Vahe Nima

Tauʻatāina ʻOku Maʻu ʻe he Kau Lotu ʻa Sihová

1, 2. (a) Ko e hā ʻa e faʻahinga tauʻatāina naʻe ʻoange ʻe he ʻOtuá ki he ʻuluaki ongo meʻa fakaetangatá? (e) Lave ki he ngaahi lao ʻe niʻihi naʻá ne puleʻi ʻa e ngāue ʻa ʻĀtama mo ʻIví.

ʻI HE taimi naʻe fakatupu ai ʻe Sihova ʻa e ʻuluaki tangatá mo e fefiné, naʻá na maʻu ʻa e tauʻatāina naʻe mahulu atu ia ʻi ha tauʻatāina pē kuo maʻu ʻe he faʻahinga ʻo e tangatá he ʻahó ni. Ko hona ʻapí ko Palataisi, ʻa e Ngoue fakaʻofoʻofa ko ʻĪtení. Naʻe ʻikai fakameleʻi ʻe ha mahaki ʻa ʻena fiefia ʻi he moʻuí, he naʻá na maʻu ʻa e ʻatamai mo e sino haohaoa. Naʻe ʻikai fakatatali mai kiate kinaua ʻa e maté ʻo hangē ko ia ko e tokotaha kotoa talu mei ai. Pehē foki, naʻe ʻikai ko ha ongo lōpoti kinaua ka naʻá na maʻu ʻa e meʻaʻofa fakafiefia ʻo e fili tauʻatāiná, ʻa e malava ko ia ke na fai pē ʻiate kinaua ʻena ngaahi filí. Kae kehe, ke hokohoko atu ʻena maʻu ha tauʻatāina pehē, naʻe pau ke na tokaʻi ʻa e ngaahi lao ʻa e ʻOtuá.

² Ko e fakatātaá, fakakaukau atu ki he ngaahi lao fakanatula ʻa e ʻOtuá kuó ne fokotuʻú. Ko e moʻoni, ko e ngaahi lao ko ení kuo ʻikai fokotuʻu nai ia ʻi ha ngaahi fokotuʻunga lea, ka ko ʻĀtama mo ʻIví naʻe ngaohi kinaua ʻi ha founga naʻe fakanatula pē ke na talangofua ki ai. Ko ʻena fiekaiá ko e fakaʻilonga ia ʻo e fiemaʻu ke kai; ko ʻena fieinuá, ko e fiemaʻu ia ke inu; ko e tō ʻa e laʻaá, ko e fiemaʻu ia ke mohe. Naʻe toe ʻoange foki ʻe Sihova kiate kinaua ʻa e ngāue ke fai. Ko e ngāue ko iá, ko hono moʻoní ko ha lao, koeʻuhí he te ne hanga ʻo puleʻi ʻena founga ngāué. Te na hanga ʻo fanauʻi mai ʻa e fānau, fakahoko e pule ki he ngaahi meʻamoʻui tokolahi ko ia ʻo e māmaní, pea fakalahi atu ʻa e ngaahi ngataʻanga ʻo e Palataisí kae ʻoua kuó ne ʻufiʻufi ʻa e kolopé kotoa. (Senesi 1:28; 2:15) He lao anga-ʻofa mo ʻaonga moʻoni ē! Naʻe ʻoange ai kiate kinaua ha ngāue mātuʻaki fakafiemālie, ʻo fakamafeia ai kinaua ke na ngāueʻaki ʻena malavá ki he kakato tahá ʻi ha ngaahi founga lelei. Pehē foki, naʻá na maʻu ʻa e tauʻatāina feʻunga ke fai ʻa e ngaahi fili ki he founga ʻo hono fakahoko ʻena ngāué. Ko e hā mo ha toe meʻa ʻe fiemaʻu ʻe ha taha?

 3. Naʻe malava fēfē ke ako ʻe ʻĀtama mo ʻIvi ke na ngāue fakapotopotoʻaki ʻa e tauʻatāina ke fai ʻa e ngaahi filí?

³ Ko e moʻoni, ʻi he taimi naʻe foaki ai kia ʻĀtama mo ʻIvi ʻa e faingamālie ke fai ʻa e ngaahi filí, naʻe ʻikai ʻuhinga eni ia ko ha faʻahinga fili pē te na fai ʻe lava ke ʻomi ai ha ngaahi ola lelei. Ko ʻena tauʻatāina ko ia ke fai ʻa e ngaahi filí naʻe pau ke fakahoko ia ʻi loto ʻi he ngaahi fakangatangata ʻo e ngaahi lao mo e ngaahi tefitoʻi moʻoni ʻa e ʻOtuá. ʻE malava fēfē nai ke na ʻilo ʻa e ngaahi meʻá ni? ʻAki ʻa e fanongo ki hona Tokotaha-Ngaohí pea ʻaki ʻa e vakai ki heʻene ngaahi ngāué. Naʻe ʻoange ʻe he ʻOtuá kia ʻĀtama mo ʻIvi ʻa e ʻatamai poto ko ia naʻe fiemaʻu ki hono ngāueʻaki ʻo e meʻa kuó na ʻiló. Koeʻuhi naʻe fakatupu haohaoa kinaua, naʻe totonu ko ʻena hehema fakanatulá ia ke tapua mai ʻa e ngaahi ʻulungaanga ʻo e ʻOtuá ʻi he taimi te na fai ai ha ngaahi filí. Ko e moʻoni, te na tokanga ke fai ʻa e meʻa ko iá kapau naʻá na houngaʻia moʻoni ʻi he meʻa kuo fai ʻe he ʻOtuá maʻa kinauá pea mo na loto ke fakahōifuaʻi ia.​​—Senesi 1:26, 27; Sione 8:29.

 4. (a) Naʻe hanga ʻe he fekau ko ia naʻe ʻoange kia ʻĀtama mo ʻIvi ke ʻoua te na kai ʻa e fua ʻo e fuʻu ʻakau ʻe tahá ʻo toʻo ʻena tauʻatāiná? (e) Ko e hā naʻe feʻungamālie ai ʻa e fiemaʻu ko ení?

⁴ Naʻe totonu leva, ʻa hono fili ʻe he ʻOtuá ke siviʻi ʻena līʻoa kiate ia ko hona Tokotaha Foaki-Moʻuí mo ʻena loto-lelei ke nofo maʻu ʻi he ʻēlia kuó ne tuʻutuʻuní. Naʻe ʻoange ʻe Sihová kia ʻĀtama ʻa e fekau ko ení: “ʻE lelei ʻaupito hoʻo kai mei he ngahi ʻakau kehekehe ʻo e ngoue; ka ko e ʻAkau ʻo e ʻIlo-ʻo-e-lelei-mo-e-kovi ʻe ʻikai te ke kai mei ai: he ko e ʻaho te ke kai mei ai kuo pau te ke mate.” (Senesi 2:16, 17) Hili hono fakatupu ʻo ʻIví, naʻe toe fakahā foki kiate ia ʻa e lao ko ení. (Senesi 3:2, 3) Naʻe hanga ʻe he fakangatangata ko ení ʻo toʻo meiate kinaua ʻena tauʻatāiná? Halaʻatā. Naʻá na maʻu ʻa e meʻakai ifo hulu fau ʻi he faʻahinga kehekehe ke kai kae tuku hono kai ʻa e fua ʻo e fuʻu ʻakau ʻe taha ko iá. (Senesi 2:8, 9) Naʻe mātuʻaki feʻungamālie ʻa e totonu ke na ʻilo ko e foʻi māmaní ʻoku ʻa e ʻOtuá ia, koeʻuhí ko ia naʻá ne fakatupu iá. Ko ia naʻá ne maʻu ʻa e totonu ke faʻu ʻa e ngaahi lao ko ia ʻoku feʻungamālie mo ʻene taumuʻá pea mo ʻaonga ki he faʻahinga ʻo e tangatá.​—Sāme 24:1, 10.

 5. (a) Naʻe anga-fēfē fakamoleki ʻe ʻĀtama mo ʻIvi ʻa e tauʻatāina lāngilangiʻia naʻá na maʻú? (e) Ko e hā naʻe fetongiʻaki ʻa e tauʻatāina naʻe maʻu ʻe ʻĀtama mo ʻIví, pea kuo anga-fēfē hono uesia ai kitautolú?

⁵ Ka ko e hā ʻa e meʻa ia naʻe hokó? ʻI hono ueʻi ʻe ha taumuʻa siokita, naʻe hanga ai ʻe ha ʻāngelo ʻo ngāuehalaʻaki ʻene fili tauʻatāiná peá ne hoko ai ko Sētane, ʻa ia ko hono ʻuhingá ko e “Tokotaha-Talitekeʻi.” Naʻá ne kākaaʻi ʻa ʻIvi ʻaki ʻene fakapapauʻi ange kiate ia ha meʻa naʻe fehangahangai ia mo e finangalo ʻo e ʻOtuá. (Senesi 3:4, 5) Naʻe kau atu ʻa ʻĀtama kia ʻIvi ʻi hono maumauʻi ʻa e lao ʻa e ʻOtuá. ʻI heʻena ala ki he meʻa naʻe ʻikai ʻanauá, naʻá na fakamoleki ai ʻena tauʻatāina lāngilangiʻiá. Naʻe hoko leva ʻa angahala ko hona pule, pea hangē ko ia naʻe fakatokanga ki ai ʻa e ʻOtuá, naʻe faai pē ʻo muimui mai ʻa mate. Ko e tukufakaholo naʻá na tuku mai ki hona hakó ko e angahala​—ʻoku hā ia ʻi he hehema fakanatula ki he faihalá. Naʻe toe ʻomi ʻe he angahalá ʻa e ngaahi mele ʻo iku ai ki he mahamahaki, hoholo ʻo motuʻa, pea mate. Ko e hehema ki he faihalá, ʻo kanoniʻaki ʻa e tākiekina faka-Sētané, kuo tokonaki mai ai ʻa e sōsaieti fakaetangata ko hono hisitōliá ko e tāufehiʻa, faihia, fakamālohi, mo e ngaahi tau kuó ne toʻo ʻa e ngaahi moʻui lahi ʻe laui miliona. He fehangahangai moʻoni ē mo e tauʻatāina naʻe ʻoange ʻe he ʻOtuá ki he faʻahinga ʻo e tangatá ʻi he kamataʻangá!​—Teutalonome 32:4, 5; Siope 14:1, 2; Loma 5:12; Fakahā 12:9.

Feituʻu ʻe Malava ke Maʻu mei Ai ʻa e Tauʻatāiná

 6. (a) Ko fē ʻe lava ke maʻu mei ai ʻa e tauʻatāina moʻoní? (e) Ko e hā ʻa e faʻahinga tauʻatāina naʻe lea ʻa Sīsū fekauʻaki mo iá?

⁶ ʻI he vakai atu ki he ngaahi tuʻunga kovi ʻoku hoko ʻi he feituʻu kotoa pē he ʻaho ní, ʻoku ʻikai ha ofo ʻi he fakaʻamu ʻa e kakaí ki ha tauʻatāina lahi ange. Ka ʻe malava ke maʻu mei fē ʻa e tauʻatāina moʻoní? Naʻe pehē ʻe Sīsū: “Kapau te mou nofo maʻu ʻi heʻeku akonaki, ko ʻeku kau ako moʻoni kimoutolu; pea ʻe faifai pea mahino kiate kimoutolu ʻa e moʻoni, pea ʻe fakatauʻatāina ʻa kimoutolu ʻe he moʻoni.” (Sione 8:31, 32) Ko e tauʻatāina ko ení ʻoku ʻikai ko e faʻahinga tauʻatāina ia ʻoku ʻamanaki ki ai ʻa e tangatá ʻi he taimi ʻoku nau talitekeʻi ai ha pule ʻe taha pe ko ha founga-pule ʻe taha kae tali ʻa e tuʻunga ʻe tahá. ʻI hono kehé, ko e tauʻatāina ia ko ení ʻoku aʻu tonu ia ki he uho ʻo e ngaahi palopalema ʻo e faʻahinga ʻo e tangatá. Ko e meʻa naʻe lāulea ki ai ʻa Sīsuú ko e tauʻatāina mei he haʻisia ki he angahalá. (Sione 8:24, 34-​36) Ko ia ai, kapau ʻe hoko ha taha ko e ākonga moʻoni ʻa Sīsū Kalaisi, ʻokú ne hokosia ai ha liliu ʻoku ʻasi ʻi heʻene moʻuí, ko ha fakatauʻatāina!

 7. (a) ʻI he ʻuhinga fē ʻoku lava ai ke tau hoko ʻo tauʻatāina mei he angahalá he taimi ní? (e) Ke maʻu ʻa e tauʻatāina ko iá, ko e hā kuo pau ke tau faí?

⁷ ʻOku ʻikai ʻuhinga eni ia ko e kau Kalisitiane moʻoní he lolotongá ni ʻoku ʻikai ke nau kei ongoʻi ʻa e nunuʻa ʻo e hehema fakanatula ki he tōʻonga angahalaʻiá. Koeʻuhi kuo nau maʻu tukufakaholo ʻa e angahalá, kuo pau ke nau kei fāinga pē koeʻuhi ko ia. (Loma 7:21-​25) Kae kehe, kapau ʻe moʻui moʻoni ha taha ʻo fehoanaki mo e ngaahi akonaki ʻa Sīsuú, heʻikai te ne kei hoko ko ha pōpula ki he angahalá. Heʻikai kei hangē ʻa e angahalá kiate ia ko ha pule fakaaoaó ʻo ʻoange kiate ia ʻa e ngaahi fekau kuo pau ke ne talangofua kui pē ki ai. Heʻikai te ne fihia ʻi ha founga moʻui ʻoku taʻeʻiai ha taumuʻa mo tuku kiate ia ha konisēnisi halaia. Te ne maʻu ha konisēnisi maʻa ʻi he ʻao ʻo e ʻOtuá koeʻuhi kuo fakamolemoleʻi ʻa e ngaahi angahala ʻi he kuohilí makatuʻunga ʻi heʻene tui ki he feilaulau ʻa Kalaisí. ʻE feinga nai ʻa e ngaahi hehema angahalaʻiá ke tutui atu, ka ʻi heʻene fakafisi ke fai ki aí koeʻuhi ko ʻene manatuʻi ʻa e ngaahi akonaki maʻa ʻa Kalaisí, ʻokú ne fakahā ai ko e angahalá ʻoku ʻikai kei hoko ko hono pule.​—Loma 6:12-17.

 8. (a) Ko e hā ʻa e ngaahi tauʻatāina ʻoku hanga ʻe he Lotu faka-Kalisitiane moʻoní ʻo ʻomai kiate kitautolú? (e) ʻOku totonu ke fēfē ʻa e anga ʻetau fakakaukau fekauʻaki mo e ngaahi pule fakaemāmaní?

⁸ Fakakaukau atu ki he ngaahi tauʻatāina ʻoku tau maʻu ʻi he tuʻunga ko e kau Kalisitiané. Kuo fakatauʻatāinaʻi kitautolu mei he ngaahi nunuʻa ʻo e ʻū akonaki loí, mei he haʻisia ki he tui fakafaʻahikehé, pea mei he pōpula ki he angahalá. Ko e ngaahi moʻoni fakaofo fekauʻaki mo e tuʻunga ʻo e maté pea mo e toetuʻú kuo nau fakatauʻatāinaʻi kitautolu mei he manavahē taʻeʻuhinga ki he maté. Ko e ʻilo ko ia ʻe vavé ni ke fetongi ʻa e ngaahi founga-pule taʻehaohaoa fakaetangatá ʻaki ʻa e Puleʻanga māʻoniʻoni ʻo e ʻOtuá ʻokú ne fakatauʻatāinaʻi ai kitautolu mei he taʻehaʻamanakí. (Taniela 2:44; Mātiu 6:10) Kae kehe, ko e tauʻatāina peheé ʻoku ʻikai te ne fakatonuhiaʻi ai ʻe ia ʻa e taʻefakaʻapaʻapa ki he ngaahi mafai fakapuleʻangá mo ʻenau ngaahi laó.​—Taitusi 3:1, 2; 1 Pita 2:16, 17.

 9. (a) ʻOku anga-fēfē hono hanga ʻe Sihova ʻo tokoniʻi anga-ʻofa kitautolu ke maʻu ʻa e tuʻunga lahi taha ʻo e tauʻatāina ʻoku ala maʻu he taimí ni ki he faʻahinga ʻo e tangatá? (e) ʻE malava fēfē ke tau fai ha ngaahi fili fakapotopoto?

⁹ ʻOku ʻikai hanga ʻe Sihova ʻo tuku mai ke tau fekumi ʻaki ʻa e ʻahiʻahiʻi pea ʻilo ʻa e founga lelei taha ke moʻui aí. ʻOkú ne ʻafioʻi ʻa e anga hotau ngaohí, ʻa e meʻa ʻokú ne ʻomai kiate kitautolu ʻa e fiemālie moʻoní, pea mo e meʻa ʻe ʻaonga taʻengata kiate kitautolú. ʻOkú ne ʻafioʻi ʻa e ngaahi fakakaukau mo e ʻulungaanga ʻe lava ke ne maumauʻi ha vahaʻangatae ʻo ha taha mo Ia pea mo e kaungā faʻahinga ʻo e tangatá, pea aʻu nai ki hano taʻofi ʻa e tokotaha ko iá mei he māmani foʻoú. ʻI he anga-ʻofa, ʻoku fakahā mai ai ʻe Sihova kiate kitautolu ʻa e ngaahi meʻa kotoa ko ení fakafou ʻi he Tohitapú mo ʻene kautaha hāmaí. (Maake 13:10; Kaletia 5:19-​23; 1 Timote 1:12, 13) Pea ko e meʻa leva ia ʻa kitautolu ke ngāueʻaki ʻetau tauʻatāina foaki faka-ʻOtua ke filí ke fakapapauʻi pe ʻe anga-fēfē haʻatau fakafeangai. ʻI he ʻikai hangē ko ʻĀtamá, kapau kuo tau tukulotoa ʻa e meʻa ʻoku tala mai ʻe he Tohitapú kiate kitautolú, te tau fai ʻa e ngaahi fili fakapotopoto. Te tau fakahā ai ko ʻetau tokanga tefito ʻi he moʻuí ko ha vahaʻangatae lelei mo Sihova.

Fiemaʻu ha Faʻahinga Tauʻatāina ʻe Taha

10. Ko e hā ʻa e faʻahinga tauʻatāina kuo kakapa ki ai ʻa e niʻihi ko e Kau Fakamoʻoni ʻa Sihova?

¹⁰ ʻI he taimi ki he taimi ko e kau talavou ʻe niʻihi ʻa ia ko e Kau Fakamoʻoni ʻa Sihova​—pea pehē ki he niʻihi ʻoku ʻikai ke nau kei talavou​—te nau ongoʻi nai ʻoku nau fiemaʻu ha toe faʻahinga tauʻatāina ʻe taha. ʻE hā ngali fakaholomamata nai ʻa e māmaní, pea ko e lahi ange ʻenau fakakaukau fekauʻaki mo iá, ko e mālohi ange ia ʻenau holi ke fai ʻa e ngaahi meʻa taʻefakakalisitiane ʻoku manakoa ʻi he māmaní. Ko e faʻahinga peheé ʻoku ʻikai nai ke nau palani ke ngāuehalaʻaki ʻa e faitoʻo kona tapú, inu ʻo fuʻu hulú, pe fai feʻauakí. Ka kuo nau kamata ke feohi mo e niʻihi ʻoku ʻikai ko e kau Kalisitiane moʻoni, ko ʻenau loto ke tali lelei kinautolu ʻe he faʻahingá ni. ʻE aʻu nai ʻo nau kamata ke faʻifaʻitaki ki heʻenau leá mo ʻenau tōʻongá.​—3 Sione 11.

11. ʻOku haʻu mei fē he taimi ʻe niʻihi ʻa e fakatauele ke faihalá?

¹¹ ʻI he taimi ʻe niʻihi ko e fakatauele ke fai ʻa e tōʻonga taʻefakakalisitiané ko e haʻu ia mei ha taha ʻokú ne taukaveʻi ʻokú ne tauhi ʻa Sihova. Naʻe moʻoni eni fekauʻaki mo e niʻihi ʻo e muʻaki kau Kalisitiané, pea ko e meʻa tatau ʻe lava ke hoko ʻi hotau ʻahó ni. Ko e kakai peheé ʻoku nau faʻa loto ke fai ʻa e ngaahi meʻa ʻoku nau ongoʻi te ne ʻomi kiate kinautolu ha fiefia, ka ko e ngaahi meʻa eni ia ʻoku fepaki mo e ngaahi lao ʻa e ʻOtuá. ʻOku nau fakaʻaiʻai ʻa e niʻihi kehé ke nau maʻu ha “fiefia.” ʻOku nau ‘talaʻofa ha tauʻataina, ʻosi ko e koto popula kinautou ki he ʻauha.’—2 Pita 2:19.

12. Ko e hā ʻa e ngaahi nunuʻa fakamamahi ʻo e tōʻonga ʻoku fehangahangai mo e ngaahi lao mo e ngaahi tefitoʻi moʻoni ʻa e ʻOtuá?

¹² Ko e fua ʻo e tauʻatāina lau peheé ʻoku kovi maʻu pē, koeʻuhí he ʻoku ʻuhinga ia ko e talangataʻa ki he ngaahi lao ʻa e ʻOtuá. Ko e fakatātaá, ko e fehokotaki fakasino taʻetotonú ʻe lava ke iku atu ia ki he mamahi fakaeongo, mahaki, mate, feitama ʻikai fiemaʻu, pea pehē nai ki ha movete ʻa e nofo malí. (1 Kolinito 6:18; 1 Tesalonaika 4:3-8) Ko e ngāuehalaʻaki ʻo e faitoʻo kona tapú ʻoku malava ke ne fakatupunga ʻa e ʻita vave, heheu e leá, palai e sió, ninimo, faingataʻa ke mānava, ongo-hala, mo e mate. ʻE lava ke iku ki hono maʻunimā, ʻa ia ʻe taki atu nai ki he faihia ke tauhiʻaki ʻa e tōʻonga ko iá. ʻOku pehē tofu pē mo e ngaahi nunuʻa ʻoku haʻu mei hono ngāuehalaʻaki ʻa e ʻolokaholó. (Palovepi 23:29-35) Ko e faʻahinga ko ia ʻoku nau kau atu ki he ʻulungaanga peheé te nau fakakaukau nai ʻoku nau tauʻatāina, ka te nau toki ʻilo kuo fuʻu tōmui he kuo nau hoko ko e kau pōpula kia angahala. Pea hono ʻikai ko ha pule anga-fakamamahi ka ko angahala! Ko e fakaʻuhinga ʻi he meʻa ko iá he taimi ní ʻe lava ke tokoni ia ke maluʻi kitautolu fekauʻaki mo ha hoko ha meʻa pehē.​—Kaletia 6:7, 8.

Feituʻu ʻOku Kamata mei Ai ʻa e Ngaahi Palopalemá

13. (a) ʻOku anga-fēfē hono faʻa langaʻi ʻa e ngaahi holi ko ia ʻoku taki atu ki he ngaahi palopalemá? (e) Ke mahino pe ko e hā ʻa e “ngaahi feohi koví,” ko e fakakaukau ʻa hai ʻoku tau fiemaʻú? (f) ʻI hoʻo tali ʻa e ngaahi fehuʻi ʻoku fakahokohoko ʻi he palakalafi 13, fakamamafaʻi ʻa e anga ʻo e vakai ʻa Sihová.

¹³ Fakakaukau ki he feituʻu ʻoku faʻa kamata mei ai ʻa e ngaahi palopalemá. ʻOku fakamatala ʻe he Tohitapú: “ʻOku ʻahiʻahiʻi ʻa e tangata taki taha he tohoaki ia ʻe heʻene holi aʻana, mo taki ʻaki ha mounu. Faifai pea tuʻituʻia ʻa e holi ko ia, ʻo ne fanauʻi ha angahala: pea ko e angahala ko ia, ʻo ka kakato, ʻoku ne faʻeleʻi ʻa e mate.” (Semisi 1:14, 15) ʻOku anga-fēfē hono langaʻi ʻa e holí? ʻAki ʻa e meʻa ʻoku hū ki he ʻatamaí. ʻOku faʻa hoko eni tuʻunga ʻi he feohi mo e kakai ʻoku ʻikai ke nau ngāueʻaki ʻa e ngaahi tefitoʻi moʻoni faka-Tohitapú. Ko e moʻoni, ʻoku tau ʻilo kotoa ʻoku totonu ke tau fakaʻehiʻehi mei he “feohi koví.” (1 Kolinito 15:33, NW) Ka ko fē ʻa e ngaahi feohi ʻoku koví? ʻOku anga-fēfē vakai ʻa Sihova ki he meʻa ko iá? Ko e fakaʻuhinga ʻi he ngaahi fehuʻi ʻoku hoko haké pea sio ki he ngaahi potutohi ʻoku fakahaá ʻoku totonu ke ne tokoniʻi kitautolu ke tau aʻu ki he ngaahi fakamulituku totonú.

ʻOku hanga ʻe he moʻoniʻi meʻa ko ia ʻo e pehē ʻoku hā ngali lāngilangiʻia ha kakai ʻe niʻihi ke ʻuhinga ai ko e ngaahi feohi lelei kinautolu? (Senesi 34:1, 2, 18, 19, NW)

ʻE malava ʻe heʻenau fetalanoaʻakí, mahalo ʻi heʻenau ngaahi fakakatá, ʻo fakahaaʻi pe ʻoku totonu ke tau feohi vāofi mo kinautolu? (Efeso 5:1, 3 [Efeso 5:3, 4, PM])

ʻOku anga-fēfē ʻa e ongoʻi ʻa Sihová kapau ʻoku tau fili ke feohi fekoekoeʻi mo e kakai ʻoku ʻikai ke nau ʻofa kiate iá? (2 Kalonikali 19:1, 2)

Neongo te tau ngāue fakataha nai pe ʻalu fakataha ki he akó mo e kakai ʻoku ʻikai ke nau ʻinasi ʻi heʻetau tuí, ko e hā ʻoku fiemaʻu ai kiate kitautolu ke tokangá? (1 Pita 4:3, 4)

Ko e mamata ko ia ʻi he ngaahi televīsoné mo e ngaahi heleʻuhilá, ʻo ngāueʻaki ʻa e ʻinitanetí, pea mo hono lau ʻa e ngaahi tohí, ngaahi makasiní, pea mo e ʻū nusipepá, ko e ngaahi founga ia ʻo e feohi mo e niʻihi kehé. Ko e hā ʻa e ngaahi fakamatala mei he ngaahi maʻuʻanga fakamatala peheé ʻoku fiemaʻu ke tau tokanga fekauʻaki mo iá? (Palovepi 3:31; Aisea 8:19; Efeso 4:17-​19)

Ko e hā ʻoku hanga ʻe heʻetau fili ko ia ʻetau ngaahi feohí ʻo tala kia Sihova pe ko e faʻahinga kakai fēfē kitautolú? (Sāme 26:1, 4, 5; 97:10)

14. Ko e hā ʻa e tauʻatāina maʻongoʻonga ʻoku fakatatali mai mei muʻa ki he faʻahinga ko ia ʻoku nau ngāueʻaki faitōnunga ʻa e akonaki ʻo e Folofola ʻa e ʻOtuá he taimi ní?

¹⁴ ʻOku fakatatali mai ʻi muʻa pē ʻiate kitautolu ʻa e māmani foʻou ʻa e ʻOtuá. Fakafou ʻi he founga-pule ʻa e Puleʻanga fakahēvani ʻo e ʻOtuá, ʻe fakatauʻatāinaʻi ai ʻa e faʻahinga ʻo e tangatá mei he tākiekina ʻa Sētané mo e fokotuʻutuʻu kotoa ʻo ʻene ngaahi meʻa fulikivanú. ʻE faai atu pē, ʻo toʻo atu ʻa e nunuʻa kotoa pē ʻo e angahalá mei he faʻahinga talangofua ʻo e tangatá, ʻo iku ai ki he haohaoa ʻo e ʻatamaí mo e sinó, koeʻuhí ka tau malava ke maʻu ʻa e moʻui taʻengata ʻi he Palataisí. Ko e tauʻatāina ko ia ʻoku fehoanaki kakato mo e “laumālie ʻo Sihová” ʻe faai atu pē ʻo maʻu ia ʻe he meʻa fakatupu kotoa pē. (2 Kolinito 3:17, NW) ʻE ʻuhinga lelei nai ke tuku ke mole kotoa ia koeʻuhí ko e taʻetokaʻi ʻa e akonaki ʻa e Folofola ʻa e ʻOtuá he taimi ní? ʻI hono ngāueʻaki fakapotopoto ʻetau tauʻatāina faka-Kalisitiané he ʻaho ní, ʻofa ke tau fakahā māʻalaʻala kotoa ko e meʻa ʻoku tau fiemaʻu moʻoní ko e “tauʻatāina lāngilangiʻia ʻo e fānau ʻa e ʻOtuá.”​—Loma 8:21, NW.

Fetalanoaʻaki Fakamanatu

• Ko e hā ʻa e faʻahinga tauʻatāina naʻe maʻu ʻe he muʻaki ongo meʻa fakaetangatá? ʻOku fēfē hono fakahoa ia mo e meʻa ʻoku hokosia ʻe he faʻahinga ʻo e tangatá he taimi ní?

• Ko e hā ʻa e tauʻatāina ʻoku maʻu ʻe he kau Kalisitiane moʻoní? ʻOku anga-fēfē ʻa e fehangahangai eni mo e meʻa ʻoku lau ʻe he māmaní ko e tauʻatāiná?

• Ko e hā ʻoku mātuʻaki mahuʻinga ai ke fakaʻehiʻehi mei he ngaahi feohi koví? ʻI he ʻikai hangē ko ʻĀtamá, ko e ngaahi fili ʻa hai ki he meʻa ʻoku koví ʻoku totonu ke tau talí?

[Fakatātā ʻi he peesi 46]

ʻOku fakatokanga mai ʻa e Folofola ʻa e ʻOtuá: “ʻOua naʻa takihalaʻi koe. Ko e ngaahi feohi koví ʻokú ne maumauʻi ʻa e ngaahi ʻulungaanga leleí”