʻe niʻihi ʻa e meʻa kuo nau ʻilo ʻe lavameʻa ai ʻa hono ngāueʻi ʻo e feituʻu ngāué. Ngāue ʻi he ngāue fakamalangá mo ha kau malanga pea mo ha kau tāimuʻa kehekehe, pea fakatokangaʻi ʻa e meʻa ʻokú ne ʻai ʻenau ngāue fakafaifekaú ke ola leleí.

⁹ Ko e ngāue malangaʻi ʻo e Puleʻangá ʻoku maʻu ai ʻa e hōifua mo e tāpuaki ʻa Sihová, pea ko ʻetau kau ki aí ʻoku fakamoʻoniʻi ai ʻetau ʻofa kiate ia pea mo hotau kaungāʻapí. (Mt. 22:​37-39) Ko ia, ʻai ke tau fakahoko ʻetau ngāué ki heʻene kakató, ʻo ʻoua ʻe hela ʻi hono ngāueʻi ʻi he taimi ki he taimi ʻa e feituʻu ngāué.