Fakaleleiʻi ʻEtau Pōtoʻi ʻi he Ngāue Fakafaifekaú—Ngāueolaleleiʻaki ʻa e Ngaahi Fehuʻí

ʻUHINGA ʻOKU MAHUʻINGA AÍ: Kapau “ko e ngaahi fakakaukau ʻi he loto ʻo ha tangata ʻoku hangē ia ha ngaahi vai lolotó,” ʻoku hangē leva ʻa e ngaahi fehuʻí ha kane ke fusi hake ia. (Pal. 20:5) ʻOku tokoni ʻa e ngaahi fehuʻí ke fakakau mai ʻetau kau fanongó. Ko e ngaahi tali ki he ngaahi fehuʻi kuo filifili leleí ʻoku faʻa fai mai ai ha ngaahi fakamatala mahuʻinga. Naʻe ngāueolaleleiʻaki ʻe Sīsū ʻa e ngaahi fehuʻí. ʻE lava fēfē ke tau faʻifaʻitaki kiate ia?

FOUNGA HONO FAI IÁ:

• ʻEke ha ngaahi fehuʻi fakatupu fakakaukau. Naʻe ʻeke ʻe Sīsū ha ngaahi fehuʻi hokohoko ke fakapapauʻi ʻa e anga ʻo e fakakaukau ʻa ʻene kau ākongá. (Māt. 16:13-16; be 238 ¶3-5) Ko e hā ha ngaahi fehuʻi fakatupu fakakaukau ʻe lava ke ke ʻeke?

• ʻEke ha ngaahi fehuʻi taki. Ke fakatonutonu ʻa e ngaahi fakakaukau ʻa Pitá, naʻe ʻeke ʻe Sīsū ha ngaahi fehuʻi pea tokonaki mo ha ngaahi tali ʻo taki ai ʻa Pita ki he fakamulituku totonú. (Māt. 17:24-26) Ko e hā ha ngaahi fehuʻi taki ʻe lava ke ke ʻeke ke tokoniʻi ha taha ke aʻu ki he fakamulituku totonú?

• Fakaongoongoleleiʻi hoʻo tokotaha fanongó. Hili ha ‘tali pōtoʻi’ ʻa ha sikalaipe, naʻe fakaongoongoleleiʻi ia ʻe Sīsū. (Mk. 12:34) ʻE lava fēfē ke ke fakaongoongoleleiʻi ha taha ʻokú ne tali ha fehuʻi?

SIO ʻI HE ʻULUAKI KONGA ʻO E VITIŌ FAI ʻA E NGĀUE NAʻE FAI ʻE SĪSUÚ—FAIAKO, PEA TALI LEVA ʻA E ONGO FEHUʻÍ NI:

• Ko e hā ko ha fakatātā ai eni ʻo e faiako ʻikai leleí, neongo ʻoku tonu ʻa e fakamatalá?

• Ko e hā kuo pau ai ke tau fai ʻa e meʻa lahi ange ʻo ʻikai fakamatalaʻi pē ʻa e fakamatalá?

SIO ʻI HE KONGA UA ʻO E VITIOÓ, PEA TALI LEVA ʻA E ONGO FEHUʻÍ NI:

• Naʻe anga-fēfē hono ngāueolaleleiʻaki ʻe he tokouá ʻa e fehuʻí?

• Ko e hā ha ngaahi tafaʻaki kehe ʻo ʻene faiakó ʻe lava ke tau faʻifaʻitaki ki ai?