Naʻe ʻAlu ʻa Sēkope ki Hālani

ʻOKÚ KE ʻilo pe ko hai ʻa e ongo tangata ko ʻeni ʻokú na talanoa mo Sēkopé? ʻI he hili ʻa e fononga ʻa Sēkopé ʻi ha ngaahi ʻaho lahi, naʻá ne fetaulaki mo kinaua ʻi ha vaitupu. Naʻá na tokangaʻi ʻena fanga sipí. Naʻe ʻeke ange ʻe Sēkope: ‘Ko hoʻomo haʻu mei fē?’

Naʻá na tali: ‘Mei Hālani.’

Naʻe ʻeke ʻe Sēkope: ‘ʻOkú mo ʻilo ʻa Lēpani?’

Naʻá na tali: ‘ʻIo. Sio atu, ko hono ʻofefine ʻena ko Lesieli ʻoku haʻu mo ʻene fanga sipí.’ ʻOkú ke sio kia Lesieli ko ena ʻoku kei haʻú?

ʻI he sio atu ʻa Sēkope kia Lesieli mo e fanga sipi ʻa ʻene faʻētangata ko Lēpaní, naʻá ne ʻalu leva ʻo tekaʻi ʻa e maka mei he vaitupú kae lava ʻa e fanga sipí ʻo inu. Pea naʻe toki ʻuma ʻa Sēkope kia Lesieli mo fakafeʻiloaki ange ia ki ai. Naʻe fuʻu fiefia ʻaupito ʻa Lesieli peá ne foki ki ʻapi ʻo tala ki heʻene tamai ko Lēpaní.

Naʻe fuʻu fiefia ʻaupito ʻa Lēpani ke nofo ʻa Sēkope mo ia. Pea naʻe fuʻu fiefia ʻa Lēpani ʻi he kole ʻe Sēkope ke ne mali mo Lesielí. Kaekehe, naʻá ne kole kia Sēkope ke ne ngāue ʻi heʻene ngoué ʻi he taʻu ʻe fitu ka ne maʻu ʻa Lesieli. Naʻe fai leva ia ʻe Sēkope koeʻuhi he naʻá ne fuʻu ʻofa ʻia Lesieli. Ka ʻi he taimi ke fai ai ʻa e malí, ʻokú ke ʻilo ʻa e meʻa naʻe hokó?

Naʻe ʻoange ʻe Lēpani ia hono ʻofefine lahi ko Liá kia Sēkope ke ʻai ko hono uaifi kae ʻikai ko Lesieli. ʻI he loto-lelei ʻa Sēkope ke ngāue he toe taʻu ʻe fitu kia Lēpaní, naʻe toe ʻoange kiate ia ʻe Lēpani ʻa Lesieli ke hoko ko hono uaifi. ʻI he taimi ko iá naʻe fakangofua pē ʻe he ʻOtuá ia ʻa e tangatá ke lahi hake hono uaifí ʻi he tahá. Ka ʻi he taimí ni, hangē ko ia ʻoku fakahā ʻi he Tohitapú, ʻoku totonu ke maʻu ʻe he tangatá ʻa e uaifi pē ʻe taha.