Ko e Faingataʻa ʻi he Fale ʻo Tēvitá

ʻI HE ʻosi pē ʻa e kamata ke pule ʻa Tēvita ʻi Selusalemá, naʻe tuku ʻe Sihova ki heʻene kau taú ha ngaahi ikuna lahi ʻo honau ngaahi filí. Naʻe talaʻofa foki ʻe Sihova te ne foaki ʻa e fonua ko Kēnaní ki he kau ʻIsilelí. Pea ʻi he tokoni ʻa Sihová, naʻa nau toki maʻu ʻa e fonua kotoa naʻe talaʻofa kiate kinautolú.

Ko Tēvitá ko e pule lelei. Naʻá ne ʻofa kia Sihova. Ko ia ko e taha ʻi he ʻuluaki ngaahi meʻa naʻá ne fai ʻi he hili ʻene maʻu ʻa Selusalemá ko hono ʻomai ki ai ʻa e puha ʻo e fuakava ʻa Sihová. Pea naʻá ne fiemaʻu ke langa ha temipale ke tuku ia ki ai.

ʻI he hoko ʻa Tēvita ʻo motuʻa angé, naʻá ne fai ha fehalaaki kovi lahi. Naʻe ʻilo pē ʻe Tēvita ʻoku hala ke toʻo ha meʻa ʻa ha taha kehe. Ka ʻi he efiafi ʻe taha, ʻi heʻene nofo ʻi he funga fale ʻo hono palasí, naʻá ne sio hifo ki ha fefine fakaʻofoʻofa ʻaupito. Ko hono hingoá ko Patisepa, pea ko hono husepānití ko e tokotaha ʻo ʻene kau taú naʻe hingoa ko ʻUlaia.

Naʻe fuʻu fiemaʻu ʻaupito ʻe Tēvita ia ʻa Patisepa ko ia naʻá ne fekau ke ʻomai ia ki hono palasí. Naʻe kei ʻalu hono husepāniti ia ʻoʻoná ʻi he taú. Ko ia, naʻe mohe ʻa Tēvita mo ia pea ʻi he konga ki muí naʻe ʻilo ʻe Patisepa ʻokú ne feitama. Naʻe fuʻu hohaʻa ʻaupito ʻa Tēvita pea naʻá ne fekau ki heʻene ʻeikitau ko Sioapé ke fakamuʻomuʻa ʻa ʻUlaia ʻi he taú ke tāmateʻi ai ia. ʻI he taimi naʻe mate ai ʻa ʻUlaiá, naʻe mali leva ʻa Tēvita ia mo Patisepa.

Naʻe ʻita ʻaupito ʻa Sihova kia Tēvita. Ko ia naʻá ne fekau ʻene sevāniti ko Nētané ke tala kia Tēvita ʻene ngaahi angahalá. ʻOkú ke sio ko Nētane ʻeni ʻokú ne lea kia Tēvitá. Naʻe ongoʻi fakatomala ʻaupito ʻa Tēvita ʻi he meʻa naʻá ne faí, pea ko ia naʻe ʻikai ke tāmateʻi ai ia ʻe Sihova. Ka naʻe pehē ʻe Sihova: ‘Koeʻuhi kuó ke fai ʻa e ngaahi kovi ko ʻení, ʻe lahi ʻa e ngaahi faingataʻa ʻi ho falé.’ Pea ko ha faingataʻa lahi ē naʻe maʻu ʻe Tēvita!

Ko e ʻuluakí, naʻe mate ʻa e tama ʻa Patisepá. Pea hili ia ko e ʻuluaki foha ko ia ʻo Tēvita ko ʻAmanoní naʻá ne fakamālohiʻi hono tuofefine ko Temá ʻo na mohe ʻi heʻena toko ua pē. Naʻe ʻita lahi ʻa e foha ʻo Tēvita ko ʻApisalomé ʻi he meʻa ko ʻení ʻo ne tāmateʻi ʻa ʻAmanoni. Ki mui mai ai, naʻe leleiʻia ʻa e kakai tokolahi ʻia ʻApisalome, pea naʻá ne ʻai ia ko e tuʻi. Faifai atu pē, naʻe ikunaʻi ʻe Tēvita ʻa e tau mo ʻApisalomé, ʻa ia naʻe tāmateʻi ai. ʻIo, naʻe lahi ʻa e faingataʻa naʻe maʻu ʻe Tēvitá.

ʻI he lolotonga ʻo e ngaahi meʻa kotoa ko ʻení, naʻe fāʻeleʻi ʻe Patisepa ha tama naʻe hingoa ko Solomone. ʻI he taimi naʻe motuʻa mo mahamahaki ai ʻa Tēvitá, naʻe feinga hono foha ko ʻAtunaisá ke ne hoko ko e tuʻi. Naʻe toki fekau ai ʻe Tēvita ʻa e taulaʻeiki ko Sātoki ke ne lilingi ʻa e lolo ʻi he ʻulu ʻo Solomoné ko hono fakahā ia ʻe hoko ʻa Solomone ko e tuʻi. Naʻe ʻikai fuʻu fuoloa mei ai pea naʻe mate ʻa Tēvita ʻi hono taʻu 70. Naʻá ne pule ʻi he taʻu ʻe 40, pea naʻe toki hoko ʻa Solomone ko e tuʻi ʻo ʻIsileli.