Naʻe ʻAʻahi ha ʻĀngelo kia Mele

KO E fefine fakaʻofoʻofa ko ʻení ko Mele ia. Ko ha fefine ʻIsileli ia naʻá ne nofo ʻi he kolo ko Nāsaleti. Naʻe ʻilo ʻe he ʻOtuá ko ha tokotaha mātuʻaki lelei ia. Ko e ʻuhinga ia naʻá ne fekau ai ʻa ʻene ʻāngelo ko Kepalelí ke lea kiate ia. ʻOkú ke ʻilo pe ko e hā naʻe tala ʻe Kepaleli kia Melé? Tau sio ange.

Naʻe pehē ʻe Kepaleli kiate ia: ‘Mālō ʻetau lava, ʻa koe kuo ʻofeina lahi. ʻOku kau ʻa Sihova mo koe.’ Naʻe teʻeki ai ke sio ʻa Mele ia ʻi he tokotaha ko ʻení ki muʻa. Naʻá ne hohaʻa, koeʻuhi naʻe ʻikai te ne ʻilo pe ko e hā ʻene ʻuhingá. Ka naʻe hanga leva ʻe Kepaleli ʻo taʻofi ʻene ilifiá.

Naʻá ne pehē: ‘ʻE Mele, ʻoua te ke ilifia. ʻOku fiefia ʻaupito ʻa Sihova kiate koe. Ko hono ʻuhinga ia te ne fai ai ha meʻa fakaofo kiate koe. ʻE vavé ni ke ke maʻu ha pēpē. Pea te ke ui ia ko Sīsū.’

Naʻe hoko atu hono fakamatala ʻe Kepalelí: ‘Ko e tamasiʻi ko ʻení ʻe hoko ko e lahi, pea ʻe ui ia ko e ʻAlo ʻo e ʻOtua Fungani Māʻolunga. ʻE ʻai ia ʻe Sihova ko e tuʻi, ʻo hangē ko ia ko Tēvitá. Ka ko Sīsū ʻe tuʻi ia ʻo taʻengata, pea ʻe ʻikai ke ʻi ai hano ngataʻanga ʻo hono puleʻangá!’

Naʻe ʻeke ʻe Mele: ‘ʻE hoko fēfē ia? Kuo teʻeki te u mali. Pea kuo teʻeki te u nofo mo ha tangata. Ko ia ai, ʻe anga-fēfē ai ke u maʻu ha pēpē?’

Naʻe tali ange ʻe Kepaleli: ‘ʻE hoko mai ʻa e mālohi ʻo e ʻOtuá kiate koe. Ko ia ai, ʻe ui ʻa e tamasiʻí ko e ʻAlo ʻo e ʻOtuá.’ Peá ne tala kia Mele: ‘Manatuʻi ho kāinga ko ʻIlisapesí. Naʻe pehē ʻe he kakaí kuó ne fuʻu motuʻa ke maʻu ha fānau. Ka kuo vavé ni ke ne maʻu ha tama. Ko ia ʻokú ke ʻilo, ʻoku ʻikai ke ʻi ai ha meʻa ʻe ʻikai malava ʻe he ʻOtuá ke fai.’

Pea naʻe pehē leva ʻe Mele: ‘Ko au ʻeni ko e taʻahine sevāniti ʻa Sihova! Ke hoko mai kiate au ʻo hangē ko hoʻo leá.’ Pea naʻe toki ʻalu leva ʻa e ʻāngeló.

Naʻe fakavavevave atu ʻa Mele ke ʻaʻahi kia ʻIlisapesi. ʻI he fanongo ʻa ʻIlisapesi ki he leʻo ʻo Melé, naʻe hopohopo fiefia ʻa e pēpē ʻi he manava ʻo ʻIlisapesí. Naʻe fonu ʻia ʻIlisapesi ʻa e laumālie ʻo e ʻOtuá, peá ne pehē kia Mele: ‘ʻOkú ke monūʻia makehe ʻi he fefine kotoa pē.’ Naʻe nofo ʻa Mele mo ʻIlisapesi ʻi he māhina ʻe tolu nai, peá ne toki foki ki Nāsaleti.

Naʻe ʻamanaki ke mali ʻa Mele ki he tangata ko Siosefa. Ka ʻi he ʻilo ʻe Siosefa ʻe ʻi ai ha pēpē ia ʻa Melé, naʻá ne fakakaukau ʻoku ʻikai toe totonu ke ne mali mo ia. Pea pehē ʻe he ʻāngelo ʻa e ʻOtuá kiate ia: ‘ʻOua te ke ilifia ke maʻu ʻa Mele ko ho uaifi. He ko e ʻOtuá ia kuó ne ʻoange kiate ia ha tama.’ Ko ia naʻe mali ʻa Mele mo Siosefa, peá na talitali ai pē ke fāʻeleʻi mai ʻa Sīsū.